Tegnologiemode

29 11 2011

Ek het onlangs besef hoe baie kinders soek Blackberrys en iPads.  Ek moet erken dat ek glad nie om gaan gee vir ‘n Blackberry of selfs ‘n iPhone nie, maar ek is skaars bewus wat ‘n iPad is.  Ek het nie juis ‘n idee wat ‘n mens daarmee maak nie of waaroor die bohaai gaan nie. Ek kom goed klaar sonder een.  Moontlik omdat ek nie weet wat ek mis nie.  Diep binne in my is ek nogal oortuig dat dit nie veel is nie.

Ek moet bieg dat ek glad nie besimpel is oor gadgets nie.  Ek is jonk genoeg dat nuwe goed my nie intimideer nie en ek kan dit gewoonlik gou uitpluis.  As ek wou en eerlik – ek wil nie.  Ek het nog steeds nie ‘n skottel en DSTV nie.  My TV is nog die ou bokstipe en my DVD speler kan basies net DVD’s speel.  My hoëtroustel het ek al vandat ek op skool was en selfs toe het ek nie belang gestel aan iets wat 3 CD’s kon speel nie.  Ek gebruik padkaarte of aanwysings as ek na ‘n onbekende plek moet gaan.  Wel, as daar geen ander genade is nie, is daar altyd Google Maps.  My rekenaar is nie ‘n tegnologiese wonderwerk nie, hoewel dit die nuutste windows gehad het toe ek dit gekoop het.

Ek sien bloot net nie die nut in om iets te vervang sodra daar iets meer gevorderd op die mark is nie.  Ek dink nie outomaties dat meer gevorderd noodwendig beter is nie.  Dit irriteer my inderwaarheid grensloos dat daar die verwagting is dat ‘n mens elke jaar of twee jou elektroniese goed met vervang.  Ek sweer deesdae word die goed net gebou om ‘n jaar of wat te hou.  Dit is nou ook nie asof dit net R2 ‘n dosyn kos nie.

Eintlik is my enigste verwagting in my elektroniese toerusting dat ek nie moet sukkel nie.  As ek ‘n sekere funksie wil gebruik, moet dit blerrie werk en dit moet dadelik werk.  As ek nou wel ‘n GPS gehad het en die simpel ding het my na ‘n verkeerde plek geneem, sal ek dit net daar stukkend trap.  Dit blyk al hoemeer om ‘n onmoontlike verwagting te wees.  Ek wil beslis nie heeldag aan verskonings dink oor hoekom dit nie werk soos dit moet nie.

Ek gun elke diertjie hulle plesiertjie.  As gadgets jou hartjie laat tjoklits klop, gaan vir goud.  Persoonlik het ek net beter goed om my tyd en geld op te spandeer.  Wel, behalwe as ek tog iets MOET koop, dan kan dit netsowel die nuutste op die mark wees.

Hoe voel jy oor gadgets en die nuutste elektroniese toerusting?

Breinvasbrand:  Wie was die stigters van Sony?

Breinlosbrand:  Olga was eerste reg met 6 Augustus 1992.





Jaareind Partytjies

17 11 2011

Dis die maand November, die maand van partytjie hou.  Die maand wat elke plek waar jy op een of ander manier betrokke is hulle pond vleis soek.  Die maand wat jou verskonings vinnig uithardloop en dat jy na die ou getroues moet terugval.  Ek meen, hoeveel keer kan jy nou by die huis bly omdat jou gunsteling advertensie op gaan kom en jy dit nie kan mis nie?

Daar is seker meriete daaraan om ‘n jaar in ‘n tydlyn voor te stel.  In Januarie begin alles met ‘n groot gejuig.  Die wiele kom aan die draai, topspoed teen die middel van die maand.  Mens kry eers tyd om in April asem te skep.  Die keer is die wegspring stadiger, maar die spoed word opgebou.  Na die winter kom almal agter die pas is te stadig vir alles wat gedoen moet word.  In Oktober sleep jou tong al op die grond, maar daar is alles wat moet klaar.  Dan kom November en alle moontlike vrye tyd word deur sosiale verpligtinge opgesuig.  Dan is dit Desember waar jy maak of jy werk en darem ‘n bietjie tyd kry om jou wiele te pomp en jou battery na te gaan.

