Eva Boyd

29 06 2010

Everybody’s doin’ a brand new dance now
Come on, baby, do the locomotion
I know you’ll get to like it if you give it a chance now
Come on, baby, do the locomotion
My little baby sister can do it with ease
It’s easier than learning your ABC’s
So come on, come on, do the locomotion with me

Almal ken seker die liedjie.  Dit was al hoeveel keer deur mense nagedoen en nog steeds is dit ‘n gunsteling gatswaai liedjie.  Dit was selfs al drie keer die nommer 1 treffer op die Amerikaanse Top 5 gewees.  In drie verskillende dekades.  Kylie Minogue het dit amper vir haarself gesteel, maar dit was Little Eva wat die lied bekend gemaak het.

Eva Narcissus Boyd is op 29 Junie 1943 gebore.  As tiener het sy as ‘n kinderoppasser vir Carole King en Gerry Goffin gewerk.  Eva het baie komieklik gedans en dit was net te veel gevra vir twee liedjieskrywers.  Hulle het Locomotion geskryf na aanleiding van haar dansstyl geskryf.  Sy sou aanvanklik net vir die Demo van die liedjie gebruik gewees het.  Tog het King en Goffin geweet vandat sy aangestel is dat sy kan sing en dit was seker net so ‘n goeie tyd as enige ander om haar te laat sing.

Locomotion was nie die enigste lied waarvoor Eva die inspirasie was nie.  Die Chrystals se liedjie; He hit me and it felt like a kiss; het King en Goffin danksy Eva geskryf.  Haar kêrel in die tyd het haar gereeld aangerand.  Hulle het haar vra hoekom skop sy hom nie onder die gat nie.  In alle opregdheid was haar antwoord dat sy liefde vir haar hom so laat optree.  Seker nie van beter geweet nie.

Eva het gou naam gemaak as ‘n dansmal sangeres en in 1964 was die publiek moeg vir haar gewees.  Eva het nooit die regte van die liedjies wat sy gesing het, besit nie.  Sy was $50 ‘n week betaal vir haar optredes, heelwat meer as die $15 wat sy as kinderoppasser kon maak.  Dit was seker goeie geld, maar sy was nie die een wat bank toe gelag het met Locomotion nie.

In 1971 het sy afgetree en met haar 3 kinders van die welsyn af gelewe.  Sy het wel hier en daar weer iets aangepak, maar niks wat regtig suksesvol was nie.  Sy is in 2003 dood van baarmoederkanker.  Sy is in ‘n eenvoudige graf in Noord-Carolina begrawe.

Sy sou al lankal vergete gewees het, was dit nie vir haar snaakse dansstyl nie.  Wys net hoe goeie musiek jou altyd kan laat lewe.





Maria Roux

12 05 2010

Maria Roux se naam het nie dadelik by my ‘n klokkie gelui nie.  Wel, nie meer as wat Susan Botha vir my beteken nie.  Nadat ek ‘n bietjie gekrap het, het ek besef dat ek wel al van haar gehoor het.  Legendaries, bekend, of selfs berug is sy beslis.  Vele het na haar gaan soek, maar ek is iemand wat geen begeerde het om haar met die hand te groet nie.  Die Afrikaanse Liedjieboer kon haar ook nie ignoreer nie . . .

Blommetjie gedenk aan my en sy lig haar duim na bo.

Blommetjie gedenk aan my sing die spook van die Klein Karoo

Die jaar is 1968 en ‘n jong paartjie is op die drumpel om verloof te raak.  Daar moet net eers ouers gevra word en daar is geen tyd soos die huidige nie.  Daarom is die jong paartjie baie laat in die aand aan die buitewyke van Uniondale.  Maria het op die agterste sitplek geslaap, toe die tragedie plaas gevind het.  Die bestuurder het om een of ander rede beheer oor die motor verloor (ek raai hy wou ook slaap) en Maria is in die ongeluk dood.

