Gausous

Hallo Maatjies!!!

Ek het ook so ‘n bietjie met die Gausous gary!!    Ek is ‘n heksie wat weet van Gausous. 

Eerste moet ‘n heksie ‘n grootboekkaart koop om op die Gausous te ry.    Jy voer die masjien geld en dan spoeg dit vir jou ‘n kaart uit.    Heksies kan nie daarmee roomys koop nie, jy kan net op die Gausous ry.    Simpel kaart!!

Wanneer die Gausous kom moet jy vinnig inspring.  Vra maar vir Merriegriet, die gausous het vir weggeroei toe sy nie vinnig genoeg was nie.    Binne moet jy net mooi op jou stoel sit.    Ekke het gedink ek gaan afval as dit so vinnig roei, omdat daar nie veiligheidstoutjies is nie.    Gelukkig het ek nie, anders sou ek my prokstituut op hulle moes sit.

Ek het gedink die Gausous gaan soos ‘n vliegmasjien wees.    Dat dit nie gaan stop langs die pad om te gaan piepie nie.    Maar die Gausous stop baie langs die pad.    Dan klim daar maatjies op en af.

Maar ek wil nie snaakswees nie, maar die Gausous lyk net soos ‘n trein!    Die mense dink seker dat alle heksies dom is, maar ek is ‘n slim heks.

Tata maatjies

 

Tevrede se gat

Daar is mense wat sê dat net tevrede ‘n te voor aan kan hê.  Duidelik het iemand nie die saak behoorlik deurdink nie. 

Ken julle die gevoel van punt in die wind?  Daardie punt wat dit doodeenvoudig nat nie kan beter nie, selfs al sou jy die Powerball van oor ‘n R100 miljoen net daar wen?  Enige iemand met ‘n tikseltjie lewenservaring weet dat dit die punt is wat die rooi vlaggies gehys word.  En dit het niks te maak met ‘n wiel wat draai nie.  Wanneer jy “on top of the world” is, val jy soos ‘n rots na onder. 

Dit is soos wanneer jy jouself op die skouer klop vir werk wat goed gedoen is, dan verander die blerrie reëls of verwagtinge.  Jy dink dalk jy het jou kinders goed groot gemaak en die volgende dag word een gearresteer vir verkragting.  Jy dink jy gaan nou ‘n neseier bou wat beny kan word, dan vreet onvoorsiene uitgawes jou laaste sent op.  Daardie kontrak wat jy tot perfeksie afgerond het, word aan iemand anders toegeken. 

Blykbaar is die mens maar gemaak om te sukkel.  Anders is daar seker ‘n fyn lyn tussen tevrede en selfvoldaan.  Die olimpiese leuse is seker ‘n wysheid.  As jy meer en beter gaan soek, gaan jy nooit tevrede wees nie.  Jy gaan altyd klim en nooit ‘n bopunt kan kry waar jy af kan neuk nie. 

Of praat ek nou snert?  Ken julle daardie gevoel wat so vinnig in ‘n gemors verander?

Breinvasbrand:  In Alanis Morrisette se liedjie, Ironic, wat is ironies aan “meeting the man of your dreams’?

Breinlosbrand:  Gerda was eerste reg met Donovan Moodley

Koerantbrokkies

Donovan Moodley (31) het gister aansoek gedoen vir ‘n herverhoor op die moord van Leigh Matthews.  Blykbaar het Piet Byleveld, ondersoekbeampte in die saak hom gedwing om alles te beken ongeag of dit die waarheid was.  Zaais van Zyl, staatsaanklaer: 
“Hy het al drie happe van die kersie gevat. Daar is niks meer oor om te byt nie. Nou is dit ewe skielik ’n nuwe kersie.”

Heyneke Meyer is glo die nuwe Bok-afrigter, maar blykbaar weier die Bulle om hom te laat gaan.  Niemand is al amptelik aangestel nie, maar die Bulle het ‘n verklaring uitgereik wat sê hulle keur nie Saru se versoek goed om Meyer beskikbaar te stel nie.  Dit blyk ook dat Meyer hom nie gaan laat boelie nie.

Daar is ‘n groot bohaai oor ‘n geldinsamelings konsert wat vir Christa Steyn se mediese behandeling gehou is.  Steyn het kanker.  37 kunstenaars het gratis op getree by die gratis lokaal wat Hoër Meisieskool Bloemhof beskikbaar gestel het.  Maniac Music wat die konsert georganiseer het, het twee derdes van die wins self gehou en net ‘n derde aan Steyn oor betaal. 

