Ouer as ‘n dekade en nog nooit gebruik nie

26 08 2015

Scrapy toeka tokkel die week oor Wasdag.  Laat ek vir julle vandag een ding vertel.  Ek is loshande die luiste huisvrou in die hele Suid-Afrika.  Dit is nou my nederige streep wat praat – die wêreld is immers baie klein.  Gelukkig soek ek mos nie eie roem nie, ek sal maar volstaan by die slegste huisvrou in Suid-Afrika.  Ek hou nie van huiswerk nie.  Ek hou beslis ook nie van wasgoed nie

Op skool het wasgoed wat in die wasgoedmandjie geland het maar die gewoonte om skoon en netjies terug in die kas te kom.  Wonderlike stelsel, wat helaas nie met vingersklap geskiet nie.  In elk geval, dan skryf mens mos matriek en skielik verander die wêreld.  In my geval, ek het in die stad gaan swot waar ek bloot te ver was om elke week vir my ma ‘n bondel (of 3) wasgoed te bring.  Ek sou dit self moes was en wee jy!  Self moes stryk!

Ek neem aan my ma het haar nogal verlekker aan die gedagte.  So oppad universiteit toe, kry ek toe ‘n strykyster.  Daar was net een klein tegniese besonderheid waarvan sy nie geweet het nie.  Geen koshuisstudent wat sy / haar sout werd stryk iets nie.  Nie eers as ‘n eerste jaar vir ‘n senior student nie.  Ek dink ons het sommer in oriëntering geleer dat stryk onnodig is as jy jou goed direk uit die tuimeldroeër opvou.  Buitendien, in ‘n koshuis is daar ook net soveel wasmasjiene.  As jy per ongeluk 5 minute laat is, het een of ander oorhaastige siel sommer jou klere vir jou opgevou.

Helaas kan ‘n mens nie altyd ‘n student bly nie.  Die groter tragedie is dat wat netjies is vir ‘n student, is nie noodwendig wending vir jou eerste pos nie.  Weereens, geen probleem.  Ek het seker gemaak dat ek by ‘n tannie loseer wat wel wasgoed gedoen het.  Later het ek  in ‘n tuinwoonstel gewoon.  Ek het toe my klere na ‘n washuis of na my ma geneem om skoon en gestryk te kom.  Julle wil nie weet vir hoe lank nie.  Ek het bloot nie plek vir ‘n wasmasjien gehad nie.  Wie stryk as jy nie wasgoed gewas het nie?  Dus was die strykyster wat saam met my universiteit toe is, nog net so in die oorspronklike verpakking.

So word ‘n mens se studielenings afbetaal en skielik is ‘n tuinwoonstel(letjie) net te klein.  Jy kry ‘n kamermaat en trek by ‘n meenthuis.  Jou kamermaat het ‘n wasmasjien.  Die strykyster is al ‘n dekade gelede gekoop en is nog nooit uit die verpakking gehaal nie.  Dalk is dit nou die tyd om ‘n verhouding met ‘n strykyster aan te koop.  Dankie tog daar is soveel droogskoonmakers wat bereid is om vir jou te stryk.

Vandag deel ek ‘n huis met die heks en die kat.  Nie die heks of die kat kom naby die wasmasjien nie.  Ek moes toe maar noodgedwonge begin wasgoed was op ‘n gereelde basis.  Ek het lanklaas vir my ma gaan kuier met ‘n groot bondel vuil wasgoed.  Maar ek trek die lyn by stryk!  Daardie strykyster is nog steeds ongebruik.

Breinvasbrand:  Van watter land is die Speed Queen afkomstig?

Breinlosbrand:  Olga was reg met Kim Hong-Hee.





Sakkaboela

25 08 2015

Wie is bang vir ‘n petite Koreanse meisie wat opera sing op pop musiek?

Wel, laat ek vir julle een ding vertel?  As jy nog nie een van jou bang hare verloor het nie en jy nog nie eers aan die tandmuis dink nie, is daardie ooggrimering regtig skrikwekkend.  Dalk net in ‘n stal?  Hoe dit ook al sê, Kimera het vir Xena Phoenix die ritteltits gegee.  Vandag kan ek egter nie met sekerheid sê hoekom nie.

