So bly ons nederig

Iemand het my eendag vertel dat hulle masjiene hulle nederig hou.  Die masjien het male sonder tal net doodeenvoudig geweier om te werk soos moet dit moes.  Die man kon dan doen wat hy wou, op sy kop staan en Jan Pierrewiet deur sy anus fluit, dit sou nie gewerk het nie.  Hulle was dan genoodsaak om op hulle knieë voor die masjien te staan.  Soms het dit gewerk en soms nie.  Maar een ding was gewis:  daardie masjiene het hulle nederig gehou. 

Ek moet dalk noem dat (as ek reg kan onthou) die gebeure in die 80’s afgespeel het.  ‘n Tyd waarin Suid-Afrika nie die nuutste speelgoed kan koop het soos dit hulle gepas het nie.  Nie dat die ooms van die tyd hulle laat vermaak nie, hulle het net doodeenvoudig self die nuutste wonder gebou.  Wat gewoonlik heel goed gewerk het, maar daar was ook soms gesukkel. 

Sanksies is al lankal iets van die verlede.  As ons wil eerlik wees, moet ons erken dat ons met die jare saam arrogant geword het.  Niks is buite ons bereik nie en ons dink nie daaraan dat ons feilbaar is nie.  Met die regte hulpbronne, die nodige kennis en ‘n bietjie geluk kan enige iets bereik word.  Hoekom dan nie?  Enige inligting waarna jy tog kan smag is beskikbaar op enige tyd en enige plek.  Al wat jy hoef te doen is om dit reg aan te wend. 

Waaroor moet ‘n mens dan nou ook nederig wees?  Dit is dalk die fout wat ons maak, een wat een of ander duistere mag gereeld ons neuse deurvryf.  Ons word nog gereeld aan ons eie onmag herinner – in my geval is dit wanneer die internet nie so maklik beskikbaar is nie.  Waar die ooms in die verlede nog hier en daar aan iets kon karring of skop, sit ons met ons hande in ons hare.  As dit nie werk nie, werk dit nie.  Jy kan niks meer doen as om seker te maak dat alles wat moes in, in is nie. 

Miskien is die internet daar om ons geduld te leer.  Geen vinnige oplossing nie, niemand wie se fortuin jy kan vertel nie, niks wat geskop kan word nie.  Jy moet maar net weer probeer – en weer en weer en weer.  Tot jy miskien jou doelwit bereik.  Die les sluit dalk volharding in.  Dit is baie makliker om jou doelwit te verander as om deur te druk met wat jy oorspronklik beplan het. 

Dus, Groot Internet Vermaker, ek kry die boodskap.  Kan ek nou betroubare, vinnige, altyd werkende internet kry?

Hoe hou julle die Groot Internet Vermaker gelukkig?  Kan ‘n mens dit iets voer, iets offer of ‘n produk aanskaf wat jou nooit in die steek laat nie?  Is dit dalk net n verlore geveg en moet ek net leer om op my tande te byt?

Breinvasbrand:  Wat is die bestandele van “Humble Pie” (letterlik)?

Breinlosbrand:  Gerda was reg met Noord.

Lunch Week 20 / 11

Toorwoorde

1. Wat is “prou”?
2. Wat beteken die afkorting “RIV”?
3. Wat beteken die uitdrukking “agteros kom ook in die kraal”?
4. Gee ‘n sinoniem vir “Vuurherd” (6 letters)?
5. Herrangskik die volgende in ‘n sinvolle woord:  TONDALERSEB

Winter Oorlewing

Die waarskuwing is uitgereik:  Gauteng behoort vanaand te bibber.  Mag dalk nie die eerste keer vir 2011 wees nie, maar dalk die intenste op datum.  Ek glo altyd dat die tweede deel van Winter (of Somer) gewoonlik die ergste is.  Ironies genoeg, die deel na die kortste dag en langste nag.

Ek neem aan almal het hulle kombersies, warm klere uitgepak en wens nou dat hulle kan hiberneer.  Vandag wil ek hoor wat het julle nodig om die winter te oorleef?  Oorleef is dalk ‘n bietjie dramaties.  Kom ons vra eerder wat word benodig om die winter met so min skete en pyne deur te kom.  Hoe maak julle winter ‘n tyd om na uit te sien?

Ek weet dat winter nie verkoues en griep veroorsaak nie.  Dit word veroorsaak met virusse en daar is 200 stories hoekom mens meer vatbaar is in die wintermaande.  Wat ook al, punt is dat ‘n dik kop, seer keel en snot neus gewoonlik in die winter kom besoek aflê.  Jy kan dit aanvaar of hoop om die jaar te wen.  Mens moet verkieslik voor die winter jou griep inspuiting kry en jouself dan probeer troos met vitamien C.

Koud kry is nie vir my lekker nie, hoewel koud kry self nie skadelik is nie.  Daar word blykbaar meer kilojoules verbrand as jy sit en bewe.  Klank aanlokkend, maar nie so aanlokkend as om warm en snoesig te wees nie.  ‘n Lekker warm baadjie is ‘n moet.  Ek haat dit as my tone koud kry, dus sal ek aan die begin van die winter ‘n paar stewels of twee koop.  Stewels smeek vir sokkies, anders sal jou voete stink.  Kry dan sommer ook ‘n pantoffeltjies en hoop iemand brei vir jou ‘n paar bedsokkies.  ‘n Kat of ‘n hond op die bed help ook om jou voete warm te hou.

Ek weet nie of ek my verbeel nie, maar my hande en voete droog meer uit in die winter.  Kanferroom of Zambuksalf is ‘n moet.  Noudat ek daaraan dink, as die virusse jou vang, gaan jy Vicks ook nodig hê.  Net vir huislike gebruik en moet verkieslik elke oggend afgewas word.

Mens is soveel luier om in die winter te gaan rondloop, vermaak by die huis is dus ook ‘n moet.  Rekenaars en DVD’s is goed, maar niks wen ‘n lekker boek in ‘n warm bad nie.

Laastens, vet mense kry minder koud.  Lekker winterkos is dus ‘n moet.  Ek dink aan souskluitjies, beestert, bredies, gebakte poedings ens.  Jy kan natuurlik alles met sjerrie afsluk, maar dit is nie ‘n goeie idee in die oggend nie.  Dit gaan nou nie help om op ‘n kafeien deur die dak te stoot kry.  Kry dus ook maar Warm Sjokolade, Milo, Horlics of sommer al 3.

Wat is jou wintersraad?

Breinvasbrand:  In watter halfrond bly die Eskimo’s?

Breinlosbrand:  Demoerin was reg met Angie Motshekga.