ID Foto Vloek

Het jy jouself al ooit as ‘n reeks moordenaar gesien?  Nie?  Jy het seker nog nooit in jou groen boekie, ook bekend as ‘n identiteits dokument gekyk nie.  Om een of ander rede lyk almal altyd daar asof hulle uit die bose kom.  Anders gestel, baie min mense sal hulle ID foto gebruik as hulle bakkies vir Facebook.

Mens moet seker dankbaar wees vir klein genades – ons leef nie meer in die donker tye nie.  ID foto’s is deesdae in kleur en ‘n mens mag deesdae daarop glimlag.  Boonop is dit nie meer vat wat jy kry en dankbaar nie.  Jy keur jou foto goed voordat dit gedruk word.  Dit behoort vir ‘n groot verbetering te sorg, met die klem op behoort.  In die werklikheid, bly ‘n ID foto iets wat jy kan gebruik om kinders mee skrik te maak.  Anders is ek net te ongeduldig om ‘n maand een foto na die ander te laat neem in die hoop dat ek een kry wat soos ek lyk. 

Die idee van die foto is tog seker dat jy herkenbaar moet wees.  Dat enige swaap sonder ‘n gesukkel jou kan eien van jou ID boek, paspoort of lisensie.  Dit is dalk die sleutel, die foto’s is dalk net deur swape identifiseerbaar.  Net sodra jy dink alles is swaapbestaan, kom daar ‘n nuwe swaap uit.  Een wat alle beperkinge oortref en nuwe grense daar stel. 

Ek was een keer so hittete toegang tot ‘n land verbied gewees omdat die persoon wat my paspoort onder oë gehad het, besluit het dat dit onmoontlik ek kan wees.  Gelukkig kon ek my uit daardie een praat. 

Wat help ‘n foto in elk geval as dit geneem is toe jy 16 was en jy stap al aan 70 toe?  Nou dat ek daaraan dink, lyk jou foto as ‘n 16 jarige beter as wat jy op 70 sal lyk?

Hou jy van jou ID foto?  Kan jy die Moslemvroue blameer wat hulle foto’s met sluiers aan laat neem?

Breinvasbrand: Wie het “Mug shots” uitgevind?

Breinlosbrand:  Demoerin was reg met Vitality.

Lunch Week 13/11

Couples Theraphy

(Rangskik die terme in pare wat by mekaar pas en gee die gemeenskaplike faktor van die groep).

Galjoen; Reptiel; Leeu; Insek; Padda; Voël; Skilpad; Soogdier; Vis; Sprinkaan; Amfibie; Flamink.

Gemeenskaplike faktor?

Beloon vir lojaliteit

Ek onthou dat ek nog op skool was, hoe die Clicks Klub Suid-Afrika getref.  Ek onthou R250 000 maandelikse prysgeld wat Edgars op die TV gehad het.  Destyds was dit nie te versmaai gewees nie.  Dit was ‘n huis se prys (skielik voel ek baie oud).  Soos vader Tyd aangestap het, het lojaliteits programme meer en meer geraak.  Daar is fliekkaarte, talking points en selfs lojaliteitsprogramme van versekering en banke.  Die mees onlangse is seker die smart card van Kies en Betaal. 

Die beginsel klink baie goed.  Hoe meer jy saai, hoe meer sal jy maai.  Die winkel beloon jou met ‘n sekere persentasie vir elke sent wat jy op hulle vloer spandeer het.  Helaas, mens kan nie deur die wêreld gaan sonder om soms met handelaars te doen te kry nie.  Dit kan dus seker as ‘n wen-wen situasie gesien word.  Jy moet koop, jy kan dus net sowel iets daarvoor terug kry.

Alles klink natuurlik baie ouliker op papier as in praktyk.  Ek weet van mense wat amper aan ‘n hartaanval beswyk het in hulle verbete pogings om hulle vliegmyle op te eis.  Ek het, seker soos elke Suid-Afrikaner, verlede jaar ernstig oorweeg om na ENB oor te skakel.  15 % terug op petrol aankope sal enige mens laat glimlag.  Gelukkig het ek eers na die fynskrif gaan soek voordat ek in die storie ingeboender het.  Jy ‘n halwe wonderwerk nodig om die 15% merk te bereik.  Terme en Voorwaardes is nie baie simpatiek nie. 

Kom ons raak prakties.  Soos reeds genoem, bied die kaarte jou die geleendheid om ‘n gedeelte van die geld wat jy spandeer het terug te kry.  Kaarte en die bemarking daarvan is nie goedkoop nie.  Administrasie is ook geldvreter soos min ander dinge, die meeste mense sal dit soos die pes vermy.  Die meeste besighede het meer as waardeur hulle ooit kom.  Hoekom die ekstra onkostes aan te gaan?

