Hoe kommin is ek regtig

Demoerin wil weet hoe platvloers en middelklas is ek nou eintlik.  Wel, soos Sterretjie sou sê, ek is is kommin soos ‘n bokdrol.  Ek moet dalk erken dat ek besonderse lae punte op die kommin toets kry, maar hulle vra dalk net die verkeerde vrae.

• Ek is geneig om te hard te praat.  Te vinnig ook, maar ek het al in ‘n groot mate geleer om dit te beheer – as ek moet.
• My ma vertel my elke keer wanneer sy my sien dat ek baie lelik lag.
• Ek dra net grimering as ek absoluut moet.  Accessorise klink vir my soos ‘n woord wat ek vir ‘n speltoets moet leer.  Ek dra elke dag dieselfde horlosie, juwele en handsak.  Ek sal miskien vir ‘n formele geleentheid ‘n poging aanwend.
• Ek dra soms ompaar sokkies.  Dit is nie my skuld as die wasmasjien hulle maatjies geëet het nie.
• Ek lees alles waarop ek my hande kan lê.  Dit sluit die Huisgenoot en Romantiese Fiksie in.
• Ek hou van ABBA en as dit my kommin maak, dan is ek met trots kommin.  Ek hou oor die algemeen van klassieke musiek, julle weet, die klassieke treffers van die 60’s, 70’s, 80’s en 90’s.  Roll over Beethoven.
• Ek het al in my nagklere ‘n tog van 400 km aangepak en uitgeklim vir koffie langs die pad.  Ek sal maklik met my pantoffels winkel toe gaan, maar snaaks genoeg nie sommer kaalvoet nie.  Dalk eenkeer in twee jaar.
• Ek drink uit ‘n bottel.  Wat is tog die nut daarvan om ‘n glas vuil te maak?  Dit proe in elk geval lekkerder uit ‘n bottel.
• Ek het ‘n Britney Spears CD en ek hou daarvan.
• Ek drink nie maklik skoon Coke nie.  Ek verdun dit verkieslik met melk, maar Spice Gold kan ook werk.
• As jy by my huis koffie kry, gaan jy dit in ‘n beker kry met die melk en suiker klaar by gevoeg.

Ek kan nie nou nog van my platvloersheid onthou nie.  Sal dit maar aan julle oorlaat om dit self te ontdek.

Oops, amper tag ek nie verder nie.  Kom ons kyk:  Ek tag vir Olga; Gogga (as sy nog skop) en Murphy.

Lunch Week 25 / 11

Couples Theraphy

(Rangskik die terme in pare wat by mekaar pas en gee die gemeenskaplike faktor van die groep).

Nissan; Toyota; Honda; Renault; Kia; Aygo; Sandero; Tiida; Picanto; Jazz

Gemeenskaplike faktor?

Dit verskil – bou ‘n brug

Ek het altyd verstaan dat die mens ‘n sensoriese wese is.  Ons maak elke dag op ons 5 – goed 6 vir sommiges – sintuie staat om ons deur die lewe te help.  Een van die belangrikste funksies van sintuie is tog seker om ons te help om te onderskei.  Sou smaak enigsins waarde gehad het as vleis soos groente geproe het?  Kinders word ook van kleins af geleer om tussen dinge te onderskei, iets wat hulle inderwaarheid hulle lewe lank gaan gebruik.  Mens sou verwag dat daar niks fout daarmee gaan wees nie.

Duidelik is ek nog saam met Noag in die ark, waarskynlik nog foutiewelik besig om te verseker dat daar net een paar van elke dier op die ark is – siende dat verskille ongegrond en oorbodig is.  Dit kom my voor dat mens deesdae veronderstel is om te kyk, maar nie te sien nie.  Verskille en onderskeid is vinnig besig om Aanstoot Gee as die hoofsonde te onttroon.

Ek lees nou die dag van ‘n kleuterskool in Swede waar die onderwysers geen onderskeid tussen geslag maak nie.  Onderskeid is dalk nie die regte woord nie.  Die skool poog glo om kinders die unieke geleentheid te gee om te wees net mooi wat hulle wil wees.  Daar word dus nie na seuns as seuns of meisies as meisies verwys nie.  Daar word dus daarmee gehoop dat hulle as sulks nie stereotipiese geslagsrolle gaan aanneem nie.

Huh?  Is dit dan nou verkeerd om ‘n seun te wees?  Of dan nou ‘n meisie?  Ek meen ‘n seun het ‘n penis en ‘n meisie ‘n vagina en as sulks is hulle verskillend.  Punt.  Goed, daar is die uitsonderings, maar wragtig, om die kinders hulle geslag te ontsê is seker ‘n bietjie wild.  Ons lewe mos al lankal in ‘n tyd wat ‘n kind enige iets kan doen wat hy of sy wil.  Ek sien regtig nie die doel daarvan om hulle almal geslaglose wesens te maak nie.

