Die een wat weggekom het . . .

Hengel is nie my idee van ‘n aangename tydverdryf nie, maar selfs ek het ‘n visvang storie.  My broers en van hulle vriende het die hele Saterdag langs ‘n modderdammetjie gestaan en probeer visvang.  Met die klem op probeer, sukses het hulle nie juis gehad nie.  Ons het hulle ‘n rukkie gaan geselskap hou.  Eintlik net om vir hulle te lag.  Die seuns was so 13 / 14 jaar oud en hulle was vasbeslote om grotes uit te trek.

Dit is moeilik om te glo dat daar iets meer vervelig as visvang is, maar net tot jy jouself in ‘n posisie bevind waar jy kyk hoe iemand visvang.  Dit is erger.  Ek vra toe of ek kan probeer en ek word ‘n stok in die hand gestop.  Hy was seker maar te dankbaar dat hy die hengel vir ‘n paar oomblikke gespaar is.  Ek doen maar wat hulle doen: gooi uit en katrol in.  Gooi uit en katrol in.  Gooi uit en skielik is die katrol in nie meer so moeiteloos nie.

Ek het iets aan die lyn!  Ek was eintlik oortuig dat dit ‘n stuk rommel is, maar rommel kan nie spartel en probeer ontsnap nie.  My broer kyk half vies vir my, hy probeer al ure lank, maar niks.  Ek is skaars ‘n minuut met die stok besig en ek het iets gevang.  Die iets blyk toe wel om ‘n vis te wees, net mooi pan grote.  Ek was glad nie beindruk met die vis nie, ek was glad nie van plan om iets te vang nie.  Ek wou net speel.  Die vis moes terug.  Daarna was die manne eers vasbeslote, maar nie een het ‘n groter vis gevang nie.  Ek het nooit weer probeer hengel nie en ek dink hulle ook nie. 

Die stories van vissers (en jagters) is wyd bekend.  My persoonlike opinie is dat dit uit hulle brandewyn-geweekte-duim gesuig word terwyl hulle lyne natmaak.  Hulle moet hulle self op een of ander manier besig hou.  Die grote het altyd weggekom om een of ander rede.  Gewoonlik omdat daar nie ‘n grote was nie.  Almal weet tog dat visvangstories sinoniem is met liegstorie.

Nou stel jou voor jy is iemand wat hengel geniet en jy trek ‘n kabeljou van 82 kg uit.  Die vorige rekord vir ‘n kabeljou is 73 kg.  Wat maak jy?  Wetende dat jy die kans het om jou visvang storie te laat dokumenteer en dat niemand dit ‘n liegstorie kan noem met die wêreldrekord agter jou naam nie.

As jou naam John Crabb, gooi jy die vis terug in die see.  Hy het gevoel daar is iets swaars aan sy lyn en hy het gedink dit is ‘n skeurtandhaai.  Na 15 minute se spook, het hy die kabeljou van 1.97 uitgetrek.  Hy het die vis gemerk en vrygelaat.  ‘n Stap wat baie voordelig vir voortbestaan van die spesie is.  Dit is reeds ‘n algemeen aanvaarde feit dat daar nie meer baie visse in die see is nie. 

Crabb kan nie die rekord houer word nie, omdat die vis nie amptelik geweeg is nie.  Dit is ook vrygelaat.  Hy is van plan om die vis se besonderhede vir die Oseanografiese Navorsingsentrum by die uShaka-oseanarium in Durban te gee. 

Dit is nie enige man wat sy kans op ‘n wêreldrekord sal opgee om ‘n vriendelike hand na die natuur te reik nie.  Daarvoor haal ek my hoed vir hom af.

Breinvasbrand:  Wat is Suid-Afrika se nasionale vis?

Breinlosbrand:  Regstellende verkragting is wanneer ‘n gay vrou verkrag word in ‘n poging om haar van homoseksueliteit te genees.

Verkragting voorkoming

Die verkragtingstatistieke laat Suid-Afrikaanse vroue nogal na klei-eende lyk.  Almal moet hulle beurt afwag om eendag verkrag te word.  Daar is ook nie juis veel wat jy daaraan kan doen nie.  Dit is ‘n hoogsdebatteerbare saak of jy jou moet verset as jy in ‘n verkragtings situasie land. 

Aan die een kant is verkragting ‘n aggressiedaad.  Weerstand kan beteken dat jy jou aanvaller/s meer aggressief en selfs meer geweldadig maak.  Samewerking kan jou beserings verminder en jou lewe red.  Aan die ander kant is verkragters oor die algemeen nie bekend vir hulle manhaftigheid nie.  Weerstand kan beteken dat hulle die aftog blaas.  Daar is ook immers geen waarborg dat samewerking jou wel gaan beskerm nie. 