Kimera het van jongs af klassieke musiek in kore gesing.  Sy is Frankryk toe gestuur vir haar universiteitopleiding en in die tyd het sy ‘n liefde vir pop musiek ontwikkel.  Iets wat haar pa dwars in die krop gesteek het, hy het nie ooghare daarvoor gehad nie.  Kimera het selfs vir ‘n tyd lank opgehou sing weens sy afsku in pop musiek.

Kimera het later opera in Frankryk studeer.  Nadat sy graad gevang het, het sy besluit om haar liefde vir opera met pop musiek te verbind.  So het sy Popera of te wel Rock Opera geskep.  Volgens Wikipedia, persoonlik glo ek die genre was deur Queen met Bohemian Rhapsody gestig.  Sonder dat hulle klein merries bang gesing het.

Kimera se Popera het baie kritiek uitgelok, maar dit was glo besonders gewild in Suid-Afrika.  In 1987 is haar 5 jarige dogter ontvoer.  Die kind is wel ongedeerd teruggevind, maar dit het Kimera sku vir die openbare lewe gemaak.  Dus het haar loopbaan tot ‘n einde gekom.

Onthou julle Kimera?  Wie het vir julle die ritteltits gegee?  Is dit vandag nog die geval?

Breinvasbrand:  Wat is Kimera se regte naam?

Breinlosbrand:  Olga was reg met Eric Knight.





Mof en Mat

24 08 2015

Dit is nogal interessant dat almal wat graag (wil) reis, graag Switserland wil besoek.  As Heidi se tuiste, omring met skouspellende berge en vredige mere, wie wil stry?  Jy kan jou horlosie stel volgens die treine en Switserland is boonop bekend vir sjokolade en kaas.  Helaas is die Rand effens lig in die broek teenoor die Switserse Frank, maar dit is hoekom daar nie pryse op drome is nie.

Ek was bevoorreg genoeg om in Switserland te gaan draai.  Raai wat is die een ding wat my opgeval het vanaf die oomblik wat ek deur die terminaal is.  Honde!  Honde op die lughawe, honde op die stasies, honde in die treine, honde op die busse, honde in die parke en honde in die winkels.  Orals waar jy ookal gegaan het, was die mens se beste vriend welkom.  As die arme brak nou regtig nie welkom was nie, was daar ‘n plek waar die hond veilig kon wag.

In Suid-Afrika sal baie van ons onsself uitgee as diereliefhebbers.  Ons eis bloed as ‘n dier in ‘n parkeerde kar gelos word en ons eis marteling as ‘n dier mishandel word.  Natuurlik moet daar daarteen opgetree word, maar waar is diere in Suid-Afrika regtig welkom?

Gestel nou jy moet jou hond gou veearts toe neem.  Oppad terug van die veearts, moet jy stop vir melk.  Geen winkel laat diere toe nie.  Wat staan jou te doen?  Ignoreer die winkel se reëls of los die hond vir ‘n paar minute in die kar?  Dit is nie net winkels nie.  Jou hond mag nie saam met jou op die Gautrein klim nie.  Jou hond mag nie saam met jou na ‘n restaurant toe gaan nie.  Daar is selfs parke en strande wat honde nie toelaat nie.  Reis jou hond saam met jou, het baie van die russtasies langs die pad geen geriewe vir jou hond nie.  Dan praat ons nie eers van katte nie.

Is Suid-Afrika, waar die meeste mense ‘n troeteldier of meer het, troeteldiervriendelik?  Wie se skuld is dit?  Is ons te higiënies-behep vir ons eie goed?  Is ons diere goed genoeg opgelei om nie ‘n ergenis vir almal te wees nie.  Ek het geen probleem as ‘n hond by ‘n restaurant tafel eet nie, mits hy ‘n mes en ‘n vurk kan gebruik.  Indien nie, is sy plek onder die tafel waar hy nie bedel nie.  Niemand gaan tevrede wees as die hond sy been teen alles lug nie.  Versorg ons die diere na behore?  Niemand wil kos vol hondhare koop nie en niemand gaan iets wil koop wat na stink hond ruik nie.

