Huweliksraad

Met sekere mense onder ons wat binnekort Mevrou-Mevrou wil speel, moet ons seker vir haar ‘n paar woorde van wysheid gee. 

Destyds toe ons nog die Jakaranda blog opgemors het, was Giggel altyd daar gewees met haar raad.  Elke vrou moet ‘n Bauer pan hê.  Ek is nie seker nie, maar ek reken enige swaarboompan wat jy net-net gelig kry sal werk.  Hierdie pan is nie vir kombuis gebruik nie.  Wanneer jou man aanjaag, dan sien jy hom reg met die pan.  As hy boonop kla, dan foeter jy hom weer.

Klink vir my na raad wat kan werk.  Persoonlik dink ek die beste manier hoe om huweliksprobleme te vermy is om nie te trou nie.  Daar is seker nou weer mense wat hulle oë rol en agter hulle hande wil fluister. 

So kom ons laat dit aan die kenners en die wat dink dat hulle kenners is.  Hoe weet jy dat jy nie die grootste fout van jou lewe maak die dag wanneer jy trou aan een man sweer nie?  Is trou sweer ‘n realistiese gedagte of maar net ‘n idealistiese dagdroom sonder enige fondasie.  Na watter gevaartekens moet ‘n mens uitkyk?  Hoe bou jy ‘n gelukkige huwelik?  Wat moet jy nooit doen nie?  Wat moet jy elke dag doen?  Wanneer moet jy gly en wanneer moet jy bly?

Breinvasbrand:  Met wie het Pieternella van die Kaap getrou?

Breinlosbrand:  Olga was reg met Moses.

Movember

Goed, goed – ek is seker ‘n bietjie agter die tyd, maar eerder laat as nooit.  Laat daar nie van Herriemerrie gesê word dat ons nie ‘n goeie saak ondersteun nie.  Buitendien, netnou word ons van geslagsdiskriminasie aangekla.

Movember is 7 jaar gelede in Australië begin en het so stadigaan oor die wêreld versprei.  Hierdie is die eerste jaar wat ek daarvan kennis dra, maar ek is dalk agter die tyd.  Dit is begin om bewustheid te kweek oor prostaatkanker en ander mansgesondheid en dan ook sommer geld in te samel vir CANSA.  Die fondse gaan gebruik word om Mans Gesondheid Klinieke en Vroeë Opsporings Programme te befonds.  In 2009 het die 1500 deelnemers R240 000 ingesamel.

Prostaatkanker is geneties gesproke borskanker se bloedboetie.  Oktober word dan ook aan borskanker gewy en baie mans gooi hulle gewigte daar agter in.  Die van ons wat sit vir ons besigheid kan dalk nie ‘n snor groei nie, maar ons kan nogtans ondersteuning gee.  Ons kan natuurlik ook help met die fonds insamelings gedeelte.

Mans word aangemoedig om op 1 November met skoon bakkies te begin.  Hulle moet dan vir die res van November aan hulle snorre kweek.  Sou hulle besluit om deel te neem moet hulle by http://za.movember.com/ registreer en verdere inligting sal aan hulle gestuur word.

Een uit elke 23 mans gaan iewers in hulle lewe prostaat kanker ontwikkel.  Netsoos vrouens moet hulle ook gereeld selfondersoek doen om te kyk of daar nie onverklaarbare knoppies is nie.  Mans tussen 15 en 40 behoort dit eenkeer ‘n maand te doen.  Ouer mans behoort ten minste jaarliks vir toetse gaan daarvoor.  Daar is ook ‘n Prostaat Spesifieke Antigeen bloedtoets wat gedoen kan word.   ‘n Ertjie grootte knop in die testes kan die eerste aanduiding van prostaatkanker wees.  Onthou egter ook dat ‘n mens iets soos testes en peniskanker ook kan kry.

Soos altyd wanneer kanker te sprake is, is kanse van herstel beter hoe vroeër ‘n kanker ontdek word.  Daarom durf ‘n mens nie versuim nie.  Daar kan nie genoeg aandag daarop gevestig word nie.

Lunch Week 20

Algemene Kennis

1. Wie was die eerste vroulike helikopter vlieënier?
2. Waarvan is Fikile Mbalula die minister van?
3. Wat was Anton van Wouw van beroep?
4. Waaroor gaan die film “The Social Network”?
5. Waarvan is Pt die chemiese simbool?

Koerantbrokkies

Onderwys in Suid-Afrika is van die swakste in die wêreld.  Volgens Dawie Roodt is dit als te danke aan die regering se beheptheid met matriek uitslae en universiteit toelating.  Dit is ‘n bydraende faktor tot lae werkskepping.  Daar is blykbaar ‘n kritieke tekort aan sweisers, daar is plekke wat sweisers voet invoer.  Die regering probeer nie eers jong mense kry om as sweisers op gelei te word nie.  Roodt reken as daar meer op ambagte gekonsentreer word, sal daar minder mense onderwysers word net om iets te word.

3 van Mthokozi Mbili se 4 kinders het Saterdag in St. Michael’s on Sea verdrink. Mbili was besig met voorbereiding vir die ANC vir die munisipale verkiesing toe dit gebeur het.  Sy vrou het met hulle baba agter gebly toe sy neef die ander kinders (17, 7, 3)  vir die dag uitgeneem het.  Die trapbootjie wat hulle gehuur het, het glo omgeslaan.

Eduard Venter (23) het amper verdrink toe hy ‘n vriendin van verdrinking in die Vaalrivier wou red. Die drie studente was met ‘n boot uit toe Venter agter kom dat Chandre Lamprecht (23) nie meer daar is nie.  Hy het ‘n voet sien verdwyn in die water en agterna geduik.  Eric Rautenbach (23) het die boot intussen omgedraai.  Venter het Lamprecht na ‘n lang soektog gekry en sy is dadelik na ‘n plaaslike hospitaal geneem.

3 Renosters is die naweek in Hartbeesfontein doodgeskiet. ‘n Verdere twee is ernstig gewond.  Een van die renosters was boonop ‘n stoetbul gewees.  Sy haksenings is af en sy oë is uitgesny.

Britse toeriste wat op hulle wittebrood was, is in Guguletu ‘n dag na hulle aankoms gekaap.  Die man is iewers langs die pad afgelaai, maar die vrou se lyk is later in die motor by Lingele- thu-Wes in Khayelitsha gevind.  Sy was in die nek gewond.  Die polisie het met wit lakens ’n halfmaan om die Volkswagen gevorm sodat omstanders nie die lyk kon sien toe dit in die forensiese voertuig gelaai is nie.

Verjaarsdae:  Petula Clark; Anni-Frid Lyngstad en Sean Murray.