Rekenaar Smekenaar

Rekenaars is deesdae so algemeen soos bad of stort.  Meer algemeen, aangesien jy aansienlik meer tyd met ‘n rekenaar deur bring as in ‘n bad of stort.  Dit is orals, by die huis, by die werk en selfs op vakansie.  Veral as jy soos sekere mense wat ek ken aan die internet verslaaf is.

Nie so lank gelede was rekenaars eerder die uitsondering as die reël.  Ek is heeltemaal deur skool sonder dat ek ooit aan ‘n rekenaar geraak het.  Dit was nou nie asof ek die “Bekendstelling aan Rekenaarsdag” gemis het nie.  Ons het wel in st 8 die keuse gehad om rekenaarwetenskap as ‘n vak te neem, maar daar was vakke wat my baie meer aangestaan het.  Ek is tot vandag toe nie spyt daaroor nie.

Die eerste keer wat ek voor ‘n rekenaar gesit was, was die vakansie voordat ek Universiteit toe was.  Ek het ‘n vakansiewerk gehad en die bestuurder was lus om te speel.  Ek was toe sy proefkonyn voor ‘n rekenaar.  Ek het nogtans niks geweet teen die tyd wat ek begin swot het nie.  Ek het weens vakkeuses eers in my tweede jaar rekenaarklasse geneem.  Dit was iets wat vir alle studente voorgeskryf is, omdat daar ‘n sterk moontlikheid was dat ons eendag almal rekenaarvaardig sou moes wees.

Met my eerste pos moes ek inderwaarheid ‘n rekenaar met 3 ander mense gedeel het.  Dit was dalk meer die suinigheidsbeleid van die maatskappy as enige iets anders.  Tog was daar van my heel eerste werk af aanvaar dat ek sal weet hoe om ‘n rekenaar te gebruik.  Danksy die universiteit se net-vir-ingeval beplanning het ek darem die basiese goed geweet.  Ek word nie sommer geintimideer nie en kon met ‘n bietjie rondspeel myself leer wat CIL nagelaat het.  Vandag nog ontdek ek goed wat die lewe van agter ‘n rekenaar baie vergemaklik.  Ek word ek selfs op sekere prosesse met gespesialiseerde rekenaars losgelaat en snaaks genoeg het ek nog niks gebreek nie.

Word is eintlik baie vaal en vervelig.  Persoonlik dink ek Excel is die bruikbaarste program wat ooit uit gevind is.  Soos my vakansiewerk se baas altyd gesê het:  Jou verbeelding is die enigste beperking.  Dit is vir my ongelooflik lekker om ‘n programmetjie in EXCEL uittelê en dit dan te gebruik om my baie tyd en moeite te spaar.  Ek is ook mal daaroor om met Power Point te speel. Ja, ek weet.  Dit is maar die mees basiese goed.

Waar het jy geleer om rekenaarvaardig te wees?  Kan jy jouself help of moet jy soms hulp soek?  Wat is jou gunsteling program?  Kan of wil jy sonder ‘n rekenaar lewe?

Breinvasbrand:  Wat was die eerste weergawe van Microsoft Office wat vrygestel was?

Breinlosbrand:  Olga was reg met Eugène Hènard.

Lunch Week 9 / 11

Algemene Kennis

1. Wat is die enigste planeet in ons Sonnestelsel met ‘n vroue naam?
2. Watter kleur hare is die skaarste onder mense?
3. Watter selle in die menslike liggaam bevat net die helfte van die DNA (chromosome) van die meerderheid van die menslike selle?
4. Wat is oneirologie (oneirology)?
5. Hoekom het die trou formulier van Amerikaanse Slawe nie die woorde – tot die dood ons skei – bevat nie?