Dood, maar nie rustend nie.  Maria het blykbaar nooit besef dat sy dood is nie en is nog steeds oppad huis toe om vir haar ma’le haar nuus te gaan vertel.  Anton Le Grange was die eerste een wat haar met die hand gegroet het, ongeveer 8 jaar na haar dood.  Hy het ‘n meisie gesien ryloop en het haar ‘n geleendheid aangebied.  Hy het al ‘n eintjie gery toe hy besef dat hy nie seker is waarheen sy oppad is nie.  Toe hy haar wou vra, toe is sy weg.

Hy is dadelik polisie toe wat saam met hom weg is na waar sy verdwyn het.  Hulle het hom nie juis geglo nie, maar daardie tyd het die polisie nog hulle plig ernstig opgeneem.  Die polisie man het onderweg na die plek gesien hoe die agterste deur van self oop en toe maak.  Le Grange het ook vir Maria geidentifiseer van ‘n foto by die polisiestasie.

Twee jaar later het ‘n Korporaal van Jaarsveld ook ‘n donkerkop meisie ‘n geleendheid op sy motorfiets aangebied.  Sy het nog self sy spaarhelm op haar kop vasgemaak.  Met haar arms styf om hom het hy die ysterperd laat sing.  Hy het ‘n klein plukkie gevoel en toe hy omkyk, is die meisie weg.  Hy het eers gedink dat sy afgeval het en het haar langs die pad gaan soek.  Maar ook net tot hy sy valhelm netjies vasgemaak agter op sy fiets gesien het.  Die meisie van Uniondale ken darem haar maniere?

Sal jy haar gaan opsoek?

Breinvasbrand:  Wie is die liedjieboer?

Breinlosbrand:  James Bond





Oom Angus

21 04 2010

Ek moet bieg dat oom Angus nog altyd my held was. Selfs al dra hy ‘n mullet. 

Angus MacGyver is op 23 Maart 1951 in Mission City, Minnesota gebore.  Sy ouma en pa het saam verdrink toe hy 10 jaar oud is, met die gevolg dat sy oupa die rol as pa van sy lewe ingeneem het.  Sy ma is na ‘n kort siekbed dood toe hy 19 jaar oud is.  Angus was ‘n baie goeie yshokkiespeler gewees en was mal oor museums.  Hy het sy eerste chemiestel gekry toe hy 10 jaar oud is.  Hy het ook ‘n vieslike gly in sy naam gehad, met die gevolg dat almal hom Mac genoem het.  Sy oupa, Peter Jackson, het hom Bud genoem.

As ‘n jong tiener is Mac se vriend, Jesse, in ‘n skietongeluk dood.  ‘n Vuurwapen het geval en ‘n skoot het per ongeluk afgegaan.  Dit het veroorsaak dat Mac ‘n weersin in vuurwapens gekry het.  Hy sou sy lewe lank weier om ‘n wapen te dra of te gebruik.  Hy was wel in Vietnam gewees en het daar bomme gedeaktiveer. 

In 1973 het Mac ‘n graad in Chemie en Fisika gekry by die Western Tech.  Een van sy dosente was Julian Ryman.  Ryman was bekend daarvoor om dinge met allerdaagse goed reg te maak.  Dit het ‘n groot invloed op Mac gehad.  Hy het altyd duct tape en ‘n knipmes by hom gedra.  Saam met sy kennis van chemie en fisika en ‘n klein bietjie buite-die-boks-denke het hy homself uit verskeie benarde posisies bevry. 

Mac het ‘n aanbod om in ‘n kernaanleg te werk bedank.  Hy het Los Angeles toe getrek en los werkies vir ‘n ruk gedoen.  Hy was onder andere ook ‘n taxi bestuurder gewees.  In die hoedanigheid het hy Pete Thornton ontmoet.  Hy het sy lewe met veters, ‘n moersleutel en ‘n skuifspeld gered.  Pete was ‘n agent by Department of External Services en het gesorg dat Mac as ‘n veld agent daar begin werk het.  Mac trek saam met Pete Phoenix Foundation toe wanneer Pete daar ‘n pos aangebied word. 

Mac het een seun, Sean Angus Malloy, gehad, by ‘n meisie wat hy na kollege mee uitgegaan het.  Hy raak eers jare later van die seun bewus.  Die ma, Kate Malloy, was intussen in China vermoor.  Pete was ook al lankal dood, dus het Mac by Phoenix bedank om sy seun beter te leer ken. 