Diewe het glo ‘n groter aptyt vir Hilux en Fortuner-modelle.  Juis omdat dit so gesog is, het Gautrein stasies spesiale parkering vir die karre. 

Mishke Roux (6) het 3 van haar tone op ‘n roltrap in aManzimtoti verloor.  Iemand het glo die noodknoppie van die roltrap gedruk.  Mishke was agter haar ma toe haar linkervoet het tussen die kant van ’n trap van die roltrap en die glas vasgesit.  Sy het ook haar linker sy beseer.  Swastika Juggernath, woordvoerder van die winkelsentrum, kruip agter die waarskuwing dat geen kaalvoete op die roltrap mag wees nie weg. 

Mediese fondse word glo deur rykes gemelk.  Dit is glo omdat hulle by terapeute boer en eis vir goed wat nie regtig medies van aard is nie.  Discovery-syfers toon pasiënte van die noordelike voorstede van Johannesburg het spraakterapeute en ou­dioloë gemiddeld meer as 17 keer per jaar gesien, teenoor die res van die lede se minder as vyf besoeke.  Dit gebeur blykbaar op versoek van skole.  Die voordeel was voorheen onbeperk, maar Discovery het nou ‘n limiet opgesit. 

Sisanda Ndaza (13) is na 13 jaar met haar ouers verenig.  Sy is glo toe sy 6 maande oud was deur ‘n familielid ontvoer.  Hulle het na die voorval in 1998 dit by die polisie aangemeld, maar die saak is nooit geondersoek nie.  Hulle het aanvaar sy is vir moetie vermoor, maar toe loop hulle verlede jaar die ontvoerders raak.  Die vrou is deur die gemeenskap aangekeer en vir die polisie gegee.  Sy het erken sy het die kind ‘n paar maande later in die veld gelos.  Sy is later in pleegsorg gesit.  DNS toetse het bepaal dat sy wel aan die Ndaza’s behoort en die hof het beveel dat sy terug geplaas moet word. 

Lebogang Mokhatsane (10) het in ‘n vuil, onbewaakte swembad verdrink.  Twee kinders van ongeveer 4 jaar oud het by die rolbalklub kom hulp soek.  ‘n Tuinier moes tolk en toe het hulle gehoor ‘n kind het gegly en in die swembad geval.  By die swembad, het hulle borrels op die oppervlakte gesien.  Nie een van die polisielede wat opdaag kon swem nie en die brandweer moes ontbied word.  Die seun se lyk is later uitgehaal.

Slagofferregte

Ek hoor vanoggend op die radio dat Leigh Matthews se pa ‘n beroep op die regering doen dat slagoffers se regte ook in ag geneem moet word.  Die media het hom die stem gegee waaroor baie mense al baie lank brom.  Die persepsie dat die oortreder se regte nie net swaarder weeg as die man op straat nie, maar dat die oortreder se regte bo die van die slagoffer is. 

Die blote reg dat daar ‘n slagoffer was, wys dat iemand se regte sonder rede van hulle ontneem is.  Daar word ‘n saak gemaak en die skuldige word dalk vasgetrek.  Op die punt word daar basies vergeet dat daar ‘n slagoffer is.  Die oortreder neem nou die vloer, met aansienlik meer regte as waarop die slagoffer op staat kan maak.  Die staat moet namens die slagoffer bewys dat hy skuldig is.  In die proses word daar in elk geval meer van die slagoffer se regte ontneem, terwyl daar baie seker gemaak word die oortreder se regte is onaantasbaar.   

‘n Goeie voorbeeld is dalk verkragtingsake.  Een of ander stadium word die slagoffer op die getuiebank geplaas.  Sy word nie net gedwing om die hele storie hardop te vertel nie.  Haar karakter word ook aan flarde geruk.  Alles word in die stryd gewerp om haar te breek, om te wys dat sy nie ‘n geloofwaardige getuie is nie.  Ongeag daar gronde vir die aantygings is of nie.  Sou enige iets anders ‘n soortgelyke aanval loots, sal sy waarskynlik ‘n siviele eis kan instel.  Dit is nie ‘n luukse wat sy in die hof het nie.  Sy kan ‘n goedkoop slet genoem word, maar die oortreder het haar net na bewering verkrag.  Sy is skuldig sonder ‘n verhoor, hy moet skuldig bewys word. 

