Gifbrouers

Never argue with a fool, onlookers may not be able to tell the difference

Mark Twain

 Die gevleuelde woorde word by die dag vir my nog meer waar.  Oom Mark was ‘n slim man.

Ek hou daarvan om my oog te gooi oor die briewe wat in koerante en tydskrifte land.  Ek spoedlees ook dikwels die kommentare wat op ‘n brief of ‘n artikel volg.  Ek kan net na my asem snak en my oë rol.  Soms oorweeg ek dit sommer ernstig om ‘n voorstaander vir ongeletterheid te word.  Ek weet nie om dit is om myself van sulke snert te beveilig of om te keer dat mense sê wat hulle dink/voel nie.  Ja, toemaar.  Ek bly nog steeds ‘n voorstaander van vryheid van spraak. 

Ek weet presies wat aannames is, maar ek voel veilig om te aanvaar dat die gemiddelde Beeld briefskrywer / kommentaar leweraar nie elke paar maande verander het nie.  Dus dieselfde mense wat bek gerek het oor die Afrikaner volksvader (ja, die een wat die kultuur van buite egtelike verhoudings begin het), rek nou bekke oor hulle president.  Terwyl daar destyds gereeld vertel was dat ‘n man se bedsake sy eie is, word daar nou bloed geëis.  Niemand het nou ‘n saak oor wat as privaat beskou kan word nie. 

Goed en wel:  die een is ‘n sanger (wat graag ‘n landsleier wil wees) en die ander ‘n leier (wat graag ‘n sanger wil wees).  Ek laat ook nie die voormalige Springbok buite die prentjie nie.  Tog voel dit vir my nog steeds asof daar met verskillende meetstokke gemeet word. 

Dieselfde groep mense het beslisde menings oor die president se vurige volgeling wat self eendag in die Uniegebou wil sit.  Verskeie wenkbroue was seker gelig oor “you should not question your elders.”  Dieselfde mense wat pak slae wil uitdeel as ‘n kind ‘n mening lug wat van hulle eie verskil.  Dan is respek vir ouer mense nie onderhandelbaar nie.  Selfs ‘n 24 jarige, wat jare lank al ‘n volwassene is, word vertel om haar plek te ken. 

Wat my verstom is hoe ‘n kwessie van wit en swart by elke denkbare saak ingesleep kan word.  Al gaan dit oor Tannie Johanna se geheime resep vir Gemmerkoekies.  In dieselfde asem word die regering blameer dat hulle ras by alles insleep. 

Het julle al opgemerk hoe hulle mekaar kan opsweep?  Ek dink nou aan ‘n spesifieke geval (kry nie die link nie) waar ‘n man hard probeer om mense te ontmoedig om die wêreldbeker by te woon.  Hy knip artikels uit en pos dit aan sportklubs en verenigings.  Onder luide aanmoediging van die meerderheid mense wat op sy brief gereageer het?  Cut off your nose to spite your face?  Wie gaan werklik die prys betaal as die wêreldbeker misluk?  Ek dink die gemiddelde belasting betaler is ‘n goeie antwoord.  Die gemiddelde kommentator is seer bewus is hy belasting betaal en die hele land daarop dra. 

Is die gemiddelde Afrikaner werklik ‘n tweegat bitterbek wat die ergste verwag met alles en geen hoop het nie?  Of is dit dalk hier die geval van die pot wat die ketel swart noem?

Breinvasbrand:  Wanneer was die dagkoerant, Beeld, geloots?

Breinlosbrand:  Gypsies, tramps and thieves. 

Nuusbrokkies

Daniel Thulare, hooflandros van Daveyton Benoni, praat bolle as hy reken dat iemand wat kan bewys dat hy keer op keer ‘n afspraak probeer maak het en misluk het, kan rondry sonder ‘n lisensie.  Die minister van vervoer sê dit moedig wetteloosheid aan.  Ander landrosse reken dat so ‘n uitspraak sal beteken dat die hof die persoon se padvaardigheid goedkeur, wat nie sal kan gebeur nie.  Die hof is nie ‘n toetssentrum nie. 

