Nietigheid van die mens

Ai tog!  Die ellende in Haïti kry net nie einde nie.  Meer as ‘n week later, word daar nog steeds mense uit die puin gegrawe.  Hulle is geheel en al uitgelewer aan die genade van die wêreld.  Daar is geen noemenswaardige strukture oor om te help om orde uit die chaos te skep nie.  Mens hoor van 5 jariges wie se handjie geamputeer is – sonder die hulp van ‘n dokter of verdowingsmiddels.  ‘n Kind wat gegil het, maar wat dood is voordat sy gered kon word.  Mense wat vuisslaan vir kos.  Lyke wat ‘n gesondheids gevaar inhou.  Daar word gespekuleer dat daar tot 200 000 mense kan dood wees . . .

Alles na ‘n aardbewing wat net 7 sekondes geduur het.  7 sekondes en alles wat mense oor generasies tot stand gebring het, lê alles nou in puin.  Miljoene ure se kopkrap, miljoene liters sweet, biljoene dollars.  Alles nou net verwoesting.  Ironies ook.  Die strukture wat die mens geskep het om hom te beskerm teen die elemente, is juis wat die elemente gebruik het om die mens te wys wie is baas. 

‘n Les wat ons keer op keer vergeet.  Sien, die mens is ‘n magtige bliksem.  So magtig dat hy keer op keer vergeet hy is nie almagtig nie.  Alles wat hom verhewe maak bo ander spesies, is juis wat hom sink wanneer die aarde weer neem.  Die mens neem in oorvloed van die aarde en vergeet gerieflikheidshalwe dat daar terug gegee ook moet word. 

Snaaks dat daar ook altyd ‘n tragedie nodig is vir die mens om te onthou dat ons saam in die ding is.  Voor die aardbewing kon Haïti maar vergaan het van aarmoede, maar skielik steek almal ‘n hand uit.  Met goeie rede ook, dit word gesien as een van die grootste rampe in die geskiedenis.  Ek haal my hoed af vir almal wat dadelik alles kon los en gaan hulp verleen het.  Mense, soos Gift of the Givers, wat ingespring het en gedoen het wat die hand vind om te doen.

Hopelik kom daar ‘n dag dat die mens sy hand so ywerig gaan uitsteek om nood te verlig, al het dit nie met ‘n tragedie begin nie.

Was jy al in ‘n natuurramp?  Wat was die bangste wat die elemente jou al gemaak het?

Breinvasbrand:  Wat is die hoofstad van Haïti?

Breinlosbrand:  Riaan was reg met is elke persoon se reg om n feit, standpunt, gedagte, mening te huldig of ander daarmee saam stem, al dan nie.

NS:  Ek lees nou net dat Haïti getref is met ‘n naskok wat 6.0 op die Richterskaal gelees het.  Die skudding het 10 sekondes lank geduur.

Skole atletiek

As jy sê jy het nog nooit atletiek gedoen het nie, wil ek amper sê jy jok.  Anders was jy net baie slimmer as ek om dit jou lewe lank te kon vermy.  Almal het tog sekerlik al resies gehardloop, al was dit net met jou ma by die huis waar sy jou laat wen het.  Selfs kleuterskole doen so ‘n klein bietjie naellope vir die kleintjies. 

Om een of ander rede het die skole waar ek was, besluit om soveel as moontlik kinders by die atletiek te betrek.  Hoekom, sal net hulle weet.  Dit kan nie juis maklik wees om 500 – 1000 kinders op een veld besig te hou nie.  Miskien het hulle gedink die bloedrooi kinders steek mooi af by bottelgroen en spierwit.  Hulle beskeie poging om Kersfees te rek.  Goed, ek praat strooi, hulle het darem versoek dat kinders ‘n hoed moet skool toe neem.

As ek reg kan onthou, was kleuresport in die laerskool op ‘n Saterdag gehou.  Op hoërskool was hulle effens slimmer.  Saterdag is ‘n af-dag en kon hulle niemand dwing om by die skool te wees nie.  In die week is dit ‘n heeltemaal ander saak en die koshuiskinders ook heelwat gelukkiger.  Die leerlinge het ook nie juis omgegee nie, dit was twee dae wat jy nie in die klas moes gesit het nie.