Angus MacGyver is natuurlik die fiktiewe karakter van die gewilde reeks, MacGyver in die 80’s gewees.  Menige seun se held en die eerste liefde van vele meisies. Die rol is deur Richard Dean Anderson vertolk gewees.   

Soos Mac het hy nooit getroud nie, maar het ‘n dogter (Wylie Quinn Annarose Anderson) saam met Apryl Prose gehad.  Die dogter is nou 12.  Anderson is ‘n entoesiastiese omgewings aktivis.  Hy is nie net ‘n akteur nie, maar ook ‘n vervaardiger en komponeerder. 

Was jy ook mal oor MacGyver?  Hoe oud was jy toe hy Vrydae aande gedomineer het?  Watter ander aksiestories het jou daardie tyd vasgevang gehad?

Breinvasbrand:  Wie was MacGyver se hoof vyand gewees?

Breinlosbrand:  Riaan was reg met Christopher Latham Sholes.





Koos Doep

4 03 2010

Maar hier moet jy jou nimmer laat bind
want so lei die ou, ou sprokie, my kind
As jy geluk en vreugde wil vind
soek die neonboog se punt

Ek is glad nie so seker dat Jacobus Johannes du Plessis kan sing nie, maar hy het beslis geweet wat om met ‘n pen te maak.

Koos du Plessis het sy eerste skree op 10 Mei 1945 in Rustenburg gegee.  Hy was die jongste van 4 kinders en het in Springs groot geword.  Hy was in Laerskool PAM Brink en het in Hoër Seunskool Hugenote gematrikuleer.  Hy het homself aanvanklik in die onderwys gaan bekwaam, maar het later eers ‘n BA in Afrikaans en ‘n Honneurs in Afrikaans-Nederlands gekry.

In 1969 is hy met Mornay du Plessis getroud.  Hulle het drie dogters (Irma, Karien en Karla) gehad.

Koos het as ‘n onderwysstudent al begin om liedjies te skryf.  Hy was fanaties oor luisterliedjies, dat mense na die woorde, nie soseer die musiek nie, moet luister.  Hy het dus ook gekies om homself met ‘n kitaar te begelei.  Sy “dayjob” was by koerante.  Hy was aanvanklik ‘n joernalis, maar het later ook subredakteur en nuusredakteur geword.

“Luisterliedjies” het in die 70’s gewild geword, maar Koos het op sy eie ontwikkel.  Kinders van die wind is byvoorbeeld al in 1967 geskryf gewees.  Carl Theunissen het al in 1975 ‘n kasset met Koos se liedjies aan Incline House Musiek geneem.  Dit het gelei tot die ontstaan van ‘n vriendskap tussen Koos en Nick Taylor.  In 1977 het Nick van Koos se liedjies in “Fyn Net van die Woord”  bekend gestel.  Nog ‘n paar programme het gevolg, maar dit was eers nadat Katinka Heynsin 1979 4 van sy liedjies in in “Phoenix en Kie” gebruik het dat dinge werklik vlam gevat het.

Laurika Rauch het die liedjies in “Phoenix en Kie” gesing, wat onder andere Kinders van die Wind ingesluit het.  Dit was beide Koos en Laurika se kaartjie na beroemdheid.  Die plaat van Kinders in die Wind moes 2 keer binne een week herdruk word.  Beide sangers het goue plate vir die album gekry.  Koos het ook in die tyd sy eerste plaat, Skadu’s teen die muur, uitgereik.  Koos het ‘n Sarie gewen vir Liedjie van die Jaar vir Kinders van die wind.

As Almal Ver is en Herbergier het onderskeidelik in 1981 en 1982 gevolg.  In 1982 het Richard Clayderman ‘n instrumentale nommer van Kinders van die Wind opgeneem en onder Children of the wind vrygestel.  Koos het in die tyd onder kritici deur geloop dat hy te kommersieel geraak het.  Hier dog ek nog altyd dit is ‘n nuwe argument.

