Hoop, Liefde, Vreugde, Vrede en Lewe

30 11 2014

Charlize Theron het al in haar (on)wysheid gaan verkondig dat Suid-Afrikaners nie Kersfees vier nie.  Duidelik ken sy nie baie Suid-Afrikaners nie.  Kersfees word deur die meerderheid Suid-Afrikaners hard en duidelik gevier.  Kerskultuur is dalk ‘n ander storie.

Wag, wag – dit is (nog) nie nodig om verontwaardig te wees nie.  Ja, Suid-Afrikaners vier Kersfees en daar is wel Kerstradisies.  Maar daar is nie ‘n ‘vasgestelde’ Kerstradisie wat op Suid-Afrikaners as ‘n geheel van toepassing is nie.  Ons het nie ‘n groot boom wat op ‘n vasgestelde dag ten aanskoue van duisende aan gesteek word nie.  Ons het nie optogte nie, ons het nie spesifieke gebruike nie en ons het nie sekere vasgestelde “moet” datums nie.  Met die aantal kulture in SA kan ‘n mens nie juis iets anders verwag nie.  Maar selfs in Kerk- en agtergrond verband is daar beslisde verskille.  Kerskultuur is ‘n familie ding en nie ‘n gemeenskap ding nie.  Daar is mense wat van Januarie af vir Kersfees voorberei, ander wat in Oktober begin, maar daar is ook diegene wat inderhaas op 24 Desember doen wat gedoen moet word.

Wat ookal vir jou werk is goed.  Persoonlik hou ek van die idee om Advent te vier.  Advent word deur baie lande en kerke gevier.  Advent skop die vierde Sondag voor Kersfees af.  Dit is ‘n tyd om geestelik voor te berei, ‘n tyd om die Christus-kind weer opnuut te kan ontvang.

Toegegee, daar is verskille tussen die Advent kranse, maar die basiese idee is dieselfde.  Ek hou nogal van die kranse met die 5 kerse – waarvan 3 van die kerse pers is, 1 pienk en een wit.  Die eerste kers word met die eerste Sondag aangesteek (in 2014, begin Advent op 30 November), en met elke daaropeenvolgende Sondag word daar nog ‘n kers aangesteek.

Daar is simboliek in elke element van die Adventkrans.  Die krans is rond, d.w.s daar is geen begin of eindpunt nie.  Dit simboliseer God wat verewig is.  Die krans word met immergroenkranse gevleg, ‘n simbool van ewige lewe.  Brande kerse simboliseer die lig van God.

Die eerste kers staan bekend as die Profeetkers en dit simboliseer hoop.  Jesaja veral het die koms van Jesus voorspel.  Die tweede kers is die Krippiekers en dit simboliseer liefde.  Die derde kers is die Herderskers en dit simboliseers vreugde.  Die vierde kers is die Engelekers en dit simboliseer vrede.  Laaste is die wit kers wat op Oukersaand aangesteek word.  Dit is die Christuskers en simboliseer lewe.

Die eerste, tweede en vierde Sondag word met ‘n pers kers gevier.  Pers simboliseer koninlikheid en om die Koning te verwelkom.  Terselfde tyd simboliseer dit ook pyn en lyding.  Met die kleur kers vier ons nie net die koms van Jesus nie, maar word ons ook herinner waarom Hy aan ons gestuur is.  Die pienk kers simboliseer weer geluk en vreugde.  Die pienk kers word op die derde Sondag gebruik.  Die wit kers simboliseer weer reinheid en Heiligheid.

Hiermee wens ek iedere en elk ‘n geseënde Advent toe.

Breinvasbrand:  Wat beteken Jesaja?

Breinlosbrand:  Olga was reg met Nasri.





Carpe Diem

22 11 2014

Daar is ‘n advertensie op die radio waar ‘n vrou afgerig word om die dag te gryp.  Nadat sy onder andere gebrul het soos ‘n leeu, word sy los gelaat om die dag aan te gaan durf.  Die advertensie reken egter dat dit baie makliker en meer effektief is om ‘n sekere plek se ontbyt te gaan gryp.

Ek weet dat ontbyt die belangrikste ete van die dag is, maar daar is beslis makliker maniere om jou alie in rat te kry vir enige dag.  Ek meen, om ontbyt te gaan koop, moes jy al reeds uit die bed geklim het en ten minste darem jou tande geborsel het.  Tensy die ontbyt self agter jou aandraf, doen dit niks om jou uit die bed te kry nie.  Dit raak dan ‘n taak, iets op ‘n doen-lysie – nog iets waarvoor jy in die bed wil uitkruip.

Maar ek dwaal (alweer) af . . . Ek wil praat van die goed wat jou tande vir die dag slyp en sommer ook die hele dag ‘n glimlag op jou gesig hou.  Dit span sommer ‘n dak oor jou battery waarop niemand die dag kan pieps nie.  Dit is natuurlik net musiek wat dit kan regkry.  Veral as jy dit onverwags hoor . . .

Dus in geen spesifieke volgorde nie, bied ek ‘n onvolledige lys Carpe Diem liedjies aan.

Proud Mary – Tina Turner

Paint it Black- Rolling Stones

Sisters are doin’ it for themselves – Annie Lennox en Aretha Franklin

I love Rock ‘n Roll – Joan Jett

Thunderstruck – AC/DC

Wat maak jou soggens die koning / koningin van die planet?  Julle beurt om die lys volledig te maak.