Is daar ‘n middeweg?

Hoe voel julle?

Breinvasbrand:  Wie het Lassie geskep?

Breinlosbrand:  Olga was reg met Worsie.





En . . . mis!!!

19 08 2015

Oe!  Ek het al soveel kere getoeka tokkel met TV Programme, dat ek nie weet wat om te sê nie.  Toegegee, dit was nie voorheen vir Scrapy gedoen nie.

Televisie is maar ‘n slinkse karakter.  Niemand hou mos van televisie.  Dit is maar aan omdat die kinders / man / vrou kyk.  Dit is dalk net aan omdat ‘n mens ‘n bietjie agtergrond geraas soek.  Jy kyk nou nie regtig nie, maar tog gebeur daar iets wat jou aandag vang.  Dit fassineer jou, walg jou of irriteer jou.  Wat dit ook al is, jy moet net weet wat verder gebeur.  Terwyl jy dit probeer vastel, vang iets anders jou.  En goodness gracious, voordat jy weet, is nog iemand op die paal (wel, is jy die slaafse volgeling van een of ander program).

Dit is natuurlik.  Dit is ook snaaks hoeveel ‘n mens in die verbygang kan optel terwyl jy met die een oog televisie kyk.  Jy leer die breë storielyne ken en al die karakters se agtergronde.  Jy weet wie met wie getroud is en wie elk een se skelmpie is.  Jy weet hoekom die spesifieke persoon week na week op die rooi tapyt afgeneem word.  Dit is goed en wel.  Ten minste bou dit jou algemene kennis.  Dit kan egter net gebeur as jy iewers ‘n oog op ‘n televisie het.  Verkieslik op die regte kanaal.

Op hoërskool, het die televisie maar ver tweede gekom.  Ek was amper elke middag op straat en het ook naweke gewerk.  Ek het wel saans die programme gevolg, ook maar net toe ek koshuis toe is.  Ja, ons het toegang tot ‘n televisie gehad, maar dit was gewoonlik diegene wat eerste daar was se reg om te kies.  Party meisies het nooit die TV kamer verlaat nie, hulle het letterlik die een sepie na die ander gekyk.  Ons was oor die algemeen nie veel gepla nie, ons het beter dinge gehad om te doen as om oor ‘n program te baklei.

Ek het toe ek begin werk het, nie ‘n televisie gehad nie.  Ek het op ‘n stadium my broer se televisie geleen, maar ek het eers toe hy dit weer nodig gehad het, daaraan gedink om ‘n televisie te koop.  Dit is nou vir die aande wat ek wel by die huis was.  Miskien, as daar iets wat die moeite werd is om te kyk.  Ek dink DSTV is belaglik duur (ek koop eerder DVD’s en boeke), dus het ek net die gewone kanale.  Tot tyd en wyl my TV vir openbare uitsending geskik is.  Nie dat ek sal treur nie, daar is letterlik niks wat ek wil kyk nie.

Punt wat ek wil maak, is dat jy nogal kan mis as jy nie toegang tot ‘n televisie het nie.  Goed en wel, jy kan nie mis wat jy nie ken nie.  Jy lyk maar net dom as jy verward rondpik oor McDreamy of McSteamy (ek het eers in die 8ste seisoen daarmee opgevang – nie op TV nie).

Dit is nie al wat ek gemis het nie.  Ek het geen idee waaroor die ophef van Friends of Dawson Creek is nie.  Dit het nog nooit oor my TV stel gekom nie.  Ek het gehoor Orange is the new Black is briljant.  Ek aanvaar maar die mense se word daaroor.  House was blykbaar ook briljant, maar ek kon met die paar episodes wat ek daarvan gesien het dit nie insien nie.  Hoeveel hospitaal reekse kan daar wees?  Ek het net gehoor van Scrubs, ER en Binnelanders.