Mens moet onthou dat daar goeie redes is hoekom beskuldiges regte moet hê.  Aan die ander kant moet die regte ’n sekere gewig dra.  Om een of ander rede word die oortreder se regte swaarder geweeg.  Hy kan nog te na gekom word, ongeag van die feit dat hy reeds iemand (na bewering) te na gekom het.  Iemand wie se regte ontneem is, kan dit nie terug kry nie, al kan die oortreder wel gestraf word of gedwing word tot vergoeding.  Dit beteken vir die slagoffer niks.  Nee, ek jok, dit beteken vir die slagoffer dat hy/sy nie saak maak nie. 

Oortreders se regte word dus beskerm ten koste van die slagoffers s’n.  In geen wêreld kan dit regverdig wees nie.  Die vraag is hoe word die skaal gedraai?  Hoe word die slagoffer beskerm en vergoed? 

Breinvasbrand:  Wie is gevonnis op die die moord van Leigh Matthews?

Breinlosbrand:  Selene was reg met   Paper Lace

Koerantbrokkies

Die grootste sonstorm sedert 2005 het gister om 16:18 plaas gevind.  Partikels van die son het die aarde teen 1 400 km/sek tot 2 200 km/sek getref.  Dit mag dalk die begin van ‘n besige sonsiklus wees en kan moontlik ‘n effek op elektromagnetiese velde hê. 

Alice Jogessar (69) is dood nadat ‘n trok haar getref het.  ‘n 8t vragmotor het gistermiddag op die N3 verloor en het deur die Liberty Midlands Mall in Pietermaritzburg geploeg.  Die trok het in ABSA tot stilstand gekom, maar het 5 motors in die pad getref.  Die trok het glo heen en weer oor die N3 beweeg, voertuie verbygesteek en op die geel streep gery voordat dit die pad verlaat het.  Die bestuurder en sy mededrywer is beseer.  Daar gaan ‘n saak van strafbare manslag en roekelose of nalatige bestuur ondersoek word. 

Twee laerskool kinders is deur die Makgawerivier saamgesleep toe hulle gisteroggend die rivier naby Sun City oorgesteek het.  Die rivier is in vloed.  Die soektog deur polisieduikers moes ook afgelas word omdat die rivier te sterk was.  In ‘n ander voorval moes 13 kinders van ‘n taxi gered word, toe hulle ook deur water meegesleur is in Rustenburg.  In dieselfde omgewing het ‘n pa sy kinders uit die motor gered toe dit ook meegesleur is.  Krokodille in die Blyde rivier vergemoeilik polisie duikers se werk. 

Johan Geyer is gister in die rug geskiet terwyl hy kos gemaak het in sy huis in Brooklyn Pretoria.  ‘n Buurman, Jaco La Cock, het gehoor toe Geyer se vrou en seun skree.  Hy het oorgery en die rowers gesien.  Omdat hy nie sy selfoon by hom gehad het nie, het hy by die huis ingehardloop en dit gaan haal.  Toe hy weer uitkom, het hy gesien die rotte het ‘n geweer.  Hulle het met sy Pajero gevlug.  Hy het Tracker in kennis gestel wat die voertuig gevolg het.  Die polisie het die rotte in Atterbury gekry en hulle het die Pajero by Hoërskool Menlopark gelos.  Hulle het daarna ‘n Mercedez probeer kaap en die eienaar is in die arm geskiet.  Hulle het toe weggekom. 

­André Gouws se prokureur, Anel Jacobs, voer aan dat die polisie se saak in die Chanélle Henning gegrond is op leuens van twee dwelmverslaafdes.  Sy voer ondermeer aan dat Gouws as hy ‘n moord beplan het, nie sy foon op luidspreker in ‘n openbare plek sou sit nie.  Die hof het ook gister beslis dat Benjamin Henning se foto nie meer in koerante gepubliseer mag word nie.   

Die staat skuld mediese verskaffers meer as R2 miljard.  Hulle beplan om glo R802 miljoen die maand te betaal, maar dit is ongeveer net 40% van hulle skuld.  R108 miljoen gaan aan die lede van SAMED betaal word.  Volengs Tanya Vogt, bedryfshoof van Samed, skuld die departament van gesondheid aan hulle lede R346 miljoen.  Van hulle lede is al betaal, maar die meeste het nog nie ‘n sent gesien nie. 

Die tropiese sikloon, Funso, gaan vakansieoorde aan die kus van Mosambiek se Inhambane-provinsie tref.  Die sikloon is ‘n kategorie 4 en bereik glo snelhede van tussen 211 km/h en 249 km/h.  Dit blyk nie enige gevaar vir Suid-Afrika in te hou nie. 