Ek dink in kort kan dit saamgevat word dat jy nie moet baklei tensy jy bereid is om met jou lewe vir jou dapperheid te betaal nie.  As jy glo verkragting is erger as die dood, is dit dalk die moeite werd om te probeer.  Ek sal dalk in die toekoms ‘n blog skryf oor selfverdediging.  Die eerste reël is om so lank as moontlik op jou voete te bly.  As jy op die grond land, rol in ‘n bolletjie op en klou vir als wat jy werd is.  Onthou, dit gaan nie noodwendig werk nie, jy kan baie waarskynlik in so ‘n manier aangerand word, dat die dood niks in vergelyking is nie. 

Terwyl ek met my vorige inskrywing nagelees het, het ek op iets baie interessant afgekom.  Daar bestaan goed wat ‘n anti-verkragtings toestelle genoem word.  Die bekendste hiervan is seker die chastity belt, wat snaaks genoeg vandag nog verkoop word.  Meer as ‘n seksspeelding as om verkragting te voorkom.  Daar was egter sedert 2000 twee toestelle deur Suid-Afrikaners ontwikkel wat moontlik verkragting kan verhoed. 

In 2000 het Jaap Haumann ‘n toestel ontwikkel wat basies soos ‘n tampon gelyk het.  Dit het ‘n harde plastiek kern gehad, met ‘n lem wat met ‘n gespande veer gewerk het.  Wanneer ‘n penis daarop gedruk het, sou die lem die punt van die penis afgesny het.  Ek is nie seker of die toestel ooit die rakke getref het nie.

Sonette Ehlers het weer iets soos ‘n kondoom ontwikkel, behalwe dat daar hakkies aan die binnekant daarvan is. 

‘n Vrou dra dit ook soos ‘n tampon.  Wanneer ‘n man ‘n vrou probeer verkrag, sal sy penis in die hakkies vasgevang word.  Dit sal ongelooflike pyn mee bring wanneer hy sy penis onttrek en die slagoffer kans gee om weg te kom.  Massa produksie sou in 2007 begin het, maar ek neem aan dit het toe nie gebeur nie. 

Die uitvindsels is nie met ope arms verwyder nie.  Geen wonder nie.  Ek weier om elke dag van my lewe aan te trek asof ek daardie dag verkrag gaan word.  Dit is ook nie iets wat jy in jou handsak kan dra om te gebruik wanneer dit nodig is nie.  Dit is darem ook nie regtig ‘n manier om verkragting te voorkom nie, maar eerder ‘n manier om die verkragter dit te laat berou.   Vir dit om te werk, moet die verkragter die vrou penetreer – dus beteken dit nog steeds dat die vrou verkrag word. 

Hoe voel julle oor die toestelle?  Kan julle aan iets beters dink?

Nuusbrokkies

En hier gaan ons alweer.  Die ANC wil finaal van Pretoria ontslae raak voordat die wêreldbeker afskop.  Daar word dringende gesprekke met die Minister van Kuns en Kultuur, Lulu Xingwana, gevoer om die proses so gou as moontlik af te handel.  Die ANC beskou dit as ‘n prioriteitssaak. 

Rowers het Elzabé Zietsman se gastehuis gestroop van drank en vleis.  In haar eie woorde:  “Iewers in Johannesburg maak daar vandag ’n nuwe shebeen oop met ’n klein slaghuisie langsaan.”  Die rowers is weg met 2 lammers, ‘n halwe bees en die inhoud van die kroeg.  Hulle het ‘n bottel Johnnie Walker blou in die kroeg uitgedrink.  Zietsman reken die skade is R30 000 – R40 000. 

Wetgewing rondom mediese parool gaan moontlik verander.  Tot 60% van die mense wat daarvoor kwalifiseer herstel ten volle buite die tronk.  As die wetgewing verander word, sal die wat herstel verplig wees om die res van hulle vonnis te gaan uitdien.  Die nuwe wetgewing sal nie Shaik raak nie, want die wet is nie terugwerkend nie. 

Elsa Blignaut is 2 dae na haar 83ste verjaarsdag in haar bed verwurg.  Sy was woonagtig in ‘n huis op die hoek Lange- en Tramstraat in Brooklyn.  Haar arms was met telefoonkabels vasgemaak, sy was in komberse toegedraai en met nagklere versmoor.  Niks is uit die huis uit verwyder nie. 

Duisende liter suurwater het gister vanuit ‘n ventilasie skag in die Wes-Rand begin lek. Mariette Liefferink, direkteur van die Federasie vir ’n Volhoubare Omgewing, noem dit ‘n omgewingramp, een waarvan verskeie organisasies dit al vir 5 jaar lank onder die regering se aandag probeer bring.  Dit is nou egter te laat.  Die departament waterwese was glo Vrydag by die skag, maar het gemeen alles is onder beheer. 

Boeing 737-800 van Ethio-pian Airlines het gister in ‘n vuurbal in die see gestort.  90 mense was aanboord en die kanse dat enige van hulle lewend gevind sal word, is maar baie skraal.  Vuilspel word nie vermoed nie, al het die vlieënier in die teenoorgestelde rigting gevlieg as wat hy aanbeveel was.  Slegte weer het vermoedelik ‘n groot rol gespeel, maar duikers soek nog na die black box.  Tot dusver is net 30 lyke al gekry.