In 1983 was Koos deur die ATKV beloon vir sy bydrae tot Afrikaans Taal en Kultuur.  Hy het ook al aan snitte vir sy 4de album begin werk.  Die plaat was egter nooit voltooi nie.  Vroeg die oggend op 15 Januarie 1984 verongeluk Koos op die Ou Krugersdorppad (ek dink dit is nou die R55) naby Knoppieslaagte.

Sy pen het toe dalk opgedroog, maar sy woorde nie.  Vandag is Kinders van die Wind een van die liedjies wat deur die meeste Afrikaanse Kunstenaars vertolk word.  Met goeie rede.

Breinvasbrand:  Watter een van sy dogters het ook vir ‘n ruk lank ‘n sangloopbaan gevolg?

Breinlosbrand:  Jayde was reg met 27.





Nuwe Toekoms

18 02 2010

He who gains a victory over other men is strong; but he who gains a victory over himself is all powerful. – Lao Tzu

Mense wat by my bewondering afdwing is die wat bokant hulle omstandighede kan uitstyg en hulleself kan oortref.  ‘n Mens sien so dikwels hoe kinders die sirkels herhaal wat daar gestel was deur hulle ouers.  Die welsyn sorg vir geslagte van dieselfde families.  Amper asof niemand die moet het om die sirkel te verbreek nie.  Kyk ook na die sirkel van mishandeling wat te dikwels van geslag tot geslag oorgedra word nie. 

‘n Mens se sterre kan verander, maar dit is gewoonlik in jou eie hande.  Jy moet besluit hoe hard jy gaan vasbyt om jou gekose mylpaal te bereik.  Hoeveel opofferinge jy gaan maak en hoeveel kanse jy gaan skep en benut is jou baba.  Dit is wel vir party mense makliker as vir ander, maar dit is alleenlik jou besluit of jy jou daardeur gaan laat onderkry.

Iemand wat dit wel reggekry het, is Sophia Loren.  Sy is as Sofia Villani Scicolone op 20 September 1934 in Rome gebore.  Sy was Riccardo Scicolone se buite-egtelike dogter by Romilda Villani, maar hy het geweier om met haar te trou.  Romilda was ‘n klavierjuffrou en hoopvolle aktrise, sonder die nodige fondse om liggaam en siel aanmekaar te hou.  Sy is met Sophia na Pozzuoli naby Napels om by haar ma, Luisa, te gaan woon. 

In die tweede wêreldoorlog, was Pozzuoli gereeld onder bomme deur geloop.  Sophia is eendag deur ‘n skrapnel beseer terwyl sy tydens ‘n aanval na ‘n skuiling gehardloop.  Hulle is daarna in Napels deur familie gehuisves, maar het na die oorlog terug gekeer.  Sophia se ouma het ‘n kroeg in hulle sitkamer oopgemaak.  Daar was musiek gemaak en kersie likeur was bedien.  Sophia was die kelnerin en skottelgoedwasser.

In 1950 het Sophia klein rolletjies in Italiaanse flieks begin speel.  In 1952 het sy as Sophia Loren begin optree.  Aanvanklik het sy heelwat teenoor Marcello Mastroianni gespeel.  Sy het in 1957 al antwoord in Hollywood gegee met Boy on a Dolphin.  Sy is die wenner van meer as 50 internasionale toekennings, wat 2 Oscars insluit. 

Sophia het Carlo Ponti in 1950 ontmoet toe sy die finalis in ‘n skoonheidskompetisie was.  Hy was 37 (22 jaar ouer as sy) en getroud.  7 jaar later het hy in Mexiko van sy vrou geskei en met Sophia getrou.  Daar was net een probleem, Italië het nie egskeidings erken nie.  Die Katolieke Kerk het die huwelik in 1962 ongeldig verklaar.  Carlo, Giuliana en Sophia het Frankryk toe getrek waar egskeidings wel wettig was.  Sy vrou het om daar in 1965 geskei en hy het weer met Sophia getrou in 1966.  Die dood het hulle in 2007 geskei. 

Beslis ‘n aktrise wat haar merk gelaat het.  Baie mense reken dat sy een van die mooiste vroue van die afgelope eeu was.  Oordeel maar self. 