Die kliente kan baie beter en makliker beloon word om die kostes van die wins verhaal.  As jy 10% terug kry van elke rand wat jy spandeer, hoekom nie net bloot die winsgrens met 10% sny nie.  Sonder die administrasie en die ekstra kostes van bemarking. 

Goed, die maatskappy gaan dan nie lyk na ‘n maatskappy wat hulle kliente se lojaliteit koop nie.  Hulle gaan dalk goeie diens moet lewer om kliente te lewer.  Goed wat logies is, sonder tierkantlyntjies wat net daar is om die kliente die mus oor oor oë te trek. 

Die enigste nadeel daarvan om met die programme weg te doen, is dat party mense dalk werkloos sal wees.  Tog, met die geld wat bespaar gaan word, kan hulle dalk vir beter dienslewering aangewend word.  Dit is nou wat ek wen-wen sonder bog noem.

Hoeveel lojaliteitskaarte het jy?  Wat is jou gunsteling lojaliteitskaart?  Is daar wel ‘n plek vir hulle?

Breinvasbrand:  Wat word Discovery se lojaliteitsprogram genoem?

Breinlosbrand:  Demoerin was reg met 1995.

Lunch Week 13 / 11

Toorwoorde

1. Wat is “reder”?
2. Wat beteken die afkorting “see.”?
3. Wat beteken die uitdrukking “die vlag dek nie die lading nie”?
4. Gee ‘n sinoniem vir “twaalftal” (5 letters)?
5. Herrangskik die volgende in ‘n sinvolle woord:  KOENJELWOUR

Aanspreeklikheid

Ons regering is mos deesdae bo enige kritiek verhewe.  Hulle lewe in ‘n gekke paradys waar hulle aksies geen gevolge het nie.  Hulle onbevoegdhede of traakloosheid ook nie.  Alles wat hulle doen is goed genoeg.  Onlangs is David Maynier van die DA uit die Nasionale Vergadering gejaag omdat hy dit gedurf waag het om Jeff Radebe te vra hoe dit voel om bloed aan sy hande te hê?  Dit volg na Radebe se aandeel om wapens aan Libië te verkoop.  Dit nou net so terloops. 

Gisteraand het Bheki Cele hom in ‘n ander bevolkingsgroep vererg vir Diane Kohler-Barnard (Mens moet net van haar hou).  Daar is nuwe wetgewing wat basies die reserviste in die polisie gaan ontman.  Kohler-Barnard het nie juis doekies omgedraai nie.  Sy het reguit vir Cele vertel dat hy nooit ooit weer die SA publiek moet vra om teen misdaad op te staan nie.  Sy nuwe bepalings verseker dat die publiek nie kan help nie.  As hy kon, het hy haar sweerlik te lyf gegaan.

Stadig maar seker raak die Suid-Afrikaanse publiek gatvol vir misdaad.  Die regering sien nie juis die probleem in nie en was hulle hande in onskuld.  Hulle mag wild en wakker skiet net wat en wanneer hulle wil.  Terselfde tyd maak hulle doodseker dat Jan Publiek nie hulleself mag verdedig nie.  Jy is dus weerloos teenoor misdadigers, kan nie juis jou vertroue in die polisie stel nie.  ‘n Baie bitter pil om te sluk en ‘n mens kan seker verstaan dat daar mense is wat bloot opgee om dit te probeer sluk.  Omrol en doodspeel behoort van niemand verwag te word nie. 

So is daar gister ‘n man aangekeer vir ‘n aantal bylmoorde in Durban.  Hy het iemand onthoof en twee ander met ‘n byl dood gemaak.  Een van sy slagoffers het ontsnap en die polisie omtrent die bylman gaan inlig.  Bylmoorde is nou nie juis iets wat die meeste wetsgehoorsame burgers aanstaan nie.  Tog, die man het wraak geneem op ‘n bende wat met die verkragting met sy dogter verbind word.  Tydens die verkragting is sy dogter met MIV besmet.  Daar word nie genoem of daar iemand in verband met haar aanval gearresteer is nie.  Sou die man daarop uit gewees het om wraak te neem as hulle agter tralies is?  Let ook op dat hy binne ‘n kwessie van dae vasgetrek is.

Die polisie dring daarop aan om mense wat hulle eie geregtigheid geëis het, tot verantwoording te roep.  Terselfde tyd, doen hulle nie hulle werk nie – wat mense tot sulke uiterstes toe dryf. 

Volgens die wet is iemand wat aandadig tot ‘n moord is, ook ‘n moordenaar.  Dalk moet die Minister van Polisie en die Polisiehoof van aandadigheid van moord aangekla word, saam met elke mens wat gedwing was om die reg in eie hande te neem.   As hulle effektief was, was dit vir niemand nodig om die reg in eie hande te neem nie.