Maar ek praat nou van November (Oom Leipoldt se woorde verdraai so lekker).  Orals waar jou naam opgegee was, kom daar nou ‘n opdrag om hulle jaareindfunksie by te woon.  Ek wonder altyd vir wat?  Al kan ‘n tydlyn gebruik word, is jare eintlik sirkels.  Volgende jaar gaan ‘n mens tog maar net aan waar jy opgehou het.  Mens kan maar net hoop.

Dit begin by die werk se funksie – in werkstyd sodat geen verskoning nodig is nie.  Ek het al probeer om afsprake in die tyd te maak, maar wanneer ek my oë uitvee is dit geskuif en moet ek saam gaan partikie.  Goed en wel, lang dienstoekennings moet iewers uitgedeel word en die baas moet iewers dankie sê.  Die kos is lekker en almal vergat hulle name op die dansbaan.  Ek skop darem nie te heftig nie.

Dit is al die ander wat my lam maak.  Orals waar jy antwoord gegee het, nooi jou vir hulle afsluiting.  Elke komitee, elke vereniging, orals waar hulle jou naam ken – al ken jy nou nie juis hulle name of is jy lus om dit te leer ken nie.  Selfs die kerk en gimnasium.  Regtig?  Is die groot afsluitings regtig so noodsaaklik?

Ek is maar op my beste ‘n suurknol en sê maklik nee sonder ‘n verskoning.  Ek kan self nie beweeg met my dagboek nie.  Wat nog van iemand wat van sosiale geleenthede hou?  Wat is in elk geval fout met ‘n kaartjie wat “Happy Happy” sê?

Hou jy van die tyd van die jaar?  Hou jy van al die funksies wat nou kop uitsteek?

Breinvasbrand:  Wat is die geboortesteen van November?

Breinlosbrand:  JWW was reg met Oubaas





Alles in die naam van skoonheid

15 11 2011

Somer is seker ‘n tyd om weer uit te haal en te wys.  Nou nie noodwendig alles nie.  Maar jou voete kom nou weer in sandale, die rokkies en broekies raak korter en jy wil dalk ‘n draai op die strand maak.  Dit kan jy nie in jou winter toestand doen nie – wel, soos ek van die tydskrifte verneem.  Skielik is die gims oorlaai met almal wat hoop hulle kan die winterskade ongedaan maak.  Almal is op ‘n dieet om al die moeite in Desember ongedaan te maak.

Die oefening, diëte en die moontlike gesigs, voet en selfs hand behandeling is seker normaal en kon nie juis skade doen nie.  Skoonheidsterapeute moet darem ook lewe en ‘n Kersfees bonus sal welkom wees.  Tog is daar mense wat vir elke weird storie of belofde val.  Ongeag hoe dit met kos, sjokolade of drank mors.  Die behandeling kan selfs walglik wees, maar as dit hulle dalkies jonger gaan laat lyk, sal hulle dit gaan probeer.

Cleopatra het blykbaar altyd in melk gebad.  Ek het nog altyd by die blote gedagte daarvan gegril, terwyl ek baie lief is vir ‘n koue glas melk.  Veral as dit saam met ‘n koekie kom.  Ek hoor daar is ‘n behandeling waar jy in bier bad.  Daar is glo ook ‘n biermasker vir jou gesig.  Dit kan seker nog gaan, maar ek weet darem nie of ek vir slakslym gesigroompie sal val nie.  Daar is selfs mense wat hulle gesigte met urine was.

Masserings is ‘n perd van ‘n ander kleur.  Persoonlik hou ek nie daarvan as mense aan my druk en vroetel nie.  Daar is ook nie juis ‘n kans wat ek gaan betaal om geboelie te word nie.  Ek verstaan daar is massering mishandeling wat met sjokolade gedoen word.  Ek is nou nie die grootste aanhanger van sjokolade nie, maar wat ‘n vermorsing.  Ek sal goeie strek oefening kry soos ek dit van my rig sal wil aflek.  Dit is darem nie pynlik nie.  Daar is ‘n behandelink waar daar ‘n vakuum gevorm word met warm glasse op jou vel.  Dit is nog niks.  Hoe sal jy daarvan hou om met takke gelooi te word – alles in die naam van goeie bloed sirkulasie?  En net om seker te maak jy behou die sensasie word jy agterna met koue water gegooi.