Het ek gemis?  Ek het geen idee nie.  Ek kyk gewoonlik die programme wat mense my in bloed belowe briljant is.  Ek het so onlangs met Dexter begin.  Ek vang alles in ‘n paar weke op (ipv jare as jy dit op die televisie volg).  Soos in letterlik alles.  Ek kyk met die een oog en as iets my kielie vra ek my goeie vriendin google.  Wanneer ek dus met ‘n reeks klaar is, is daar niks wat ek nie daarvan weet nie.

Ek is nie een van daardie mense (tot almal wat dit waag om saam met my TV te kyk) wat in spanning my naels afkou tot alles oopgegooi word nie.  Ek kan lewe met kunsmatige spanning, nie met nuuskierigheid nie.

Waar laat dit my?  Dalk ‘n obsessiewe TV kyker, al is dit nie noodwendig uitgesaaide TV wat ek kyk nie.  Ek het persoonlik niks teen TV kyk nie, mits dit iets is wat my kan amuseer.

Breinvasbrand:  Ek het ‘n aanhaling van Vetkoekpaleis in die die stuk gebruik.  Watter karakter se gevleuelde woorde was dit?

Breinlosbrand:  Olga was reg met Diane Kohler-Barnard.





Do your worst

19 08 2015

Daar was vanjaar meer as een geval waar ‘n skoolmeisie selfmoord gepleeg het as gevolg van boelies.  Normale, gesonde, suksesvolle en aantreklike kinders wat nie juis boelies iets op ‘n skinkbord aangebied het nie.  Nogtans kon die boelies hulle minderwaardig en ongeskik vir die lewe laat voel.  Tot so ‘n mate dat die dood na die enigste uitweg gelyk het.

Natuurlik is daar nou oproepe, eise en pleitdooie dat boelies in die bek geruk moet word.  Hoog tyd, maar nogtans te laat vir diegene wat reeds hulle eie lewe geneem het.  Dalk, net miskien, help dit dat ander kinders nie so desperaat raak nie.  Miskien vorm ons ‘n generasie wat in die toekoms net in liefde en vrede gaan saam woon.

Iets moet gedoen word.  Vraag is wat?

Boelies floreer op die vrees wat hulle inboesem.  Dit laat hulle magtig en onbestrokke voel.  Sterk.  Selfs dalk genadeloos.  Natuurlik is dit nie gesond of reg om te boelie nie.  Dit behoort stopgesit te word.  Gaan oppassers en ‘huursoldate’ die gewensde effek het?  Of gaan dit eerder ‘n boelie verder bemagtig en meer gevaarlike (maar subtiele) maniere om te boelie laat ontwikkel?

Ek het dit al van te vore gesê en ek sê dit weer:  die enigste manier om ‘n boelie te stuit, is as die slagoffer hom/haar stuit.  In ‘n fisiese boelie verhouding is dit maklik.  Slaan die grootste, gemeenste boelie ‘n bloedneus en maak van hom ‘n tjankbalie.  Dit is nou nie heeltemal moontlik met die sosiale media of afkrakende boelies nie.  Mens kan hulle seker in gelyke munt terug betaal, maar gaan dit die slagoffer enigsins as mens bevorder?

Dalk is dit ‘n tyd vir ou clichés.  Stick and stones may break my bones, but words would never hurt me.  Nou nie heeltemal die waarheid nie, maar dalk moet kinders leer wie se menings tel en dat die oorgrote meerderheid se menings of verklarings wind is.  Iets waaraan jy jou afvee.  Beslis nie die tyd en moeite werd om daaroor te wroeg nie.

Deur die nonsens met die minagting te behandel wat dit verdien (dink water op ‘n eend se rug), word die boelie ontwapen.  Sonder die slagoffer se vrees / reaksie, is daar geen ‘wins’ uit boelie uit nie.

Klink eenvoudig, maar helaas.  Wat reken julle wat moet met die boelie situasie op skole gedoen word?  Wat van die boelies in die werksplek, verskaffers of selfs die wat hulle self vriende noem?  Hoe moet die slagoffers bemagtig word om hulle self teen die boelies te beskerm?

Breinvasbrand:  Aan watter parlementslid het vermoedelik Riah Phiyega  die volgende sms gestuur?  “I am black, proud, capable and get it clear you can take nothing from me eat your heart out.  I am not made by you and can not be undone by you”

Breinlosbrand:  Olga was reg met Bruce Willis.





Ek kry net my slippertjies, dan kom ek ook

12 08 2015

Scrapy praat die week oor pantoffels.

Op die oog af klink pantoffels half opgesmuk.  Dink ‘n bietjie daaroor.  Dit is veronderstel om skoene te wees wat jy dra wanneer jy nagklere aan het; dus oppad is om te gaan slaap.  Wanneer laas het jy met skoene aangeslaap?  Is daar dan enigsins nut aan pantoffels?  Ek meen, as jou voete koud kry of jy wil dit skoon hou, keer niks jou om die eerste, beste paar skoene (selfs onpaar as jy will) te gryp nie.  Dit sal ook die doel bereik.  ‘n Paar sokkies kan dit ook tegnies gesproke doen.

Tog, ons sou net ‘n tweedag week gewerk het as ons net gekoop het wat werklik nodig is.  Pantoffels skree gemak op die knusste, warmste manier.  Buitendien is pantoffels heel prettige skoene.  Dit moet wees as hulle die binnekant van die Herriemerrie stal wil sien.

Dit is genoeg om by swart, bruin en dalk room te bly vir wanneer jy in die openbaar gesien word.  Hier en daar kan jy uitspattige kleur aan jou voete verdra.  Die meeste van ons is hopeloos te inkennig om soos reënboë rond te loop.  As jy nie ‘n fat is nie, gaan dit waarskynlik belaglik lyk.

Daar is nie sulke drama waar dit by pantoffels kom nie.  Ek gooi sommer bedsokkies daarby in.  Hoe bonter, hoe beter.  Pantoffels is soos ‘n goeie vriend en watter goeie vriend het nie ‘n naam nie?  Ja, ek weet dat dit simpel is om skoene te doop, maar wie kan dit weerstaan as die pantoffels ‘n gesiggie het?  Op die oomblik hou my Maya’s my voete saans warm.  Wie kan raai hoe Maya lyk?

Mense kan nogal heel puntenerig raak was dit by hulle pantoffels kom.  Ek is nie groot in die somer op pantoffels nie.  Kaalvoet is soveel beter.  Buitendien skop ek gewoonlik my skoene by die deur uit.  Dit staan dan mooi reg as ek Laviga en Lispiek moet gaan smeek om in te kom.  Kaalvoet is lekker en kaalvoet is gesond, maar ek verkies nie om in die donker met my kaalvoete op ‘n padda te trap nie.

In die winter, moet my pantoffels my warm hou.  Dit is natuurlik gaaf as dit groot genoeg is om my bootie (bedsokkie) en / of pantoffelsokkie te kan akkomodeer.  My hakke moet toewees, wie soek net ‘n halwe warm voet.  Dit is ook besonders gaaf as die sole vir meer as een winter kan hou.

Hoe kies jy jou pantoffels?





Ander mense se kinders

11 08 2015

Daar is beslis voordele daaraan om ‘n kind te wees.  Een daarvan is dat niemand skeef opkyk as jy in jou slaapklere reis, funksies bywoon of self kerk toe gaan nie.  Daar is ‘n tyd om formeel te wees, maar daardie tyd is nie wanneer jy ‘n kind is nie.  Dit is ‘n tyd om prakties te wees.  As jy in die bed gaan spring as jy tuis kom (of gaan aantrek nadat jy gearriveer het), wie gaan daaroor kla?

Goed en wel!  Die vraag is tot watter ouderdom is toelatings en toegewings geskik?  Kom ons neem kerk toe gaan as ‘n voorbeeld.  As jou ouers verkies om ‘n aand diens by te woon, is dit geskik om op 8 of 9 jarige ouderdom nog in jou slaapklere kerk toe te gaan?  Elke week?  Ons praat nou nie van ‘n middernagdiens of ‘n laat aand diens wat buite die normale roetine is nie.  Is dit geskik as die 8 / 9 jarige kind die enigste kind is wat week na week in slaapklere opdaag?  Veral as daar aansienlik jonger kinders is wat normaal aangetrek is?