Dit gaan omtrent R1 miljoen kos om ‘n kind wat nou in gr 1 in ‘n privaat skool is, deur skool en universiteit te kry.  As die kind in staatskole is, gaan dit ongeveer R133 536 vir laerskool en R192 860 vir hoërskool kos.  Privaat gaan dit R267 072 vir laerskool en R540 008 vir hoërskool kos.  Wanneer dié kind universiteit toe gaan, sal hy sowat R335 130 vir klasgeld, R157 708 vir verblyf en R44 356 vir boeke nodig hê. Dit is in totaal sowat R537 194.  As dit nou die geboortebeperking is nie. 

Die plaaslike bande bedryf sleep die regering hof toe omdat hulle nie oor Redisa genader is nie.  Redisa is ‘n band herwinningsplek wat gefinansier gaan word uit ‘n moontlike R2-36 / kg  bandheffing.  Die bedryf beplan blykbaar al 12 jaar lank aan ‘n soortgelyke South African Tyre Recycling Process Company (SATRP) op aandrang van die regering.  Dit het hulle vanjaar al R8 miljoen gekos aan met die goedkeuring van die Mededingingskommissie en die nasionale tesourie.  In Mei was die minister nog tevrede en dit is sonder rede in November afgekeur.

Bang Jan, Dooi Jan of Onnodige Held

Een ding wat ek al lankal geleer het, is dat mense hulle self Google.  Mense Google hulle geliefdes.  Wat ek dalk dink ‘n geregverdige galbraak sessie is, is dalk net die strooi wat nodig is om ‘n kameel se rug te laat knak.  Lang storie wat basies beteken dat ek persoonlike aanvalle op iemand se menswees of karakter beperk.  Gewoonlik.  Hangaf wie dit is en wat hulle gemaak het.  Ja, ek weet ek het dubbel standaarde.

Mens kan egter dink wat jy wil, al mag jy nie sê wat jy wil nie.  Die een berig wat gister in die nuus was, hou my aan die dink.  Dit is hoe ‘n jong man onder ‘n bed gaan skuil terwyl ou mense aangerand word.  Ek wil-wil hom iets noem, maar probeer ook regverdig wees.  Kanse is dat hy waarskynlik vandag ook ‘n kandidaat vir ‘n begrafnis sou wees as hy wel gaan help het.  ‘n Dapper toekomstige wat dood is, beteken nie veel nie.  Mag waar wees, maar daardie woordjie wil maar net nie rede in sien nie.  Ek wonder ook of sy verloofde altyd in die hitte van die oomblik sy wysheid gaan insien.

Ek hou oor die algemeen nie van macho-crap nie.  As ‘n man altyd wil wys hoe manlik hy is, wys hy eintlik hoe pateties die is.  Dit is dalk oulik in ‘n seuntjie van 5, maar wanneer jy Oros vir drank verruil is dit bekotsingswaardig.  Aan die ander kant hou vrouens tog ook van manlike (wel opgevoede mans).  Wie wil nou met iemand trou wat wanneer daar vreemde geluide is, gaan wegkruip.   Of wanneer die deure oopstaan agter jou gaan wegkruip wanneer daar in die huis gegaan word.  Soos ma’s altyd die versorgers van die gesin gaan bly, gaan pa’s seker die beskermers bly.

Deesdae is mense, met goeie rede, bang om hulle neuse in ander se sake te steek.  Wanneer iemand op straat beroof word, maak mense pad vir die rower om weg te kom.  As bure geskiet word, word daar iemand ontbied, maar daar gaan nie sommer gaan help word nie.  Heldwees kan maklik vandag doodwees.  Dit is presies die rede hoekom misdaad vandag hooggety vier.  Jou opinie van die saak gaan verskil as die die vrou is wat aangeval word en die buurvrou.  Die aangevalde gaan die held buurman ewig dankbaar wees, die buurvrou gaan hom waarskynlik sitkamer toe stuur.  Seker nie almal nie, persoonlik weet ek nie of ek veel respek vir iemand sal hê wat sy rug op iemand in lewensgevaar draai nie.

