So dom soos ‘n voël

20 02 2017

e03e79d70a2f4b1adefa0b1cfbea9a87

Julle onthou mos nog vir Lispiek?  Ek daag mos eendag doodonskuldig by die huis op en daar het die dom heks vir haarself ‘n perd gekry.  Die perd wat enige ander mens ‘n kat sal noem.  Blykbaar het sy gekwalifiseer vir die kat en ek moet maar net met kathare op en in alles lewe.  Laviga het natuurlik ‘n perd gekry wat genoeg hare vir ‘n dieretuin het.  Siestog, die hare maak seker op vir die gebrek aan ‘n gesig.

Wel, ek was seker nie so ontwaardig oor die kat soos ek moes wees nie.  Ek het maar net gehoop Lispiek (Laviga het die naam gekies) hou die heks darem uit die moeilikheid.  Dit is nou as sy die merrie van ‘n heks kan kry om te luister.  Verder is Lispiek baie ouliker as die hare wat sy rondstrooi.

Sy maak seker dat ‘n mens nie eensaam op die toilet is nie.  Sy sus jou prrrrr-prrrr aan die slaap.  Sy maak seker dat jy elke dag ‘n bietjie oefening kry en kom vertel jou alles wat die bure aanvang.  Boonop hou sy ‘n oog oor die tuinier en vertel hom goed sy fortuin as hy skeef trap.

Lispiek hou van maatjies – mits hulle nie kinders of mans is nie.  Hulle moet ook nie rook nie.  Sy hou ook nie van tannies nie.  Man, om eerlik te wees, is haar verskoning vir ‘n neus heel puntenerig oor van wie sy eintlik hou.  Nie dat sy ‘n snob is nie.  Sy het al vir haar ‘n padda heel geduldig gehelp om by die huis uit te kom.  Nogal liggies met die pootjie op die regte pad gehou.  Sy het ook al ure lank met ‘n mot wat amper groter as sy is gespeel.  Sy het hom (lewendig) buite gevat toe sy ma geroep het.  Meestal vermaak sy haarself met die voëltjies.

Ai!

Sy kan mooi met die maatjies speel, maar dit raak nogal ‘n probleem as die maatjies haar in die gesig vroetel.  Onthou, Lispiek verwyder enige mens van uit haar sit plek.  Opgee is teen haar beginsel.  So wanneer sy nou ‘n voëltjie huistoe bring en die voëltjie daag haar uit om te stoei . . . kom ons sê maar net Lispiek doen nie tweede plek nie.  Lispiek is ook nie die een wat beseer word nie.

Ons het noual die voëltjies vertel om nie met die kat te speel nie.  Om hulle te help, het ons  vir haar ‘n groot klokkie laat dra sodat hulle weet as sy kom.  Natuurlik red ons die voëltjie wanneer ons kan.  Mens is seker die oorlewendes het hulle storie gaan deel met die res?  Het hulle egter hulle les geleer?

Aikona!

Nee, gister kry ek mos die dom goed (heks verskoon die slag) wat al om die kat paradeer.  Sy kan kies en keur.

Nou wonder ek of voëls maar ‘n selfmoord neiging het?  Geniet hulle Lispiek se geselskap?  Of is hulle te dom om te leef?





EEUW uit beginsel

30 10 2015

Die mens bly maar ‘n fasinerende dier.

Ek moet dalk begin deur te noem dat ek baie lief is vir kos.  Hoewel daar sekere goed is waaraan ek nie my mond sal sit nie, is ek nie te puntenerig nie.  Daar moet regtig iets groots fout wees voordat ek die kos sal wegstoot.  Dit blyk soms dat my standaarde in die geval ver te kort skiet.

