Die Evolusiebom

29 09 2015

Daar is min dinge wat mense so warm onder die kraag maak as evolusie en / of die skepping.  Die evolusioniste is net so passievol as die kreationiste (ek het geen idee waar die vieslike woord vandaan kom).  Dit sal my beslis nie verbaas as dit eendag tot ‘n oorlog lei nie.  Elke kant is so hard besig om sy kant te verdedig sonder om die ander kant ‘n regverdige spreukbeurt te gee.

Dit is eintlik lagwekkend.  Dit word immers ‘n evolusieteorie genoem omdat dit nog nie ten volle bewys kon word nie.  Ek kan seker moedswillig wees en uitwys dat daar van ‘n skeppingsverhaal gepraat word.  Die punt wat ek egter wil maak is dat die Bybel nooit noem wat gebeur het toe God die aarde geskep het nie.  “In die begin het God die hemel en die aarde geskep.”  Die Bybel gee nie die besonderhede van hoe die aarde geskep is nie.  Daar is dus niks in die Bybel wat ‘n groot knal kon uitsluit nie.

Netso is daar niks wat moontlike evolusie uitsluit nie.  Dinge raak natuurlik nog meer interessant dat daar twee weergawes van die skeppingsverhaal in Genesis is.  Die uiteinde van die saak is dat daar niks in die Bybel is wat evolusie uitsluit nie.  Terselfde tyd is daar niks in evolusie wat ‘n God in geheel uitsluit nie.  Ja, albei kante van die munt gaan stry tot hulle blou in die gesig is of met geweld hulle punt gemaak het.

Evolusie, in ‘n neutedop, is die vermoë van ‘n organisme om oor tyd by hulle omgewing aan te pas.  Dit was die eerste keer opgemerk aan dieselfde tipe voël wat op verskillende plekke opgemerk is.  Daar is toe geargumenteer dat die voëls van die verskillende plekke verskillende fisiese eienskappe het om hulle te help om in die unieke habitat te oorleef.  So daar genoeg tyd verloop (gemeet in generasies, eeue of selfs millennia) sal die voëls uiteindelik twee verskillende spesies kan vorm.  Die aanname is toe na ander spesies uitgebrei en iemand het durf vra of die mens ook so tot stand gekom het.  Tot op hede kon daar natuurlik nog niks bewys word nie.

Op skool was ek geleer dat evolusie die duiwel se werk is.  Om enigsins oor evolusie te dink, kom daarop neer dat jy glo dat die mens uit die aap ontstaan het.  Siende dat die mens na God se beeld geskep is, argumenteer evolusioniste dus dat God ‘n aap is.  Natuurlik met die ontdekking van Homo Naledi was daar gou oproepe van onder meer Vavi dat hy nie ‘n aap is nie.

Persoonlik is ek nie oortuig dat alles van een gemeenskaplike selletjie ontwikkel het nie.  In elk geval nie sonder ‘n besonderse goeie Wetenskaplike wat Almagtig is nie.  Terselfde tyd kan ek nie evolusie in geheel ontken nie.  Neem die mens byvoorbeeld.  Hoeveel mense word deesdae sonder verstandtande of selfs oogtande gebore?  Hoeveel mense se verstandtande moet uitgesny word.  Is dit alles die oorblysels van iets wat onnodig geraak het?

Ek is dus nuuskierig om Homo Naledi van nader te gaan beskou.  Terselfde tyd vermoed ek dat hulle nooit die bewys sal kry dat dit die mens se voorganger was nie.  In elk geval nie in my tyd nie.

As ek verkeerd is, wat maak dit saak?  Die Bybel het immers nooit ‘n stap vir stap verklaring gegee van presies hoe die mens gemaak is nie.

Hoe voel julle hieroor?

Breinvasbrand:  Wie is die vader van evolusie?

Breinlosbrand:  Olga was reg met London.