Toe ek nog ‘n kinders was, het ons al klaar gespeel waarmee ons wou.  Ek het my eie gewere en karre gehad en my broers het hulle eie poppe gehad.  Ek het dalk baie meer poppe as hulle gehad, maar dit beteken nie noodwendig dat ek meer pop gespeel het hulle nie.  Ons was wel bewus daarvan dat ek ‘n dogtertjie is en hulle seuntjies.  Die enigste verskil was dat hulle kon staan en piepie.  Seker iets wat nou heeltemaal taboe is omdat ‘n vrou dit nie met selfrespek kan doen nie.  Sy kan nogtans probeer as dit haar behaag.

Die verskil is ook op genetiese vlak.  ‘n Man het ‘n XY chromosoom en ‘n vrou ‘n XX chromosoom.  Dit alles lei tot verskillende hormone, eienskappe ens om van die vrou ‘n beter mens te maak.  😉  Kinders gaan dit een of ander tyd ervaar, waarna sal hulle dit kan toeskryf as daar nie eers op die mees basiese vlak onderskeid gemaak mag word nie?

Die punt is daar is ‘n verskil – ‘n sigbare verskil.  Moet jou oë nou aangekla word as wat jy sien nie alles dieselfde is nie?  Verskil is daar – aanvaar dit, beleef dit.  Dit is pret en maak die lewe interessant.  Bou ‘n brug of grou ‘n tonnel, maar kom oor dit.  Al is jy hoe polities korrek, daar gaan ‘n verskil wees.  Tussen man en vrou, swart en wit, lank en kort, wit en swart, tier en leeu.

Van die verskille gaan die een dalk meer geskik maak vir iets as die ander.  Dit beteken nie dat die ander nie kan probeer en dalk suksesvol wees nie.  Iewers moet daar tog ‘n punt van aanvaarding wees.  Voordat iets hof toe gesleep word omdat ‘n vrou nie sperms kan produseer nie en ‘n man nie ‘n kind kan verwag nie.

Hoe voel julle?

Breinvasbrand:  Watter jaar is Ken as ‘n mans vriend vir Barbie bekend gestel?

Breinlosbrand:  Ek het nooit die vraag klaar gevra nie.  Growing up Dane se antwoord is seker net so reg soos enige iemand anders s’n.  Ek wou eintlik weet Watter rol het Leonardo DiCaprio in Growing Pains gespeel.  Die antwoord daarvoor is Luke Brower.

Lunch Week 25 / 11

Toorwoorde

1. Wat is “stewe”?
2. Wat beteken die afkorting “TV”?
3. Wat beteken die uitdrukking “om kleingeld van iemand te maak”?
4. Gee ‘n sinoniem vir “DJ” (12 letters)?
5. Herrangskik die volgende in ‘n sinvolle woord: GAWEKIR

Agter elke suksesvolle kind

Ek lees nou die dag van ‘n baie bekende Popsanger wat naam met ‘n piepstem gemaak het.  Hy het al as ‘n jong seun die skare aan sy voete gehad.  Natuurlik wou puberteit dinge, veral sy stem verander het.  Om dit te verhoed is sy testikels op ‘n baie jong ouderdom uitgehaal.  Hy het een van die grootste sterre van sy tyd geword en het miljoene gemaak.  Vraag is eerder of die miljoene sy testikels, ontwikkeling en kinderlewe werd was?

Ek het my bedenkinge of die storie waar is.  In geheel gesien, maak baie dinge nou perfek sin.  Tog, sou dit algemene kennis gewees het as dit wel waar is.  Geen normale mense sal na sulke uiterstes toe gaan nie.  Of sal hulle?  Dalk is die ouers van beroemde kinders bloot die uitsonderings.

Kinders wat vroeg-vroeg ‘n roemryke loopbaan het, sal seker altyd ‘n omstrede kwessie bly.  Aan die een kant is daar baie beslisde kinder arbeid wetgewing.  Dit gaan wel ‘n bietjie moeilik wees om ‘n 18 jarige as ‘n kleuter aan te sien.  Aan die ander kant, is die tipe lewe vir gewone mense speel.  Kinders doen tog konserte, waarvoor hulle ure lank oefen en dit sonder vergoeding.  Daar word basies verwag dat ‘n goeie skolier ‘n hele paar ure sport ‘n dag doen.  As die kind daarmee ‘n geldjie kan maak, hoekom dan nie?

