Wat meer is nodig?

Onlangs het daar ‘n bom gebars rondom Babbelbekkie Kleuterskool in Pretoria.  ‘n Video wat deur een van die onderwysers gemaak is het getoon hoe kinders in die kleuterskool mishandel word.  Daar is onder andere beeld materiaal van hoe die skoolhoof ‘n kind oor die enkels slaan en hoe kinders aan ‘n tafel en ‘n matras vasgebind is.  Alles glo in die naam van tugtiging en dissipline. 

Natuurlik is daar ‘n paar vrae wat daaroor gevra word, insluitend hoekom dit amper ‘n jaar geneem het om die video’s openbaar te maak.  Blykbaar het die ouers almal ‘n kontrak geteken waarvolgens hulle die skool toestemming gee om hulle kinders te tug.  Geen kontrak is bokant die wet nie en die wet stel duidelik dat lyfstraf nie in skole toegelaat word nie.  Nadat die video uitgekom het, is lyfstraf in geheel by die kleuterskool opgeskort. Die skoolhoof is van haar pligte teenoor die kinders onthef, maar kon nog administratiewe en huishoudelike pligte verrig. 

Die skoolhoof is toevallig ook die skooleienaar se ma.  Raai wat?  Die nuwe skoolhoof het dieselfde van as Jacques Kruger.  Ek dink nie ‘n aanname dat sy ook familie is vergesog nie. 

Monique Deetlefs (22) is die onderwyseres wat die video gemaak het.  Sy is op betaalde verlof geplaas hangende ‘n tug ondersoek.  Dit sal niemand seker verbaas dat sy toe ook skuldig bevind is nie.  Onder andere op 5 aanklagte dat sy lugtyd van die hoof se selfoon gesteel het en dat sy kinders onderskeidelik aan ‘n tafel en matras vasgebind het om die skool sodoende in ‘n slegte lig te stel.  Sy is na die verhoor dan ook afgedank. 

Dit bring my dan by die liewe ouers.  Daar is natuurlik diegene wat hulle kinders summier uit die skool gehaal het.  Dan is daar diegene wat die hele storie as ‘n heksejag afmaak.  Ek kan net my kop skud oor van die kommentaar wat op die berig gelewer is.  Daar is mense (wat trots is om aan die skool verbind kan word) wat verheug is dat Deetlefs afgedank is.  Een voer aan dat die “diefstal van lugtyd” (kan iemand terloops verduidelik hoe jy lugtyd steel?) boekdele oor Deetlefs se karakter spreek.  Sy is dus nie ‘n betroubare getuie nie.  Nog een voer aan dat as jy kan lieg, kan jy steel en moor ook. 

Kom ons veronderstel vir ‘n oomblik dat die beweringe rondom Deetlefs waar is.  Wie is dan nog steeds oorhoofs verantwoordelik vir die welstand van die kinders?  Die hoof, nie waar nie?  Hoe kon Deetlefs toegelaat word om kinders aan tafels en matrasse vas te bind?

Ongeag of die video kwaadwillig gemaak is of nie.  Feit bly staan dat ‘n kind oor die enkels geslaan is.  Geen regdenkende mens slaan ‘n ander oor die enkels nie.  (Kan dit dalk wees dat enkels nie te veel merke laat nie?).  Na jare in die posisie is dit nogal waarskynlik dat dit eerder die reël as die uitsondering is.  Kan dit op enige vlak goed gepraat word?  Waarmee kom die ander toesighouers weg?

Gestel nou ‘n kind is dood as gevolg van die versorging en/of tugtiging wat hulle by die skool ontvang het, sou die lojale ouers dan ‘n ander deuntjie sing?  Wat meer is nodig om hulle te laat insien dat van die praktyke in die skool onaanvaarbaar is?  Is die blote feit dat die hoof wat ‘n kind herhaaldelik oor die enkels slaan rooi lig genoeg nie?

Hoe voel julle hieroor?

Breinvasbrand:  In  watter fliek is Arnold Schwarzenegger ‘n undercover kleuterskool onderwyser?