Die meeste mense het hulle afkeur / misnoeë / afgryse al tot ‘n fyn kuns vervolmaak.  Ek let dit altyd in ‘n vliegtuig op.  Hulle sal die kos neem en dan ondersoek asof dit ‘n petribak vol bakterieë is.  Volgende sal die vurk geneem word en iets heel wantrouig beproef word.  Ek het nog nie iemand gesien wat die kos summier uitspoeg nie of selfs ‘n gesig trek nie.  ‘n Paar dapper siele sal dit selfs ‘n hap of 3 verder neem.  Die bakkie word dan met die grootste minagting weggestoot.  Die volgende dis word beproef en die proses word herhaal tot alles op die skinkbordjie afgekeur is.

Ek sal myself verstout en sê dat hulle van die begin af geweet het dat hulle die kos gaan haat.  Hoekom dit dan enigsins neem?  Dit bly vir my ‘n groot sonde om met kos te mors.

Dan weer, ek verwys na vliegtuigkos in my voorbeeld.  Iets wat blykbaar altyd sleg is, al het ek persoonlik nog nooit rede gehad om te kla nie.  Blykbaar het die minister van vervoer jare terug die parlement gevra of hulle wil vlieg of vreet?  Dit was in antwoord op ‘n klagte van die swak kos wat die destydse SAL voorgesit het.

Dit is egter vir my treffend dat die dramatjie nie net op vliegtuie afspeel nie.  Ek het al dikwels gesien hoe iemand iets in ‘n supermark, stalletjie of self in ‘n restaurant sal bestel en dit dan sou behandel asof dit mens-brein-en-niere-sop is.  Asof dit blote bediening daarvan (al het hulle dit self bestel) hulle beledig het en nie hulle tonge waardig is nie.

Hoe voel julle oor vliegtuigkos?  Is my standaarde besonders laag of is mense net bederf?

Breinvasbrand:  Voltooi:  Die kool is die sous ______________!

Breinlosbrand:  Daniël Bezuidenhout was reg.  Duitsland se naskoolse studies is gratis vir alle Europeuse studente en internasionale studente (volgens my bron).





En die laaste kers

25 12 2014

So het ons nou uiteindelik by die laaste, wit kers op ons Advent krans uitgekom.  Die wit kers in die middel wat Christus verteenwoordig en lewe simboliseer.

Mag die Kersfees ‘n nuwe lewe vol van hoop, liefde, vreuge en vrede vir een  en almal van julle wees.





Prins van Cambridge

24 07 2013

Prins

Teen die tyd is julle seker al moeg gelees en geluister na die nuwe baba! Wel ek nie… dis altyd lekker om van nuwelinge te hoor!

Ek is net bly ons het darem al ‘n foto gesien! Nie dat ons al een van North West gesien het nie, shame haar ouers is seker besig om te kyk wie die meeste geld vir hulle sal gee vir daai eerste foto!

So wat dink julle gaan die klein of te wel groot mannetjie se name wees? Sy Pa se name is William Arthur Philip Louis… Oupa is Charles Philip Arthur George en Oupagrootjie Philip. 

Almal dink George… wat dink julle?

Vraag vir die dag: Die nuwe Prins is nou 3de in lyn vir die kroon, wat beteken Harry is nou 4de… wie is lucky number 7?





Ek is die Wet!!

8 04 2013

Ek het die naweek ‘n klein probleem opgetel… wel eintlik het dit in my vasgehardloop!

‘n Man het in my motor in vasgehardloop terwyl dit nog in beweging was. Ek was besig om te stop, toe die man twee ander motors probeer vermy het deur in my motor in vas te hardloop! Ek het soos ‘n mens moet, gestop. Ek het hom gevra of hy ok is – hy het gevra ek moet hom hospitaal toe vat. Is dit ‘n nuwe hi-jack metode?? Nee hel, ek sê toe nee! Heel duidelik kan hy loop, so ek sê toe kry my by die petrol stasie (50m op) Ons wag toe daar vir die ambulans wat ek gebel het om te kom… vir 45minute! Nie Metro of iemand vd SAPS het OOIT opgedaag nie.