Soos altyd is geld dalk die wortel van alle kwaad in die geval.  Hoe ver word daargegaan om die geld te bekom?  En vir wie is die geld bedoel?  Glo dit of nie, maar baie van die fanatiese ouers spandeer die kind se geld met lus.  Daar is selfs ‘n wet in Amerika waarvolgens ‘n gedeelte van die kind se inkomste gevries moet word tot hulle dit self kan benut.  Vir die meeste mense is hulle kinderjare goue herinneringe, maar is dit altyd die geval met kindersterre?  Niemand verwag tog ooit dat die kind die hoofbroodwinner moet wees nie, maar dit is presies wat gebeur met baie van die gevalle.

Daar kan geargumenteer word dat dit die kind se droom is wat uitgeleef word.  Tog is dit ook opmerklik dat die ouers dikwels te vergeefs in hulle verlede probeer het om sukses te maak in die spesifieke geval.  Wat as die kind se droom verander?  Fanatiese ouers sal nie net so aanvaar as hulle “performing monkey” aftree nie.  Dit kan ‘n lewe van luuksheid nek omdraai.

Dikwels wanneer van die wonderkinders volwassenheid behaal, wil hulle niks van hulle ouers weet nie.  Juis omdat hulle voel dat hulle in ‘n blik gedruk en uitgebuit is.  Daar is egter ook baie van die sogenaamde wonderkinders wat sonder issues deur die lewe gaan.  Wat net bewys dat dit nie noodwendig ‘n slegte ding was nie.  Tog het die laasgenoemdes se ouers se skandes nooit hulle loopbane oorheers nie.

Wanneer moet ‘n kind toegelaat word om ‘n wilde droom na te jaag?  Hoe word daar verseker dat dit die kind se droom is en nie die mal ouer nie?

Breinvasbrand:  Watter rol het Leonardo DiCaprio

Breinlosbrand:  Olga was reg met Michael Flatley.

Lunch Week 25 / 11

Uilspieël

(Watter een pas nie en hoekom pas dit nie?)

1. Tom; Huckleberry; Oliver
2. Robbe; Olifante; Walrusse
3. Durban; Pietermaritzburg; Mafikeng
4. Beker; Koppie; Bord
5. Stormers; Bulls; Sharks

Dans tot jy uitpass

Ek was nog altyd gefassineer deur flieks waar iemand in ‘n hoekie begin sing.  Hy of sy begin dan stadig saam te dans en voordat jy jou oë kan uitvee dans die hele skool, stad of skou saam met die persoon.  Natuurlik net op die silwerdoek.

Tog was sulke massiewe dans tonele algemeen bekend tussen die 14de en 17de eeu.  Vandag word dit sommer Dans Manie genoem, maar dit was ook bekend as dans plaag, choreomania, St Johannes se Dans en St Vitus se Dans.  Die oorsaak daarvan is tot vandag toe nog onbekend.

Die Rottevanger van Hamelin se oorsprong kom waarskynlik van ‘n voorval van Dans Manie in 1237.  Kinders het al singende en dansende getoer vanaf Erfurt na Arnstadt.  In 1278 het daar soveel mense op ‘n die brug oor die Meuse Rivier in Duitsland gedans dat die burg in mekaar gestort het.  Die eerste voorvalle van die Manie was al in die 7 de eeu gewees, maar 100 eeue later het dit in geheel basies uitgesterf.  Die verbindenis met St Vitus gaan oor ‘n aantal vroue wat jaar na jaar die St Vitus Kapel in Drefelhausen besoek het.  Hulle het dan deur die nag gesing en gedans tot hulle uitgeput inmekaar gesak het.

Die Dans Manie het gewoonlik in moeilike tye voorgekom.  Dit was immers die tyd wat Europa geteister was deur vloede, plaag en hongersnood.  10 duisende mense sou sonder enige rede aan die dans raak en aangaan totdat hulle in mekaar gesak het.  Tot kon tot maande lank kon duur.  Niemand weet vandag of die mense die danse vooraf georganiseer, spontaan of gedwonge was nie.  Tog was die deelnemers nie heeltemaal by hulle positiewe gewees nie.

Ergotvergiftiging is dikwels aangevoer as ‘n rede vir die dans.  Hoewel hallusinasies met Ergot voorkom, kan dit nie die ander simptome verduidelik nie.  Ander simptome stem oor nie ooreen met breinontsteking, tifus of epilepsie nie.  Dit is opmerklik dat die dans gewoonlik begin is deur besoekers en dit is heeltemaal moontlik dat mense vir die snaaksigheid saamgedans het.  Musikante het dikwels die dansers vergesel om die manie te keer, maar hulle kon net sowel mense aangespoor het om saam te tans.  En so het die mense bly dans, tot hulle in mekaar gesak het of dood neergeslaan het.

