Bles weens bediendes

Ek is in die bevoorregte posisie waar ek eintlik net kan lag vir die streke van bediendes.  Ek het nie een met wie ek ‘n kontrak moes gesluit het en elke maand moet betaal nie.  Die ergste waarmee ek te doen het is die optredes van die op kantoor.  En glo my, hulle kan nogal eksentriek wees. 

Daar is spesifiek twee goed wat ek nie kan klein kry omtrent hulle nie.  Die eerste een is hoe hulle teen glase diskrimineer.  Hulle sal al die vuil skottelgoed uitdra: bekers, bordjies, teelepels, enigeiets.  Behalwe die glas.  Selfs al staan daar 10 glase en niks anders nie, sal hulle die glas los.  Die tweede irritasie is dat hulle nie die leë houers weer kan vol maak nie.  Hulle sal dit selfs was, maar daar is nie ‘n manier dat hulle dit weer sal hervul nie.

Soos ek dit verstaan is dit niks teen wat mense ervaar wat ‘n bediende by die huis het nie.  Selfs is sy ‘n staatmaker, is daar sekere gewoontes wat haar werknemers teen die mure uitdryf.  Dit is dikwels ‘n vraag of die irritasies die hulp werd is.  Daar is seker niks ergers as wanneer die irritasies nie die ergenis werd is nie en dat jy niks kan doen om daarvan ontslae te raak nie.

Vandag het ons dus ‘n kla blog.  Wat doen jou bediende wat jou teen die mure uitdryf?  Wat maak jy as sy nie na ‘n redelike opdrag wil luister of uitvoer nie?  Wat van ‘n bediende staaltjie of 2?  Miskien kan iemand ons vertel wat van hulle bediende waardeer hulle?  Vandag is die dag wat jy alles oor jou bediende kan sê wat jy nog altyd wou.

Windhoek Lager

Al drink ek nie bier nie, wil ek graag vandag vir Windhoek Lager ‘n pluimpie gee. 

Hulle nuwe advertensie is kookwater. 

Die man trek van die pad af vir ‘n pap wiel.  Hy gee die wiel eers ‘n baie vuil kyk en haal dan sy selfoon uit om te bel.  Dit is wanneer die “Baas” opdaag en vra of hy sy ma bel?  Die outjie kyk hom half verstom aan, dan pluk die baas die selfoon uit sy hande en gee hom ‘n wielspanner.  Windhoek Lager mans ruil hulle eie wiele om en bel nie padbystand nie.

Dit is beslis ‘n advertensie om voor televisie te kyk.  Wat is op die oomblik jou gunsteling advertensie?

Breinvasbrand:  Wat beteken die woord Lager?

Breinlosbrand:  Olga was reg met North Atlantic Treaty Organization

Teddiebeer Projek

Ek dink enige redelike mens verstaan die redelose woede wanneer jy van ‘n kind lees wat verwaarloos, verkrag of mishandel is.  Persoonlik kry ek dan altyd moordgedagtes.

Die grap is:  al vermoor (doodmartel) jy die wreedaard, doen dit net mooi NIKS om die slagoffer se omstandighede te verander nie.  Ongelukkig het te min van ons die opleiding en/of persoonlikheid om die slagoffers daadwerklik te help.  Betoog en petisies wys hoe ons voel, maar weereens is die slagoffer nie regtig gehelp nie.

Juis daarom dat ek die Teddiebeer projek geloots het.  Ek het juis gister die eerste teddiebere vir die projek gekry.  Dankie, Maxie.

Teddiebere bring darem vertroosting tot die slagoffers.  Teddiebere is altyd daar om te luister en gee nie om as hulle dalk die slagoffers van frustrasies word nie.  Hulle droog trane af en is altyd daar.

Dit is in jou mag om daardie vertroosting te gee.  As deel van ons Sussies met Blasies projek samel ons die teddiebere in om vir ‘n plek te skenk wat trauma berading doen.  Die nie-amptelike inskrywing vir die Rissies-teen-Sissies span is ‘n teddiebeer.  Dit hoef nie ‘n groot teddie of ‘n duur teddie te wees nie.  Enige sagte speelding sal doen.  Jy is natuurlik welkom om meer as een teddie te gee.

As jy nie aan Sussies wil / kan deelneem nie, kan jy nog steeds ‘n teddiebeer skenk.  Epos my gerus (amaal3@gmail.com) as jy graag wil deelneem.

Nuusbrokkies

En so begin die sestien dae van aktivisme vandag.

In die Oosrand is ‘n 5 jarige meisie vasgemaak aan ‘n tafelpoot in haar ma, ‘n prostituut, se huis gevind.  Sy was besig om aan ‘n vleisbeen te kou en was baie aggressief teenoor haar redders.  Sy het onder andere ook uit bak gedrink en moontlik haar eie ontlasting geëet.  Sy was seksueel misbruik en die moontlikheid dat haar ma haar uitgehuur het is nie uitgesluit nie.  Sy word Klein L genoem.

Jurie Els se saak gaan voort.  Die staat het erken dat die aanklag van onsedelike aanranding toe Klay jonger as 12 was nie bewys kon word nie.  Die regter het gesê hy het nie nodig om op die stadium redes vir sy besluit te gee nie.

Die Suid-Afrikaanse Instituut vir Rasseverhoudinge het gevind dat die aantal blankes in plakkerskampe verdriedubbel het.  Dit is glo nie net as gevolg van ekonomiese redes nie, maar ook luiheid. 

Die res is maar ook net politieke bollie.