Dr. Eon Sonnekus, forensiese kriminoloog, reken dat Cézanne Visser eerder gemeenskapdiens opgelê word.  Blykbaar het sy genoeg berou getoon, al het sy nie een van haar slagoffers om verskoning gevra nie.  Hy stel voor dat sy huisarres kry of 8 ure ‘n maand gemeenskapdiens in die dieretuin.  Huisarres sal 5 ure inkopietyd op ‘n Saterdag en 5 ure kerk/familietyd op ‘n Sondag insluit.  Sy sal ook 60 ure ‘n week kan werk.  Ek reken dit is baie optimisties van Visser se regspan.  Dit klink baie na my lewe en ek het nie eers iets verkeerds gedoen nie. 

Streeklanddros Ronnie Rambau en mnr. Estene Willemse, streekhofaanklaer, het in Mussina in die hof verskyn nadat hulle glo omkoopgeld aanvaar het om sake reg te beinvloed.  Wel, duidelik is daar nog hoop vir die Rand.

‘n Babaseuntjie is in ‘n appelboks gevind in Durban.  ‘n Veiligheidswag het die reaksiespan ontbied, nadat hy ‘n vrou gewaar het in die vullis krap.  Sy het weggekom.  Die reaksie span is in die steeg in, terwyl hulle na moontlike gewapende verdagtes gesoek het.  Hulle het ‘n geluid in die vullisblik gehoor en op Apple – wat hulle die baba noem – afgekom. 

‘n 8 maande oue baba is in Randburg gevind, tussen vuil doeke en ander ander gemors.  Die baba was erg aangerand, hy het ondermeer 11 frakture, rooi wonde aan sy gesig en sigaretbrandmerke aan sy voetjies gehad.  Sy ma en stiefpa is gearresteer.  Die baba is blykbaar al in Oktober gevind.

Die staat draai geen doekies om dat hulle poog om die enigste eienaars van vuurwapens in die toekoms te wees nie.  Nathi Mthethwa, minister van polisie, reken dat hoe minder wettige vuurwapens in omloop is, hoe moeiliker sal misdadigers dit kan steel en vervolgens misdade daarmee kan pleeg.  Ek wonder nou net oor die groot poel onwettige wapens daar buite.  En natuurlik wat die staat se motiewe met die ontwapening is. 

Ten slotte:  ‘n Skoolhoof is in die sop nadat hy leerlinge bevel het om ‘n uitgeteerde boerboel in die bosse te gaan weggooi.  Die DBV beskou dit as ernstige diermishandeling en wil met alle mag en krag hof toe daarmee.  Die dier moes van kant gemaak word.  Ek het ‘n paar vrae.  Wie is die eienaar van die hond?  Hoekom is die hond so uitgeteer en swak?  Moes iemand nie die DBV lank voor die tyd gebel het nie?  Die weggooi is amper die minste, al kon die skoolhoof ‘n baie beter voorbeeld gestel het.

Aanplaknood

Wee, julle.  Ek kan boeke vol skryf oor die bedelkultuur wat ons in Suid-Afrika het.  Ek het begrip vir nood, maar aanplaknood maak my ‘n bietjie die duiwel in.  Daardie arme maergat, vuil kinders op elke straathoek.  Hoekom het hulle dieselfde ritueel.  Die vrolike waai en die treurige vee oor die maag.  Dalk omdat hulle almal op dieselfde manier geleer is om vir die “baas” te bedel.  Terwyl jy nou so laag moet daal om te bedel, hoekom dit vir ‘n baas doen?  Dieselfde geld vir almal met hulle hartseer plakkate. 

Wat my keer op keer kort voor ‘n beroerte aanval laat omdraai is die wat gestremdes help bedel.  Die man / vrou is blind en enige aap kan sien hy/sy is blind.  Daar is darem hierdie een siel wat sy/haar hele dag sal afstaan om die blinde te help om ‘n nodige sentjie te kry.  Die blinde (of verminkte) sal darem nie nog omgery word saam met al sy ellende nie.  Ek wonder net oor hoeveel blinde-siende paartjie hulle deesdae tot die straat moet wend?  En wat is die siende se kommissie.

