Drama, Drama, Drama

Deesdae is dit nogal die inding om verslaaf te wees.  Verkieslik nou iets waarvoor daar geen hoop is nie, maar nogtans iets wat nie jou hele lewe sommer kan verwoes nie.  Elke tweede meisie is verslaaf aan sjokolade.  Adrenalienverslawing is ook baie gewild en dan praat ek nie eers van internet of nuusverslawing nie.  Alles maar onskuldige praatjies, net om ‘n sekere liefde groot te praat as ek dit so kan stel. 

Tog kom ek meer en meer agter dat daar ‘n lelike verslawing kop uit steek.  Mense raak verslaaf aan drama.  En ek is glad nie so seker dat dit onskadelik is nie.  Vir elke klein gebeurtenis word daar ‘n draaiboek geskryf.  Goed of sleg, dit word met elke beskikbare geleendheid op gevoer.  Mense moet in die stroom inspring en stroomaf saam swem.  Anders moet die draaiboek aangepas word om die nuwe verwikkelinge by te werk.  Die draaiboek moet so lank as moontlik uitgerek word, niemand praat tog van ‘n fliek wat net ‘n dag lank gedraai het nie. 

So word mense se lewens aansienlik meer interessant ingekleur as wat dit werklik is.  Kan ek maar sê dat dit hulle belangrik laat voel?  Dit hou die aandag op hulle gevestig en laat mense van hulle kennis neem.  Dit laat mense selfs hulle eie lewe vergeet en hulle in ‘n ander se lewe vasgevang word.  Alles word in die storie gegooi, dit is eintlik jammer dat dit nie vir een of ander toekenning genomineer kan word nie.

Soos enige verslawing weier die lyers daarvan om te herken dat daar ‘n probleem is.  Sonder erkenning is daar geen genesing nie.  Genesing is wel nodig, dit kan nogal ‘n giftige kringloop word.

Ek het onlangs ontdek dat ek self nogal melodramaties kan wees.  Ek erken dit hier en nou, en wie weet?  Dalk leer ek tog om ou koeie in die sloot te gooi en te begrawe.  Nie om almal rondom my met dieselfde stront te verveel nie.

Is jy verslaaf aan drama?  As jy heeltemaal eerlik moet wees?  Watter ander giftige verslawings is daar waarvoor daar geen rehab is nie?

Breinvasbrand:  Drama is uit Grieks uit afgelei.  Wat beteken dit?

Breinlosbrand:  2.56

Nuusbrokkies

Weer ‘n keer Maandag en weer ‘n geleendheid om van moord en doodslag gehoor. 

• Ernest Giesekke – chemie doktor – se kop was in mekaar geslaan, sy keel is afgesny en hy is met ‘n skerp voorwerp gesteek in Ficksburg.  Alles vir R50 en ‘n selfoon.  Die barbare het Giesekke (69) by die watertenk aangeval en het daar na sy vrou, Eve (77) in die huis oorval.  Hulle het haar vertel haar man is dood en het wapens en geld geëis.  Met die hulp van die gemeenskap is hulle 6 uur later in hegtenis geneem. 
• Johan (30) en Talitha Fourie (25) en hulle baba is gister opslag dood na ‘n kop aan kop botsing met kapers.  Die Fouries was in ‘n Mazda 323 en het op die R30 tussen Derby en Rustenburg met ‘n Condor wat deur die polisie gejaag is gebots het.  Hulle het die taxi gekaap, maar die vroulike insittendes het gesmeek om los gelaat te word.  Die kapers het ingestem en die vroue het die polisie oor die kaping in kennis gestel.  Die bestuurder van die Condor is ook dood, 2 van die ander kapers beseer en nog iemand is gebeseer nadat hulle met die polisie gebots het.   
• Johan Venter (60), ‘n boer van Middelburg, is deur aanvallers half twee in die oggend in die kop geskiet.  Sy vrou was in die arm en bors gewond.  Die aanvallers het vermoedelik Hendrieka van der Merwe (59) ook oorrompel nadat sy gestop het om ‘n obstruksie uit die pad te haal.  Een van die aanvallers moes saam met haar na haar huis stap, maar sy het ontsnap nadat hy haar ‘n oomblik alleen gelaat het.  Niemand is al gearresteer nie. 
• Mark Stansfield (53) het homself vermoedelik in sy motor vergas naby Kaapsehoop.  Hy was ‘n oud-joernalis van onder andere die Sunday Times en die Laeveld nuus.  In 2008 het wilde perde hom uit ‘n verwoestende brand naby Kaapsehoop gered.  Stansfield is deur rook oorval en het sy rigtig verloor.  Hy het op die perde afgekom en besluit om hulle te volg.
• Oaitse Mogotsi en haar man is dood nadat hulle motor met ‘n trein gebots het.  Die egpaar het met ‘n Renault Clio gery.  Haar man wat bestuur het word tans in die hospitaal versorg. 

Die vorige regering meen dat De Kock ‘n slagoffer van die verlede is en dat hy soos alle ander politieke gevangenes vry gelaat behoort te word.    Hulle is seker bang hy het ‘n paar stories.  Terselfde tyd is Winnie Mandela glad nie gelukkig daarmee dat hy dalk binnekort vrygelaat gaan word nie. 

Adel Oberholzer (29) het haar pa, Arrie Groenewald (57), gekry nadat hy in 1980 kontak met sy kinders verloor het.  (Ek neem aan dat sy hom nooit geken het nie, sy sou in 1980 gebore gewees het.)  Hy het hulle glo jare lank gesoek, maar sodra hy ‘n adres kry, was hulle weer weg.  Oberholzer het Groenewald opgespoor deur ‘n polisievriend.  Groenewald het in 2008 ‘n gesteelde motor aangemeld en die polisievriend het hom deur die aanmelding opgespoor.  Groenewald het ook kontak met sy seuns gemaak. 

Andrew Sarkin (kardioloog) reken Simply Slim  is daarvoor verantwoordelik dat hy 4 mense, een so jonk as 20 in die hospitaal vir hartprobleme moes opneem.  Die SABS het bevind dat die produk meer Sibutramien bevat as die geregistreerde verslankings middels.  Simply Slim is nie geregistreer nie en hulle voer aan dat die SABS nie hulle produk getoets het nie. 

En ten slotte:  Tannie Daleen Moll (91) het haar eerste boete gekry, nogal vir ‘n spoed oortreding omdat sy haastig was om by die see te kom.  Sy was 15 Desember  in haar Hyandai gevang op die N12 naby Harrismith terwyl sy 113 km/h in ‘n 100 zone gedoen het.  Die oud-maatskaplike werker reken sy ry nog vinnig en veilig.  Haar rybewys verval in 2013, maar sy gaan dit nie hernu nie omdat sy nie wil hoor dat sy dalk te oud is om nog te kan ry nie.  Voet in die hoek, dit is mos hoe die ou mense moet ry.