Is neutraliteit ‘n sonde?

29 04 2015

Daar word gesê dat ‘n mens jou neus uit ander se sake te hou.  Dit is presies wat Switserland met die Tweede Wêreldoorlog gedoen het.  Switserland; wat vandag nog diensplig het en waar die regering privaat huise bewapen ingeval van nood.  Sodoende het hulle land staande gebly terwyl die hele Europa gebrand het.  Switserland was goed genoeg vir Churchill om die einde van die oorlog aan te kondig.  Tog moes hulle ‘n duur prys vir hulle neutraliteit betaal.  Hulle was beboet omdat hulle nie saam in die oorlog baklei het nie.

Let wel:  Switserland was neutraal.  Hulle het nie vir Duitsland geskerm nie, maar hulle het ook nie teen Duitsland baklei nie.  Hitler se dade in die tyd kon nie regverdig geword het nie.  Iets of iemand moes hom (en sy gespuis) gestop het.  Engeland, Frankryk en maatjies het hand opgesteek om helde te speel.  Het Switserland hulle plig versaak om nie ook held te speel nie?

Dit laat my na die onlangse reaksie op xenofobiese geweld dink.  Orals het mense hulle stemme dik gemaak.  Daar was ook nie gehuiwer om in die openbaar te verkondig as jy nie ook teen xenofobie baklei nie.  Beroemdes en berugdes het seker gemaak die ultimatum is word harder verkondig as hulle misnoë.

Dalk het hulle ‘n punt beet.  Soos Edward Burke gesê het:  “The only thing necessary for the triumph of evil is for good men to do nothing.”  Desmond Tutu het dit dalk duideliker gestel:  “If you are neutral in situations of injustice, you have chosen the side of the oppressor. If an elephant has its foot on the tail of a mouse and you say that you are neutral, the mouse will not appreciate your neutrality.”

In die geval van xenofobie is dit nie barbare wat die uitlanders uitmoor wat gestraf word nie.  Hulle vaderlande (waarvan baie van die uitlanders gevlug het – die ironie!) is glad nie gedien daarmee dat hulle burgers vir geen rede aangeval word nie.  Wie word gestraf daarvoor?  Elke Suid-Afrikaner wat hulle in die hande kry.  Wel op ‘n minder barbaarse manier.  Helaas, raak dit nie diegene wat die buitelanders uitmoor nie.

Dit is waarskynlik genoeg om almal na ‘n plakkaat te laat gryp en sommer jou eie optog te begin.  As jy egter verkies om eerder op die draad te sit, kan niemand jou ‘n held noem nie.  Is dit egter reg om jou ‘n skurk te noem?

Hoe voel julle daaroor?  Hoe voel julle oor xenofobie?

Breinvasbrand:  Wat het Ghandi gesê van ‘n oog vir ‘n oog?

Breinlosbrand:  Razzies





Toeka Tokkel: Versamelings

27 04 2015

Scrapy neus die week in mense se versamelings.

Ek kan nie met ‘n rein gewete ontken dat ek sentimenteel is nie.  Ek gooi ook nie sommer iets weg nie.  Dus het ek verskeie versamelings, te veel om te noem en te vervelig om te deel.  Ek sal dus met my kontroversiële versameling volstaan.  Ek versamel DVD’s.

Ek sal dalk nou nie ‘n winkel met my getal DVD’s kan oopmaak nie.  Terselfde tyd het ek ‘n hele klompie DVD’s wat ek maande (jare) lank voor gesoek het en/of moes invoer het.  Ek het selfs al probeer om my DVD se streek universieel te maak.  Ek is nie seker hoe suksesvol dit was nie.  Dus het ek nou nog nie probeer om ‘n streek 1 DVD te koop nie.  As ek wel verseker was dat ek dit kon kyk, was my versameling aansienlik groter.

Ek het nogal ‘n redelike verskeidenheid.  Daar van musiek blyspelle tot aksie flieks, van kinder en familie vriendelike genre tot goed wat sommige as kult sal beskryf.  Daar is die Oscar treffers en ‘n paar wat kritici met die grootste misnoë sal beskou.  Die meeste mense sal iets kykbaars in my versameling kan kry.  Wel, behalwe as jy net gruflieks kyk – ek hou nie van bloed, derms en wreedhede nie.