Helaas is dit nie die ergste nie.  Deesdae is die in ding mos om ‘n erg verkreupelde in die middel van ‘n besige pad te sit.  Plat op die grond, waar hulle beslis leer om opreg te bid.  Dit is al genade as hulle nie binne die eerste 5 minute maalvleis wil word nie.  Hulle sit daar en hoop dat die motoriste hulle gaan toegooi onder goud (of note as dit meer prakties is). 

Ek gee toe baie van hulle is erg gestrem.  Ek gee eerder my koninkryk vir Kreupelsorg om hulle te help as om die praktyk aan te moedig.  Ek wil beslis nie die monster wees wat ‘n erg gestremde mens sonder genade dood ry nie.  Al sit hulle op ‘n baie gevaarlike plek. 

Nou die dag het ek iets gesien wat ek eintlik moes verfilm het.  Die karre het kwaai deur die loop van ‘n Saterdagmiddag afgeneem.  Die arme kreupele het met groot moeite en vertoon gekruip na die naaste straathoek.  Karre moes maar versigtig vir hom uitswaai.  Toe al die karre om die hoek verdwyn, spring hy op en gaan met sy vriende aan die dans.  ’n Wonderwerk – reg voor my oë.  Ek het julle mos gesê, die mense leer opreg bid.   

Dit was nie die eerste keer nie, ek het al gesien hoe ‘n “bekende” sy eie rolstoel stoot.  Dit bring ‘n mens by die dilemma.  ‘n Mens wil graag ‘n minderbevoorregte help, maar hoe onderskei jy tussen broodnood en aangeplakte nood?  Is daar waarde daarin om ‘n individuele bedelaar te help?  Kom geld wat jy aan organisasies gee by die armes uit?

Hoe siek moet jy wees om jouself gestremd te hou om geld uit ander mense te kry?  Is daar hoop vir jou as jy ander dwing om te bedel sodat jy jouself kan verryk?

Sal ons ooit die bedelkultuur kan bekamp?

Breinvasbrand:  Voltooi die Cher liedjie:  Gypsies, . . .

Breinlosbrand:  Selene was reg met Portugal.

Nuusbrokkies

Ek is nie regtig lus vir die nuus vandag nie.  Ek is seker niemand is nie.

Philemon Wakashe, direkteur-generaal van kuns en kultuur reken dat die regering geen taal, insluitende Afrikaans, sal kan ontwikkel om op dieselfde vlak as Engels te kom nie.  Die regering het blykbaar nie die nodige hulpbronne daaroor nie.  Cerneels Lourens, Vereniging van Regslui vir Afrikaans probeer tans die regering dwing om die Nasionale Taalwet te aanvaar. 

Hannetjie Venter (79) moes 4 km ver stap nadat aanvallers haar seun, Fanie Venter (60), op sy plaas gedood het.  Hulle het wapens gesoek en was weg met geld en al die selfone.  Hannetjie Venter kan nie self bestuur nie.  Fanie Venter is altyd gewapen, maar hy is geskiet voordat hy dit kon gebruik.  Intussen meen TLU-SA dat dit onmoontlik is vir boere om sonder vuurwapens klaar te kom.  Mog wees, maar lyk my plaasaanvalle is amper soos ‘n wapen Take Away. 

Simply Slim staar eise in die gesig nadat hulle die publiek mislei het met hulle aktiewe bestandele.  Daar is ook ernstige kommer oor die effek wat dit moontlik op mense se gesondheid gehad het.  Aldus adv. Johann Engelbrecht, SC – wat Barbie in haar hofsaak verteenwordig.  Van die os op die jas – hulle wag op ‘n verklaring van een van Prinsloo se seksslawe in Rusland in die hoop dat dit as versagting kan tel. 