Breinvasbrand:  Sophia Loren is die aktrise met die tweede meeste toekennigs.  Wie (aktrise) het die meeste toekennings in haar loopbaan verwerf?

Breinlosbrand:  Coyote was reg met policy.  Alhoewel, Anna het genoem dat eerlikheid die beste beleid is, wat maar net die vertaling is.





Die buksie van Hoopstad

28 01 2010

Agter in my kas kruip daar ‘n skelpienk tennisraket weg.  Nie omdat ek my skaam vir die kleur nie (nooit gesien nie), maar eerder omdat ek graag meer gereeld sal wil speel.  Al is ek pateties op ‘n baan, met geen “ball sense” en hopeloos te lui om te hardloop, hou ek van tennis.  Ek sal dit ook geredelik op televisie kyk.  Steffi Graf en André Agassi is by uitstek my gunstelinge:  julle het tog nie gedink dit is toevallig dat die twee met mekaar getrou het nie.  Maar enige iemand wat by Graf vrees ingeboesem het, verdien my respek.  Veral as sy nog boonop ‘n Suid-Afrikaner is.

Amanda Coetzer is op 22 Oktober 1971 in Hoopstad gebore.  Haar ouers was Nico en Suska Coetzer.  Sy het in 1988 begin professioneel speel.  Sekerlik een van die kleinste vrouens in professionele tennis, Coetzer is maar 1.57 m lank en weeg 54 kg.  Sy sal dus nie sommer as een van die wêreld se grootste spelers onthou word nie, maar sy is gewis Suid-Afrika se beste vroulike speler op datum. 

Vir die grootste gedeelte van haar loopbaan het Coetzer in Hilton Head, South Carolina gewoon.  Sy was afgerig deur Gavin Hopper.  Haar loopbaan het in 1997 ‘n hoogtepunt bereik.  In November van dieselfde jaar was sy 3de op die ranglys gewees van vroue tennis, haar hoogste ooit. 

Coetzer het nooit een van die Grand Slams gewen nie.  Sy het wel al die semi-finale rondes van die Australiese Ope en die Amerikaanse Ope behaal.  Coetzer het 9 titels in haar professionele loopbaan ingepalm, die grootste daarvan is seker die Hilton Head in 1998.  Saam met Wayne Ferreira het sy die Hopman Beker vir Suid-Afrika gewen.  Sy het Suid-Afrika ook drie keer in die Olimpiese Spele verteenwoordig. 

Glad nie sleg vir ‘n meisie van die Vrystaat nie, maar dit vergelyk maar vaal teenoor Steffi Graf wat 107 titels ingepalm het en 22 Grand Slam titels agter haar naam het nie.  Tog is Coetzer een van net 6 spelers wat Graf in een jaar 3 keer op haar neus kon laat kyk het.  Sy is ook een van 4 spelers wat Graf meer as een keer in Grand Slam toernooi ore kon aansit.  In 1995 het sy Graf se wedloop van 32 oorwinnings in ‘n ry beëindig in die Kanadese ope.  Graf het ook haar grootse pak slae van Coetzer gekry.  Dit was in die kwartfinale in Berlin en die telling was 6-0, 6-1.  Coetzer het met Graf binne 56 minute kaf gedraf.

Graf was nie die enigste nommer een speler wat deur Coetzer die loef af gesteek was nie.  In 1999, het Coetzer die enigste speler geword wat Graf, Martina Hingis en Lindsay Davenport kon wen terwyl hulle die beste in die wêreld was.  Haar krag was juis daarin dat die hoë gekeurde spelers haar nooit kon afskryf nie, sy het net te dikwels met hulle klaar gespeel.

Coetzer het amper $6 miljoen verdien met tennis toe sy in 2004 afgetree het.  Sy is getroud met Arnon Milchan wat 27 jaar ouer as sy is.  Milchan was die vervaardiger van onder andere Pretty Woman.  Hy is ‘n Isreali.

Breinvasbrand:  Wat was Amanda Coetzer se bynaam (behalwe Buksie van Hoopstad)?