Soos julle weet gaan ek my oudste kind na ‘n seerower vernoem.  Hou maar eerder duim vas dat my oudste kind nie ‘n seun is nie.  Ek sal dus nou nie my neus optrek ‘piracy’ nie.  Soos bykans elke ander Suid-Afrikaner het ek ook ‘n hardeskyf of twee waarop ek ‘gesteelde’ reekse en flieks het.  Ek huiwer egter nie om ‘n storie waarvan ek hou (of ten minste waardeer) aan te koop nie.

Dit het niks te maak met my gewete nie.

Flieks en reekse word op die einde van die dag gemeet aan die hoeveelheid verkope.  Kykers ook, maar kykers betaal almal op een of ander manier.  Ek koop dus reekse en flieks as ‘n teken van waardering teenoor die mense wat in die projekte betrokke was.  Niemand hou daarvan om verniet te werk nie.  Almal hou van erkenning vir werk wat goed gedoen is.  Buitendien, is ‘n nagemaakte diamant ooit soos ‘n regte diamant?

Hoekom dan die gesteelde reekse?  Wel, ek weier om DSTV te kry (waarmee moet ek andersins my DVD’s koop?).  Ek wil darem eers kyk of ek van iets hou voordat ek dit aankoop.  Verder is daar ‘n paar reekse wat ek net nog nie te koop gekry het nie.  Die oomblik as ek dit raakloop, kyk ek nie eers na die prys nie.

Hoe voel jy oor DVD’s?  Besit jy eniges wat nie sommer in ‘n winkel beskikbaar is nie?

Breinvasbrand:  Watter toekenning word in dieselfde tyd as die Oscars uitgedeel vir swak vertonings?

Breinlosbrand:  Olga was reg met Ceylon

 





Gryp ‘n rooi koeldrank . . .

24 04 2015

P1340052

Ekke vervel!!!!!

Onthou!  Julle moet almal pippersente bring en vir my “Geluk Liewe Viga” sing.

Dan kan julle saam eet van my toor pot.

Bring julle dans vetertjies en laat ons op die balke swaai.

Hie ja!





Rheinfall

24 04 2015

P1330734





Toeka Toekel: Skeepskatte

22 04 2015

Scrapy se uitdaging vir die week is diere.

Snaaks genoeg word katte oor die algemeen verbind met vroue eienaars.  Dus was ek nogal verbaas toe ek nou die dag van skeepskatte hoor.  Daar is tog seker ‘n rede hoekom hulle seeMANNE genome word.  Veral in die tyd toe skeepskatte floreer het.

Katte is blykbaar baie aanpasbare diere en aard gewoonlik baie goed op skepe.  Daar was hulle hoofdoel natuurlik om rotte en muise te vang.  ‘n Eeu of twee gelede het knaagdiere toue en seile ernstige skade berokken.  Hulle het natuurlik ook die kosvoorraad van die skeepslui en die vrag wat gedra is vernietig.  Boonop was hulle ook draers van dodelike siektes gewees.

Katte was verder ook iets huisliks aanboord.  Baie mense het hulle as geluksbringers op die skip beskou.  Dus was die katte op die hande gedra, wat die kieterjasies natuurlik soos ‘n handskoen gepas het.  Party, soos Convoy, het selfs hulle eie hangmatte gehad.

As hoë skeepslui het hulle natuurlik ook al die belangrike gaste ontmoet.  Verskoon my.  Baie bekende mense het die voorreg gehad om DIE kat van die skip te ontmoet.  Kyk net hoe moet Winston Churchill vir Blackie van “HMS Prince of Wales” groet.

Blackie en Convoy is natuurlik nie die enigste bekende skeepskatte nie.

Simon van “HMS Amethyst” het in 1949 die bevelvoerder van die skip geselskap gehou tydens die Yangtze Voorval.  Die Chinese het die skip aangeval en Simon is ernstig beseer in die bomaanval wat die bevelvoerder gedood het.  Simon was erg gebrand, maar hy kon kruip om hulp te gaan soek.  Die medici het hom gekry, vier stukke skrapnel verwyder en Simon het tot almal se verbasing die dood gekul.  Hy het sy pos as rotvanger volgestaan in die maande voordat die skip kon ontsnap.  Met sy terugkoms in Engeland, was Simon bevorder tot “Able Seacat”.  Dit het egter nie beteken dat hy kwarantyn vry kon spring nie.  In kwarantyn is hy aan ‘n virus infeksie dood.  Simon het ‘n eervolle Vloot begrafnis gekry.

