Vriendelike Diens

Twilight het ‘n bietjie gal gebraak oor die gebrek aan goeie diens in ons land.  Ek gaan probeer om die haas onmoontlike te doen, iewers moet ‘n mens besonderse goeie diens kry.  Al is dit soms op die plekke waar ‘n mens dit die minste verwag. 

Ek het al vrede gemaak met die feit dat ek lyk soos ‘n brandarm persoon wat onder die broodlyn lewe.  Ek sal dit erken dat dit my soms goed pas ook.  Dit is egter baie frustrerend die dag wat jy wel iets wil koop.  Die verkoopsmense maak geen geheim wat hulle van jou finansies dink nie.  Hulle druk jou in die goedkoper items se rigting, skimp dat hulle niks vir jou prysklas het nie of ignoreer jou blatant.  Alles baie neerhalend asof jy nog boonop dom ook is, met ‘n katvriendelikheid asof hulle jou ‘n groot guns doen.  Natuurlik is ek dan ook behoeftig en gaan na ‘n plek waar hulle my die voordeel van die twyfel gee. 

Daarom is ‘n mens geneig om te dink wanneer jy regtig by rykmansspeelplekke, of eerder koopplekke kom, dat hulle jou ook teen die neus af behandeling gaan gee.  En, ironies genoeg, is dit ook dikwels waar ek die vriendelikste personeel raakloop. 

Van kuns weet ek nie veel nie.  Kanse dat ek ooit R30 000 of meer vir ‘n geverfde doek sal betaal is maar skraal.  Selfs al sou ek dit kan bekostig, is die kanse maar skraal dat ek dit sal waardeer.  So het ek eendag ‘n paar ure gehad om te verwyl in Brooklyn en is toe by winkels in wat ek selde probeer vasstel het waar die deur is.  Niemand probeer jou so vinnig as moontlik by die deur uitkry nie.  Waar ek nou regtig verbaas was, was by Chris Tugwell Gallerye.  Die verkoopsdame het baie vriendelik gegroet toe ons inloop, ons genooi om rond te kyk en ons herinner dat sy daar is as ons haar nodig kry.  Nie iets aan ons probeer afsmeer nie, maar tog vriendelik en professioneel.

Ek is nie ‘n wynliefhebber nie, van landgoede en versnitsels weet ek nie veel nie.  In die Kaap, maak jy soos al die ander toeriste en gaan proe wyn.  Ons het eintlik Stellenbosch toe gemik, maar soos ons verby Groot Constantia ry, besluit ons dat dit seker net so goeie plek is om wyn te proe as enige ander.  Spyt was ons beslis nie.  Die oudste wynplaas in SA verwelkom alle besoekers gul.  Die personeel trek nie hulle neuse op nie en maak die ervaring een wat jy beslis in die toekoms wil herhaal.

My laaste voorbeeld van die dag is die Diamant Winkel in die Cullinanmyn.  Kyk, daar is vir jou geslypte diamante wat jou laat wens jy kan met diamante smokkel.  Hulle weet die meerderheid van die mense is daar om te bewonder, hoeveel Suid-Afrikaners loop regtig met duisende dollars (jip, dollars, nie rande nie) in hulle gatsakke rond.  Tog bedien hulle almal asof jy enige oomblik al hulle diamante gaan aankoop.  

Kan meer van die tipe mense nie maar in die gewone kettingwinkels werk nie?  Of die werkers in die kettingwinkels net ‘n paar lesse gee nie.

Watter plekke se diens staan vir jou uit?  Wat was die beste diens wat jy in jou lewe gehad het.  Wat sal gebeur as alle verbruikers hulle geld vasklou tot hulle soos miljoenêrs behandel word?

Breinvasbrand:  Waar was Shoprite se eerste winkel buite SA geopen?

Breinlosbrand:  Ons het altyd gesing:  graad 1, parrabeen.  Graad twee, koppie tee.  Maar ek het BB se rympie baie geniet.

Nuusbrokkies

Die skoknuus van die dag is seker dat die Ossies moontlik na April nie meer blou gaan wees nie.  Hulle sal dan saam met al die ander sportspanne van Pretoria wit, groen, geel en swart wees.  Die blommetjie wat skielik ‘n madelief is en nie ‘n Baberton Daisy is nie gaan ook die trekpas kry.  Afriforum het aangedui dat hulle Gauteng-Noord Hengel en enige ander sport wat vra in die hof sal gaan verdedig.  Die BBRU reken dat dit hulle nie raak nie, want die Blou Bul is ‘n geregistreerde handelsmerk.  Bismarck Mosuoe van die Tswane-Sportraad het gesê dat daar in ‘n April ‘n ope vergadering daaroor gehou sal word.  Wat ook al daar besluit word, sal bindend wees vir alle spanne van die streek.

Kinders van Philadelphia Ark-kleinhoewe in Kameeldrift-Wes moes toekyk hoe hulle troeteldiere met ‘n .22 afgemaai word.  Blykbaar is 8 katte en ‘n hond so gedood.  50 mense bly op die hoewe, elke gesin in hulle eie houthuis waarvoor hulle R650 huur betaal.  Dirk van Vuuren, die eienaar, het die mense gewaarsku om hulle diere aan die DBV te oorhandig voor Maandag 10:00.  Van Vuuren sê hy het een kat en een hond vir elke gesin gelos en sowat 25 katte na die DBV geneem.    Aan die een kant is dit skokkend as hy wel die diere afgemaai het, maar aan die ander kant is daar dalk method in his madness.

Wie sê die Kaapse water is te koud vir haaie?  Loyd Skinner (37) is vermoedelik deur ‘n witdoodshaai in Vishoek aangeval.  Volgens ooggetuies was Skinner ‘n 100 m van die strand halflyf in die water naby rotse besig om sy duikbril te verstel tydens die aanval.  Nadat die haai hom gegryp het was die helfte van sy lyf weg.  Die haai het terug gekom en Skinner weggesleep. 

Lucky Kubayi (36) het sy 4 jarige seun en homself aan ‘n boom opgehang.  Kubayi was ‘n veiligheidswag en het glo verhoudingsprobleme met vermoedelik die kind se ma gehad. 

7 mense, 2 ernstig, is beseer toe gasbottels by Barcelos ontplof het.  Die ontploffing was kragtig genoem op die dak en ruite uit te skiet.  Die aangrensende Chicken Licken was ook erg beskadig.  Die presiese oorsaak word nog geondersoek.