As spietkops maar kon dink

Ek mag verkeerd wees, maar ek dink die doel van verkeerswette is om ongelukte te voorkom en hopelik daardeur lewens te red.  Daar is natuurlik ook die klein element van seker te maak dat die regering nie ingeloop word.  Hoekom anders is daar goed soos registrasie nommers en lisensieskywe.  Eerstens sodat die staat kan geld maak en tweedens sodat hulle ‘n oog op jou kan hou. Tog, die rede hoekom daar enigsins goed soos verkeersbeamptes is, is om padveiligheid te bevorder. 

Veiligheid is nie altyd ‘n swart en wit saak.  Wat in die een situasie heeltemaal veilig sou wees, is doodsake in ander omstandighede.  Al sou ‘n verkeerslig vir jou groen wys, gaan jy beslis nie veiligheid bevorder om deur ‘n optog wat die pad kruis te jaag nie?  Die spoedgrens laat dalk 100 km / h toe, maar dit is heeltemaal onvanpas om die spoed in ‘n heftige storm te handaf.  Die stippelyn is dalk aan jou kant, maar net ‘n dom mens steek verby as hy/sy nie kan sien nie.  Enige redelike mens kan dit insien.  Die teenoorgestelde geld ook – bedoelende selfs al word die wet in ‘n seker opsig oortree, is niemand se veiligheid in gevaar nie. 

Ek hoor met die AARTO wetgewing kan iemand se lisensie opgeskort word as hulle 160 km / h in ‘n 120 km / h zone ry.  160 km / h is nie so vinnig nie.  My persoonlike ervaring is hoe vinniger ‘n mens ry, hoe meer gefokus is ‘n mens op die pad.  Natuurlik is 160 km / h in ‘n woonbuurt geheel en al onvanpas (ek ry gewoonlik nie meer as 40 km/h in ‘n woonbuurt nie).  Op ‘n stil pad, vry van diere en voetgangers, wat in ‘n goeie toestand is, kan ek nie die rede insien hoekom daar streng by 120 km / h gehou moet word nie.  Selfs die AA meen dat spoedboetes in baie gevalle net ‘n geldmaakskema is.

Hoekom moet ‘n mens dood stop by ‘n stopstraat as jy vingeralleen daar is?  Hoekom moet jy ‘n sperstreep gehoorsaam as jy tot volgende jaar kan sien?  Hoekom moet jy links om ‘n sirkel as dit regsom makliker is en jy is alleen by die sirkel? Dit is onlogies en heeltemaal onnodig.  Veilig ry is nie altyd in die letter van die wet nie.  Dit is die besluite wat agter die stuurwiel geneem word wat veiligheid bepaal.

Elke mens behoort verantwoordelikheid vir hulle eie veiligheid te neem.  Met die bietjie logika, behoort verkeersreëls geheel en al oorbodig te wees.  Of ten minste behoort verkeersbeamptes tussen veilig en gevaarlik te kan onderskei en net in die gevaarlike situasies optree.   Dit sal meer sin maak, maar minder geld inbring.  En juis daaroor, moet ons met die varke opgeskeep sit.

Hoe voel julle?  Wat is jou gunsteling verkeersoortreding?  Dink jy AARTO is ‘n goeie idee?

Breinvasbrand:  Wie het in 1877 die verkeersirkel ontwerp?

Breinlosbrand:  Demoerin was reg met John Miles

Oplossing Week 8 / 11

Algemene Kennis

1. Indië, Bangladesh en Sri-Lanka (Demoerin) 
2. Lucas Maree
3. 5.17m (Demoerin) 
4. Asië (Demoerin) 
5.  3 maande, 3 weke en 3 dae (Demoerin) 

Uilspieël

1. Oliver Twist – Geskryf deur Charles Dickens, ander 2 is karakters van Mark Twain (Demoerin) 
2. Jesaja – Is ‘n profeet en nie een van die evangelies nie (Demoerin) 
3. Olifant – is ‘n landdier en nie ‘n seedier soos die ander nie (Demoerin) 
4. Paaltjiewagter – krieketposisie, ander is posisies in rugby (Demoerin) 
5.  Bloubloedselle – Nie ‘n amptelike bestandeel van bloed nie (en net koninlikes het dit 😆 ) (Demoerin) 