Die grondwethof het hulle stem dik gemaak oor die fooie wat regslui vir hulle werk vra.  Volgens die hof moet die mense wat die rekeninge hersien onthou dat die beginsel van redelike vergoeding toegestaan moet word vir werk wat noodsaaklik is en wat behoorlik gedoen is geld.  Advokate kan bv nie 61 uur eis vir ‘n dokument wat 61 bladsye lank is nie.

Sigwaarde van Wyn

Die Franse het ‘n gesegde:

“In water one sees one’s own face; But in wine one beholds the heart of another”

Dit klink nogal half onsinnig, tot ‘n mens effens daaroor na dink. 

Die effekte wat drank op ‘n persoon het, verskil van mens tot mens.  Sommige vrouens raak terte en ander raak tjankerig.  Baie mans raak aggressief en ander raak net stil.  Hoekom?  Drank ontneem ‘n mens van jou inhibisies.  Dit is ‘n algemene feit.  Stroop dit jou dalk van al jou voorgee en aangeleerde maniertjies?  Ons het al van te vore daaroor gepraat dat mense graag die rol speel van iemand wat hulle wil wees, maar nie noodwendig is nie.

Wanneer die inhibisies weggeneem word, wat bly oor?  Die ware jy, sonder vertoon? 

Is dit ‘n goeie ding of ‘n slegte ding?

Is daar enige waarheid in die gesegde of het iemand met ‘n glasie te veel dit kwyt geraak?

Breinvasbrand:  Watter land is die hoofverskaffer van kurk?

Breinlosbrand:  Anna was reg met die Apie.

Oplossing 020

Algemene Kennis

1. Sonono Khoza 
2. Vier 
3. Sam Tsukudu
4. Om in graad 12 toegelaat en weer aangestel te word as onderhoofseun nadat hy die skool verlaat het na prefek ontgroening. 
5. Simply Slim

Uilspieël 

1. Colin Farrell – hy het nog nie James Bond vertolk nie. 
2. Amatis is die geboorte steen vir die maand van Februarie en die Irsis die blom vir Febuarie. Leeu is die sterreteken vir Jul / Aug maand
3. Spoedboot – Spoedboot is enjinaangedrewe terwyl die ander twee met roei aangedryf word
4. Peru – is ‘n land in Suid-Amerika en die ander is eilande in die Karibiese see.
5. Holding Out for a Hero – Bonnie Tyler lied en die ander is Laura Branigan se liedjies

Couples Theraphy

Diamant & Ring
Mes & Vurk
Elizabeth & Phillip
Sop & Pons
Pretoria & Jakarandas

Liedjiepret

1. You’re so vain – Carly Simon
2. Love of the common people - Paul Young
3. Say a little prayer – Aretha Franklin

Nommer kopkrap

Staan oor

Toorwoorde

1.  Om onsin of kaf te praat / om te klets
2. Jou Onbaatsugtige Opoffering vir Liefdadigheid
3. Om belangstelling te begin toon in die teenoorgestelde geslag
4. pronk; praal; snoef
5. Staan oor

Xena: 36 – Jippie, ek wen

‘n Herinnering

Chariots of Fire 020

Algemene Kennis

1. Wie is die moeder van Jacob Zuma se 20ste kind?
2. Vir hoeveel Oscars is District 9 benoem?
3. Wie is die Engel van Bedfordview?
4. Hoekom het Edwin Botha die onderwysdepartament hof toe gesleep?
5. Watter verslankingmiddel is vandeesweek deur die Medisyne Beheer Raad van die mark onttrek?

Uilspieël 

1. Colin Farrell; Timothy Dalton; Roger Moore
2. Ametis; Iris; Leo
3. Kajak; Spoedboot; Vlot
4. Bahama; Peru; Jamaika
5. Gloria; Self Control; Holding Out for a Hero

Couples Theraphy

(Plaas die woorde in pare bymekaar.  Elke regte paar kry een punt.)