Jan Wilson se kat kon netsowel “Unsinkable Sam” gewees het.  Sam was aanvanklik ‘n Duitser wat diens gedoen het op die “Bismarck”.  In 1941 het die skip na ‘n geveg gesink en net 117 van die 2201 bemanningslede het dit oorleef.  Sam was een van die bemanningslede en die “HMS Cossack” het hom gered.  Dit is elke kat vir homself en Sam het geen problem gehad om skielik ‘n Brit te word nie.  Die “HMS Cossack” was deur ‘n torpedo getref en 159 bemanningslede het gesterf.  Sam was nie een van hulle nie.  Hy is oorgeplaas na die “HMS Royal Ark” gesink het.  Raai wie het weer oorleef?  Sam het toe maar besluit om nie weer sy lewe aanboord te waag nie en hy het toe maar eerder ‘n pos aanwal aanvaar.

Jenny was die kat op die Titanic.  Daar is twee weergawes oor wat met haar gebeur het, maar ek gaan met my gunsteling weergawe ploeg.  Jenny is van die Titanic se susterskip, Olympic, oorgeplaas nadat sy kleintjies gekry het.  Jenny het kort voordat die Titanic Southampton moes verlaat besluit dat die skip nie haar teenwoordigheid werd was nie.  Toe vat sy haar kinders een vir een van die skip af.  Die Ierse laaitie wat na haar moes omsien was toe wys genoeg om ook sy tassies te bak.

Emmy van “RMS Empress of Ireland” wou niks weet om by die huis te bly nie.  Die 28 Mei 1914 kon niemand haar oortuig het om op die skip te klim nie.  Die skip moes sonder haar uitvaar.  Die skip het die volgende dag met ‘n ander skip gebots en meer as ‘n 1000 mense is dood.

Vandag word daar nie meer regtig van skeepskatte gebruik gemaak nie.  Hulle word nie meer as higiënies gesien nie.  Tog is daar blykbaar ‘n kat wat Hollandse skepe verkies.  Hy sal afklim om te gaan rondsletter op land.  Die skepe sal dan hom soms agterlaat.  Dan vaar hy maar met ‘n ander skip, tot hy weer ‘n Hollandse skip kan kry.

Daar is nog vele ander katstories, te veel om hier te noem.  Google gerus maar shipcats.

Breinvasbrand:  Waarheen het die skip gevaar waarop Jan Wilson se kat gesit is?

Breinlosbrand:  Olga was reg met Theodore Roosevelt.





Gesinsvriendelik

21 04 2015

Die Pretoria Dieretuin is tans besig met ‘n meningspeiling oor drank in die dieretuin.  Die huidige voorstel is om die inbring van drank te verbied en om drank verkope tot een restaurant te beperk.  Party mense het natuurlik baie sterk menings hieroor, veral diegene wat ‘n algemene drank verbod op die dieretuin wil plaas.  Hulle beroep hulle daarop dat die dieretuin gesinsvriendelik moet wees en dat daar dus geen plek vir drank ook is nie.

Die argument kielie my natuurlik pienk.  Veral as die gewig daaragter versterk word met “As jy wil drink, gaan drink by die huis.”  Die mees gesinsvriendelike plek vir ‘n kind is tog seker by sy / haar huis.  In die gemiddelde normale huishouding, gaan die ouers tog seker met tye ‘n drankie geniet.  Gaan hulle dan daardeur hulle kind/ers onherroeplike skade aandoen?

Let wel:  ek praat hier van drank gebruik en nie drank misbruik nie.  Ek weet party mense verstaan nie die verskil so lekker nie, maar daar is niks verkeerds met matige drankgebruik nie.  ‘n Koppie koffie is immers ook skadelik.  Tee ook.  Ons sal nie eers praat oor die suikerinhoud van koeldranke en sappe nie.  Sover my kennis strek, is water die enigste veilige aanvaarbare drankie.  Op watter punt raak die drink van enige iets anders gesinsONvriendelik?

Wat beteken gesinsvriendelik nou eintlik?  Hoekom noem ons dit buitendien gesinsvriendelik as ons eintlik kindveilig of kindtoeganklik bedoel?  Filosofies gesproke (met HM logika) is kindwees ‘n voorbereidingstyd vir die volwasse lewe.  Kinders word in ‘n beskermende omgewing geleer om die uitdagings van ‘n volwassene te hanteer.  Sou hulle genoegsaam voorbereid wees as hulle nooit aan onsmaaklikhede blootgestel word nie?

