Iewers in die hoërskool doen ‘n mens ‘n eksperiment waar jy ‘n naald op water dryf. Toegegee, dit was nie in ons klas gedemonstreer nie. Die onnie wou, maar daar was een klein tegniese probleempie. Sien, nie een van die meisies het ‘n naald by haar gehad nie. Hy het sy hande in die lug gegooi en verklaar dat ons baie slegte trouvrouens gaan maak. Na sy mening het ‘n goeie vrou altyd ‘n naald en gare by haar. Siende dat ons skoolrokke ons bloes meestal verberg het, het een of twee knope wat dros nie juis saak gemaak nie. Die seuns het in elk geval baie meer knope verloor as ons en hulle hande is beslis nie rond nie. Vir ons roksome – wel, krambinders is nie net gemaak vir papier nie, is dit? (Die blote idee het my ma ‘n hartaanval gegee, my vriendinne se ma’s het dit toe al vir jare gedoen.)
Vandag nog sien ek nie die wysheid van die onnie se woorde in nie. Al dra ek 10 naalde by my, sal ek nie sommer ‘n knoop aanwerk of ‘n soom terugsit nie. Om dit nog boonop vir iemand anders te doen, is heeltemaal buite die kwessie. Daar is wel ander dinge wat ‘n mens altyd binne vatafstand benodig. Goed wat baie meer benodig word as ‘n naald.
Ek het op hoërskool begin om altyd ‘n knipmes by my te dra. Dit amuseer gewoonlik mans geweldig dat ek een het – tot ek die mes kan gebruik en hulle besef hulle het nie ‘n mes by hulle nie. Dit gebeur nogal gereeld. Ongelukkig het ek op ‘n stadium dikwels gevlieg. Die kanse is 0 dat ek van my knipmes gaan afstand doen. Die gevolg is dat dit nou in my kar is en nie meer in my handsak nie. Dit kan wel vinnig in my handsak gedruk word as ek vermoed dat ek dit iewers gaan nodig kry of ek kan dit vinnig in my kar gaan haal.
Ek het ook ‘n flits in my motor. My pa het een jaar vir ons elkeen ‘n flits gegee met die opdrag dat dit altyd in ons kar moet bly vir ‘n noodgeval. Dit is toevallig ook baie handig as ek iets in die kar moet soek. Dit het ook al gekeer dat ek my nek breek as ek iewers in die donker moes loop.
‘n Pen is ook nogal ‘n handige item om ten alle tye by jou te hê. Die ongeluk van die saak is dat penne so dikwels gesteel word. Ek het gewoonlik duisende los papiere in my handsak, maar iemand wat effens netjieser is kort waarskynlik ook ‘n notaboek.
Ek gaan verkieslik ook nêrens heen sonder my kamera, selfoon en beursie nie. Dit is gewoonlik wanneer dit tuis bly, dat jy dit wel met ‘n seer hart soek.
In die dae van my sotheid het ek nêrens heen gegaan sonder my mondskerm nie. Ek het geredeneer dat ek een of ander tyd aangeval sal word en dan nie my tande van die straat af wil optel nie. Ek het nou nog ‘n mondskerm, maar dit bly deesdae by die huis. Ek gebruik dit wel as ek ‘n sportdag moet bywoon. Ek hoop deesdae eerder dat ek in geheel ‘n aanval sal vermy.
Wat reken jy moet iemand saam met hulle dra? Wat is die weirdste ding wat jy al saamgedra het of gehoor het iemand saam dra? Wat behoort ‘n goeie trouvrou altyd by haar te hê? En ‘n goeie trouman?
Breinsvasbrand: Wie is die vervaardiger van die Switserse Weermagmes?
Breinlosbrand: Olga was reg met Sannie.
Herriemerrie 
Wie runnik saam?