My sabatical

Olga in die Herriemerrie se hoewe. 

Almal weet teen die tyd dat ek, Herriemerrie, van formaat, Xena Phoenix nie vir n uitdaging skrik nie.

Olga het die pad met koekies gesaai en ek gaan hulle vir myself toe eien.  Hopenlik het sy nie my gunsteling, skurwejantjies, nie onherroeplik verbrand nie. Liewe ouers, dit sal n ramp wees. Ek kon nog nooit koekies weerstaan nie.

Daarom is my Sabatical kant en wal gereel. Ek wag nou net om julle huiswerk te kry. Daaruit sal ek ‘n locum kies om die blog aan die gang te hou.  Kozibaai tot Alexanderbaai.

Hoe moeilik kan dit tog wees.  Solank ek elke dag eet en soms in geslaap, is die  saak reg.

Breinvasbrand:  Waar is is Kolmanskop geleë?

Breinlosbrand:  Nell was reg met 130 km / uur.

Laat die kinders kom

Hier probeer die Herriemerrie maak of sy die Girl van die Suburbs is. 

Vanmiddag, na werk, kon hierdie droomkind nie met haar geliefde agterstraatjies huis toe ry nie.  So word ek in die spinneweb, ook bekend as William Nichol, vasgevang. 

‘n Klein seuntjie het stroopsoet aan die voet van die robot gespeel.  Sy ma besig om ‘n paar sente vir ‘n kossie die aand in te samel.  Haar oë rus deurentyd op die knapie, soos sy van die een motor na die ander beweeg.  Bevoorregte bliksems wat die venster in haar gesig toemaak.  Weggekruip in hulle lugversorgde luukse motors, te skaam om haar in die oë te kyk. 

Een kyk in haar desperate traannat oë en ek  het haar my laaste noot gegee.   Haar mannetjie is aan die skroeiende son en die Goudstadse bestuurders oorgelaat.  Hy kan darem nie met ‘n honger magie huistoe gaan nie.  Daardie verdwaasde, dankbare glimlag was soos ‘n aanklag teen die mensdom.  Hoe min is ons nie bereid om te doen nie?

Nou sit ek kaalvoet opgekrul met Oscar styf teen my en popcorn eet.  Watse luukse sal dit nie vir die gesinnetjie wees nie?    Hoe bevoorreg is ek nie?  Ek kla so maklik, maar eintlik het ek met my gat in die botter geval.  Ek kan elke aand eet en ek is verseker daarvan dat my geliefdes veilig is.  Ek werk in ‘n gemaklike kantoor waar daar koffie agter my aangedra word.  Ek kan ry tot waar ek wil wees.

Ek het so baie om voor dankbaar te wees.  Uit dankbaarheid wil ek graag terug gee, maar doen ek genoeg?  Daar is die werk wat ek vir MES doen, maar daar is soveel ellende.  As elkeen maar net ‘n bietjie van hulle tyd wil gee, sal ons so groot verskil kan maak. 

Gedagtegroepe:  Sommer maar net.

My beurt vir Huiswerk uitdeel:

Ek tag  vir Twilight; Olga en Maxie om hulle voete in my hoefysters te sit.  En enige iemand wat dapper genoeg is om te probeer.  As jy nie jou eie blog het nie, epos my en ek sal dit hier plaas.

Nuusbrokkies

Petrus de Bruin (45), ‘n epileptiese lyer wat op ‘n ongeskikheidspensioen is, is gister sonder rede in die straat doodgeskiet.  Hy en sy vrou het by sy ma (80) kos gaan haal, omdat hulle niks gehad het om te eet nie.  ‘n Rower het hulle voorgekeer, Tanya de Bruin (sy vrou) neer gegooi en hom bo-oor haar in die kop geskiet.  Die rower is weg sonder die kospakkie.  Tanya oorweeg selfmoord omdat sy nie sonder Petrus kan lewe nie. 

Paulinah Makinta het teen ‘n deur gaan sit om die inbrekers van haar werknemers se kinders weg te hou.  Sy het gesien hoe twee mans die erf binnekom en is toe na die kinders in die TV kamer.  Sy het die een van die kinders haar selfoon gegee om haar ma mee te bel en van binne af uitgehou.  Die rowers het weggekom met elektroniese toestelle.  En Paulinah is my heldin vir die dag.

Die ou landsvlag is nooit verban nie en dit is teen die grondwet om dit te verban, aldus die grondwet kenners.  Dit volg nadat Cele die ou landsvlag by ‘n junior bestuurder van metrorail gekonfiskeer het en daar met korrektiewe optrede gedreig is. 

Kersvader het gister by 24 kinders in die Pretoria en Johannesburg tronke kom kuier.  Die kinders se ma’s is gevonnis en hulle is saam daar sodat hulle ma’s hulle darem nog kan versorg.  Kenny Bouwer, waarnemende gebiedskommissaris van korrektiewe dienste reken dat tronke nie die plek is om kinders in groot te maak nie.  Juis omdat die ma’s nie ernstige misdaad gepleeg het nie, dikwels maar iets soos winkeldiefstal, sal daar in die toekoms na alternatiewe strawwe gekyk word.

Adriaan van Niekerk (20) kon dalk moontlik gelewe het as hy nie sy beurt moes afwag nie.  Volgens sy pa, Riaan van Niekerk, het die dokter van die Sebokeng hospitaal gesê hy gaan Van Niekerk nie vinniger behandel omdat hy wit is nie.  Verder het die dokter vir die paramedici vertel hulle kan hom nie vertel hoe om sy werk te doen nie.  Van Niekerk het met sy motorfiets teen ‘n boom vasgejaag.