Toegegee, daar moet iewers ‘n lyn wees.  Ek voel wel sterk daaroor dat die lyn gebaseer moet wees op wat werklik skadelik vir ‘n jong siel is.  Iemand wat ‘n bier drink is waarskynlik nie ‘n tweede kyk werd vir ‘n jongeling nie.  Sou hy/sy ‘n dronkeling teëkom, sit dit die kind dalk heeltemal van drank af.  Gaan dit hom / haar weke lank nagmerries gee?  Gaan dit sy / haar se gesondheid negatief beïnvloed?  Gaan die kind daardeur beseer word?

Indien nie, is dit nodig om dit in die naam van gesinsvriendelikheid te verban?

Wat behoort die kriteria vir gesinvriendelik te wees?  Hoe ver behoort die omgewing die kind te beskerm en hoeveel is eintlik die ouers se verantwoordelikheid?  Plaas ‘n gesinvriendelike plek ‘n demper op mense wat nie kinders het nie?

Breinvasbrand:  Na watter Amerikaanse president is ‘n Teddie Beer genoem?

Breinlosbrand:  Olga was reg met Walton.





Vir ‘n Erfgenaam

20 04 2015

Scrapy se Toeka-Tokkel van ‘n paar weke gelede was oor erfstukke.  Die uwe het ander prioriteite gehad en het toe nooit sover gekom om ‘n paar woorde te spreek nie.  Nie dat stilte al ooit ‘n sterkpunt van my was nie.  As dit was, was ek mos al lankal ryk siende dat stilte blykbaar goud werd is.

Voordat ek in ‘n malkolk van stront praat vasgevang word (ek het ‘n natuurlike talent daarvoor), laat ek eerder op erfgename konsentreer.  Dit is verstommend hoeveel stories rondom ‘n erfgenaam gebou is.  Daar is die Jane Austen model, waarop ‘n huis vol dogters dringend met die erfgenaam van hulle voorouers se skatte (as daar iets oorgebly het) moet trou.  Daar is ‘n wavrag vol stories dat iemand moet trou en/of ‘n erfgenaam voortbring om alles te kan erf.  Amper vergeet ek van die sot wat een oggend wakker word en dan besef dat daar niemand is aan wie hy alles wat hy bymekaar gekrap het kan nalaat nie.  Laastens is daar die kom ons beduiwel almal met ‘n onverwagte testament.

Die fiksie het hulle voete ook maar stewig in die werklikheid.  Daar is mense wat nie ‘n dag in hulle lewens hoef te werk danksy ‘n voorouer wat goed voorsorg getref het nie.  Daar is in sekere gevalle geslagte wat nie ‘n hand in koue water hoef te steek omdat hulle voorouers slim belê het nie.  Hulle is die gelukkiges.

Op die oppervlak ten minste.  Punt van die saak is om jou brood, botter en kar met sweet te verdien is tog nie regtig ‘n straf nie.  Al haat jy jou werk, gee dit jou ‘n doel in die lewe.  Waarvoor leef baie van die ryk erfgenames nou eintlik?  Om dag in en dag uit inkopies te doen vir enige iets waarop jy jou oë lê?  Is daar dan iets om na uit te sien?  Iets om voor te smag?  Baie van die erfgenames verval in depressie of val van een skande tot ‘n ander.  Daar is ook die erfgenames wat altyd baie hoog vlieg.

Dalk weer ‘n bewys dat geld nie geluk koop nie.  Natuurlik hoef elkeen wat met sy gat in die botter val nie sy gat die saligheid belowe nie.

Daar is mense wat glo dat dit oneties is om ryk te erf.  Hulle glo natuurlik dat die staat en / of liefdadigheid voordeel daaruit moet trek.  Aan die ander kant, dit is seker elke mens se reg om met sy / haar besittings te maak soos hy / sy goed dink.  Dalk is die balans om te stop by genoeg.  Dan weer, wat is genoeg?

Breinvasbrand:  Wie volgens Forbes was in 2014 Amerika se rykste familie?

Breinlosbrand:  Olga was reg met Robert Ludlum.





Lelie

17 04 2015

P1310777





Toeka Tokkel Inry Teaters

16 04 2015

Scrapy, ek weet nie veel van Inry-teaters nie.  Dink ek was al by een, maar dit is maar vaag.  Al wat ek kan sê daaroor: