Ek bring vir jou blomme

Vandat ons die eerste keer ons voete in die kleuterskool sit, word ons opgelei dat mammas (en juffrouens) van blomme hou.  Dit is mos ook maklik.  As jy verby ‘n blommetjie loop wat jou bekoor, pluk jy hom om vir jou ma te gaan gee.  Dit maak nie saak of jy dit nou ‘n stingel van 2 cm of 20 cm los nie, dit moet hulle mos plesier gee.

Later – nadat jy ‘n paar skoublomme in jou onkunde verwoes het – leer jy darem ook dat jy maar ‘n blom kan los as hy jou bekoor.  Jy leer om later net blomme vir spesiale geleendhede te pluk.  Later kry jy ‘n kredietkaart en kom op die punt wat die prys van die bos blomme jou bedoelinge moet oordra.  Daardie kleuter onskuld van mooi blomme pluk om iemand se hart bly te maak is seker vir altyd verlore.

Seker nie in alle gevalle nie.  Almal weet seker dat ‘n enkele gesteelde roos heelwat meer waarde het as ‘n ‘n 100 langsteel rose, al kos ‘n 100 lang steel rose amper net soveel soos ‘n naweek weg – jou petrol ingesluit.  Die gesteelde roos was impulsief, iets wat geld nie kan koop nie.  Nou nie juis dat ek romanse kan spel nie.

Ek onthou hoe het ons angeliere gekry op hoërskool toe die perfekte aangewys was.  Op varsity het ons dafodille gekry toe ons tot die huisraad verkies is.  Die beste van alles is dat ek weet ons het ook blomme gekry toe ons uitgetree het, maar vet weet wat.  Gewoonlik wanneer ‘n ou jou na ‘n dinee vergesel het, was jy ook verseker van blomme.  Ons kry soms blomme by die baas as ons verder gegaan het met iets as wat nodig was.

Ek het ‘n vriendin wat haar siel sal verkoop vir sonneblomme.  Dit is dus seker geen verrassing dat haar huis vol sonneblomme is nie.  My kamermaat op varsity het elke blom wat sy van iemand gekry het gedroog om eendag op haar begrafnis te gebruik.  Sy het toe al kaste vol gedroogde blomme gehad.

Vandag wil ek by julle weet wat is julle gunsteling blomme?  Waarvoor deel jy graag blomme uit?  Hou jy ooit van blomme?  Hoe voel mans oor blomme, iemand dapper genoeg om te erken dat hulle van blomme hou?

Breinvasbrand:  As wat is ‘n Dianthus caryophyllus beter bekend?

Breinlosbrand:  Olga was reg met Corrie van Zyl.

Lunch Week 18

Toorwoorde

1. Gee ‘n verklaring vir:  ”Geofiet”?
2. Wat beteken die volgende afkorting:  ”m.b.t.”?
3. Wat beteken die volgende uitdrukking:  ”vuur en vlam wees”?
4. Gee ‘n sinoniem met die gegewe aantal letters vir:  ”Ampsgenoot – met 7 letters”?
5. Skommel die volgende in ‘n sinvolle woord (die eerste letter is reg):  OPBAAKLEN

Inni Nuus

Wat is die top punt van lafaard wees… Om te wag vir ‘n 60 jarige vrou, Hester  Bronkhorst van Walkerville om werk toe te gaan voor julle haar half verlamde man, Mnr. Chris Bronkhorst (67) oorval en martel met smeltende plastiek en dan met ‘n sambok te slaan en te los om dood te gaan terwyl julle vlug met R10 000 se gesteelde goed. 👿 Daar is fotos…

Die komediant Casper de Vries is woedend vir “vrot Christene” wat gekla het oor hy ’n “matroos sal laat bloos” met sy gevloek op die verhoog. Dit kom nadat  mnr. Uys de Vos van Namibië ‘n e-pos aan Casper geskryf het onder anderere gesê het: “De Vries is ’n goeie komediant en hoef nie so erg te vloek om snaaks te wees nie; en die vloekery onder ’n vrou se rok in (en erger) is swak smaak en totaal onnodig.” Casper het terug geskryf met “Dis jou reg om uit te stap, maar dis nie jou reg om jou Christenvinger onder my neus te druk en rond te swaai nie. Jou briefie is vreeslik 1986, jy is agter die tyd en onvolwasse. Leer redeneer en wyer dink.” Wat dink julle?