Nie dat ‘n mens die kind kan bevraagteken daaroor nie.  Hy / sy besluit immers nie wanneer dit tyd is om te bad of kerk toe te gaan nie.  Dit vra egter vrae.  Dit het seker niks met my te doen nie, tog kan ek nie help om te wonder nie.  Sien, dit is nie die enigste ‘afwyking’ van die ander kinders nie.

Die spesifieke kind is nooit meer as 2 cm van sy / haar ma nie.  Die ma doen dikwels aktiewe diens in die kerk.  Wanneer sy voorlees of selfs nagmaal uitdeel, hang die kind aan haar.  Die kind sal nooit by die pa sit vir die paar minute wat die ma ‘n spesifieke funksie moet verrig nie.  Dat sy by iemand anders sit is ook buite die kwessie.

In die spesifieke diens is daar ‘n ouerpaar wat ‘n handvol kinders het.  Ouer en jonger as die kind waarna ek verwys.  Van die ander kinders kom sit graag by hulle tydens die diens.  Ek het al gesien dat die pa, ma en die kinders die pramhanger nooi om by hulle te kom sit, maar die uitnodigings was nie eers met ‘n antwoord vereer nie.

Dit laat ‘n mens wonder.  Snaaks genoeg vermoed ek dat dit nie die kind self is wat onveilig voel by enige iemand anders as sy / haar ma nie.  Die ma het kinders wat al in hulle 30’s is.  Kan dit ‘n geval wees van leënessindroom wat te ver gevoer word?  Hoe langer die kind ‘n baba bly, hoe langer bly die nes vol.  Is dit egter regverdig vir die kind?

Hoe voel julle?  Hoe lank is ‘n kind geregtig om ‘n baba te bly?  Is dit die ouer se reg om ‘n kind ‘n baba te hou?

Breinvasbrand:  Wie was Mickey se stem in Look who’s talking?

Breinlosbrand:  Olga en Ekmyselff was reg met Juanita du Plessis.





Mengelmoes

5 08 2015

Scrapy wil die week van ‘n mengelmoes weet.  Wel, laat die gedagtes begin spat.

Kom ons begin met die nuus wat die wêreld tot in hulle skoene in geskok het.  Die dood van Cecil die leeu.  Daardie tandarts kan sê wat hy wil, maar die idioom is nie verniet lieg soos ‘n tandetrekker nie.  Dit is net baie minder moeite om ‘n geblikte leeu vir ‘n ryk Yankee nader te sleep as om ‘n bekende leeu uit ‘n reservaat te lok.  Ek vermoed hy het betaal om spesifiek vir Cecil te skiet.

Die gemiddelde (en etiese) jagter beteken veel meer vir die ekologie as ek wat met my kamera jag.  Die natuur is beslis nie meer op so ‘n vlak dat dit sonder menslike inmenging kan voortbestaan nie.  Wel, dalk as al wat ‘n mens is van die aarde verwyder word nadat alle heinings plat geslaan is.  Ek sien dit nie gebeur nie.  Diere se getalle moet beheer word en as iemand wil betaal vir die werk, des te beter.  Daardie jag en geld beskerm spesies.

Terselfde tyd moet ek nogal erken dat ek noudie dag lekker gekry het toe ‘n jagter ‘n armadillo (gordeldier in Afrikaans) geskiet het en die dier se skudde die koeël terug na die jagter gestuur het.  As jy wil uitdeel, moet jy kan ontvang ook.

Die hele Cecil storie is hartseer.  Hartseerder is dat dogtertjies uit hulle huise gelok word om verkrag te word voordat hulle verewig stil gemaak word.  Dit gebeur daagliks.  Hoekom is die dood van ‘n leeu ‘n groter tragedie?  Net om een voorbeeld te noem.

Cecil het ons darem ‘n breek gegee met die hele “love wins” sepie.  In die eerste plek, “love win” al sedert 2006 in Suid-Afrika.  Hoekom die groot vreugde / afgryse as jy nie self in Amerika bly nie?  En ja, mens kan simpatiseer met die twee ooms van in hulle 80’s wat in Texas hulle liefde kon formaliseer het.  Is dit regtig ‘n geval van liefde wat oorwin het?  Of is dit eerder ‘n geval van “Everything you can do, I can do better?”

