Die Diana Legende

31 08 2017

Een van die grootste flieks die jaar was Wonder Woman.  Natuurlik het ek dit ook gaan kyk, al kon ek nog nooit regtig die bohaai van Wonder Woman insien nie.  Ek het met Saartjie en Bienkie groot geword, nie met strokiesverhale nie.

In elk geval, ‘n mens kan seker nie ‘n superheldstorie te ernstig op neem nie.  Daar was nogtans iets wat my soos ‘n stukkie vleis tussen my tande gepla het.  Diana is die Romeinse godin van jag en ook die beskermheer van die Amasones.  Haar Griekse eweknie (of is dit haar Griekse naam) is Artemis.  Nogtans, bevind die Diana wat Wonder Woman is haar tussen Griekse opperweses.  Sy baklei byvoorbeeld teen Ares – nie teen die Romeinse weergawe Mars nie.

Nietemin, Diana is geen nuwe naam tot legendes nie.  As Romeinse godin het sy duisende jare gelede haar verskyning gemaak.  Die Amasones hoort ook min of meer in daardie tyd.  Wonder Woman het in 1941 die eerste keer haar buiging gemaak.  Diana is dus seker die naam van legendes.

So dan ook met die Diana wat op 1 Julie 1961 haar verskyning op die aarde gemaak het.  Die Diana was nie ‘n jagter nie, maar eerder een van die mees gejagde vrouens op aarde.  As ‘n mens in aanmerking neem dat sy net 36 jaar op aarde was, sou Artemis dalk ‘n meer gepasde naam gewees het.  ‘n Griekse naam vir ‘n (Griekse) tragedie.

Vandag is 20 jaar na Diana se dood, maar sy is nog lank nie vergete nie.  Ek meen daar is nou nog mense wat die koningshuis nie kan vergewe oor hoe hulle haar behandel het nie.  Die stoere aanhangers gee nie eers regtig om oor die anderkant van die storie nie.

Wat kan van Diana gesê word wat nog nie gesê is nie?  Ek hou nie daarvan om ander se menings te deel nie.  Dus sal ek Diana die rebel vier.

Diana was iemand wat nie ‘n duiwel om gegee het wat mense van haar dink nie.  Dalk moet ek dit op ‘n ander manier stel.  Sy was ‘n rebel wat nie net teen sosiale verwagtinge baklei het nie, maar dit met mening afgebreek het.

Neem maar die jong Diana Spencer.  Haar pa het ‘n graaf geword toe Diana 14 was en dus was sy toe al Lady Diana.  Die Spencers was ‘n familie van aansien – Charles het byvoorbeeld op ‘n stadium by Diana se ouer suster vlerk gesleep.  Ek neem aan die Spencers was nie te gelukkig dat Diana as ‘n kinderoppasser en bediende gewerk het nie.  Mens verwag dit mos immers nie van adelike bloed nie.

Sy het in in 1981 nie gehoorsaamheid aan haar man beloof nie, iets wat glo baie ongehoort in die tyd was.  Sy het boonop ou Charlie se name omgeruil met haar troubeloftes.  Sy het nooit weggeskram vir taboes nie – sy het nooit geskroom om aan melaatses en VIGS lyers te vat nie.  Weereens iets wat skokkend vir die tyd was.  Neem ook maar die mans met wie sy na haar egskeiding uitgegaan het.  Daar was meer as een Moslem onder hulle gewees.  (Ironies, siende dat sy nie hou van gehoorsaamheid aan ‘n man nie.)  Dalk omdat haar eks-skoonma hoof van ‘n Christelike kerk was?

Wie sal ooit weet?  Diana het haar kers hard gebrand en dus is dit vroeg-vroeg al uitgebrand.

Wie is jou gunsteling Diana legend?


Aksies

Information

6 responses

31 08 2017
seegogga

Hell harh no fury like a woman scorned. Charles is tot vandag toe nog steeds die verloorder.

4 09 2017
Xena Phoenix

Gee die duiwel wat hom toekom.

Hy het persoonlik haar lyk in Frankryk gaan haal. Dit was nie nodig nie. Dalk was hy in haar dood ‘n beter man vir haar as toe sy gelewe het. Aan die anderkant weer – sy is die ma van sy seuns.

5 09 2017
seegogga

ja ne, lewe is snaaks…

2 09 2017
Olga

Hiers ek weer, hiers ek weer. Netwerk het ons darem vanaand ‘n bietjie speeltyd gegee. In elk geval, ek was nog nooit ‘n Diana aanhanger nie. Sy het presies geweet waarvoor sy haar ingelaat het, Sy kon ook seker bietjie versigtiger om gegaan het, dan weer, Charles as Charles maar net die helfte van die tyd wat hy aan perde, honde en sy tuin aan haar bestee het, was sy waarskynlik ook nog lewendig en steeds sy vrou. Maar nou ja, wie se hy het nie ‘n perremerrie ryker geword nie?

4 09 2017
Xena Phoenix

As Charles nie sy al sy tyd aan perde, honde en sy tuin spandeer het nie, watse Engelsman sou hy gewees het? 😉

2 09 2017
Olga

1
2
3
Mapstieks, hiers geen krom tone nie.

Laat 'n boodskap

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out /  Verander )

Google photo

Jy lewer kommentaar met jou rekening by Google. Log Out /  Verander )

Twitter picture

Jy lewer kommentaar met jou rekening by Twitter. Log Out /  Verander )

Facebook photo

Jy lewer kommentaar met jou rekening by Facebook. Log Out /  Verander )

Connecting to %s




%d bloggers like this: