Presies 40 jaar later en nog steeds ‘n treffer!!

31 10 2015

 





EEUW uit beginsel

30 10 2015

Die mens bly maar ‘n fasinerende dier.

Ek moet dalk begin deur te noem dat ek baie lief is vir kos.  Hoewel daar sekere goed is waaraan ek nie my mond sal sit nie, is ek nie te puntenerig nie.  Daar moet regtig iets groots fout wees voordat ek die kos sal wegstoot.  Dit blyk soms dat my standaarde in die geval ver te kort skiet.

Die meeste mense het hulle afkeur / misnoeë / afgryse al tot ‘n fyn kuns vervolmaak.  Ek let dit altyd in ‘n vliegtuig op.  Hulle sal die kos neem en dan ondersoek asof dit ‘n petribak vol bakterieë is.  Volgende sal die vurk geneem word en iets heel wantrouig beproef word.  Ek het nog nie iemand gesien wat die kos summier uitspoeg nie of selfs ‘n gesig trek nie.  ‘n Paar dapper siele sal dit selfs ‘n hap of 3 verder neem.  Die bakkie word dan met die grootste minagting weggestoot.  Die volgende dis word beproef en die proses word herhaal tot alles op die skinkbordjie afgekeur is.

Ek sal myself verstout en sê dat hulle van die begin af geweet het dat hulle die kos gaan haat.  Hoekom dit dan enigsins neem?  Dit bly vir my ‘n groot sonde om met kos te mors.

Dan weer, ek verwys na vliegtuigkos in my voorbeeld.  Iets wat blykbaar altyd sleg is, al het ek persoonlik nog nooit rede gehad om te kla nie.  Blykbaar het die minister van vervoer jare terug die parlement gevra of hulle wil vlieg of vreet?  Dit was in antwoord op ‘n klagte van die swak kos wat die destydse SAL voorgesit het.

Dit is egter vir my treffend dat die dramatjie nie net op vliegtuie afspeel nie.  Ek het al dikwels gesien hoe iemand iets in ‘n supermark, stalletjie of self in ‘n restaurant sal bestel en dit dan sou behandel asof dit mens-brein-en-niere-sop is.  Asof dit blote bediening daarvan (al het hulle dit self bestel) hulle beledig het en nie hulle tonge waardig is nie.

Hoe voel julle oor vliegtuigkos?  Is my standaarde besonders laag of is mense net bederf?

Breinvasbrand:  Voltooi:  Die kool is die sous ______________!

Breinlosbrand:  Daniël Bezuidenhout was reg.  Duitsland se naskoolse studies is gratis vir alle Europeuse studente en internasionale studente (volgens my bron).





Fees must fall

27 10 2015

Iewers het iemand genoeg dat verlede week se studente oproer die grootste sedert 1976 was.  Daar was darem nie studente doodgeskiet nie, maar die waterkanonne en ander afskrikmiddels het gewerk.  Studente was onversetlik.  Hulle het op geen verhoging vir die 2016 akademiese jaar aangedring nie.  Hulle het voet by stuk gehou en het op die einde hulle sin gekry.  Blykbaar is almal nie gelukkig nie.  WITS soek gratis onderwys en AFRIFORUM kla verder oor hulle reg op onderrig, in Afrikaans en dat alle kwotas summier geskrap word.

‘n Besige week onder studente.  Veral as ‘n mens in ag neem dat die jakarandas se blomtyd aan die verbygaan is.  Dit is dus eksamentyd, nie die mees ideale tyd om te gaan protesteer nie.  Die studente het nogal wye steun geniet.  Elke politieke party behalwe die ANC was bankvas agter hulle.  Elke twitter rekening het hulle steun bevestig.  Max Price, Universiteit van Kaapstad, se seun was selfs een van die wat tydens die betogings gearresteer is.  Price was vinnig om te verkondig dat hy trots op sy seun is.

Gratis onderwys is seker nie ‘n slegte ding nie.  Dit is natuurlik hartseer dat verdienstelike jongmense op naskoolse studie uitmis omdat hulle dit nie kan bekostig nie.  Die voorstanders van gratis onderwys argumenteer dat meer gegradueerdes, ‘n groter arbeidsmag sal beteken wat natuurlik ‘n groter belastingbron sal wees.  Daar sal dan ook minder staatstoelae betaal hoef te word.  Dit klink Utopies.  Waarskynlik omdat Utopië ‘n fiktiewe wêreld is.

Daar is ‘n ander kant ook.  Ten spyte daarvan dat universiteit opleiding so duur is en nie toeganklik vir almal is nie, is daar baie gradueerdes wat sukkel om werk te kry.  Gaan die arbeidsmag dan werklik vergroot?  Suid-Afrika kort immers werkskeppers en dit is nie noodwendig ‘n snotneus met ‘n splinternuwe graad nie.

Netsoos daar mense is wat dit doodeenvoudig nie kan bekostig om te studeer nie, is daar ander wat die voorreg om te studeer misbruik.  Daar is studente wat jare (dekades) lank op universiteite sit sonder om iets te bereik.  Gaan gratis onderrig dit nie vererger nie.  Dit is nie noodwendig die lui studente wat nie wil gaan werk nie.  Ek ken ‘n meisie wat voor my op skool was.  Teen die tyd wat ek graad gevang het, was sy nog steeds ‘n eerste jaar.  Nie omdat sy gedruip het of sleg gevaar het nie.  Sy is een van daardie mense wat elke wakker oomblik agter die boeke spandeer.  Sy het net nooit met haar ‘gekose’ graad deur gedruk nie.  Sy het onder meer keuring vir medies, tandheelkunde, aptekerswese en veearts en nykunde gehad, maar altyd besluit dit is nie vir haar nie.  (Ek wonder nou, is sy nog steeds ‘n eerste jaar?).

Ek het nou-nou ‘n opskrif gesien dat die onderwys department nie van hulle posisie wil afsien dat druipelinge deur gesit mag word nie.  Blykbaar doen dit geen kind goed om agter te bly nie.  Sal die kinders met die mentaliteit wil universiteit toe wil gaan?  Wat sal dit vir ons standaarde beteken?  Veral as die voornemende studente nie kan lees of skryf nie?  Behoort skole nie eerstens gratis te wees nie?

Wat gaan die implikasie wees as elke Jan, Mart, Sipho en Thandi ‘n graad het?  Gaan straatveërs in die toekoms ‘n BA graad benodig?

Persoonlik is ek nie teen gratis onderrig nie.  Ek betaal immers self om verder te studeer.  Ek is net nie so seker of ‘n ‘Free for all’ gaan werk nie.  Sekerlik moet daar nog streng toelatingvereistes wees en moet die studie in ‘n sekere tyd afgehandel word.  Dalk moet die staat vir almal ‘n kans gee om gratis volgens hulle sterkste aanleg / aanlegte te kwalifiseer.  Dus as jou aanlegte wys jy moet ‘n rekenmeester wees, betaal die staat vir jou B.Com (rek) graad.  As jou aanlegte wys dat jy ‘n loodgieter moet wees, betaal die staat vir jou loodgieter opleiding.  Jy gaan word nie net ‘n dokter omdat jy dit gratis kon doen, kon eis het op keuring en boonop deur gedruk is nie.  Veral as jy nie die aanleg en/of intellek daarvoor het nie.

Wat reken julle is die oplossing?

Breinvasbrand:  Wie kwalifiseer in Duitsland vir gratis naskoolse studies?

Breinlosbrand:  Olga was reg met 1918.





Toeka Tokkel Bestuur

20 10 2015

Mens sou sweer ek hou van mostert, die dat ek dit altyd na die maal uithaal.  In elk geval, ‘n paar weke gelede het Scrapy bydraes gesoek oor bestuur.  Elke mens het seker iets daaroor te sê.

Ons weet natuurlik almal dat die goue reël van die pad is om links te hou.  Dit is egter nie ‘n universiële reël nie, dit is basies net van toepassing op die voormalige Engelse kolonies.  Die ironie is dat die meerderheid van lande aan die verkeerde kant van die pad ry.  Hulle is selfs verwaand genoeg om te glo ons ry aan die verkeerde kant.  Soos ‘n Duitser my eendag vertel het:  Hulle ry regs, want ‘right’ is right.  Left is mos nie right nie.  Ek weet nie of ek saamstem nie, maar daar is seker ‘n skerfie logika daaragter.

Blykbaar bestuur 65% van die wêreld se bevolking aan die regterkant, maar 90% van die paaie hanteer verkeer aan die regterkant.  Dit is volgens Wikipedia.

Oorsee is ‘n wonderlike plek waar openbare vervoer tot ‘n groot mate die verkeerde kant vir jou uitsorteer.  Gewoonlik.  As jy in die besige sentrums bly of bereid is om deur jou ore vir ‘n huurmotor te betaal.  Dit is nou as jy een in die hande kan kry.  Oor die algemeen is dit heeltemal genoeg en is daar nie juis rede om te kla nie.  Tog kom daar iewers ‘n dag wat die enigste sinvolle besluit is om ‘n kar te huur.  Daardie kar sal dan aan die verkeerde kant gery moet word.

‘n Dag waarteen baie mense opsien.  Hallo?  Dit is en bly aan die verkeerde kant van die pad.  Al voel die meerderheid van die wêreld anders, is die meerderheid nie noodwendig reg nie.  Behalwe dat ‘n mens aan die verkeerde kant moet ry, is die kar ook gatkantom.  Dit is genoeg om enige gesonde verstand te laat besin.

In standard 5 het een van ons onnies vir ons die volgende wyse woorde geleer:  “Groter sissies as ek is al daardeur.”  Die besoekers wat aan die verkeerde kant gewoond is, bestuur sonder om te hik aan die linkerkant.  As hulle kan, hoekom kan ons nie?

Dalk omdat ons nie ‘n internasionale lisensie het nie.  Uhm!  ‘n Internasionale lisensie is eintlik maar net ‘n vertaling van jou bestaande lisensie.  Dit leer jou nie om aan die verkeerde kant te ry nie.  As groter pissies en dommer swape as jy regkom om van kant te verander, behoort jy mos ook suksesvol te wees.

Natuurlik moet ‘n mens ook rede ingedagte hou.  Dit is een ding om kop te hou na ‘n goeie nagrus, maar is dit wys om te bestuur as jy al 40 uur lank reis?  Suid-Afrikaners is nie juis ‘n wetgehoorsame nasie nie.  Baie van die lande wat ons wil besoek is baie wetsgehoorsaam.  Kan ons so op die ingewing wetsgehoorsaam word?  Soos in 100% wetsgehoorsaam?

Goeie vrae!  Nogtans wil ‘n mens nie mis nie.  Wie weet wanneer kry jy weer ‘n kans om wettig aan die verkeerde kant te bestuur?

So jy druk deur en kom agter dit is nie eintlik so ‘n groot storie nie.  Gelukkig het niemand gesien toe jy in die verkeerde kant van die kar geklim het om te bestuur nie.  Volgende keer is dit dalk net ‘n roetine besluit.

Breinvasbrand:  In watter jaar het Namibië begin om aan die linkerkant te bestuur?

Breinlosbrand:  Toortsie was reg met Andrew Lloyd Webber.





Koooeeewwwwwwiiiiiiiiiiiiieeeeeeee

2 10 2015

Hallo Maatjies!

P1230130

Die simpel Tannie Tossel maak mos of sy vergeet het hoe ek lyk!  Gmph!  So al asof sy my nie met die toon gegroet het nie.  Ek het ‘n foto en alles, maar Merriegriet sê ek kan julle nie  wys hoe lyk Tannie Tossel nie.

Ek wil net dat die plaat wys dat ek my besem kan vlieg!  Ek vlieg nie in bome en goed vas nie.  Buitendien is daar Tannie Tossel se heks vet.

Ek wil haar nie eintlik ken nie, maar dit is my verlangse, agtertoe, aangeklapte, verskoning van ‘n niggie Suielina.  Maatjies!  Daardie lelike heks hou van goue koeldrank en gooi altyd swart koeldrank by.  Merriegriet sê dit is groot sonde om ander koeldrank by rooi koeldrank te gooi.  Ek is ‘n goeie heks, wat reguit hemel toe wil gaan.  So ek mors nie met rooi koeldrank nie.

Soos julle kan sien, dans Laviga die mooiste heks nog altyd.  Beter as ou Suielina en Tannie Tossel.  Ek is die mooiste, slimste en oulikste heks wat julle ken.

Weet julle waar ek wegkruip?

1

2

3

Blok myself!