Breinlosbrand:  5:00

Lunch Week 16

Uilspieel

1. Haaie; WP; Bulle
2. Michael; Leonardo; Gabriel
3. Bonehead; Adam Clayton; Larry Mullen, Jr
4. Ham; Gammon; Tuna
5. Drol; Julius Malema; Robert Mugabe 😉

Koerantbrokkies

More.

Ek weet daar was lanklaas ‘n koerant gewees, maar die kaalvoet koerant verkoper is deesdae chronies “siek”.  Wel, hy daag bloot net nie altyd op nie.

Gert Reyneke (71) is in Kameeldrift doodgeskiet.  Reyneke en sy vrou het van Bloemfontein af gekom vir sy kleindogter se 14de verjaarsdag.  Hy sou vir haar ‘n ysterkopstuk gemaak het.  Hulle het in die woonstel op die erf geslaap, toe daar omstreeks 01:00 gisteroggend by die woonstel ingebreek is.  Reyneke het ondersoek ingestel en is in die bors geskiet.  Die moordenaars het leë hande gevlug.  Hier is wat vreemd is.  Johanna Reyneke het haar dogter en skoonseun probeer bel, maar kon nie antwoord kry nie.  Thiana Geringer het wakker geword van die skoot en haar man het toe sy selfoon in die kar gaan haal.  Hy het toe gesien dat sy skoonma hulle gebel het.   

Jan Pretorius van die polisie is 5 keer deur ‘n bende geskiet toe hulle in Balfour by ‘n winkel wou inbreek. Pretorius het bekendheid verwerf nadat hy ‘n seun van verdrinking gered het.  Die bende is betrap nadat hulle deur die sinkdak van PeP probeer inkom het.  ‘n Lid van die publiek het Pretorius wat van diens af is in kennis gestel.  Oppad na Pep het hy die polisie ontbied.  Daar is op hom geskiet toe hy op die toneel opgedaag het.  Terwyl hy gewond op die grond gelê het, het hy een van die inbrekers doodgeskiet het.  3 ander het gevlug.  Hy het self nog die ambulans ontbied en is tans in die hospitaal.

 Mary Metcalfe, direkteur-generaal (DG) van onderwys, gaan vroeg volgende jaar haar pos verlaat.  Blade Nzimande, minister van hoër onderwys en opleiding, het glo haar bedanking geëis.  Raai hoekom?  Hulle het glo ‘n potjie geloop oor haar vrae oor sy uitspattige (lees duur) reis na Kuba.  Die universiteite is nie gelukkig met Metcalfe se vertrek nie.  Daar word verwag dat Nzimande iemand sal aanstel wat op die agtergrond sal bly en die admin sal behartig. 

‘n 18 jarige het glo 2 motorfietsryers dood en ‘n derde ernstig beseer met sy ma se Hummer.  Die Hummer het aan die brand geslaan en hy het gevlug.  Al die pad van Pretoria Noord na Zimbabwe.  Die ma verander haar storie ook so gereeld soos haar onderklere.  Eers het die seun glo die Hummer sonder toestemming gebruik en toe weer het haar 31 jarige seun dit gebruik.  Nou het sy glo toestemming gegee.  In elk geval, die seun het net vandag tyd om terug te kom of daar word ‘n lasbrief uitgereik. 

Ten slotte – spesiaal vir Leon.  Die WNNR reken dat ons ‘n nat somer kan verwag.  ’n El Niño-verskynsel kom voor wanneer die water rondom die ewenaar in die Stille Oseaan warmer as gewoonlik is. Sy “tweelingsuster” is La Niña, met ’n kouer tydperk wat daarop volg.  Daar is blykbaar nie juis kans dat ‘n El Niño kan ontwikkel nie. 

Verjaarsdae:  Samora Machel saam met 33 ander is in 1986 is dood nadat hulle vliegtuig in die Lebombo berge neergestort het.  Daar is mense wat glo dat die ongeluk deur die apartheidregering veroorsaak is.  DJ Sammy; John Edward en Louis Oosthuizen.