Die prys van ‘n nier

Ons was geleer dat ‘n lewe nie aan geld en sent gemeet kan word nie.  Ons was verkeerd geleer.  Vra maar enige mediese fonds of hospitaal.  Die pasient se lewe of selfs die kwaliteit van iemand se lewe is ‘n bysaak.  Wat regtig saak maak is die wins aan die einde van die dag.  En blykbaar is daar geen grense van hoe ver daar gegaan sal word om ‘n wins in die sak te steek nie. 

In September vanjaar het Netcare hulle spyt uitgespreek dat hulle aangekla word nadat hulle deurgaans met die polisie saamgewerk het.  Vandag was daar aangekondig dat Netcare met R4 miljoen beboet is nadat hulle skuld erken het dat hulle onwettige niere laat oorplant het.  Daar is ook ‘n konfiskeerbevel van R3.8 miljoen teen die hospitaal.  Die waagkans werd as ‘n mens in ag neem dat hulle ten minste R22 miljoen wins gemaak het.  Van een hospitaal – waar hulle gevang is. 

Die handel van menslike weefsel is teen die wet.   Of eerder, meer prakties gesproke, geen “verskaffer” mag wins maak nie, maar kan wel poog om hulle onkostes te verhaal.  Met goeie rede ook.   Dit is een manier om die veiligheid van almal betrokke te probeer beskerm.  Die skenker gaan dan hopelik nie gedwing word om te skenk vir ‘n ander mens se sak nie.  Skenkers gaan nie ter wille van hulle organe opgeveil word – sonder dat hulle noodwendig ‘n sê in die saak het nie.  Mense sal hopelik nie ten koste van ‘n pasient of hulleself hulle liggame wil opveil nie. Natuurlik word daar vir die geskenkte organe op ‘n manier betaal.  Toetsing en verwerking kos ‘n plaas se prys en moet van iewers verhaal word. 

Maklik om te praat as jou lewe of ‘n geliefde se lewe nie van ‘n moontlike skenker afhang nie.  Of as daar nie ses honger mondjies by die huis sit wat gevoer moet word nie.  Geld groei nie aan bome nie, maar jou liggaam is seker daar vir hoe jy dit goed dink.  Soos die meeste Westerse lande berus ons ekonomie op ‘n vrye mark stelsel, so hoekom nie jou nier verkoop as jy kan doen met R40 000 nie?  Jy kan mos met een nier ‘n vol lewe hê en daarmee kan jy ook iemand se lewe red.   Daar is gerespekteerde medici wat voel dat orgaanhandel gewettig moet word. 

In Netcare se geval hou die argument nie juis water nie.  Hulle het toegelaat dat die niere van minderjarige kinders gekoop word.  Wie het voordeel uit die transaksie getrek?  Wie sê in elk geval dat enige van die “verkopers” nie gedwing was om te verkoop nie?

As jy dan ‘n nier kan koop of verkoop, hoekom nie ook ‘n hart nie?  Waar gaan die lyn getrek word?  Hoe gaan daar verseker word dat die verkoper dit vrywillig doen?  Of dat mense nie ter wille van hulle organe vermoor word nie?  Is die huidige stelsel van vrywillige skenker nie beter nie?

Wat dink julle?

Breinvasbrand:  Wie het die eerste suksesvolle nieroorplanting gedoen?

Breinlosbrand:  Olga was reg met People Opposing Woman Abuse

Ek het

Plan verandering

“If at first you do not succeed, change your strategy.”

As iemand die gesegde tot ‘n kuns vervolmaak het, was dit beslis die vervaardigers van die Rocky Horror Picture Show.

Die Rocky Horror Picture Show (RHPS) is in September 1975 vrygestel in California.  Hoewel dit baie goed gedoen het in die spesifieke teater, was die res van gehore nie juis beindruk nie.  Die UA Theatre was elke aand uitverkoop, maar dit was keer op keer dieselfde mense wat kom kyk het.  Dit het eintlik so sleg gevaar dat die vrystelling van 8 ander stede afgestel is.

Die RHPS is daarna op kampusse vrygestel, waar dit gewoonlik met ‘n ander wetenskapfiksie vertoon was.  Weereens was daar nie juis baie belangstelling nie.  Seker maar as ‘n Aprilgek grap is dit as ‘n middernag fliek in April 1976 vrygestel.  In Oktober dieselfde jaar het mense begin om dit te gaan kyk in kostuums en het begin terugpraat met die skerm.  Hulle het ook begin om sekere props saam te bring as hulle gaan fliek.

Stadig maar seker is die fliek na ander teaters uitgebrei, waar dit ewe suksesvol was.  Dit was selfs ‘n ruk lank in Suid-Afrika vertoon gewees.  Ek verstaan dat strate op plekke gesluit moes word om almal wat die RHPS wou sien te akkomodeer.

Vandag nog is daar nog steeds teaters wat RHPS op ‘n gereelde basis – soos in twee keer ‘n week – vertoon.  In Munich is daar ‘n teater wat een van hulle lokale spesiaal ingerig het vir die RHPS.  Dit wys nog daagliks daar.  Dit het al $139,876,417 verdien sedert dit vrygestel is.  Nie sleg vir ‘n film wat sowat $1.2 miljoen gekos het om te maak en waarvoor die mense aanvanklik langtand was nie.

😉  Vir die meer senior mense, het julle RHPS gesien voordat dit verban is?

As iemand wonder hoe Tim Curry vandag lyk:

Lunch Week 19

Uilspieël

1. Gemmer; Siamees; Khoi
2. Jakaranda; Eike; Geelhout
3. Lukas van Rooyen; Jacques Mynhardt; Piet Vos
4. Hoender; Bees; Skaap
5. Seël; Posman; Yahoo

Koerantbrokkies

438 babas is die afgelope 8 maande weggegooi. Die ergste is dat die 800 maar net die oortjies van die seekoei volgens Michelle Meiring, uitvoerende hoof van die organisasie Big Shoes.  Vir elke een wat die koerante haal is daar sowat 50 wat stil-stil verdwyn.  Patricia de Lille het genoem dat die weggooi van babas die afgelope 2 maande skerp toegeneem het.  Sy beroep at daar na die geestesgesondheid van swanger ma’s omgesien word tydens voorgeboortedienste. Ek sê as jy nie bereid is om groot te maak nie, moet jy nie tango nie.

Kitty Nel (93) van Petrusburg het ure lank op ‘n matras in die gang van die Nasionale Hospitaal in Bloemfontein gelê. Daar was glo nie ‘n dokter beskikbaar vir die tannie van Petrusburg nie.  Sy het vroeër vanjaar twee beroertes gehad en is in ’n erg verswakte toestand.  Sy was net na 10 hospitaal toe gebring en was teen 16:00 nog nie gehelp nie.  Langs haar het daar ‘n pasient in ‘n plas bloed ook vir ure lank gelê.  Sarel Germishuizen was ook 10:00 by die hospitaal en ‘n dokter het hom glo uit sy rolstoel gegooi vir ‘n ander pasient.  Germishuizen het ‘n ernstige heup- en rugbesering en kan nie loop nie.  Twee lyke was glo om 4 uur verwyder van ongevalle.  ‘n Man wat saam met sy vrou gewag het, het Volksblad laat roep om te kom kyk.  Ek sê eerder maar niks.

Ruben Fourie (4 maande) is uit sy pa se kar geslinger toe daar tydens ‘n onwettige straatren teen die motor gebots is. Ruben het in die middel van die pad te lande gekom waar ‘n toeskouer gehardloop het om hom voor ‘n aankomende motor op te raap.  Hy word vir skedelkrake en bloeding op die brein in die hoësorgeenheid van die Unitas-hospitaal in Centurion behandel.  Van die ander lede van die gesin moes ook behandeling kry.  Die mense van die ander motor het gevlug.  Ek moet dit seker nie sê nie, maar Ruben se pa is ‘n metropolisie lid.  Hoekom was Ruben nie vasgegord nie?

Die presidensie stel ondersoek in na die beweerde kaping van die nasionale jeugontwikkelingsagentskap (NYDA) deur die ANCYL.  Die meeste kernposte in die NYDA, wat sowat R1 miljard van die staat ontvang, word nou beset deur jeugligalede wat reuse-salarisse ontvang.

Solidariteit, AfriForum en lede van die Johannesburgse Kamer van Handel en Nywerheid (JCCI) wil die AARTO wetgewing in die Grondwet Hof keer.  Hulle is onder meer gekant daarteen dat die eienaar en die bestuurder van ‘n motor punte kan verloor vir oortredings.  Almal begin glo met 12 punte.  76% van Suid-Afrikaners oortree elke dag die verkeerswet.  Een van die dae ry ons almal fiets en is daar beslis nie meer motors op die pad nie.

Verjaarsdae:  In 1888 maak Jack the Ripper Mary Jane Kelly, sy laaste slagoffer dood.  Dit is om van te kots:  in 1907 kry Koning Edward VII die Cullinan Diamant vir sy verjaarsdag.  In 1921 kry Albert Einstein die Nobelprys vir Fisika.  In 1967 is die eerste Rolling Stone gepubliseer.  Chris Jericho en Eric Dane.