Wie sou jy wees?

Ons is op die punt om Jesus se kruisiging te herdenk.  Weer ‘n tyd te onthou hoe sondig ons regtig is, so sondig dat God se Seun opgeoffer moes word om ons te red.

Wanneer daar oor die kruisiging besin word, is mens geneig om half meewarige houdinge te hê teenoor die sterflikes van die tyd.  Tog, as ons eerlik moet wees, met almal na wie daar verwys word, is daar iemand met wie ‘n mens kan identifiseer.

Daar was Judas.  Hy het ‘n geleentheid gesien om Jesus te verraai vir geld.  Daar was Petrus, wat eers grootbek belowe het om Jesus altyd by te staan.  Hy kry selde krediet daarvoor, maar hy het regtig probeer.  Nadat Jesus hom self gekeer het, was hy seker dikbek daaroor.  Hy het Jesus toe verloën soos dit voorspel was.  Daar is al die ander dissipels wat weggehardloop het toe Jesus gevange geneem is.

Daar was die priesters wat bedreig gevoel het deur Jesus en Hom ten alle kostes wou dood hê.  Die mense wat vals getuienis gelewer het om waarskynlik die priester se guns te wen.  Die soldate wat Jesus verneder en gemartel het.  Pilatus wat nie sy steun wou verloor het nie en Jesus tog oorgelewer het.  Die skare wat bloed gesoek het en op Jesus se kruisiging aangedring het.  Hulle het moontlik geglo dat Hy wel skuldig was.  Die spotters om die kruis.

Dan was daar Pilatus se vrou wat regtig gesê het dat Hy vrygelaat moet word, maar dit het by woorde gebly.  Johannes, wat tot op die einde stil by Jesus gebly het.  Die vroue wat nie juis kon help nie, maar wat Hom nogtans nie verlaat het nie.  Simon van Sirene wat Jesus se kruis gedra het.

As jy moet eerlik wees, watse rol sou jy in Jesus se dood gespeel het?

Van ‘n ander hoek af.  Daar is ‘n liedjie van “Whatsoever you do to the least of my brothers, that you do unto Me.”  Dit is een ding om te antwoord as Jesus betrokke is, mens skiet jouself nie so blatant in die voet nie.  Dit is ‘n heel ander storie as jy ‘n ander moet behandel asof hy/sy Jesus is.

As jy mense vir geld uitverkoop, sou jy vir Jesus ook uitverkoop.  As jy altyd sulk as iemand jou terregwys en eers bloed wil sien vloei, sou jy dieselfde gedoen het met Jesus.  As jy ‘n mooiweersvriend is, sou jy van Jesus ‘n mooiweersvriend gewees het.  As jy ‘n ander nie in jou lig verdra nie, sou jy ook planne beraam het om Jesus dood te maak.  As jy ‘n gatkruiper is, sou jy ook gekruip het waar dit vir jou die meeste voordeel inhou.  As jy bang was vir mense, sou jy ook soos Pilatus alles gedoen het wat die skare gesoek het.  As jy jou verlekker in ‘n ander se lyding, sou jy ook gespoeg en geslaan het.  As jy genadeloos op ‘n ander se ondergang aandring – selfs al is hulle skuldig – sou jy ook vir Jesus op ‘n kruis wou sien.

Daar was natuurlik die goeies ook, ‘n handvol en selfs stil.  Hoeveel van ons is dan regtig goed?

Mag die kruisiging en opstanding ons inspireer om soos ware Christenne op te tree.  Dit is tog aan die vrugte wat die boom erken word.

Dit laat my vel van my lyf af krimp

Op SABC 3 word daar die coolste CD geadverteer.  Dit gaan oor almal wat van die wêreld se beste kitaarspelers geag kan word.  Onder enige normale omstandighede sou ek my bene stompies hol om dit te gaan koop.  Daar is net een probleem.  Die titel:  The Gods of Guitar. 

Dit is seker altyd iets wees wat my niere vergruis.  Van alle benamings wat daar is om die spelers te beskryf – ek dink aan konings, baas, die beste, die meesters, die heersers – hoekom op aarde na hulle as god verwys?  Dit is nou regtig krap waar dit nie jeuk nie.  Daar kan seker daaroor geredeneer tot volgende jaar, ek sal net nie gemaklik wees daarmee om dit in my besit te hê nie.

Ek preek gewoonlik dat ‘n mens eerder God in alles moet gaan soek en nie die duiwel nie.  Ek voel glad nie gemaklik daarmee om alles en almal god te maak nie.  Ek hou veral nie daarvan as iemand sommer van hulle self god maak nie.  Die tipe arrogansie staan my nie aan nie. 

Ek gee nie om vir ‘n vloek of 10 nie.  Het julle agter gekom dat die verwysings na God deesdae nie eers meer as vloek gesien word nie.  Dit word oor die algemeen as aanvaarbaar gesien.  Waar ‘n boerevloek nog gebiep word of ten minste ‘n ouderdomsbeperking kry, blyk dit dat niemand regtig daarvoor omgee nie. 

Al beskou jy jouself nie as ‘n Christen nie, is dit nie nodig om te gaan skoor nie.  As jy wel na jouself verwys as ‘n Christen, is daar geen verskoning nie. 

Hoe voel julle daaroor?

Gelukkige Hemelvaart

Hier is ons al wraggies aan die einde van die Paas Seisoen.

Vandag is Hemelvaart, die dag wat Jesus na die Hemel toe opgevaar het en Sy (fisiese) tyd op aarde tot ‘n einde gebring het.

In Suid-Afrika is dit al lankal nie meer ‘n openbare vakansiedag nie.  Tog kan ‘n mens dit nog steeds onthou.

Herdenk jy hemelvaart?  Hoe vier jy dit?

