Internet geslag

Ek is ‘n groot aanhanger van algemene kennis.  Ek sal die hele dag doodgelukkig wees as ek kan chappie papiertjies lees.  Daar is mense wat wil sien, mense wat wil doen, mense wat wil weet en ander wat nie ‘n duiwel omgee nie.  Ek is baie beslis in die wat wil weet se kliek.

Algemene kennis word deur baie as nuttelose inligting beskou.  Hoe iets wat soveel deure vir jou oopmaak nutteloos kan wees, gaan my verstand te bowe.  Algemene kennis verbreed jou uitkyk en maak jou wêreld net soveel groter.  Gewoonlik hoef jy nie eers moeite te doen om dit te kry nie.  Jy sal goed doen as jy net onthou wat jy in die laerskool geleer het en verder net na die wêreld oplet.  Maklik.

Soms kan mense se gebrek aan algemene kennis my stom laat.  Ons sit nou die dag in ‘n groep en praat van vroulike legendes.  Almal dink dadelik aan Marilyn Monroe en ‘n paar onthou van Diana as ‘n nagedagte.  Op die punt noem iemand Cleopatra.  Dadelik is die groep verdeeld – die eerste groep is opgewonde oor die moontlikhede wat Cleopatra bied en begin sommer ook oor Nefertiri te praat.  Die ander?  Hulle weet nie wie Cleopatra is nie.

Cleopatra wat seker meer vrou was as wat Marilyn en Diana saam was.  Die heerser van Antieke Egipte en die minnares van Julius Ceasar en Mark Antony.  Hoe kan iemand nie weet wie Cleopatra is nie?

Goed en wel, almal hou nie van geskiedenis nie.  Baie mense het Macbeth op skool gedoen en nie Julius Ceasar nie.  Hoekom sal ‘n mens iemand Google as jy nie eers weet van haar bestaan nie?  Maar werklik mense, ek het regtig gedink almal het darem Asterix gelees en gekyk.  Kon hulle regtig vir Cleopatra mis?

Dit bring my tot iemand wat my nou die dag vertel het die internet maak die huidige geslag dom.  Ons is blykbaar meer geneig om Google te beraadslag as ons eie oordeel.  Volgens hom is Google se woord wet en sal mense dit dikwels nie bevraagteken nie.  Mense sal ook nie sommer self ‘n probleem probeer oplos nie.

Natuurlik het ek gestry – ek is immers doodgelukkig verslaaf aan die internet.  Na die Cleopatra voorval moet ek egter oor sy siening dink.  Het die gemak van die internet ons lui gemaak?  Intelligensie is nie verwant aan kennis nie, maar eerder wat met die “aangeneemde” kennis gemaak word.  Om te weet is een ding, maar wat gaan jy maak met wat jy weet?

Die internet is immers ‘n baie geduldige dienaar.  As jy die lus en die tyd het, sal jy bewyse van bykans enige iets opspoor.  Jy sal argumentsonthalwe kan bewys dat die AK 47 oorlog en vrede bewerkstellig het.  Sou jy nie dadelik jou wenkbroue gelig het oor vrede nie, het jy waarskynlik ‘n probleem.

Die internet kan vriend of vyand wees.  Kritiese denke is wat bepaal of dit jou vriend op vyand gaan wees.  Sou jy alles vir soetkoek opeet, dan is ek bevrees het jy internet se dienaar geword.  Met kritiese denke bly jy altyd in beheer.  En nie noodwendig net met internet gebruik nie.

Hoe voel julle hieroor?  Weet julle darem wie Cleopatra was?

Breinvasbrand:  Wat was Obelix se hondjie se naam?

Breinlosbrand:  Olga was reg met Owen Parnell.

 

Ek wonder . . .

Bewaar op ‘n veilige plek!

Ons ken dit almal so goed, veral ten opsigte van baie belangrike dokumente.

Nou wonder ek.

As jy dit op ‘n veilige plek bewaar, moet dit van jou af ook veilig wees?  Ek het die siekte om iets so veilig te bewaar dat ek dit nooit weer kry nie.  Is dit wat die doel van veilige bewaring is?

Hoe veilig is jou bewaring?

Lunch Week 17

Toorwoorde

1. Gee ‘n verklaring vir:  “Veda”?
2. Wat beteken die volgende afkorting:  “prof.”?
3. Wat beteken die volgende uitdrukking:  “Oggendstond het goud in die mond”?
4. Gee ‘n sinoniem met die gegewe aantal letters vir:  “Voortstu – met 7 letters”?
5. Skommel die volgende in ‘n sinvolle woord (die eerste letter is reg):  PUNGVEREN

Koerantbrokkies

Rus in Vrede:

Paul die seekat is eergister aan natuurlike oorsake dood.  Nogal ‘n jammerte, hy moes nog eers die Sharks vertel het dat WP hulle viskos gaan maak.

Kobus Joubert, ’n voormalige president van die Zimbabwiese tabakkwekersvereniging (ZTA), is op sy plaas sowat 100 km suidwes van Harare vermoor.  Hy was in sy 70’s.  Daar word vermoed dat die moord polities van aard was.  Sy vrou is kort na middernag deur twee mans in haar huis oorval.  Sy was gedwing om stil te bly en een is na die kamer waar hy Joubert met een skoot dood geskiet is.  Mev Joubert is aangerand voordat die rotte met andsak, ’n onbekende bedrag Amerikaanse dollar, drie selfone en ’n skootrekenaar gevlug het.

Hans Kooy (wildvanger) en Jana Pretorius (veearts), sy vriendin is deur 4 rowers by Thaba Manzi-lodge naby Warmbad oorval.   Die rowers het die renosterhorings in hulle kluis gesoek.  Kooy het permitte van die Limpopo se departement van omgewingsake gekry om renosterhorings te besit.  Hy het een renoster verloor as gevolg van stropery en het toe die res se horings ge-0es.  Pretorius se 9 mm-pistool, R15 000 kontant, ’n skootrekenaar, selfone en ’n .375-rewolwer is ook gebuit.

Twee vliegtuie het in Wonderboom teen mekaar vasgevlieg tydens opleiding.  Al die insittendes het darem oorleef.  n Instrukteur en ’n leerlingvlieënier in ’n Jabiru-tweesitplekvliegtuig was besig met deurlooplandings (circuits and landings) toe ’n Piper Cherokee-viersitplekvliegtuig met ’n buitelandse vlieënier ingekom het om te land. Na wat verneem word, was dit die vlieënier se eerste solovlug.

Verjaarsdae:  Amsterdag (in Nederland) is in 1275 gestig.  James Cook; Theodore Roosevelt; Oliver Tambo; Vanessa-Mae en Kelly Osbourne.