Maar soos reeds gesê:  ek het dubbel standaarde.  Ek het toevallig gister op TV iets gekyk van ‘n man wat volgens sy gewete opgetree het.  Dit het ongelukkig van hom ‘n verraaier gemaak en almal was opsoek na sy bloed.  Dit het onder meer gelei daartoe dat sy gesin geintimideer, geboelie en sommer na die weermag se frustrasie moes verduur.  Hy was ‘n held, maar danksy dit was sy gesin nou slagoffers.  Sy vrou loop hom wel later raak en is baie bly om te sien hy lewe.  Hy kry dus ‘n warm reaksie.  Ek moet egter sê dat as dit my man was, het ek my skuldig gemaak aan huishoudelike geweld.  Die Engelse spousal abuse werk eintlik net beter hier.

Hoe voel julle hieroor?  Wanneer kan ‘n man (of vrou) ‘n held wees en wanneer is dit beter om weg te kyk?

Breinvasbrand:  Wie het ‘n treffer gehad met Billy don’t be a Hero?

Breinlosbrand:  Olga was reg met munchausen by proxy.

Koerantbrokkies

Frans van der Linden (57) het aan sy wonde beswyk nadat hy op sy dogter se aanstaande skoonma se plaas geskiet is.  Die eienaar was nie tuis nie.  Van der Linden en sy vrou, Elizabeth (52), was juis in Brits om te help met die finale reëlings vir hulle dogter, Yolandi van der Linden (27), se troue die naweek met Gerhard Coetzee (26).  Die aanval het Sondag 03:00 gebeur.   Coetzee het gesien hoe Van der Linden in die gang met ‘n knuppel geslaan word.  Hy het toe onder die bed en sy swanger verloofde in die kas gaan wegkruip.  Mev van der Linden is ook aangerand.  Hulle het eers uitgekom toe Van der Linden na hulle kamer gekom het en gehoor het of hulle beseer is.  Hy het op hulle bed gelê en bloei.  Laat ek maar eerder stilbly.  Bure het die polise, veiligheidsdienste en ambulans ontbied.

Sedert 1952 is dit tradisie dat die huidige Meesterskampioen die kampioene dinee se spyskaart kies.  Van jaar is dit Charl Schwartzel en hy wil boerewors maak en self braai.  Hy reken nogal sy hand gaan seer wees na die gebraaiery en spog dat fillet eintlik sy spesialiteit is.  Trevor Immelman het na sy sege in 2008, bobotie, sosaties en melktert voorgesit.

Josie Raath, omroeper van Radiokansel en regisseur het die naweek selfmoord gepleeg.  Hy het glo ‘n selfmoordpakt met Christa Petersen Johnson, dogter van Roelf Petersen, uitvoerende hoof van die stasie, gehad, maar sy het kop uitgetrek en weier om dit te bespreek.  Raath reken die stasie het Jesus vir hom dood gemaak.  Sy laaste sms was:  “Sorrie vir almal. Ek’s klaar met die lewe, moet nie verder bel asb,” wat hy vir geliefdes gestuur het.  Hy het vermoedelik ‘n oordosis pille geneem en sy lyk is Sondagoggend gekry. 

André du Toit (52) is so erg deur die son verbrand dat hy in die hospitaal opgeneem moes word.  Du Toit het gaan visvang en het glo ‘n tent-afdak onder ’n boom teenaan die water opgeslaan en hy het heeltyd ’n breërandhoed gedra.  Dit het nie juis veel gedoen om die weerkaatsing van die water te stuit nie.  Hy het selfs sy tong en keel verbrand.  Hy is ‘n paar dae later in ‘n hospitaal opgeneem omdat hy swart kolle en blase op sy vel ontwikkel het.  Hy het blykbaar 3de graadse brandwonde en word daagliks in ’n ysbad geskraap om infeksie te keer.

Christiaan Lamprecht (22) word nog steeds aangehou en sal vir evaluasie gestuur word.  Hy is onlangs betrap met hondjies wat hy afgeslag en gevries het.  Blykbaar nie die eerste keer wat hy so iets doen nie.  ‘n Distrikgeneesheer het bepaal dat hy wel verstaan wat die aanklagte teen hom is, maar dat hy vir psigiatriese behandeling behoort te gaan. 

Chris Claassen (58), eertydse wenner van die program Flinkdink, het verlede Sondag spoorloos in die Hartebeespoort omgewing verdwyn.  Claassen is ‘n sistiese fibrose lyer en het 13 jaar gelede weens kommer oor misdaad na Australië geëmigreer.  Hy was glo nie te gelukkig daar nie.  Sy laaste woorde voor sy verdwyning was:  “Ek is steeds hartstogtelik ’n Boer.” ’n Spesiale taakspan bestaande uit lede van die polisiedienste, die Bergklimklub van Suid-Afrika, honde-hanteerders van Rustenburg en Potchefstroom, plaaslike buurtwagte en helikopters kon hom sedert verlede week nog nie opspoor nie. 