Dit is dalk een manier om die polisie aanspreeklik te hou.  Hoe dink julle moet die polisie – wat tans bo kritiek is – aanspreeklik gehou word?  Ons het dalk vanaand ‘n groot blogjol in Pretoria Sentraal – daar skort niks met die polisie se boelie tegnieke nie. 

Breinvasbrand:  Wanneer is die Suid Afrikaanse Polisie Diens gestig?

Breinlosbrand:  Seegogga was reg met Richard Burton.

Lunch Week 13 / 11

Uilspieël

(Watter een pas nie en hoekom pas dit nie?)

1. Beautiful Noise; Cecilia; The Boxer
2. Tjops, Wors; Kook
3. Kinders; Grimering; Kaalvoet
4. Pinocchio; Geppetto; Gina
5. Vierkant; Reghoek; Driehoek

 

Getroud sonder parool

Die filosofie agter ‘n huwelik is seker baie eenvoudig.  Twee mense wat ringe ruil en dan een word om die res van hulle lewe saam deur te bring.  Bla Bla Bla saam met ‘n emmer vol kots.  Veral ten opsigte van die mense wat dit baie letterlik opneem. 

Ek sweer daar is mense wat glo dat hulle die helfte van elke asemteug aan hulle ander helfte moet afstaan.  Dit is asof hulle nie ‘n volle skoot asem kan kry as hulle nie elke oomblik van elke dag bymekaar kan deur bring.  Natuurlik is dit seker nutteloos om met iemand te trou as jy verbete aan jou vryheid as ‘n enkellopende gaan vasklou.  Natuurlik moet daar tyd saam deur gebring word en weeg die een waarmee jy getroud se belange nogal swaar. 

Beteken dit nou opsluit dat julle nou mekaar se spieëlbeeld moet wees?  Dat julle alles uit een mond moet sê, presies dieselfde belangstellings moet hê en alles saam moet doen?  Beteken ‘n trouring dat ‘n brein nie meer onafhanklik kan werk nie? 

As dit die geval is, is die liefde oftewel ‘n huwelik dan, ‘n tronk.  Daar is ‘n gesegde dat selfs ‘n goue kou nog steeds net ‘n hok is.  Dit ontneem jou van jou vryheid.  Daar kan seker geredeneer word dat jy die dag wat jy trou vrywillig jou vryheid opgee.  Hoe vrywillig kan dit wees as jy die heeltyd opgepas word? 

Dit is waarop dit vir my neer kom.  Die mense wat elke beskikbare oomblik van elke dag opsluit saam met jou huweliksmaat moet deurbring, misbruik liefde as ‘n verskoning om tronkbewaarder te speel.  Liefde sal mos nie verwater om ‘n uur weg van die ander deur te bring nie?  Hoekom anders sou ‘n man byvoorbeeld daarop aandring om vinger alleen tussen 4 vroue te kuier?  Of ‘n vrou wat nooit van rugby gehou het nie, opsluit saam na elke wedstryd gaan?

Ongeag van hoe oulik jou man of vrou is, daar is tye wanneer ‘n Y chromosoom ‘n vereiste / oorbodig is. 

Dit is tog maklik om iemand te dwing om aan jou getrou (en getroud) te bly.  Tog lê die sukses van ‘n huwelik daarin dat die paar ongedwonge by mekaar bly.  Selfs word hulle nie die heeltyd opgepas nie.

Is ek ‘n verbitterde oujongnooi of laat sommige mense jou ook naar word?

Breinvasbrand:  Met wie was Elizabeth Taylor twee keer getroud?

Breinlosbrand:  Olga was reg met Monopoly.

Koerantbrokkies

Jammer die koerant kon nie saam jul koffie afgelewer word nie… blameer asb Binnelandse Sake! 😦

Kostes vir passpoorte en ID boekies gaan op. Passpoort vanaf R190.00 na oor die R400.00 en ID gaan vanaf R20.00 na R140.00 sonder fotos – dis min of meer die bedrae wat ek vanoggend by die ongelooflike behulpsame staf gekry het. Daar was in totaal 4x toonbanke oop met omtrent 3x wat gehelp het en soms het hulle verdwyn vir tee. Dis glo te danke aan die pryse wat styg… so ja daar het julle dit; swak diens is AGV hoë tariewe. Die twee loop saam.

Fred die bobejaan is nie meer nie. Hy is van kant gemaak nadat hy te veel nonsens aangejaag het en mense al seer gemaak het. So ja… aan die mense wat bobbejane bly voer en probeer “mak” maak daar het julle dit nou, hou dit asb op doen! Diere word nie gevoer nie vir ‘n rede! Want dan ruk hulle hand uit en julle loop en kla en die dier word uitgesit.

