Jou Facebook Bakkies

10 04 2014

Ek is op my beste ‘n Facebook sluiper. Laat ek begin om te verduidelik wat ‘n sluiper is. In die koshuis het ons altyd die meisies wat jy nêrens sien behalwe soms in die gang sluipers genoem. Jy hoor en sien hulle nooit nie omdat hulle in die gange rond sluip.

Soos ‘n tipiese sluiper word ek selde op Facebook gewaar. My lewe is hopeloos te vervelig om dit in ander se kele af te druk. Siende dat ek wel in my “friends” belangstel, loer ek gewoonlik wat hulle die moeite werd vind om te deel. Ek wil nou nie per ongeluk die verjaarsdag, verlowing, doop of egskeiding van ‘n terloopse kennis mis nie.

Dit is so dat die meeste nuwe verhoudings op Facebook aangekondig word. Ek doen gewoonlik my sluiperding en gaan loer hoe die nuwe liefde daar uitsien. As potensiële werknemers Facebook gebruik om die koring van die kaf te skei, is dit seker nie so verregaande om iemand se profiel te gebruik as die baadjie waarop hulle getrakteer word nie. Spesifiek, wonder ek dikwels oor die foto wat hulle kies om hulle self mee te verteenwoordig.

Is ‘n foto maar net ‘n foto, of sê dit iets?

Ek is natuurlik geen sielkundige nie. Ek sien natuurlik altyd rooi ligte as ‘n man ‘n foto van homself plaas waar hy tot by sy tande bewapen is en ‘n dreigende houding aanneem. Ek sien iemand wat trots is op sy aggressie en nie sal huiwer om na geweld oor te gaan nie. Ek sal nie verbaas wees as so iemand van sy vrou ‘n slaansak maak nie.

Ek wonder ook oor iemand wat ‘n dronk foto van hulleself sal plaas. Onthou, ek verwys spesifiek na die foto’s wat mense kies om hulle profiel aan te koppel. Is hulle trots daarop om dronk te wees? Is dit ‘n prestasie? Dalk is dit net hulle doelwit in die lewe?

Ek kan verstaan dat mense gereeld hulle bakkies verander as hulle opwindende plekke besoek het of gereeld iets werd-om-genoem-te-word gedoen het.  Ek kan verstaan net nie die honderd en tien selfies wat hulle op ‘n dag kan op sit nie.  Vis hulle vir komplimente of dink hulle net hulle is besonders aantreklik?  Voel hulle binne ‘n paar minute soveel ouer dat hulle nodig het om hulle profile aan te pas?

Kan iemand vir my lig werp?  Wonder julle ook oor wat iemand se bakkies oor hulle sê?  My ma het ‘n gesegde van iemand het ‘n gesig soos ‘n bicycle.  Dit smeek om getrap te word.  Is dit waar vir profiel foto’s?

Breinvasbrand:  Olga was reg met Gugile Nkwinti.

Breinlosbrand:  Watter land was eerste om foto’s (mugshots) van gevangenes te neem in 1843 / 1844?





Eienaarskap se gat

7 04 2014

Regtig, partykeer dink ek dit is ‘n wonder dat alle redelike Suid-Afrikaners nie alkoholiste is nie.  Wel, eintlik is dit geen wonder nie.  Persoonlik gee niks my ‘n groter kramp as om die regering geld te gee wat hulle nie toekom nie.  Sou ek ‘n alkoholis word, gaan hulle gryperige hande verheug wees oor die ekstra sondaarsbelasting wat hulle nie verdien nie, maar wel gaan kry.  Drank is dus nie ‘n opsie nie.  Dwelms is wel, tot tyd en wyl dit gewettig word en die regering hulle vraatsige pote ook daarop kan lê.  Noudat ek daaraan dink, as prostituut hoef ek ook nie belasting te betaal nie.  Ja, ek is al by sulke uiterstes.

Ja, ja – ek kerm weer oor iets wat my nie direk raak nie. Ek het geen belangstelling in die boerdery, so wat traak dit my dat die regering boere wil dwing om 50% van hulle grond aan hulle werknemers af te staan.  Die regering gaan hulle mos daarvoor betaal, al gaan die geld nie in die wettige eienaar se sak nie.  Nee, die meesters wat nie poep nie, het dit goed gedink dat ‘n trust van die geld geskep word.  Alle grondeienaars is aandeelhouers van die trust en dit word glo aangewend vir die verdere ontwikkeling van die plaas.  So met ander woorde, daar word van die boere verwag om die helfte van hulle koningkryk weg te gee sonder om te kla.

Duidelik het diegene wat die plan uitgedink het, hulle ook aan drank oorgegee.  Hulle is seker van die sondaarsbelasting vrygestel.  Blykbaar is selfs nie eers die swart landbou unies gediend met die plan nie.  Volgens die Rapport:  “Dr. Mandla Buthelezi, senior visepresident van Nafu, sê werkers móét opgehef word, maar die plaaseienaar het die kundigheid en behoort groter magte te hê om besluite oor die hele plaas te neem.”

Dit vat geen genius om te weet dat kos pryse eers deur die dak gaan styg voordat daar niks meer beskikbaar gaan wees nie.  Dit is seker tyd om ‘n groente tuin te onderhou en sommer ‘n vegatariër te word.  Nog iets waaroor armes verlig oor kan gaan slaap.

In hierdie wonderlike noot, lees ek toe hoe iemand reken dat dit die tyd is vir ‘n eenmalige welvaartsbelasting.  Vir alle rykes ongeag van wat die rykes se velkleur is.  Ek wonder nogal wat die implikasie van die welvaartsbelasting.  Gaan die sogenaamde rykes elkeen ‘n X bedrag moet betaal?  Gaan dit dalk ‘n persentasie van hulle bates wees?  Gaan hulle daarna gevrywaar wees ten die regering se bog planne soos om 50% van plase wat weggegee word en e-tol?  Mens kan tog nie net eis sonder om iets in ruil aan te bied?  Gaan die rykes dit met ‘n lied in hulle harte betaal?

Wie is die sogenaamde rykes?  Miljoenêrs?  Diegene wat al reeds belasting betaal?  Die 10% wat die res van die land dra?  Wat met ander worde vir die ANC komberse gee om stemme mee te koop en ekstra vir elektrisiteit betaal sodat die armes ‘n gedeelte gratis kry?  Klink al reeds vir my of welvaartsbelasting ingestel is en dit is nie eenmalig nie.

Terloops, glo enige iemand dat so ‘n belasting werklik net eenmalig sal wees?  Ons staat weet van bloed uit ‘n klip te tap.  Wie gaan hulle keer om elke keer wat daar ‘n Nkandla gebou moet word weer ‘n welvaartsbelasting in te stel?

Skielik is ek lus om in die donker te sulk.  Nie dat dit sal help nie.  Iemand betaal seker erfbelastig waar ek ookal my stert neer plak.  Hoeveel kan die regering nog gryp voordat genoeg genoeg is?

Is ek onredelik?

Breinvasbrand:  Wie is die die onagbare minister van landelike ontwikkeling en grondeise?

Breinlosbrand:  Olga was reg met 2006.

Nota aan myself:  Tot die dag wat ek net soveel of meer as ‘n parlementslid verdien beter hulle nie as ryk na my verwys nie.





Why don’t you get a job?

6 04 2014