Verkragting werklikheid

‘n Meisie wat in Suid-Afrika gebore word, het ‘n groter kans om verkrag te word as wat sy het om te leer lees.  Aldus ‘n BBC berig in 2002. 

Ek het amper van my stoel afgeval toe die feit onder my neus geswaai word.  Ek aanvaar dat elke mens wat my pad kruis wel kan lees.  Moet ek nou aanvaar dat elke vrou wat my pad kruis verkrag is?  Indien sy nie verkrag is nie, dat sy wel nog verkrag gaan word?  Is verkragting ‘n geval van ‘n kwessie van tyd, iets wat wel een of ander tyd met jou gaan gebeur?  Skrikwekkende gedagte!

In 2003 was daar bereken dat 85.7% van Suid-Afrikaanse vroue bo 15 kan lees en skryf.  Met die BBC se feit, beteken dit dat 9 uit elke 10 vroue wat jy gaan ontmoet op een of ander tyd in hulle verkrag gaan word.  Die meeste mense is bewus van verkragting, maar verkies om te glo dat dit iets is waarvan jy net in koerante en tydskrifte lees.  Nie met mense wat jy ken nie.  

Dit is ‘n nare gedagte dat iemand wat jy ken ‘n verkragtingslagoffer kan wees, maar die moontlikheid kan nie buite rekening gelaat word nie.  Niemand verkondig dat hulle verkrag is nie.  Dit is makliker om dit weg te steek as om te erken dat iemand jou op die intiemste moontlike manier te na gekom het.  Vandag nog is daar mense wat dink die slagoffer dra skuld aan wat gebeur het. 

Net om ‘n paar ander statistieke te noem.  1 uit elke 3 vroue uit ‘n groep van 4000 het erken dat hulle die vorige jaar  verkrag was (dus in ‘n tydperk van 12 maande).  25% van seuns in ‘n groep van 1500 leerlinge dink gangrape is pret.  Die Mediese Navorsing raad het bevind dat omtrent 50% van mans al iemand verkrag het.  Die helfte van hulle het al meer as een vrou verkrag.  Ongeveer 500 000 verkragtings vind per jaar plaas, die meerderheid word nooit aangemeld nie. 

In 2000 alleen was daar 67 000 aangemelde gevalle van verkragting of seksuele aanranding teenoor kinders.  Daar is mense wat glo dat minder as 10% van die gevalle word aangemeld.  Suid-Afrika is die land met die meeste verkragtings en die meeste voorvalle van kinderverkragting.  Nie juis iets wat ‘n mens trots maak daarop om ‘n Suid-Afrikaner te wees nie. 

Dit troos darem dat die data 10 jaar oud is, maar ek kry niks wat aandui dat die prentjie in die tussentyd aansienlik verbeter het nie.  Dit is ‘n situasie wat nie geduld mag word nie.  Charlene Smith is ‘n verkragtingslagoffer en iemand wat haar beywer om verkragting in Suid-Afrika uit te roei.  Sy reken (in die BBC berig) dat verkragting aangespreek kan word op:

• Die manier waarop ma’s hulle seuns opvoed.
• Meer gemeenskap verantwoordelikheid oor die manier waarop gemeenskapslede hulle gedra
• Beter polisiëring
• Strenger vonnisse
• Die hervorming van die geregtelike sisteem.

Stem jy saam met haar?  Hoe dink jy kan verkragting uitgeroei word?  Het SA noemenswaardig verbeter vandat die statistieke bekend gemaak is?  Weerspieël die statistieke die werklike prentjie of word dit oordryf?

Indien jy ‘n slagoffer is wat nie weet wat en hoe nie, lees asseblief hier. 

Breinvasbrand:  Wat is ‘n regmakende (corrective) verkragting? 

Breinlosbrand:  Nell was reg met aksie.

Nuusbrokkies

Mickey Arthur het bedank – sy verhouding met Graeme Smith het glo onherstelbaar verbrokkel.  Die hulpafrigter is na bewering in die pad gesteek en daar word gegis dat die keuringskommittee dalk ook binnekort weg kan wees.  As ek my nie verbeel nie, is dit nie die eerste keer dat Smith nie saam met ‘n afrigter kon werk nie en die afrigter vervang moes word nie.  Is dit nie juis hoe Arthur in die pos geland het nie? 

Sophie Bouillon (25) en haar Zimbabwiese vriend is voorverlede Vrydag deur die polisie aangerand, gevloek en ‘n aand lank toegesluit is.  Volgens haar berig in Libération was hulle in ‘n padversperring voorgekeur.  Daar was ‘n wit polisie man in bevel van ‘n groep swart lede.  Hy het glo ‘n probleem gehad daarmee dat Bouillon se vriend swart is.  Hy het haar ‘n R1000 boete wat dadelik betaalbaar was opgelê.  Na ‘n woordewisseling is Bouillon hardhandig in ‘n vangwa gegooi.  Toe haar vriend haar wou help, het hy ook in die vangwa geland.  Sy het ‘n ander vriend gebel wat gesorg het dat hulle vrygelaat word en alle klagtes teen hulle is terug getrek. 

Jacobus Barend Rudolph Engelbrecht (40) van Bela-Bela wou glo die eienaars van die Pick n Pay en Spar se kinders ontvoer het.  Hy het ‘n byl en chloroform by hom gehad toe hy Vrydag gearresteer is.  Hy wou glo ‘n losprys vir hulle geëis het.  Niemand is presies seker wat sy planne was nie. 

Miriam Rapasa (19) van Bloemfontein is dood nadat sy eergister herhaaldelik deur twee mans verkrag en aangerand is.  Haar oë is gekrap, sy was met ‘n mes gesteek, daar was op haar maag gespring en sy is met glasstukke ook verkrag.  Haar beserings was so erg dat die medici wat haar behandel het berading moes kry. 

Theresa Eksteen (51) is met ‘n panga in haar huis in Stilfontein aangeval en vir die dood gelos.  Eksteen se man werk in Zimbabwië waar hy selfoontorings oprig.  Die familie vermoed dat dit dalk ‘n wraak aanval is nadat ‘n werknemer in Desember afgedank is.  Sy word in ‘n private hospitaal versorg.  Iemand is in verband met die aanval gearresteer, maar sy identiteit is nie bekend gemaak nie. 

Daar gaan ‘n fliek gemaak word van die Henley-on-Klip busongeluk waarin 23 kinders dood is.  Die ongeluk het op 28 Januarie 1970 plaasgevind – die bus met 42 skoliere het met ‘n trein gebots.  Die fliek gaan om Johan le Roux, ‘n matrikulant, draai wat twee laerskoolkinders uit die bus gegooi het toe hy gesien het die trein gaan hulle tref.  Hy was egter te laat om homself te red.  Marguelette Louw, regisseur, wil die storie vertel omdat mense nie van die ramp weet nie of dit verwar met die Westdene ongeluk. 

Caroline Cartwright (48) van Newcastle Engeland het gister ‘n opgeskorte vonnis gekry omdat sy te veel lawaai met seks.  Cartwright het ‘n vroeër bevel dat sy vir 4 jaar rustiger moet wees geignoreer na net 48 uur.  Sy is nou gevonnis tot 8 weke tronkstraf wat vir ‘n jaar opgeskort is.  Ek dink hulle moet maar mik vir hulle eie persoonlike eiland.