Wat gaan die mense sê?

Ek hou nie baie van strepe nie.  Wat kan in elk geval van ‘n streep gesê word behalwe dat dit maar ‘n verbeeldinglose lyn is.  Militaristies en kaal.  Niemand kan my seker blameer dat ek ‘n paar strepe verloor het nie.  Boonop het my bont varkie aangebied om dit te gaan soek en het nooit terug gekeer nie. 

‘n Baie lang storie om te verduidelik dat ek nie skroom om dinge te doen wat mense as strooi praatjies beskou nie.  Julle ken die epos wat omgaan oor hoe om jy jouself kan vermaak?  Een van die voorstelle is om jou parkering met ‘n noot te betaal.  Wanneer jou kleingeld uitgekeer word, dan skree jy kliphard:  “Ek het gewen!  Ek het gewen!”  Ja, ek het dit al gedoen.  Baie.  (Veral snaaks wanneer die mense wat by jou is nie weet jy gaan dit doen nie.)  Ek wil baie graag nog die een van die haardroeër doen, eendag. . .

Die beste van sulke . . . e . . . sal ons dit gedrag noem is die toeskouers se reaksie.  Daar is die wat jou aankyk asof jy van Neptunus af kom en ander vererg hulle bloediglik vir sulke verspottigheid.  Party is oortuig dat jy nie normaal is nie en dan is daar die wat geamuseerd saam lag. 

Die grootste rem aan ons voete is seker altyd wat gaan die mense sê.  Hoekom?  Wat maak dit saak wat die mense sê?  Hulle moet nie met jou saam lewe nie en jy kan jouself nie ontsnap nie.  Is dit dan nie die moeite werd om jouself gelukkig te maak of net ten minste met jouself pret te hê nie?  Jy moet tog eendag vir jou kleinkinders stories vertel van toe jy jonk was en wat is nou die moeite werd om oor te vertel as jy jouself altyd ordentlik gedra het. 

Ek het ‘n jaar terug ‘n wynproe by Groot Constantia bygewoon.  Die les van die dag?  Drink die wyn waarvan jy hou.  As jy van bokswyn hou, koop dit.  Om die wyn af te wurg omdat die etiket reg is, is net ‘n vermorsing van geld en boonop ‘n straf.  Hoeveel verder gaan dit nie?

Hoekom jou strokiesboek in ‘n dik ingewikkelde boek wegsteek?  Lees dit openlik.  Die wat dit benede hulleself beskou is eintlik net jaloers dat hulle nie saam kan lees nie.  As jy lus is om te gaan swaai – gaan.  Moet net nie ‘n kind afgooi om ‘n swaai in die hande te kry nie, wag jou beurt af.  As jy lus het om kliphard in die mall te sing, sing!  Iemand begin dalk net saam sing. 

As ander nie daarvan hou nie, is dit doodeenvoudig hulle probleem. 

Hoeveel invloed het ander mense op jou?

Breinvasbrand:  Wie was die skrywer van die Gossip Girl boeke?

Breinlosbrand:  Olga was reg met Daniel Zaaiman

Lunch Week 20

Uilspieël

(Watter een pas nie en hoekom pas dit nie?)

1. Veet; Colgate; Gilette
2. The Terminal Ill; Forrest Gump; The Green Mile
3. Speedy; Supa Stuck; Hi Q
4. Kanada; Mexico; Peru
5. Gholf; Tennis; Muurbal

Koerantbrokkies

Bjorn Basson en Chiliboy Ralepelle is beide geskors nadat verbode middels in hulle bloed gekry is. Hulle is net na die toets teen lukraak gekies en het positief getoets vir metielheksaneamien.  Beide het behandeling vir griep gekry.  Daar is nou kommer dat die hele Springbokspan onwetend iets ingeneem het en alles word nou weer getoets.

Rowers het ‘n bediende gisteroggend oorval en die huis in Sinoville beroof. Hulle het by die voorhek ingekom om glo die muur te kom regmaak.  Die bediende het niks geweet en wou nou die saak met die werkgewers bevestig toe die mans vuurwapens uitgepluk het.  Hulle het die eienaars se drie jaar oue seun na die kamer geneem waar hy kon speel en die deur toe gemaak.  Sy 18 maande oue sussie het geslaap.  Hulle het die bediende vasgemaak en aangerand voordat hulle met ‘n televisie, ‘n Blou Bul- en Springbok-trui, tekkies en drank met ‘n Chana bakkie gevlug het.

Peter Eldridge (61) wou sy boot met seerowers en al gesink het toe hy en sy twee bemannings-lede is op 26 Oktober naby die Tanzaniese grens met Mosambiek deur seerowers gekaap is.  Hulle was 13 dae lank gevange gehou en van die seerowers was kinders so jonk as 12 (as ek gister die nuus regverstaan het).  Die seerowers het ‘n paar keer op hulle geskiet, maar niemand gewond nie.  Hulle het die gyselaars selfs as menslike skilde teen die EU se vloot gebruik.  Hy het aanvanklik geweier om die boot te verlaat toe hulle op 7 November laat gaan is.

Vandag is glo die dag wat koppe gaan rol by die munisipaliteit van Pretoria. Volgens Oupa Nkoane, waarnemende munisipale bestuurder:  “15 amptenare “teen wie daar duidelike bewyse is”, sal vandag en môre geskors word.”  Hulle is van die departamente van finansies, gemeenskapsveiligheid, maatskaplike ontwikkeling en ekonomiese ontwikkeling.

Die polisielede van Gauteng is nie baie ingenome daarmee dat hulle nie in die feestyd verlof gaan kry nie. Mzwandile Petros, Gautengse polisiehoof het opdrag gegee dat geen verlof tussen 15 Desember en 15 Januarie goedgekeur mag word nie.  “Die mense is nie kwaad nie, hulle is bef**,” het ’n lid gesê.  Ek kan nogal verstaan ook.  Daar is blykbaar lede wat al vroeg vanjaar aansoek gedoen het, maar dit nou moet kanselleer, al het hulle reeds ‘n deposito vir die vakansie betaal.  Lede mag ook nie van April tot Julie verlof geneem het nie.

Hennie le Roux (53) het onskuldig gepleit op ‘n aanklag van moord op sy verloofde, Elphia Myburgh (49), die aand van 21 April 2009.  Volgens hom is dit nie sy foptoestel wat haar dood veroorsaak het nie, maar die rowers wat haar geskiet het.  Le Roux erken dat hy foptoestelle gehad het, maar dit is glo eerder ‘n afskrikmiddel as lewensgevaarlik.  Ek wonder of die man ooit iets weet van forensies?  Die polisie kan seker ook in SA vastel van waar ‘n skoot gevuur is?

Verjaarsdae:  Dr Albert Hofman maak LSD in 1938.  Maggie Gyllenhaal en Jannie du Plessis.