New Age Bid

Op die vooraand van een van die belangrikste dae op die Christen almanak, is dit dalk ‘n goeie tyd om oor bid te praat. 

Dit is deesdae opvallend hoeveel mense hulle bid op Facebook doen.  Ek praat nou nie van die algemene woorde van bemoediging of die getuienis nie.  Nee, bid – van die aanhef tot op die punt waar daar amen gesê word.  Dit is amper asof God een van hulle vriende is en hulle Facebook Statusse slaafs navolg.  Met die nodige respek gesê.

Ek weet dat God orals is, ook in Facebook en elke mens het seker die reg om te bid soos hulle goed dink.  Ek weet ook dat waarvan die hart vol is, die mond (en statusse) sal oorloop.  Niemand is tog skaam daaroor dat hulle Christenne is nie.  Hulle het die reg om hulle Christenskap uit te leef, soos hulle goed dink.  

Tog is dit nie iets waarmee ek gemaklik is nie.  Persoonlik voel ek dat ‘n gebed iets is wat in privaatheid gedoen moet word en ‘n saak streng tussen jou en God is.  Mens kan / wil / moet soms mense vra om saam met jou te bid en daarvoor is Facebook ideaal.  Die eintlike gebed self, ek is nie so seker dat dit op Facebook hoort nie.  

Ek verpes dit om met die Bybel onder die arm te loop, maar daar is twee verse wat ek tog met julle wil deel vandag. 

Verder, as julle bid, moet julle nie soos die skynheiliges wees nie.  Hulle hou daarvan om op die straathoeke te  staan en  bid sodat mense hulle kan sien.  Dit verseker Ek julle:  Hulle het hulle beloning klaar weg.  Nee, as julle bid, gaan na jou kamer toe, maak die deur toe en bid tot jou Vader wat jy nie kan sien nie.  Jou Vader wat sien wat verborge is, sal jou beloon.  (Matt 6 : 5 – 6)

Hierdie is nie my amptelike Goeie Vrydag en Paasfees skrywe nie, maar ek wil graag vir die van julle wat nou in “Internet Stilte” gaan ‘n baie geseënde Paastyd toe wens.  Vir almal wat in die pad val, reis veilig en kom uitgerus terug.

Breinvasbrand:  Wie was die leier van die Isrealiete toe die Paasfees ingestel was?  (Let wel, dit was eeue voor Jesus)

Breinlosbrand:  Olga was reg met Andre Stander.

Die vuur genaamd TONG

Ek voel eintlik so half (goed, baie!) skynheilig om die onderwerp aan te roer.  Siende dat die vuur onderwerp nog hooggety vier, kan ek nie die geleendheid laat verby gaan nie.

Ons skoolhoof in die laerskool was besonders lief om op ‘n Maandagoggend hieroor te preek.  Ons het dit ook al ‘n keer of wat in Hoërskool gehoor en seker ook al ‘n paar keer in die kerk.  Iemand het my eendag vertel dat Jakobus die boek is wat lewens red, wat jou werklik vertel hoe om te lewe.  Dit is seker die een stuk in die Bybel, spesifiek Jakobus 3 wat spesiaal vir my geskryf is.

Vanaf vers 5 tot 12 (alhoewel vers 1 so verskriklik waar is – gaan lees maar gerus).

So is die tong ook maar ‘n klein liggaamsdeeltjie, en tog het dit groot mag. ‘n Klein vuurtjie kan ‘n groot bos aan die brand steek.

Die tong is ook ‘n vuur, ‘n wêreld vol ongeregtigheid, die deel van die liggaam wat die hele mens besmet. Dit steek die hele lewe, van die geboorte af tot die dood toe, aan die brand, en self word dit uit die hel aan die brand gesteek.

Alles wat loop, vlieg, kruip of swem, elke soort dier word en is al deur die mens getem,

maar geen mens kan die tong tem nie. Dit is ‘n rustelose kwaad, vol dodelike gif.

Met die tong loof ons die Here en Vader, en met die tong vloek ons die mense wat as die beeld van God gemaak is.

Uit dieselfde mond kom lof en vloek. My broers, so moet dit nie wees nie

n Fontein laat tog nie uit dieselfde oog vars en brak water opborrel nie.

‘n Vyeboom, my broers, kan tog nie olywe dra nie, of ‘n druiwestok vye nie. ‘n Brakfontein kan mos nie vars water gee nie!

As ek na al die insidente wat op my hel toe boekie staan kyk, was my tong (en seker my vingers ook) die hoofrede daarvoor gewees.  Sou ek dus eendag beheer oor my tong kry, sal ek dalk eendag myself as ‘n goeie mens kan uitgee.

Ek staan soms verstom oor wat mense wat glo opregte Christenne is kwytraak.  Hulle sal jou vertel van die Here aan eenkant en aan die anderkant vloek hulle die bediende wat so pas ‘n druppel tee gemors het.  Hulle vertel jou van God se wonderdade, net om die volgende oomblik haar buurvrou te beskinder dat die biesies bewe.  Elke keer wonder ek dan oor Jakobus 3 – en natuurlik ook al die kere wat ek myself daarmee vang.

Ek wil wel met ‘n ander gedagte afsluit.  Dit is waar dat ‘n vuur verwoesting saai, maar dit is ook waar dat vuur kan suiwer.  Dit is net so waar dat die tong soveel kan vernietig, maar die tong kan ook gebruik word om ‘n situasie te suiwer.  Die tong is tog daar om gebruik te word, maak net seker dat dit met oorleg gedoen word.  Soos Langenhoven gesê het:  “Leen jou ore uit aan iedereen wat ‘n tong het, maar moenie jou tong uitleen aan iedereen wat ore het nie.”