Zuma dink alweer hy is almagtig.  Hy het die afgelope paar maande 3 keer die weermag ontplooi sonder om die Nasionale Vergadering (NV) daarvan in kennis te stel.  Die weermag was glo ontplooi om die polisie met COP 17 en die feestyd bygestaan.  Verder het Zuma hulle vir 2 weke DRK toe gestuur.  Volgens David Maynier, DA-LP:  “Dié reël is om ’n goeie rede daar, dit is daar om uitvoerende oorloë te voorkom, waar die SANW met slegs die goedkeuring van ’n klein handjievol van die uitvoerende gesag van die land ontplooi word. ’n Mens wil nie wakker word en skielik hoor die weermag staan voor die hekke van Luanda en niemand het daarvan geweet nie.”  Pierre de Vos reken dat dit ‘n situasie kan skep waar gewone burgers deur soldate geskiet word. 

 Anita Jacobs van Niekerk (62) se keel is met ‘n skeermeslem oop gekerf.  Sy is die koster van die Afrikaanse Protestantse kerk en is Saterdagaand in haar huis deur 5 rotte aangeval.  Haar 4 jarige kleinseun was by haar.  Hulle het haar handsak met R300 gesteel en hulle is in hegtenis geneem toe die handsak by hulle gekry is.  Van Niekerk is in ‘n bedenklike toestand in die hospitaal, haar stembande moet weer geheg word en sy sal moontlik nie weer normaal kan sluk nie.

Ten slotte:  Petrol kan volgende maand met tot 34 c toeneem.  Een van die dae ry karre op polse kou.

Siek, Siek

Om siek te speel is nie juis iets nuuts nie.   Kleuters doen dit wanneer hulle nie lus is vir skool nie.  Hulle span dit selfs as ‘n verskoning in as hulle nie besonders lus vir seker takies nie.   Kinders doen dit vir skool.  Studente is geneig om dit vir toetse in te span waarvoor hulle nie lus is nie.  Dan betree mense die arbeidersmark en skielik word daar siekverlof ingespan vir trek, lang naweke of sommer net omdat mense nie lus is nie.  Baie mense vertaal die maksimum siek verlof van 6 weke in 3 jaar as ‘n addisionele 2 weke ‘n jaar.

Dit is niks nuuts nie en dit is geen geheim nie.  Wel, die enigste geheim is diegene wat siek pleit inderwaarheid dink mense glo hulle is siek.  Diarree is immers ‘n baie gemaklike sieke.  Kom in een dag, waai in een dag en niemand is lus om oor die besonderhede uit te vra nie.  Behalwe nou as die persoon dom genoeg is om in ‘n baas vas te loop.  Jy kan bittermoeilik inkopies doen, krieket kyk of rondloop as jy nie jou stert van die toilet af kan lig nie.

Hierdie kamma-siekdae kos nogal ‘n aardige bedraggie jaarliks.  Baie besighede begin mense blatant omkoop om die siekerigheid te vermy.  Dit geskiet soms met ‘n bonussie as jy nie siekverlof geëis het nie of in sommige gevalle ‘n geskenkbewys.  Hoe goed dit werk, sal ek nou nie kan sê nie.  My ervaring is in elk geval dat so ‘n siekverlof wat nie te gereeld gebeur word nie, gewoonlik in goeie gesindheid aanvaar word.  As iemand nou aspris hulle 2 weke ekstra verlof wil inwerk nie, gaan daar gefrons word.

Die teenoorgestelde geld ook.  Mense wat soos lyke lyk en dan gaan werk.  Dit lyk of hulle enige oomblik kan omkap, maar as jy sien sit hulle kiertsregop by hulle werkstasie.  Al kos dit hulle dood of steek ‘n paar mense aan wat drasties hoop op siek verlof.  Die ywer kan ‘n mens waardeer tot op die punt waar dit bloot stupid is.

Dan kry ‘n mens die wat bloot net siek in die kop is en die siekheid kan siekverlof net mooi niks aandoen nie.  Daar is hoeveel mense wat met skete en pyne rondloop net vir simpatie.  Sou die simpatie begin taan, raak die pyne en skete erger.  Wat eers pateties is, is wanneer hulle ‘n dokter van die laste probeer oortuig.  Toegegee, die klompie wil nie op ‘n hopie sit en hulle self bejammer nie.  Hulle soek toeskouers en daag dus eerder op vir werk.