Die ambulans neem hom toe weg hospitaal toe… maar voor hulle hom weg vat, vra die paramedikus sal ek asb vir hom taxi geld gee! Ja ek was woedend en dink nog steeds ek moet hulle aangee… maar in elk geval, ek het toe die man R20 gegee omdat hy niks aan hom gehad het nie, en dat die hospitaal volgens die paramedikus amper 40km weg is? Die kan nou seker soos ‘n bribe lyk… dink ek eers NA die tyd! Ai mens kan so stupid wees in ‘n moeilike situasie waar jy net wil help!

Maar dit bring my tot my laaste punt… ek gaan meld die saak toe aan by my naaste SAPS kantoor. Terwyl ek die “Accident Report” invul word daar uit die bloute vir my gesê “NO!! This must be a reckless and negligent docket!” Ek sê toe nee, dit was ‘n ongeluk… “No, bring that docket! We are opening a reck and neg case!!” Dankie f*kken tog ek is nie gister gebore nie en ken die wet darem so bietjie… en met die hulp van twee ander SAPS lede (wat vir so 5sec ook maar lekker deurmekaar was) gesê nee dis ‘n “accident report!

Lang storie kort… WTF?

  • Wie kan mens deesdae vertrou as so iets gebeur? Niemand het my gehelp toe die man in my motor vasgehardloop het nie! (neem hulle nie juis kwalik nie – mens kan vandag mos nie meer ander help nie)
  • Niemand het geoffer om te help toe ek by die petrol stasie staan nie… en o my tog kan hulle staar!! Dog hulle oë en tonge gaan uitval!
  • Die paramedikus het vir my gesê ek het die “accident scene” verlaat – EK KON NIE DAAR BLY STAAN NIE? En dis nie sy werk nie… waars die SAPS of Metro wat ook gebel was??
  • Paramedikus vra vir geld vir die “victim” wat sy seer voet op homself gebring het…
  • En laastens ken die SAPS nie die reëls en regulasies nie!!

My naweek kon baie anders uitgedraai het as ek nie ‘n clue gehad het nie! So moet ons as burgers nou almal gaan swot sodat IEMAND darem weet wat jy mag en nie mag doen nie??

Ken jy die wet so goed dat wanneer die k@k die fan sou strike, jy jouself kan help dat die Polisie jou nie nog verder en dieper gaan inkry nie?

Of het jy soos ek en my Tweeling ‘n prok op speed dial wat jou vinnig sal help?? Al is dit net om vir jou te sê “Ignore die idiot!! Hy het seker sy graad gekoop”

Wat is Judge Dredd (1995 fliek gespeel deur Sylvester Stallone) se naam?

Groete, Selene





Karate Afrigting

19 11 2012

Ek hoor vanoggend op Eye Witness News dat een of ander Karate Sensei skuldig gaan pleit op verskeie aanklagte van Seksuele en Onsedelike aanranding.  Hy reken glo dat die die maklikste pad is om te volg, maar volstaan dat dit onmoontlik is om karate af te rig sonder om aan die studente te raak.

Vir ‘n verandering ‘n onderwerp waaroor ek persoonlike ondervinding het.  Ek was immers jare lank ‘n karateka gewees.  In die tyd het ek met tye klasse aangebied en dikwels juniors gehelp met hulle bewegings.  Dit is seker nie onmoontlik om karate af te rig sonder om aan die studente te raak nie.  Dit is bloot net makliker om ‘n liggaamsdeel reg te draai as om die klas op te hou van ‘n lang en moeilike verduideliking van presies hoe ‘n arm, been, heup, kop of skouers moet wees te deel.

Daar is egter een baie belangrike punt om in gedagte te hou.  Die “aanraking” is bloot funksioneel.  Ek is oor die algemeen nie baie gemaklik om aan mense te vat of om dat mense aan my vat nie.  Dit het my egter nooit in ‘n karateklas gepla nie.  Daar is ‘n doel met elke beweging en dit help die student om die beweging meer korrek uit te voer.  Dit is amper soos om tafel te dek, alles moet presies reg wees.