Toorwoorde

1. Laat dit geskiet, ek vind dit goed
2. been voor paaltjie
3. Luister wat iemand te sê het
4. platvloers
5. keelvol 

Couples Theraphy

• 2-4 (Demoerin) 
• 3-9 (Demoerin) 
• 5-25 (Demoerin) 
• 6-36 (Demoerin) 
• 7-49 (Demoerin) 

Getalle en hulle vierkante (Demoerin) 

Liedjiepret

1. Weekend Special – Brenda Fassie (Demoerin) 
2. Highway to hell – AC/DC (Demoerin) 
3. Shabby Little Hut – The Reflections/The Bats (Demoerin) 

Liriekeraai

1. The long and winding road – The Beatles (Demoerin) 
2. Country Roads – John Denver (Demoerin) 
3. Walking in Memphis – Marc Cohn (Demoerin) 
4. Africa – Toto (Demoerin) 
5. I’m Gonna Be (500 miles) – The Proclaimers (Demoerin) 

Hoog in die blare

Hallo Maatjies

Ek het ampertjies gevergeet dat dit Vrydag is.  😳  Ek was ‘n baie besige heksie gewees.    Sien julle hoe hoog is ek in die takke?  😛

Ek moet vir Tannie Ougat gaan mirresyne maak dat sy gou gesond word.  😀  Myse ouma Heldina sê hoe slegter die mirresyne is, hoe vinniger werk dit.  😯  Ek dink die ou Perse het almal gesteel.  👿

Tata Maatjies en soet wees hoor?

Lunch Week 8 / 11

Liedjiepret

(Geen een woord titels sal aanvaar word nie.  Die vertaalde titels van 3 liedjies is verskuil.  Identifiseer dit met die sanger.)

Dit was ‘n naweek afslag, wat avontuurlik gelyk het.  Nou sit ek op die hoofweg na hel en wonder of die afskeep klein hut enigsins ‘n goeie idee was.  Dit is seker maar net ‘n muskiete nes. 

Liriekeraai

(Liedjie en sanger)

1. You left me standing here
   A long, long time ago
   Don’t leave me waiting here
   Lead me to your door.
2. I hear her voice in the morning hours she calls me
   the radio reminds me of my home far away
   and drivin’ down the road I get a feeling
   that I should have been home yesterday
3. Now security, they did not see him
   They just hovered ‘round his tomb
   There’s a pretty little thing waiting for the King
   Down in the Jungle Room
4. I stopped an old man along the way
   Hoping to find some old forgotten words or ancient melodies
   He turned to me as if to say
   “Hurry boy, it’s waiting there for you!”
5. When I’m working, yes I know I’m gonna be
   I’m gonna be the man who’s working hard for you
   And when the money, comes in for the work I do
   I’ll pass almost every penny on to you

Liedjie vir Jou

Ek is baie musieklik.  Die enigste instrument wat ek kan speel, is ‘n CD speler, maar musiek vorm nogtans ‘n groot deel van my lewe.  Ek luister musiek as ek kwaad is, ek luister musiek wanneer ek bly is.  Musiek is die ideale metgesel om volgens jou bui aan te pas.  Jy kan dalk nie die verloop van jou lewe bestuur nie, maar jy kan darem self die klankbaan uitwerk.

Musiek word dikwels gekoppel aan ‘n tyd in jou lewe.   Sekere gebeure en oomblikke word ook saam met musiek in jou geheue vasgelê.  So ook kan musiek aan mense gekoppel word. 

Ek het onlangs ‘n sms ontvang wat dadelik my belangstelling geprikkel het.  Volgens die sms moet jy die liedjie noem wat jou aan die persoon wat jou gesms het laat dink.  Ek gaan die idee dus so ‘n bietjie vir ‘n skrywe aanpas.

As jy lus is om saam te speel, sal ek probeer om ‘n liedjie aan jou te koppel.  Soos met Facebook quizes is dit veronderstel om pret te wees, hopelik akkuraat, maar dit kan nie gewaarborg word nie.  Verder kan julle ook sê watter liedjie laat julle aan my dink.