Daar is dan die ma’s wat hulle kinders siek maak / hou vir een of ander vreemde rede.  Dit is ‘n beskryfde toestand, maar dit is siek op talle vlakke.  Hoe mense hulle gewete so kan verkrag om mense te manipuleer, weet ek nie.

Laaste maar nie die minste nie is die Shaiks en Selebi’s van die lewe.  Hoe Selebi so vinnig so dodelik siek kon word na sy appél misluk het, weet ek nie.  Steve Biko is seker net ‘n meer aangename tronk as Sun City.  Miskien pak sy niere regtig op, maar niemand sal my kan oortuig dat Shaik iets meer as ‘n taai klap makeer het nie.  Dat hy boonop daarmee weggekom het, is om van te kots.  Hy is seker die “Siek Pleit Koning”.

Het jy al ooit siek gepleit sonder ‘n rede?  Wat dink jy van mense wat dit doen?

Breinvasbrand:  Wat word die toestand genoem waar ma’s hulle kinders moedswillig siek maak?

Breinlosbrand:  Olga was eerste reg met “The Body”.

Koerantbrokkies

‘n Eerstejaar-ingenieurstudent van Pukke het blykbaar die naweek tydens die vrugtefees in ‘n swembad verdrink.  Sy lyk is twee uur later gekry en niemand het gesien hoe hy verdrink het nie.  Die vrugtefees is ’n jaarlikse pret-geleentheid waar seniors en eerstejaars saam waatlemoen eet en mekaar daarmee op die Fanie du Toit-sportterrein smeer.  Die koshuise is daarna koshuis vir koshuis toegelaat om in die swembad af te spoel.  Studente wat nie kan swem nie is gevra om eerder nie in die swembad te gaan nie.  Sy koshuis was 23ste en nog 4 koshuise het daarna gevolg.  Dit is eers by die koshuis ontdek dat hy weg is en 2 senior studente het hom in die swembad gesien. 

 Michael Stenger, wat by Sound Systems Nelspruit gewerk het, is tydens ‘n rooftog as ‘n menslike skild gebruik.  Hy is toe vermoedelik per ongeluk deur Charles Loram, sy werkgewer, doodgeskiet.  Twee van die rotte is glo ook gewond.  Sound Systems word bedryf van ‘n plot op die Baberton pad waar Loram ook werk.  Hy het gesien dat ‘n rooi BMW opdaag en hoe die mans klapmusse opsit.  Hy het sy rewolwer geneem en is na die kantoor waar Stenger gewerk het.  Stenger het toe reeds met die rowers gestoei.  Loram het op hulle geskiet.  Toe sy koeëls klaar was, het hy sy 9mm gaan haal en van sy kamer verder op hulle geskiet.  Die elektriese hek was toe en die 4 rotte te voet gevlug het.  Die polisie het Loram se wapens in beslag geneem en een van die geskiete rotte is gearresteer toe hy by ‘n hospitaal gekla het sy BMW is gekaap. 

Die DA dring daarop aan dat Cassel Mathale as premier van Limpopo in die pad gesteek word.  Volgens James Lorimer, DA-LP, behoort Mathale te bedank.  As hy weier, moet die ANC hom dwing om te gaan. As hy (die ANC) dit nie doen nie, beteken dit dat hy sy (Mathale se) klepto-administrasie stilweg goedkeur, of anders nie die erns van die situasie begryp nie.” Volgens Lorimer het Mathale LUR’e in kontrakte gedwing waarby maatskappye met wie hy bevriend was, kontrakte kon kry en het hy almal afgedank wat oor wanbestuur gekla het.  Geen wonder die hoofnar voel so tuis daar nie. 

Volgens Lindiwe Sisulu, minister van verdediging, was Zuma se reis na New York met TWEE skaduvliegtuie, die laaste.  Dit was alles glo net omdat die Inkwazi onlangs gediens was.  Alles net sodat Zuma dalk nie te laat vir sy VF vergadering is nie.  Ek wonder hoekom kan hy (en veral ander ministers) nie kommersieel vlieg nie?

Woolworths het geweier dat Red Gekko Design and Branding Solutions hulle pryse met ander winkels kan vergelyk.  Die verteenwoordigers van Red Gekko Design and Branding Solutions is gevra om die winkel in Fourways te verlaat.  Volgens Viccy Baker, het Woolies se bestuur haar toestemming geweier, maar sy het voortgegaan omdat hulle geen regsredes kon gee van hoekom nie.  Zyda Rylands, Woolworths se besturende direkteur van voedsel reken Woolworths se produkte is dikwels nie regstreeks vergelykbaar met dié van ander kettingwinkels nie.  