Mnr. Angus Buchan, evangelis van Greytown wil glo wi Bob Dylan bekeer… wats die kanse? Regtig?

Die Proteas is uit die Wêreldbeker! Dit nadat hulle alweer gechoke het! 😦 Kom ons probeer maar weer in 4 jaar!

Vier betogers in Ladysmith is vanoggend dood gery en ‘n vyfde ernstig beseer. Dis nog onseker waaroor hulle betoog het.

‘n 37 Jarige vrou het uit haar 4×4 voertuig geval toe sy glo oor haar motor beheer verloor het. Dis nog onseker hoe die ongeluk gebeur het.  Die ongeluk het eergistermiddag by die Bosvark 4×4 Adventure Park by Noordheuwel aan die Wes-Rand gebeur, en die vrou is ernstig beseer.

♪♫ Verjaarsdae ♪♫ Lady Gaga is vandag 25 – Dis scary!! Een van my hunks Vince Vaughn is 41 en Julia Stiles (30)

Lunch Week 13 / 11

Algemene Kennis

1. Watter land het die langste wynroete in die wêreld?
2. Watter straat in Soweto was die adres van twee Nobel Vrede Prys wenners?
3. Waar (dorp) is die diepste handgegrawe vertikale gat?
4. Wanneer was die eerste hartoorplanting op ‘n mens gedoen?
5. As jy dit het, wil jy dit deel.  As jy dit deel, het jy dit nie meer nie.  Wat is dit?

Gereserveer vir my gebruik

Die mens is maar ‘n dier van gewoonte – al haat jy dit is dit iets wat maar net sowel erken kan word.  Selfs verpes jy roetine met ‘n passie, daar is goed wat maar net weer en weer gedoen sal word.  Mense sal byvoorbeeld altyd aan dieselfde kant van die bed slaap.  Hulle sal altyd op dieselfde plek gaan sit of uit dieselfde koppie drink. 

Goed en wel, in jou eie huis kan jy seker doen wat jy wil.  Tog raak ‘n mens oor die verloop van tyd gewoond daaraan om dinge op jou manier te doen.  Jy kom byvoorbeeld in die oggende by jou werk en jou kar gaan parkeer haarself op haar plek.  Wel, nou nie heeltemaal haar plek nie – jou naam staan nou nie daarop nie.  Tog parkeer jy al solank daar, dat dit netsowel met jou naam gemerk kan word.  Jy beskou dit al jare lank as jou eie persoonlike parkering.

Nie net by die werk nie.  Baie elke inkopie sentrum waar jy kom, het jy punt waar jy altyd parkeer.  By die waar jy gereeld kom, gaan parkeer die kar ook al haarself.  Jy gaan – as jy enigsins ‘n keuse het – by dieselfde tafel sit as waar jy voorheen gaan sit.  Jy gaan hou op dieselfde punt piekniek.  Jy gaan sit op dieselfde plek in die kerk.  Net om ‘n paar voorbeelde te noem.  Juis omdat dit iets is wat jy jare lank doen, het jy jou merk daarop afgesteek.  Dit behoort aan jou, al het jy nie die kaart en transport daarvoor nie. 

Alles goed en wel, tot daar een wetter (gewoonlik ‘n nuweling) opdaag met geen respek vir informele eienaarskap nie.  Dit is dan wanneer jou kar jou met ‘n rooi gesig uit die kantoor kom haal, want iemand anders staan op jou plek.  Natuurlik het hulle die volste reg om dit te gebruik, maar dit beteken nie dat ek daarvan gaan hou nie.  Dit is sulke tye wat ek dit kan verstaan hoekom mense bande stukkend steek as iemand op hulle plek parkeer. 

Natuurlik maklik genoeg om dit jou plek te hou.  Sorg dat jy ‘n paar dae vroeg genoeg is om jou terrein te verdedig.  Tsk, jy gebruik dit vir jare en kan nie net iemand anders se ruimte gaan gaps nie.  Dit vat ‘n bietjie moeite, maar kan gedoen word.  Behalwe vir die dikvellige sotte wat nie die lyne kan lees nie.  Daar is geen bril wat daarvoor help nie.

Eien jy vir jou sitplek / parkering / bekers / ruimte waarop jy eintlik geen reg het nie?  Wat is “jou goed” waaraan niemand moet karring nie?  Raak jy geirriteerd as hulle dit probeer oorneem?

Breinvasbrand:  Met watter bordspeletjie word gratis parkering geassosieer?

Breinlosbrand:  Demoerin was reg met Molteno.