Hoekom is dit altyd die vrou se skuld?

Nog ‘n week, nog ‘n bekende man wat met sy broek om die knieë betrap is.  Nog ‘n massa dissipels wat glo dat hy die slagoffer van gemene spel was. 

Soos ek van die kantlyn af verstaan, is dit blykbaar onmoontlik vir ‘n man om “Nee, Dankie” te sê.  As ‘n vrou soos ‘n ryp perske op sy skoot val, moet hy opsluit sy broek uittrek en mildelik gebruik wat hom aangebied word.  Selfs as hy ‘n trouring het. 

Sou hy uitgevang word, word die ring triomfanklik onder haar neus gedruk.  Hy, sy volgelinge en selfs sy vrou basuim uit:  Jy het geweet hy is ‘n getroude man.  Hoe kon jy hom verlei?

Sy is die flerrie en hy die slagoffer wat onbeskaamd uitgebuit is.  As daar nou al ooit ‘n lam was wat met ‘n glimlag ter slagting gelei is.  Hy het elke oomblik saam met haar geniet, alles uit gehaal wat hy kon en nou kruip hy weg sodat sy alleen die spervuur moet aandurf.  Wat het tog van manlike durf geword?

Is hy nie die een wat ‘n ring op sy vinger dra en self sy huwelik heilig moet hou nie?  Het hy nie ‘n gelofde afgelê om getrou aan sy vrou bo alle ander te wees nie?  Watter gelofde het die Jesebels en Delilahs afgelê?  Nie een sover ek weet nie.

Is selfbeheer iets wat ‘n man nie kan uitoefen nie?

Breinvasbrand:  Met wie is Tiger Woods getroud?

Breinlosbrand:  Fokker was reg met koms of aankoms.

Nuusbrokkies

Polisie versterkings moes ingeroep word by ‘n DA saamtrek in Soshanguve.  ANC ondersteuners het onder meer Zille met drankbottels gegooi en blou DA hempde aan die brand gesteek.  Die ANC sê dat hulle ondersteuners nie dronk was nie. 

Patricia Lewis en Sonja Heroldt het aangedui dat hulle vir Robbie Klay sal getuig in ‘n siviele eis teen Els.  Lewis sê sy weet wat sy weet en Heroldt sê sy het haar seun nooit alleen saam met Els gelaat nie.  Interessant, veral omdat Els beweer hy het ook al ‘n kamer met Simeon Hamman gedeel.  Ek wonder hoekom het hulle nie getuig in die strafregtelike saak nie?  Of beter nog, hoekom het hulle nie opgetree toe Klay ‘n snotneus was nie.  Was daar niks of is dit nou te min, te laat?

Gawie Hough is met sy eie vuurwapen in Roossenekaal Donderdagaand tereg gestel.  Deon, sy broer, reken dit kan dalk die wraak aanval wees van ‘n Zimbabwiese werker wat weens diefstal afgedank is.  Sedert die aanval is sy broer, wat nog op die plaas was, ook weg.  Twee maande gelede het die afgedankte werker hulle gebel en gesê:  ‘Ek gaan jou wys wat ek met ’n wit man kan maak.’  Hy het R600 gesoek wat die broers wel aan hom gegee het. 

En om die vervelige nuus mee af te sluit:  Motoriste sal oor die Feestyd hulle asems by Engen met weggooibare alkohol-asemtoetsers toets.  Dit is nog onseker wat dit gaan kos of wanneer dit beskikbaar sal wees.