Let the games begin.

Breinvasbrand:  Vir wie was Music sy eerste liefde?

Breinlosbrand:  Demoerin was reg met Latrodectus.

Lunch Week 8 / 11

Couples Theraphy

(Rangskik die terme in pare wat by mekaar pas en gee die gemeenskaplike faktor van die groep).

2; 49; 36; 7; 4; 5; 9; 25; 6; 3

Gemeenskaplike faktor?

Wat gemaak met ‘n spinnekop?

Die Nasionale Raad van Dierebeskermingsverenigings (NRDBV) het duidelik weer nie werk vir hulle hande gehad nie.  Onlangs was daar ‘n advertensie op TV waar ‘n ma en pa paniekerig oor ‘n besoekende spinnekop stry.  Hulle dogter gryp haar selfoon en google hoe sy die spinnekop kan verwyder.  Haar antwoord is om die spinnekop vol skeerroom te spuit.  Dit immobiliseer glo die spinnekop sodat jy hom of haar veilig buite kan gaan sit, maar doen die spinnekop glo nie kwaad nie.

Die NRDBV en ander belanghebbendes voel dat die advertensie ’n negatiewe beeld van spinnekoppe skep en daartoe lei dat die wrede en onnodige doodmaak van “lewende wesens” bevorder word.  Die advertensie is in Korea gemaak en LG hou vol dat  ’n spinnekop  veilig verwyder en skadeloos in die natuur losgelaat kan word as dit eers met skeerroom bedek word.  Hulle het nogtans ingestem om die advertensie in Suid-Afrika te onttrek.  NRDBV het onderneem om ander diereregte-organisasies te laat weet dat dit ‘n baie wrede advertensie is.

Dit is ‘n voldwonge feit dat baie mense bang is vir spinnekoppe, of dan ten minste nie baie gediend met hulle teenwoordigheid is nie.  Ongelukkig vir die spinnekop, is sy blote teenwoordigheid ‘n oortreding strafbaar met die dood.  Die meeste mense gaan nie eers kyk hoe hulle die spinnekop veilig kan verwyder nie.  Dit is soveel makliker om die spinnekop (gogga, vlêrmuis, padda, slang ens) finaal uit die weg te ruim as om alternatiewe akkomodasie vir hulle te soek.  Die meisie het darem ‘n ander plan probeer maak.  Min ander mense sal daardie moeite doen.  Die algemene gevoel is as jy my pla, gaan jy vrek en klaar.

Een van my vele lewensfilosofië is lewe en laat lewe.  Ek is persoonlik nie baie lief daarvoor om goed onnodig seer of dood te maak nie.  Sou ‘n spinnekop my pla en ek kan (of wil) hom nie ignoreer nie, sal ek ‘n fles kry en hom daarmee vang.  Ek sal die spinnekop dan iewers vrylaat waar dit nie in iemand se pad gaan wees nie en dus ook veilig gaan wees.  Dit is seker my erfenis as Suid-Afrikaner, ek kan logies dink.  Nie alle lande is so onverfynd nie.

Dink julle die NRDBV het ‘n geldige punt beet gehad of het hulle op die verkeerde idee van die advertensie gekonsentreer?  Gaan jy van nou af hardloop vir skeerroom vir die volgende spinnekop wat jou pla?  Wat doen jy gewoonlik met diere wat jou ongemaklik laat voel?

Breinvasbrand:  Tot watter genus behoort knoppie spinnekoppe?

Breinlosbrand:  Olga was reg met Gray Hofmeyer.

Lunch Week 8 / 11

Toorwoorde

1. Wat beteken “fiat”?
2. Wat beteken die afkorting “b.v.p.”?
3. Wat beteken die uitdrukking “iemand te woord staan”?
4. Gee ‘n sinoniem vir “banaal” (10 letters)?
5. Herrangskik die volgende in ‘n sinvolle woord:  KLEVOEL