My jean broek

Daar is ‘n brief in die Beeld wat my hardop laat skater het.  Die opskrif lui:  Kerk laat selfs al mense met denims toe.  Die skrywer brei ondermeer verder uit dat ‘n mens nie denims skool, bal, werk of hof toe sal dra nie.  Dit laat my nogal wonder of die skrywer ooit iets anders doen as om die heeldag briewe vir die koerant te skryf.  Ek twyfel sterk.

En daar is mense wat voel dat hy ‘n punt beet het.  Vir party mense is jeans blote ontspannings drag, wat net by die huis of vir ‘n baie informele geleendheid gedra kan word.  Durf ek sê dat party mense in die laat 1800’s vasgehak het toe denim spesifiek vir werksdrag ontwikkel was.  Kan iemand asseblief die verwelkomingsmatjie vir hulle uitrol?  Hulle het 2 eeue om in te haal. 

Deesdae is ‘n denim orals welkom, mits jy dit reg optert vir die geleendheid wat jy in gedagte het. Mans kan al lankal by formele dinee’s opdaag in denim.  Vrouens ook, hulle moet net verder dink as wat hulle neuse lang is.  Die geheim lê in die bykomstighede en in ‘n mate in die snit.  Ek weet dit en ek is nie eers modebewus nie.  Die regte skoene, juwele, bloes met die slim gebruik van die regte baadjie en handsak.  Hoe meer formeel die geleendheid, hoe hoër moet die skoene. 

Howe is al lankal nie meer ‘n plek waarvoor jy moet aan trek nie.  Wel, mits jy nou nie kaal is nie.  Dit is ‘n oortreding van die wet.

Daar was egter gekla oor denims in die kerk.  Ek moet seker my mening daarvan ook gee.  Verskoon my asseblief as ek vir ‘n oomblik prekerig word.  As jy aanvaar God is jou vader en die kerk is sy huis, dan is dit mos jou huis ook.  In jou huis is jy veronderstel om gemaklik te wees.  Trek jy formeel aan as jy jou ouerhuis besoek?  Sien my punt?

Lank lewe denim!  Net waar dit jou behaag.

Breinvasbrand:  Wanneer is Levi Strauss & Co. gestig?

Breinlosbrand:  Olga was reg met ‘n heks wat soos Kersvader geskenke aan Italiaanse kinders uitdeel.

Plig teenoor Bejaardes?

‘n Bejaarde dame vertel in Beeld hoe sy voor ‘n aantal tieners geval het en nie een het hom/haar aan die vrou gesteur nie.  Sy moes self opsukkel en selfs nadat sy van frustrasie in trane uitgebars het, het nie een na haar welstand verneem nie.  Sy was op krukke gewees.  ‘n Swart dame het wel gekom en haar opgehelp.

Natuurlik het almal lê oor hoe slapgat die jeug is en hoe swak hulle opgevoed is.  Dit mag so wees, maar ek is seker daar was nie net kinders in die omgewing nie.  Hoekom word die skuld net voor hulle deure gelê?  Is dit net ‘n kind / tiener se plig om ‘n ou mens te help? 

Ek het ‘n oomblik afgestaan om te dink wat ek in die toeskouers se geval sou gedoen het.  Ek sal verseker nie alles gelos het om haar dadelik te help nie.  Ek sou wel ‘n oomblik gewyfel het om te sien of sy self regkom.  Indien nie, sou ek haar so gou moontlik gehelp het, verseker het dat sy self verder kan regkom en dan verdwyn het.  ‘n Mens wil graag help, maar jy wil nogtans nie ‘n oumens van hulle self – / menswaarde beroof nie.  Ek sou verseker nie gelag het nie.  Ek sou enige mens wat voor my voete geval het dieselfde behandel het. 

Iemand het eendag gesê dat dit die bejaardes se gebede is wat ‘n volk staande hou.  Uit dankbaarheid behoort ons hulle te help waar ons kan, hulle gebede is wat ons deur die dag help.  Kan enige mens regtig wegkyk as ‘n mede aardse burger in pyn is of hulp benodig?  Des te meer as die persoon hulle self nie kan help nie?

Is dit ‘n voorreg of ‘n plig om ‘n bejaarde te help?  Wat behels die plig alles?  Moet ‘n mens almal wat oud lyk oor die straat help?  Moet jy altyd terug staan sodat hulle voor jou gehelp kan word?  Jou stoel aanbied as hulle staan?  Dit is seker net goeie maniere en kan nie skade doen nie. 

Tog, moet ons nie meer probeer doen nie?

Nuusbrokkies

Op hierdie toegetrekte, koel Maandagoggend, sal ek maar met die mooi nuus begin.  Kaiene Aldorino, Mej Gibraltar is Saterdagaand as Mej Wêreld gekroon.  Perla Beltran van Mexico en Tatum Keshwar van Suid-Afrika was onderskeidelik tweede en derde.  Nicole Flint is ook gisteraand as die nuwe Mej SA.  Blykbaar dink net ek dat dit nuuswaardig is.

71 mense is gister in die Universal Church of the Kingdom of God beseer toe staaltrappe ineengestort het.  Die meeste het glo ligte snyplekke en skok opgedoen en is reeds al ontslaan.  Daar was ook ‘n paar fakture.

Huisgenoot sê Robbie Klay lieg oor die R10 000 wat hulle teen sy wil in sy rekening betaal het.  Volgens Weideman was die R10 000 wat ooreengekom was as Klay onder sy eie naam sou erken wie hom gemolesteer het. 

‘n Verregse sekte en arsenaal is op ‘n plaas in die Boland ontdek.  Pieter Lodewyk White (45) is ‘n selfaangestelde pastoor en moet saam met ander lede van die Jesurun Broederskap in Januarie in die hof verskyn.  Apartheid is hulle geloof en hulle doel is om die “ware evangelie aan die Keltiese en Kaukasiese wêreld te preek”.  Wat dit ook al beteken. 

Liam Falcone is dood nadat hy te veel butaangas (aanstekergas) ingeasem het.  Facone het die aand (1 Desember) by sy broer se huis deurgebring.  Die broer en sy vrou het al gaan slaap toe hulle met ‘n gil gewek is.  Falcone is met die aanstekergas in die hand gekry, besig om te snak na asem en half-toe oë wat flikker. Hulle het noodhulp toegepas, maar nog hulle, nog die paramedici kon Falcone bybring. 

Die New Life-sentrum in Kempton Park gaan moontlik gedwing word om te sluit weens ‘n gebrek aan fondse.  Die hawe huisves 16 meisies tussen die ouderdom van 11 en 18.  Die kinders is wees of hulle ouers kan hulle nie versorg nie. 

En ten slotte:  Hobbit is dood.  Hobbit, ‘n gorilla van Pretoria Dieretuin, het aan tipe 2 diabetes gely.  Hy het die afgelope tyd baie gewig verloor, sy sig het agteruit gegaan en hy het nierversakking opgedoen.  Sy niere het Vrydagnag finaal ingegee.  As jy die afgelope 21 jaar die dieretuin besoek het, is die kanse goed dat jy wel al vir Hobbit ontmoet het.  Hobbit het blykbaar nooit vergeet om Binnelanders te kyk nie.  Hobbit was 30 jaar oud gewees.