Diamant; Vurk; Elizabeth; Pons; Ring;  Mes; Sop;  Jakarandas; Phillip; Pretoria

Liedjiepret

 Mense en hulle dinge.  Jy moet maar lag, want daar is geen salf te smeer nie.  Jy is so vol van jouself, dit loop skoon oor.  Mens kan dit bottel en verkoop, maar gelukkig is daar geen mark daarvoor nie.  Die liefde van die eenvoudige mense is nie ‘n maklike begrip nie.  Ek sal maar ‘n klein bid moet bid. 

Nommer kopkrap

3; 5;  _; _;  21

Toorwoorde

1. Basel?
2. Jool?
3. Rooi Hakskene?
4. (Soos ‘n blokkieraaisel) Spog (5 letters)?
5. KETAIKLO

Die heksie sit en droom

Soms kort ‘n heksie boomtyd.  Sy is mos nie ‘n ratkas nie nie, maar net somtyds hak haar ratte in haar kop vas. :shock:   Hoe kan ‘n heksie se kop ratte hê?    Ek het seker weer my bolletjies iewers verloor!    Hie Hie Hie!  En dit was glad nie eers seer nie.    Ek werk nog purrend, anders as Blommie as sy fiets ‘n bolletjie verloor.

Wag, nou het ek weer vergeet wat ek wou sê nie.  My draad is weg!    Moenie vir my lag nie, dit gebeur net met pragtige, mooiste heksies.  GRRRR!  Die is daardie ou perse!    Sy dink sy is slim, maar ek is ook slim.  Omdat sy grasblou van jaloesie is, wil sy net hê dat ek moet breek.  Daarom stuur sy haar agtertoe maatjies om my draad en bolletjies en goed te steel.    Sy wil haarself net so mooi maak soos ek.  Gmf!

Sy kan maar probeer.  My ouma Heldina het my altyd gevertel dat ‘n heksie is van binne af mooi.  Daarom is ek mooi, ek het ‘n pragtige dermpie.  Die ou perse het ‘n verrotte pens.  Sy sal tog nooit mooi wees nie.  Al steel sy my op.  Dit gaan haar niks help nie.  Buitendien sal ek myself weer regtoor.

“Karplaks!!”

Eina!!  Ek het ‘n bietjie gevergeet dat ek in die boom gesit het.    Hoekom het ek nou weer boom geklim?

Breinvasbrand:  Wie het in die mik van ‘n moerbyboom gedroom?

Breinlosbrand:  Freek was reg met Wupperdal.

‘n Handvol vere

Elke diertjie moet ‘n plesiertjie hê.  Myne op skool was om my Wiskunde juffrou te treiter.  Ek het nie ‘n rede daarvoor gehad nie, inteendeel, ek was mal oor haar.  Niemand anders het die durf gehad om haar gas te gee nie.  Soos altyd was ek meer as bereid om die gaping te vul.

Eendag, ek was seker so st 9, is ek weer goed op dreef om my slim stories te verkoop.  Ek kan nie meer onthou waaroor nie.  Sy het nogal baie geamuseerd na my vreeslike dreigemente geluister.  Ek en sy het geweet dat ek beslis geen planne gehad het om dit uit te voer nie. 

Aan die einde van my relaas vertel sy my ongeërgd:  “Weet jy, Xena, as nonsens praat vere was, was jy ‘n hoender.”  Ek het gemaak-verontwaardig opgespring en gedreig om my ma te gaan vertel.  Weereens het dit haar nie ‘n blou duit geskeel nie. 

Net mooi wat ek nodig gehad het om regtig my ma te gaan vertel.  Natuurlik het sy nie met die juffrou saam gestem nie.  Sy het om die waarheid te sê gedink die juffrou praat snert. 

“Ag man, gaan vertel jy vir Juffrou ek sê:  As nonsens praat vere was, was jy n donskombers.”

Die aap is uit die mou, vir almal wat dit nou nog nie weet nie: Xena Phoenix is ‘n ou bekende, selferkende bullshitter.  Met ‘n goeie skoot temperament vir ekstra skop.

Breinvasbrand:  Waar het die berghaan ‘n veer laat val?

Breinlosbrand:  As ek reg onthou, was Emily Hobhouse so genoem.