Om eerlik te wees het ek nooit regtig voor vanoggend daaroor gedink nie.  Dit was bloot net nie ‘n dink werd nie.  Dit was ‘n “tap” met die voet dat die knie van die student ver genoeg vorentoe gestoot is.  ‘n Vinnige draai van ‘n voet of van die heupe dat die posisie effektief is.  Soms net ‘n vinger op ‘n vuis of op ‘n elmboog om die student te herinner hoe ‘n posisie moet lyk.  Daar was soms grepe en skerm wat mense nader aan die ander liggaam gebring het.  Tog was dit altyd met die doel om perfeksie na te jaag.  Niemand het ooit gewonder of dit onskuldig al dan nie was nie.  Dit was tog nie die doel nie.

Ek kan nie dink dat enige iets in ‘n karateklas wat voor ouers en medestudente gebeur as seksueel of onsedelik kan wees nie.  Elke student het ‘n GI aan en vroulike studente het dikwels ‘n t-hemp en ‘n ski pants onder die GI aan.  Punt wat ek wil maak is dat dit moeite vir ‘n afrigter is om onsedelik of seksueel te wees.  Iets wat buite die konteks van ‘n karate instruksie sal wees.  Iets wat nie per ongeluk verkeerd verstaan kan word nie.

Ek het natuurlik nie al die feite tot my beskikking nie, maar ek voel dat daardie sogenaamde instrukteur stront praat.  As dit onskuldig was, het daar niks daarvan gekom nie of elke tweede senior student of instrukteur sou moes bond staan om te verduidelik.

My mening, maar wat dink julle?

Breinvasbrand:  Die belde voor swart staan as kyu bekend.  Wat beteken kyu?

Breinlosbrand:  Gerda was reg met Sita.





Pad Veiligheid

16 10 2012

In my Jetsetter Tweeling se afwesigheid gaan ek ‘n kort post doen.

Na die berig in die Beeld, waar ‘n 8 jarige skoolseun raak gery was het ek begin wonder of vandag se kinders nog steeds padreëls geleer word op skool?  Op skool het ons het elkeen ‘n wielietjie gekry, en so was jy die bestuurder van ‘n voertuig die een dag, en die volgende dag was jy weer die voetganger. Ek dink dit was in Std 1. (vandag graad 3)

By die huis was ons nooit alleen in die strate toegelaat nie. Wanneer ons oor ‘n stopstraat / verkeerlig geloop het was ons hande altyd vasgehou… gelyk soos eendtjies in ‘n ry. Ons moes altyd uitkyk vir motors. Ons was geleer dat jy nie agter ‘n motor verby loop nie want jy is so kort niemand sal jou da sien as hulle uit ‘n parkeering ry nie. Loop altyd op die sypadtjie, en oor zebra strepe. (in die goeie dae toe mense nog daar gestop het dat jy kan oorloop)

Die Ma van die 8 jarige seun kon nie genoeg kla oor hoe gevaarlik die kruising is nie. Sy blameer die skool, die staat, die Metro… almal en als! Maar waar was sy toe haar seun raakgery was? 3 Sekondes weg! Sy het aan die ander kant van die gevaarlike kruising vir hom gewag! Die seun het net ewe skielik weg getrek en met een helse spoed oor die pad gehol sonder om links of regs te kyk!  Ja die bestuurder van die motor kon seker stadiger gery het, of beter gekyk het – sy is tog by ‘n skool. Vandag se bestuurders voel ook soms ‘n veer, jaag oral en maak al wat ‘n stop straat is ‘n komma!

Dit bring my by my vraag. Hoe kan dinge verbeter word? Gaan nog padtekens help? Hobbels by stopstrate sit? Mense beboed wat by skole jaag. Spesiale klasse oprig om kinders (en selfs ouer mense) behoorlik te leer hoe om die pad te gebruik? Dit gaan bietjie moeilik wees, veral as die taxi’s ry net waar hulle wil!

Wie weet wat die teken beteken? (Dis nie ‘n Suid Afrikaanse teken nie) Hint: Die teken kom in Kanada voor.