Een behandeling wat my so fassineer dat ek dit sommer sal probeer is ‘n Thaise / Japanese Vis pedikuur.  Jy druk jou voete in die vissies se dam en hulle vreet al die dooie velletjies weg.  Blykbaar is dit glad nie seer nie, net kielierig.

Het jy van weird behandelings gehoor?  Enige van hulle al self probeer of oorweeg?

Breinvasbrand:  Wie was die stigter van L’Oreal?

Breinlosbrand:  Mense in Suid-Afrika was blykbaar altyd 07:00 gehang.





Uithou Pryse

28 10 2011

My heel laaste dag in Gr 1 het ek meer as net ‘n rapport gekry om huis toe te vat.  Ek was die trotse eienaar van ‘n harde papier vir 100 % skoolbesoek vir die afgelope jaar.  Dit was my eerste sertifikaat wat ek op skool gekry het.  Daardie tyd het ‘n mens in st5 ‘n sertifikaat van die Departament van onderwys gekry om te wys dat jy 7 jaar lank die banke blink gesit het.  Teen die tyd was ek nie meer beindruk met sertifikate nie, maar die een het my aandag gekry.  Dit was selfs nog dunner as ‘n gewone stukkie papier.  Ek meen, na 12 jaar kon ek seker ‘n behoorlike stuk karton gekry het.  Daar het die sertifikate vir skool besoek opgedroog, behalwe vir ‘n vermelding in Gr 12.  Die keer het ‘n wel ‘n stukkie karton gekry:  ‘n A6 grote.  Die trofee wat daarmee saamgaan was beduidend groter.

Daar was altyd gespot oor ‘n goue horlosie wat na 20 jaar getroue diens uitgedeel is.  Soos ek verstaan is dit deesdae ‘n ongewone prestasie.  Mense se asse begin na ‘n paar jaar jeuk en maatskappye word gewissel soos onderklere.  Waar dit in die verlede ‘n klad op jou naam kon wees, is dit deesdae ‘n aanvaarde gebeurtenis.  Dit sê blykbaar ook iets van jou ervaring.  Baie maatskappye beloon ook deesdae werkers wat nooit gerieflike maagwerk gekry het die afgelope jaar nie.

Bekhou en uithou in die huwelik is deesdae nie meer algemeen te vinde nie.  Ek het gister so ‘n bietjie rondgekrap vir die tradisionele geskenke vir mense wat die groot mylpale behaal het.  As jy ‘n 100 jaar lank met ‘n man uitgehou het, is dit basies sy plig om jou ‘n 10 karaat diamant te gee.  Die vangplek is natuurlik dat jy en hy nog moet lewe.

Ek neem aan dat ‘n oom wat ‘n 100 jaar getroud is, seker ten minste 116 jaar oud is.  Behalwe natuurlik as hy as ‘n kleuter getrou het, die ou mense het mos maar  vreemde goed toegelaat.  Nie dat dit saak maak nie, maar na ‘n goeie 40 jaar op pensioen sal sy bankbalans nie sommer sulke geskenke kan verduur nie.  Ek het al gesien wat kos diamante van minder as ‘n karaat en ek dink nie eers my 12 jarige fietspomp sal die prys van ‘n 10 karaat diamant kan weerstaan nie.  Dalk deel die voorste juweliers die knewels sommer verniet uit.  Dit is nie elke dag dat iemand hulle 100ste herdenking vier nie.

Daar is tog ander unieke situasies wat ook ‘n prys verdien.  Dink aan iemand wat 50 jaar langs onaangename bure bly sonder om ‘n moord te begaan.  Iemand wat jare lank met die internet sukkel en nie met ‘n masjien geweer lostrek nie (prys moet verkieslik internet wees wat nie sukkel nie).  Dalk die persoon wat jare lank Zuma se PR doen.

Watter uithoupryse reken julle is daar ‘n mark voor?

Breinvasbrand:  Wie is huidiglik die persoon wat die langste in ons parlement diens gedoen het?