Mev. Jackie Coomber (38) het hard en aanhoudend terug baklei om haar gesin te beskerm toe hulle aangeval is tydens ‘n visvang uitstappie die Vrydagnag by die Trans Magalies-woonwapark. Vier mans het middernag hulle tent oopgezip, en gesê hulle moet stil bly en toe vir Coomber begin slaan! Haar arm is gebreek, haar oor amper afgesny en van haar tande is los! Coomber se vrou mev. Tessa de Villiers (37) het die seuns probeer beskerm en haar lyf gebruik om hulle te beskerm. Mens kan nie eens meer in vrede gaan kamp nie!

Ek dink julle gaan nou twee stelle koerante kry vandag 😆 Die joernaliste het in hulle eie rigtings gegaan 😉

Over and out!

 Selene

Koerantbrokkies

Weens ander verpligtinge, gaan dit maar ‘n baie kortaf nuusberig wees.

Barbara Hogan het as LP bedank.  Ek hoop van harte dat dit sommer haar bedanking as ANC lid insluit.  Al die opposisie partye is tog aan haar kant.  Tannie Helen en Antie Patty moet nou nie gras onder hulle voete laat groei nie.

Rotte het ook maar geen genade nie.  Hulle het ‘n verlamde 67 jarige man aangerand en gemartel. Watse gevaar kon hy tog vir hulle wees.  Ek hoop hy kan toor.  Vier mans het Chris Bronkhorst van Walkerville, tussen 09:00 en 10:00 oorval.  Sy vrou het hom gebel, maar ‘n vreemde stem het geantwoord.  Sy kon ook die swart stemme op die agtergrond hoor en het die buurman gevra om tog te gaan kyk.  Die buurman het gaan roep, maar Bronkhorst het nie geantwoord nie – DUH!  Kan ek sê slapgat?  Die booswigte het met onder meer juwele, ’n selfoon, horlosie en geld gevlug.  Bronhorst is met ‘n sambok geslaan, sy kop is teen ‘n muur geslaan en sy hande met plastiek gebrand.  Hy word in die Milpark hospitaal behandel.

Casper de Vries is die vieste in omdat Christenne gekla het oor sy vloekery.  Hy skaam hom glo vir vrot Christenne, dit in antwoord op ‘n beskaafde epos aan hom waar hy oor sy taal aangespreek is.  Jammer dat Beeld net ‘n berig oor ‘n ketting epos gedoen het en nie agter die kap van die byl probeer kom het nie.

‘n Vrou se oor is byna afgeskeur toe sy vir haar gesin baklei het.  Haar vrou het hulle seuns glo met haar liggaam beskerm.  Hulle is in ‘n 5 man tent in Trans Magalies-woonwapark oorval toe hulle geslaap het.  Die rotte het pikstele en pangas gehad en Jackie Coomber (38) se arm is ernstig beseer met die panga.  Hulle het toe daarna 3 dae lank gesukkel om die voorval by die polisie aan te meld, veral omdat die polisie nie opgedaag het nadat hulle na die aanval ontbied is nie.

Elvis Blue is die nuwe Idol.  Hy het ook gister aangekondig dat hy sy prysgeld met L’loyd die naaswenner gaan deel.

Verjaarsdae:  Chevrolet dring die mark in 1911 in as kompetisie vir Ford.  Harrison McCain (McCain Foods);  Roseanne Barr; Adam Ant en Dolph Lundgren.