Plakkers is besig om sebras en koedoes te verdryf op Wallmannstal wat hulle onwettig beset.  Die grond is aan Wallmannstal Communal Property Association (WPCA) gegee nadat dit glo onwetting in 1968 deur die regering onteien is.  Nou verkoop ene Richard Makhene, oud-polisiekaptein, erwe vir R400 aan die publiek.  Hy het geen reg om dit te doen nie.  WPCA wil die grond vir ekotoerisme gebruik.  Afriforum gaan regshulp aan die slagoffers verskaf

Jong Modelle

Haar naam is Kaia Gerber, sy is een van die eerste reeks modelle vir die Young Versace reeks.  Haar ma was op haar dag die top van al die Supermodelle gewees.  As daar iemand is wat die modewêreld ken, is dit seker Cindy Crawford.  En sy is na bewering so trots soos ‘n pou oor haar 10 jarige dogter se debuut.

Kom ek wees regverdig.  Young Versace se teikenmark is tot ouderdom 12.  Natuurlik gaan hulle modelle jonger as 12 moet wees.  Dit is dalk nie my idee van wat ‘n laerskoolkind behoort te dra nie, maar dit is waarskynlik meer die kleur as enige iets anders wat my nie aanstaan nie.  Sy lyk nie vir my 10 nie (sy word 11 vanjaar), maar dalk is dit met die grimering te doen.  Ek het al gewone soet kinders gesien wie se houding meer uitlokkend is op foto’s.

Aan die ander kant, begin modelle deesdae al hoe jonger.  Toe Crawford in 1986 planke toe was, was sy 20 jaar oud gewees en het sy haar studies as ‘n chemiese ingenieur opgeskop.  Oud, oor-die-muur-amper en oorgekwalifiseerd (sy het skool klaargemaak!).  Elle Macpherson was 17 en Naomi Cambell was 16.  Volgens Wikipedia was Charlize 16, tog verbeel ek my 14 was nader aan die waarheid.  As ek reg verstaan was Kate Moss 14 en Linda Evangelista maar net 13.  Dit was nog in die goeie ou dae.

Ek verbeel my ek het onlangs ‘n bohaai raak gelees van ‘n meisie wat ook maar laerskool ouderdom is.  Sy het naam gemaak met pruilende mondjie en gewaagde posisies.  Die girls wat deesdae as sekskatjies uitgebeeld word, is nie eers die wettige ouderdom nie.  Hulle is nog nie eers tieners wat wild kan pleit nie.  Die modelbase laat dit toe en soek dit selfs.  Die ouers gee blykbaar nie om nie of die geld wat so ‘n snotkop maak is genoeg om alle omgee te verloor.

Professioneel modelspeel sit nie in elkeen se broek nie.  Dit is blykbaar blerrie harde werk en nie heeltemal so prettig soos dit mag lyk nie.  Swemklere word byvoorbeeld in die winter gefotografeer, wanneer jasse self gewoonlik truie soek.  Dit is blykbaar ‘n geval van uithou, vasbyt en deurdruk – al is dit teen die natuur.  Dit is om ‘n gewig te handaf ten alle koste, al kos dit jou dood.  Dit is blykbaar ook ‘n wêreld van drank, dwelms en seks.  Is dit die wêreld van ‘n langbeen meisiekind wat nog bates moet ontwikkel en haarself moet leer ontdek?  Wat is die prys wat sy moet betaal?

Dit is waarskynlik eerder die uitsondering as die reël van alle meisies wat droom om modelle te raak.  Dit is nogal gewild om kinders van jongs af vir modelklasse in te skryf.  Dit help glo met hulle postuur en selfvertroue.  Niks fout daarmee nie.  Persoonlik kan ek deur die dak spring as ‘n kleuter haar bors uitstoot vir ‘n foto.  Dit is nie ouderdom geskik nie.  Kleuters moet nie geleer word om uitlokkend te wees nie.

Persoonlik is dit vir my walglik, ander dink weer dit is cute.

Hoe voel julle?  Wat behoort die minimum ouderdom vir loopplank modelle te wees (nou nie vir kinderklere nie)?  Is die geld wat hulle kry die prys werd?  Behoort model klasse kleintjies te leer om soos wafferse modelle te poseer?

Breinvasbrand:  Wat was Elle Macpherson se bynaam?

Breinlosbrand:  Olga was reg met 1948