Breinlosbrand:  Olga was reg met die Isley Brothers





27 10 2011

Daar is mense wat beslisde winter mense is en dan is daar natuurlik diegene wat net lewe vir somer.  Ek is seker tussen in, ek kla as dit winter is en ek kerm as dit somer is.  Seker maar soos die meeste mense, maar ek sal dit erken.

Die afgelope paar dae kon ek aardverwarming voel.  Ek is die grootste deel van die hittegolf gespaar danksy ‘n kantoor met lugverkoeling.  Soms moet ‘n mens egter die veilige, koel hawe verlaat en dit is dan wanneer jy met ‘n hitte kombers toegevou was.  Ene wat jy boonop nie kan afsmyt as dit ongemaklik raak nie.  Die ergste van alles is dat ‘n mens nie eers na ‘n donderstorm kon uitsien om dit te verlig nie.  Selfs skemer bring nie enige verligting nie.

Die humiditeit het my laat wonder of ek nie maar die hitte kan opkap en bêre nie.  Dit sal dalk ‘n bietjie werk neem, maar dit sal dan beslis aangenamer wees.  Wanneer die winter kom, kan ek die hitte weer uitpak en aanwend soos benodig.  Daar is beslis oorvloed, dus kan ek dit dalk in die winter verkoop ook.  Omgewingsvriendelik verwarming.  Ek sal ryk genoeg raak om nooit weer aan die weer uitgelewer te wees nie.

Dit is helaas net wensdenkery.  Dit blyk of dit ‘n uitmergelende somer gaan wees en ons moet maar die beste van die saak maak.  Ongelukkig kan ‘n mens nie onder ‘n sproeier sit en lees nie, maar jy kan dalk ‘n plan maak om ‘n fliek so te kan kyk.  Of sommer net sit en droom.

Vandag wil ek weet hoe jy die beste van somer maak?  Wat doen jy vir verligting van die hitte en hoe buit jy somer uit?

Ek was seker maar ‘n krokodil in my vorige lewe.  Ek wil net in die koelte sit en my mond laat oophang.  Niks anders nie.

Wel, dalk eet en drink.  Somertyd is die tyd van waatlemoene, mango’s en ander sappige vrugte.  Ideaal om jou van binne te verkwik.  Somer is ook ideaal vir sushi en koue vleise.  Gemmerbier en koeksisters!  Alles goed waarvoor jy nie eers jou kolletjie onder ‘n boom met verlaat nie.

Breinvasbrand:  Wie het ‘n treffer gehad met The Heat is On in 1975?

Breinlosbrand:  Selene was reg met Impulse.





My huis, my reëls

21 10 2011

Na 3 ure se gesukkel gisteraand plus 2 ure se gesukkel vanoggend om iets hier uit te rig, is ek beslis nie besonders lus om te blog nie.  As Vodacom en MTN jou in die steek laat, dan is jy geskroef.  Ek neem aan die heelal probeer my iets vertel.

Reëls, oor die algemeen is nogal lief vir diskriminasie.  Vra maar enige skoolgaande kind.  Reëls wat hulle moet respekteer steur sogenaamde volwassenes hulle selde aan.  Jy mag nie vloek nie.  Jy moet ‘n sekere tyd by die huis wees en mag net uitgaan wanneer iemand weet waar jy is.  Jy mag nie drink nie.

Reëls word dus strenger toegepas met hoe jonger die persoon is, met goeie rede ook.  Dit sluit natuurlik nie die “morele reëls” in nie.  Seks wat verbode voor die huwelik is, is ononderhandelbaar op 16.  Met elke verbygaande jaar, raak dit meer en meer onderhandelbaar.  Teen die middel 20’s is dit die verwagting, maar saamwoon word nog veroordeel.  Teen die tyd wanneer ‘n persoon reeds ‘n huwelik agter die rug het, gee bitter min mense nou regtig om.  Hulle lewe en hulle kan saamwoon soos dit vir hulle lekker is.

Dit laat my aan ‘n insident dink.  Daar is ‘n oom in sy tagtigs wat saam met sy wettig getroude vrou in die ouetehuis woon.  Soos die oom dit self beskryf, is hy baie lief vir sy familie.  Daarmee bedoel hy nie net sy eie en sy vrou se kinders en kleinkinders nie.  Elkeen van die uitgerekte Smit familie is welkom.  Solank jou van op een of ander stadium Smit was, kan jy maar aan sy deur kom klop.

