Die suksesvolles

Hulle sê ‘n suksesvolle man is iemand wat meer geld kan maak was wat enige vrou kan uitgee.  ‘n Suksesvolle vrou is iemand wat ‘n suksesvolle man gekry het.

Iemand het eendag gesê dat dit nie saak maak of jy R800, R8000 of R80 000 ‘n maand verdien nie.  Jou geld gaan so lank hou as wat die maand lank is.  Ek dink die punt is dat mense geld sal uitgee vir solank hulle dit het.  Hoe meer hulle het om mee te begin, hoe duurder gaan hulle gemors wees wat hulle koop.  En ironies, hoe groter die skuld wat hulle aangaan. 

As ‘n mens hulle dus suiwer aan hulle skuld neem, is die sogenaamde ryk mense waarskynlik slegter af as die arm mense.  Kan ‘n bate wat op skuld gekoop is, steeds as ‘n bate tel.  As ek aan my rekeningkunde terugdink, onthou ek van Bates wat gelyk is aan Eienaarsbelang en Laste.  As die Eienaarsbelang 0 is, is Bates gelyk aan laste.  Dit is dus niks werd nie.

Daarom salueer ek vandag almal wat binne hulle inkomste lewe.  Ek haal my hoed af vir almal wat nie ‘n sent skuld het nie.  Ek bedoel nie ‘n huis of karpaaiement nie.  Die staande applous gaan aan diegene wat nog geld aan die wat dit nodig het kan uitdeel en self nog iets vir hulle oudag kan bêre.  Iemand wat finansieël gevestig is, is iemand wat al die voorafgenoemde kan doen en ‘n noodfonds van 3 maande se salaris kan wys. 

Bestaan daar sulke mense?  Hulle kry die Herriemerrie toekenning vir Bewonderingswaardig.

Breinvasbrand:  In die Merchant of Venice, waarmee sal Antonio Shylock betaal as hy nie op die spesifieke dag die terugbetaling kan maak nie?

Breinlosbrand:  Spektrofobie

Koerant Brokkies

Op ‘n hartseer noot, 3 sussies is wees gelaat nadat die Meintjies gesin op ‘n ongeluk op die N1 betrokke was.  ‘n Motor het teen ‘n stink spoed ‘n ry karre verby probeer steek toe daar skielik van voor ‘n motor gekom het.  In die haas om terug in sy baan te kom, het hy teen die Meintjiese gebots.  Die Avanza waarin die gesin was het omgetol en die gesin uit die motor geslinger.  Die pa, Ringo, en ma, Renchia, is dood en twee van die kinders, Calista (10) en Cresentia (22 maande) is ernstig beseer.  Hulle weet nog nie dat hulle ouers dood is nie.  Chirene (9) vertel dat sy wakker geword het toe die “kar gespin en geval het”.

Na ‘n hofgeding is daar besluit dat ‘n Londonse baba se ventilator afgesit kan word.  Die seun is met spierswakte gebore  (Okt 2008) en was sedert geboorte aan ‘n ventilator.  Sy pa het die besluit van die dokters en die kind se ma beveg.  Die regter het toe besluit dat dit die beste is dat die kind eerder sterf. 

Die Maroga saga duur voort.  Sy bedanking is nog steeds geldig, soos hy gister agter gekom het toe hy vir werk opdaag.  Die direksie het gekeer dat hy die perseel mag betree. 

Nog ‘n vrou is blykbaar deur die polisie verkrag.  Die vrou van Rustenburg wat ‘n seun van 18 maande was gearresteer omdat sy glo van haar vorige liefde gesteel het.  Sy het gevra om badkamer toe te gaan, waar sy verkrag is.  Daar is 4 polisiemanne (1 verkragter + 3 wat weggekyk het) gearresteer.  Hulle is nie geskors nie.  Die vrou het ook ‘n siviele klag aanhandig gemaak en word deur dieselfde prokureur as die vrou van die Oosrand verteenwoordig.

En verder is ook maar same old, same old.