Breinlosbrand:  Demoerin was reg met galjoen.





Anchien Troskie

21 01 2010

Almal wat hou van boeke het ‘n denkbeeldige lysie wat hulle beplan om deur te draf.  Vandat ek van “Ek is Anna” gehoor het, het dit op die lysie verskyn.  Ek wou dit lees, maar was bereid om baie geduldig daarvoor te wag.  Dit sou een of ander tyd op afslag kom en dan kan ek dit opraap.  Anders kon ek maar geduldig wag tot dit beskikbaar was in die biblioteek.  Stories hardloop mos nie weg nie.

Die Allan Gray advertensie van “The only book your child will ever read” het my nog altyd gefassineer.  Ek het dit eendag ‘n skrywe daaroor gedoen en gevra wat is die een boek wat mense bo alle ander sal uitsonder.  Iemand het geantwoord “Dis ek, Anna” sodat my kinders kan verstaan hoekom ek is soos ek is.  Ek het dieselfde middag nog Ek is Anna gaan koop. 

As jy dit nog nie gelees het nie, moet jy ‘n plan maak.  Dit is beslis een van daardie boeke wat ‘n mens moet lees.  Ek het gehoop dit is nie Elbie Lötter se eerste en enigste poging nie.  Wel, op ‘n manier was dit.  Die vrou agter die naam het dit wel geniet om saam oor haar eie boek te skinder, maar sy het tog bekend gemaak wie sy eintlik is.  En daarmee saam my hoop nie beskaam nie.  Haar tweede boek het onder haar eie naam, Anchien Troskie, verskyn.

Ek het sopas die tweede boek, “Nooit is ‘n baie, baie lang tyd” gelees en ek is ‘n beslisde bewonderaar.  En nee, Skoor, ek is nog steeds die grootste Dalene Matthee bewonderaar.  Ek was mal oor die boek gewees, maar ek verstaan dat ek dalk die uitsondering is.  Iemand het al opgemerk kritici “sal dié boek seker nie eers gebruik word om die debatkamer se deur oop te hou nie”.  Gelukkig is ek nie ‘n kritici nie en kan ek geniet wat ek wil.  Ek dink dit het ‘n paar interessante twists gehad, maar dalk net omdat ek heerlik in my kokon bly.

Tipies, is daar nie veel inligting oor Troskie beskikbaar nie.  Sy het op 16 jarige ouderdom begin gil as haar stiefpa by haar kamer ingekom het.  Haar ma wou haar nie glo oor wat daar gebeur nie en het haar uitgeskop.  In Anna skiet sy haar stiefpa, maar in werklikheid is hy aan natuurlike oorsake dood. 

Troskie is ‘n huisvrou.  Sy is in 1968 gebore en het in die Vrystaat groot geword.  Sy is met ‘n boer in die Oos-Kaap getroud en het twee kinders.  As ek reg tussen die lyne lees is sy ‘n tuisteskepper, met ‘n passie vir Scrapbooking, borduurwerk en breiwerk.  Saans sit sy in die koudste kamer in haar huis en skryf.  Niemand anders wou die kamer gebruik nie.  Sy beskryf haarself as iemand met ‘n vuil humeur, maar wat bang is vir slange.  Sy is bang vir slange, haat leuens en rou vleis. 

Haar grootste vrees is dat sy nie al die stories in haar kop sal kan neerpen nie.  Ek dink ons gaan dus nog baie van haar in die toekoms sien.  Self, kan ek nie wag nie.  En die keer gaan die boek nie op die boekwinkel se rak verjaar nie. 

Breinvasbrand: Wie het die Divine Secrets of the Ya-Ya Sisterhood geskryf?

Breinlosbrand:  Demoerin was reg met Port-au-Prince.

Bronne:  Huisgenoot, Burger; Litnet en NB uitgewers





Hello, you fool, I love you

3 12 2009

Joyride was dalk nie Roxette se eerste treffer nie, maar dit is die liedjie wat die duetpaar aan my bekend gemaak het.  Destyds was ek ‘n laerskooldogtertjie wat so pas my eerste (en enigste) draagbare radio gekry het.  Benewens die openingslirieke, is dit die gefluitery in die lied wat dit vandag nog een van my gunstelinge maak.