In ‘n mate stem dit nogal ooreen met rave.  Dit kon dalk net ‘n voorloper van massa histerie wees.  Om een of ander rede laat dit my aan toi-toi dink.  Maar gelukkig het die dans toe wel in die middel van die 17de eeu gestop.

Breinvasbrand:  Wie is die “Lord of the Dance”?

Breinlosbrand:  Olga was reg met Jack Worthing.

Wreede Ontnugtering

Ek het al gehoor van ‘n geween wat die dooies sou opwek.  Ek het dit natuurlik nie letterlik gevat nie, ek meen destyds in die Kaap het die rykes mense gehuur om te kom ween op ‘n begrafnis.  Niemand is sodoende opgewek nie, hulle het gelukkig later die lawwigheid laat staan.  Dit blyk nou dat ek verkeerd was.

Fagilyu Mukhametzyanov (49) het op haar eie begrafnis wakker geskrik van almal wat rondom haar kis geween het.  Toe sy besef het wat gaan aan, het die arme vrou aan die gil gegaan.  Ek is seker sy was nie die enigste een wat gegil het nie.  ‘n Hele paar van die begrafnisgangers het seker ‘n paar dinge aangevang waaroor daar nie gepraat is nie.

Natuurlik het arme Fagilyu se hart dit nie gehou nie en sy is 12 minute na haar aankoms in die hospitaal dood.  Wel, so hoop die dokters.

Dit laat ‘n mens nogal wonder hoeveel mense word lewendig begrawe en word eers wakker onder die grond?  Hoe keer jy dat dit gebeur?  Ek hoop maar orgaan skenking is genoeg.

Lunch Week 25 / 11

Algemene Kennis

1. Hoekom het Kader Asmal in 2008 van die parlement bedank?
2. In tennis het net 3 enkelspel spelers ‘n Career Golden Slam beklink.  Wat beteken ‘n Career Golden Slam?
3. In Grease, wat is Danny se bende se naam?
4. Waaroor gaan die Hoot @ Noon inisiatief?
5. Wie se hond was Jock of the Bushveld?

Trust every man, just not the devil inside him

Ek is nie juis veel gespin daarmee om reg voor die opening van die inkopiesentrum te parkeer nie.  Ek gryp gewoonlik die eerste parkering waar ek inkom en stap na die ingang.  Dit spaar my ‘n volle 10c op petrol, ek hoef my nie dood te soek na parkering nie en daar is nie ‘n spul karre wat jou kar met hulle deure krap nie.  Selfs die karnarre vermy die uiterste van die parkeer areas. 

Julle weet mos nou hoe gaan dit.  Jy draai ‘n bietjie langer as beplan en as jy jou oë uitvee moet jy in die donker na jou kar stap in ‘n afgeleë deel van die parkeer area.  Nie ‘n goeie idee as jou huis Suid-Afrika is.  Mens moet maar altyd bewus wees van die gevare.  In ‘n mate help dit jou om voorbereid te wees en nie net nog ‘n statistiek te word nie. 

Nou die dag het ek weer verder parkeer as wat ek van plan was om inkopies te doen.  Ek is juis oppad terug kar toe, toe ek hoor hoe iemand agter my begin hardloop.  Ek is jammer, my goed is my goed en ek deel nie graag nie.  Dit sluit my handsak in.  Ek kryp dit ekstra styf vas en klem my vuis om die leisels.  Reg om ‘n geveg op te sit, die plek is darem nou ook nie so verlate nie. 

Die hardloper kom verby en ek dink nogal so selfvoldaan dat hy gesien het my handsak is myne.  Ek kan mos van baie dinge beskuldig word, maar nie dat ek subtiel is nie.  Ek het egter nie geweet hy het ‘n maatjie wat saam met hom draf nie. 

Nie juis dat dit saak maak nie, ek het mos nie my handsak gelos nie.  Hy draf ook nietemin verby, maar draai in die draf na my om met my te praat.  “Sorry ma’am!  We are running for transport.” 

Natuurlik het ek soos ‘n eier gevoel.  Dit was ‘n baie onskuldige draffie en ek het van hulle misdadigers gemaak sonder bewyse.  Die teenoorgestelde kon ook gebeur het.  Ek kon gedink het dat hulle onskuldig is en minus my handsak en kar gewees het. 

Ek is egter seker dat ek nie die enigste een was wat al so iets aangevang het nie.  Het jy al grond toe geval toe daar ‘n klapper afgegaan het?  Het jy dalk iemand wat jou op die skouer tik met ‘n vuis gegroet?  Ken jy iemand wat ‘n situasie verkeerd gelees het en die grap van die jaar was?  Vertel ons so ‘n bietjie.

Breinvasbrand:  In “The Importance of Being Earnest” watter karakter was as ‘n baba in ‘n handsak gevind?

Breinlosbrand:  1955