Ironies genoeg is een van die mense wat baie getrou met hom kontak behou van sy broerskind geskei.  Vir jare lank is sy dus streng gesproke nie familie nie, maar soveel jare kontak geniet hulle mekaar.  Sy bel die oom tot sy groot vreugde gereeld.  Bel is een ding, maar ‘n regte kontak besoek is tog meer besonders.  So beplan – kom ons noem haar Magda, in haar 50’s al – toe om by die oom ‘n paar dae oor te staan.

Sy kry kaartjies vir haar en haar lewensmaat (iemand met wie sy al jare lank ‘n tafel, bed en huis deel, maar nie mee getroud is nie) en bel die oom oopgewonde met die goeie nuus.  Natuurlik word sy dadelik gul genooi om te kom oorbly.  Sy en Chris aanvaar die aanbod met dank, dit was immers die idee van die begin af.

“Maar Magda, is jy en Chris dan nou getroud?”

“Nee, Oom, ons bly saam.”

“Nie onder my dak nie.” snork die oom verontwaardig.  “Ek het net een spaarkamer, maar ek sal slaapplek by die bure vir Chris reël.”

Wat hy ook getrou aan sy woord gedoen het.  Magda en Chris het egter nooit opgedaag nie, maar soos ek verstaan is daar darem nou al ‘n datum vasgestel.

Breinvasbrand:  Hoe oud is Nelson Mandela?

Breinlosbrand:  Presley Chweneyaga





Jou Daaglikse Muur

14 10 2011

Dit is seker ‘n redelike aanname dat ‘n persoonlike rekenaar jou as persoon moet weergee?  Wat kan gesê word is dit die prentjie is wat jou groet van so ‘n rekenaar?

Dit sou baie onregverdig wees om sommer dadelik aan te neem dat die persoon vervelig is.  Daar is mense wat regtig nie weet hoe om dit te verander nie.  Windows kom gewoonlik met ‘n redelike aantal agtergronde, wat dalk ‘n bietjie minder bekend is.  Dit skree egter nog steeds Windows en is dus nog nie persoonlik nie.

Dit is altyd vir my interessant wat mense vir hulle agtergrond kies.  As ek nou ‘n sielkundige was, het ek seker ‘n verklaring vir elkeen se keuse gehad. Vrouens veral is geneig om die agtergrond ‘n foto van hulle kinders of dan ten minste die baba van die huis te maak.  As daar nie ‘n kind is nie, pryk die ou van die oomblik, haar man of selfs ‘n groepfoto van haar vriendinne op die agtergrond.  Troeteldiereienaars sit ook graag hulle dierlike vriende op.

Mans is geneig om eerder ‘n ding op te sit.  Iets soos ‘n gevegsvliegtuig of ‘n kar wat hulle net op ‘n prentjie sal sien.  Hoe ouer die man is, hoe groter is die kans dat waarmee die rekenaar ookal uit gekom het, daar gaan pryk.  Hy sal nie eers daaraan dink om iemand te vra om dit te verander nie of selfs weet dat dit kan verander nie.

Daar is natuurlik ook die landskapfoto’s.  Self geneen of gesteel van Google.  Dit is interessant, maar nie te intiem nie.  Veral as jou rekenaar soms vir voorstellings gebruik word.  Ek ken iemand wat ‘n foto van haar sitkamer op gesit het.  Na ‘n paar laat nagte, het sy besluit dit is die enigste manier waarop sy haar huis gaan sien.

Dieselfde geld vir selfone.  Die voorgestelde beelde vir jou agtergrond word dan dikwels met “branding” bederf.  Dit is mos nie asof die foon in elk geval Vodacom / MTN / WATOOKAL skree as jy daarna kyk nie.

Wat gebruik jy om jou agtergrond van jou rekenaar of selfoon te verfraai?  Wat was die interessantse wat jy al gesien het?  Dink jy dit verklap iets van iemand?

Breinvasbrand:  Watter uitvinder wat by Apple werksaam was, is onlangs oorlede?

Breinlosbrand:  Olga was reg dat sy nie getroud was nie.








Follow

Get every new post delivered to your Inbox.

Join 155 other followers