 Per Gessle en Marie Fredikson ken mekaar al van 1979.  Hy was toe die hoofsanger van Gyllene Tider en sy was lid van Strul and MaMas Barn.  Die laasgenoemde groep het nie juis baie sukses behaal nie, so Marie moes ander werkies ook doen.  Dit het onder andere werk as ‘n agtergrond sanger vir Gyllene Tider ingesluit. 

In 1984 het die Gyllene Tider aan ‘n Engelse Album gewerk .  Die plate maatskappy wou dit egter nie internasionaal onder die naam bemark nie.  Die groep moes ‘n ander naam kry en hulle het op Roxette besluit.  Roxette was ‘n 1975 liedjie van Dr Feelgood.  Die Engelse Album het nie baie goed gevaar nie en die lede het besluit dat Gyllene Tider se dae vir eers getel is. 

Per het aan sy sololoopbaan gewerk, hy het ‘n album uitgebring waar Marie weer die agtergrond sang behartig het.  Sy het ook haar tweede solo album laat opneem.  In 1986 het Rolf Nygren aanbeveel het dat hulle saam behoort te sing.

“I remember that Per had written a damn good song. I thought that Per and Marie would fit in as Per writes great music and Marie can sing a phone book and get it (to) sound good. Of course I’m a bit proud of getting the idea for Roxette”

Die res is geskiedenis.  Van hulle heel eerste vrystelling, Neverending Love (Per se lied wat hy vertaal het) was ‘n treffer.  Hulle het van 1986 – 2002 met tye saam opgetree en treffers gelewer.  In September 2002 is daar ‘n breinvergroeisel by Marie ontdek.  Die tumor was met ‘n operasie verwyder.  Dit het Roxette vir eers laat halt terwyl Marie herstel het. 

Die paar het op onderskeie projekte gefokus.  Per het weer ‘n album met Gyllene Tider opgeneem wat baie suksesval was en Marie het haar eerste Engelse album vrygestel.  Tot op datum was daar nog verskeie solo pogings van beide gewees.

April vanjaar het Per geskimp dat dit van Marie afhang of hulle weer saam sal optree.  ‘n Maand later het hulle aangekondig dat hulle ‘n konsert in België sou doen.  Marie het ook al ‘n paar keer saam met Per as gaskunstenaar op sy konserte opgetree.  Einde Oktober 2009 het hulle aangekondig dat hulle aan ‘n nuwe CD werk.

En hier wag ons nou in spanning.  Sal Roxette wel ‘n groot terugkoms kan maak of moes hulle eerder met dankbaarheid die goeie jare onthou het.  Tyd sal ons wel leer. 

Breinvasbrand:  Wat beteken Gyllene Tider?

Breinlosbrand:  Fokker was reg met Ackermans.





Prinses

26 11 2009

Ek onthou ‘n Saterdagoggend in 1993 waar ek baie opgewonde na die fonds in my pa se kas gaan soek het.  Na jare se versigtige oppas het my ma uiteindelik vir Gina ‘n geskikte man gekry.  Die kleintjies is deur die nag gebore gewees.   Ek het haar bene versigtig oop getrek (daar was jare lank gespot oor die hond met haar kind) en kon net een kleintjie sien.  Die produk van ‘n swart ma en wit pa.  Die kleinste swart-en-wit-dingetjie wat 2 van my vinger litte lank was.  Jy.  Later die oggend het ons ontdek daar is eintlik 3 hondjies gewees. 

Jy was veronderstel om die bure se hond te wees.  Tog het jy jou tandeborsel by ons huis gelos, jy het altyd maar weer en weer jou op my vensterbank tuis gemaak.  In die hoop dat niemand jou gaan sien en huistoe stuur nie, min wetende dat jou stert jou altyd verraai het.  Jou ma het later die slagoffers van groot honde geword.  Nogsteeds het jy klokslag by ons opgedaag.