Ja, twee dae.  Daar was eers ‘n dag opgeoffer om uitdunne te hou vir die kleurespanne.  Jy het dus die dag saam met jou rooi (groen of blou) span in jou ouderdomsklas deur gebring en van een item tot ‘n volgende beweeg.  Jy het nie ‘n keuse gehad nie, tensy jy dood was, moes jy elke item doen, behalwe die langafstande.  Die bestes van jou span, moes dan aan die kleuresport gaan deelneem het.  Wat so te sê beteken het dat almal een item gehad het om aan deel te neem.  Jy moes dan ook ‘n week lank gaan oefen het, tot die kleuresport.

Kleuresport was ook ‘n heeldagstorie, op ‘n gewone skooldag.  Met die verskil dat jou bas op die pavijoen moes gewees het wanneer jy nie self deelgeneem het nie.  Daar moes gesing en geskree word tot jy gedink het jy het nie meer ‘n keel nie.  Wat is die doel met die gesingery op die paviljoen?  Behalwe dat die onderwysers rus en vrede kon hê omdat almal se stemme weg is?

Na kleuresport, kon die skooljaar met erns weggespring.  Sport was beperk tot smiddae en naweke.  As jy gelukkig genoeg was om met kleuresport uit te val, het niemand hulle juis aan jou gesteur nie.  Tot dit weer interhoër was.  Jy moes geesvang bygewoon het, waterkaskenades en op ‘n weeksaand gaan sing het.  Dit was glo lekker.  Ek sal nie kan sê nie, ek het altyd iets beters gehad om met my aande te doen.

Eerlik – my 10 dae van gedwonge atletiek was nie sleg nie.  Ek het dit nogal geniet.  Ek is wel baie dankbaar dat dit vir altyd iets van die verlede is.

Onthou jy kleure sport?

Nuusbrokkie

Nellie Matthysen het met haar twee kinders, Arno (12) en Isabel (6), uit Bloemhof verdwyn begin Desember.  Sy sou na bewering ‘n man wat sy in MXit raakgeklets het gaan ontmoet.  Hulle is net met die nodige vir ‘n paar dae, hulle meubels en klere is nog net so in hulle blyplek.  Matthysen is van haar man vervreemd en het van Hoopstad na Bloemhof getrek.  Sedert haar verdwyning het niemand weer van haar gehoor nie.  Haar selfoonnommers is nie meer aktief nie en sy het nie ‘n bank- of ander rekeninge waarmee sy opgespoor kan word nie.

Die departement van koöperatiewe regering het ‘n omkeerstrategie bedink om plaaslike regerings reg te ruk.  Een van die 36 wetswysigings sluit in dat daar met uitvoerende burgermeesters weggedoen gaan word.  Sterk reaksies word hierop verwag, juis omdat baie mense burgermeesterskap sien as die eerste stap in ‘n politieke loopbaan.  Die mag van die burgermeester gaan onder amptenare verdeel word met ‘n seremoniële burgermeester of ‘n uitvoerende raad gaan moontlik aangestel word.

6 mense is ernstig beseer gister in Roodepoort toe ‘n vragmotor weens remprobleme nie by ‘n T-aansluiting kon stop nie.   Die koeldrankvragmotor het eers in ‘n Mazda Sting vasgery en dit tot binne in ‘n motorhuis gestamp.  Daarna het dit ‘n huis, en 3 heinings omgery voordat dit uiteindelik tot stilstand kon kom.  Die eienaar van die eerste huis se vrou is swanger, maar sy was gelukkig weg na die ginekoloog ten tye van die ongeluk. 

Kay Gilderdale (55) van Sussex, Engelang, het Lynn Gilderdale (31), haar dogter gehelp om selfmoord pleeg.  Lynn Gilderdale ly glo aan chroniese moegheidsindroom en het haar ma gesmeek om haar te help om te sterf.  Sy het self die eerste spul pille gedrink.  Gilderdale het na bewering 30 uur lank gesukkel om haar dogter dood te kry.  Sy staar verskeie aanklagte in die gesig. 

Die Engelse is wragtig nie lekker nie.  In London is Angela Sullivan (36) gevang dat sy al 200 keer met ‘n 12 jarige seun seks gehad het.  Sy het ‘n sterretjie in haar dagboek geplak elke keer wat hulle seks gehad het.  Na die 100ste keer het sy vir die seun tekkies gekoop.  Sy het haar eie kind na sy ouma gestuur wanneer die seun oorgekom het. 

Jeremy Mansfield is op die oomblik kankervry.  Hy moet nog die volgende drie jaar vier maal per jaar vir toetse gaan.