Laat ek verduidelik:  in SA was die kopseer nie so seer om twee mense van dieselfde geslag te laat trou nie.  Die eintlike pyn was hoe om hulle weer te kon skei.  Daar was nie net ‘n stormloop om eerste getroud te kom nie.  Ek onthou een artikel baie goed van ‘n gay paar wat baie trots daarop was dat hulle heel eerste kon skei.  Hulle het spesifiek met die doel gaan trou.

Dit is seker ‘n menseregte saak.  Na die opspraakwekkende referendum in Ierland het iemand nogal ‘n baie interessante vraag gevra:  Behoort die meerderheid oor die regte van ‘n minderheid te besluit?  Is dit reg?

Ek moet sê dat ek vreeslik geamuseerd is dat baie mense wat die instelling van die huwelik verag, voorstaanders van homoseksuele huwelike is.  Ek sien nie die logika nie.

Die laaste twee jaar is dit asof gayregte die hoogste prioriteit geniet waar dit mense regte aangaan.  As jy nie daarvoor staan nie, is jy so goed soos ‘n bloedafstammeling van Hitler.  Ek meen, in ‘n wêreld waar mense nog doodgemaak word oor hulle geloof, van hongerte sterf, nie kan lees of skryf nie, waar mense (of hulle organe) verkoop word of sommer net soos diere behandel word, is dit regtig die hoogste prioriteit?  Om te kan trou (en skei)?

Paulus word dikwels in die gay debat ingesleep.  Ek is nie self ‘n aanhanger nie, maar hy het soms groot wyshede kwyt geraak.  Dit is goed om te trou, maar beter om nie te trou nie.  As jy pro-gay huwelike is, geluk.  Dit is egter nie nodig om daarop aan te dring dat almal na die partytjie moet kom nie (verskoon die anglisisme en pun).  As jy anti-gay is, die goeie nuus is dat jy nog steeds kan trou met wie jy wil trou.  Jy hoef nie met iemand dieselfde geslag as jy te trou nie.

Ek wonder regtig soms wat van ‘n vrou se vryheid van denke en beweging word as ‘n man betrokke is.  Kan jy werklik gelukkig wees om te spring elke keer wat iemand sy vingers klap?  Wat is die sin daarin om jou persoonlikheid te verander om ‘n vent te plesier?  Hoekom het nie meer vroue rugprobleme nie?  Daardie agtertoe buig kan regtig nie goed vir die liggaam wees nie.

Jacaranda het my gunsteling program van die lug afgehaal.  Dit is beslis nie meer lekker om na hulle te luister nie.  Ek het altyd Andrew se speletjies geniet.

Van speletjies gepraat, die LUR van onderwys in Gauteng het alweer nie gepoep toe hy moes nie.  Hy het op sy nalatenskap besluit en dit gaan glo “Twining” wees.  Model C skole (wat meestal deur die ouers befonds word) gaan met ‘n arm, swak presterende skool moet ‘saamsmelt’.  Hulle sal een begroting hê (alles natuurlik van die model C skool sal kom) en een beheerliggaam (wat ten minste 50% van die arm skool sal insluit).  Natuurlik weer ‘n geval vat van die een wat goed doen en bogger nog ‘n skool op.  Dit is terloops dieselfde man wat onlangs verklaar het dat township skole nou beter toegerus is as van die land se voorste skole.

Wel, ons moet toegee.  ‘n Standard 2 van ‘n township skool is goed genoeg om van jou ‘n president te maak.  Aan die anderkant, dit was daardie tyd ‘n heel ander standard as wat vandag in die onderwys was.  Dit maak jou nou net nie ‘n goeie president nie.  Het die man enigsins iets goeds in sy termyn gedoen?

Het ek iewers tone gemis? Wel, ek kan dit seker met ‘n volgende skrywe bykom.

Breinvasbrand:  Wie het Mengelmoeskardoes gesing?

Breinlosbrand:  Olga was reg met André van der Merwe en Frank Graewe.