Tot daardie Donderdagaand toe jy per ongeluk in ons erf raak gery is.  Jy was toe omtrent ‘n jaar oud gewees.  Ek onthou hoe jy onder die wiel vasgepen was.  Ek het nog by myself gedink dat ek doodseker moet maak watter kant toe die kar moet ry, anders is jy dood.  Jy is teen die spoed van lig daar weg.  Ek het jou om die hoek gekry, toe ek aan jou geraak het, het jy my middelvinger stukkend gebyt.  Ek het vandag nog die letsel.  Nadat ek kalmerend met jou gepraat het, het jy my darem toegelaat om jou op te tel.

Jou baas het gereken dat jy geskiet moes word as jy te seer gekry het.  Die volgende dag het sy jou kom haal, maar teen die Saterdagmiddag het jy nog nie mediese behandeling gekry nie.  Dit was toe dat ek jou vir my gevat het.  Jy het jou bekken in die ongeluk gebreek.  Ek het die veearts met my sakgeld betaal en jy moes onder andere ‘n aborsie kry en reg gemaak word. 

Van toe af kon jy openlik op die bed slaap.  In die winter was dit styf teen my onder die komberse.  In die somer was dit op ‘n punt waar jy nie afgeskop sou word nie.  Soms het jy met jou kop om my kussing gelê, maar was vinnig afgesmyt.  Net omdat ek my bed met jou gedeel het, het dit nie die kussing ook ingesluit nie.

Wanneer jou hare lank was, het die mense gedink dat jy ‘n klein Engelse Skaaphond was.  Nadat ons verhuis het na ‘n huis wat nie vir jou toiletvriendelik was nie, het jy dikwels saam met ons gery.  Ek moes toe koshuis toe gaan en dit het jou ‘n ruk lank geneem om dit te aanvaar.  Jy was ‘n hond wat ‘n paar keer kerk toe gegaan het en wat self al ‘n begrafnis of twee bygewoon het. 

Jy het ‘n leeuhart gehad, jy was die dominante hond op die erf.  Dikwels was jy te dapper vir jou klein lyfie, ons moes male sonder tal keer dat jy nie een of ander groot hond die stryd aansê nie.  Ons moes dikwels keer dat jy nie ‘n kuiken ontvoer om self groot te maak nie.  Jy het die hoenders mooi aan hulle vlerke uit die huis uit gesleep.  Wanneer daar ‘n siek/swak hoender was, het jy hom opgepas tot iemand kon kom help het. 

Later het ek jou net vakansies gesien, nog later het ek jou darem een keer ‘n maand gesien. Altyd was jy uit jou vel uit om my te sien, nooit het jy my verwyt dat ek  jou solank alleen gelos het nie.  Tot daardie een naweek wat ek jou gebad het en vergroeisels by jou ontdek het.  Plaas het ek jou toe veearts toe geneem.

Die volgende maand was dit te laat.  Jou niere het begin ingee.  Jy wou nie eet nie en het melk en water opgebring wat jy wel ingekry.  Daardie Goeie Vrydag het ek jou op my bed getel (jy kon nie meer spring nie) en gebid dat jy op jou eie terme moes doodgaan.  Jy het nie.

Die veearts was simpatiek gewees, maar dit was duidelik dat jy uitgesit moes word.  Hy het voorgestel dat ons jou huistoe neem om te groet, maar ek kon jou nie langer daardeur sit nie.  Toe ek jou groet het jou oë my vertel dit is okay.  Ek het nogtans soos ‘n kind gehuil en nie omgegee wie my sien nie. 

Jy was vir my ‘n goeie hond gewees.  Ek was nie altyd vir jou ‘n goeie baas gewees nie.  Ek raak vandag nog hartseer as ek aan jou dink.  Ek sal jou altyd onthou.

Breinvasbrand:  Wie was die eerste Dulux hond wat die rol vir 8 jaar lank vertolk het?

Breinlosbrand:  Olga was reg met Storage (stoorplek).





Veels geluk, Tina Turner

26 11 2009

Ek sien Tina Turner is vandag 70.  En sy staan nie een tree terug vir die veel jonger dames in die popwêreld nie.  Ek moet darem ‘n video of twee van haar plaas.