Skole is blykbaar ‘n plek waar almal een of ander klap deur die lewe toegedien moet word.  As dit nie groepsdruk is nie, is dit boelies.  Daar is probleme by die huis en onderwysers wat hulle buie op die kinders uithaal.  Die vakke is vervelig of anders is alles te moeilik.  Niemand verstaan die arme bloedjie nie en sy/haar selfvertroue is na die maan.  Les bes is daar nou ook homofobie om seker te maak kinders het al hulle dae van hel by die skool.

In die eerste plek dink ek skole sal al reeds beter af wees as mense wat hulleself soos volwassenes gedra as onderwysers aangestel word.  Ek is ten gunste van reuse salaris vir onderwysers, maar net as hulle aan sekere keuringskriteria kan voldoen.  As jy dan soos ‘n kind wil optree, moet jy maar werk vir sakgeld.  Daar is onderwysers wat boelies in hulle kwaad strek en ammunisie.  Natuurlik lag hulle net so hard vir die arme slagoffer wat grond moet eet.  Nie dat ek vandag op my seepkissie wil skaats oor onderwysers nie. 

Hierdie homofobie op skole het my aan die herkou.  Al pas ek jare lank nie meer in my skoolklere nie, maar ek kan darem nog die meeste van die reëls onthou.  Een van die wat streng afgedwing was, was dat geen liefkosery op die skoolterrein of in skoolklere mag gebeur nie.  As ek nou reg kan onthou, moes daar ten alle tye tenminste 30 cm tussen jou en jou geliefde wees.  Dit kon nogal heel tegnies raak, maar die boodskap was duidelik.  Mangelhokkie hoort nie voor ‘n gehoor nie.  Enige iets meer as dit, hoort in elk geval nie by ‘n skoolkind nie.  Volgens die landswette, is selfs mangelhokkie voor die ouderdom van 16 taboe.

Nie ‘n onredelike reël nie, veral omdat ‘n mens dit in elk geval van ‘n fatsoenlike mens verwag.  So ‘n openbare gesuigery, gelekkery, gevryery en bebytery kan enige mens ‘n onskuldige kat laat skiet.  Ongeag van die geslag, kleur of ouderdom van die deelnemers.  Sou die reëls nagekom word, sou daar nie juis plek vir homofobie wees nie.  Almal sou in hulle optrede by die skool aseksueel wees.

Dit is so effens oorvereenvoudig.  Dinge van buite die skool, het tog ook ‘n invloed.  Die waarheid maak ook maar weinig saak wanneer iemand gebrandmerk word.  Dit is waar geen verdraagsaamheid teenoor boelies moet geld.  Ongeag die slagoffer wit of swart, vet of maer, lelik of mooi, gay of straight, Moslem of Christen is.  Boelies sal altyd ‘n rede kry om te floreer. 

Fobie kom van die Grieks vir vrees af.  Gewoonlik is dit die persoon wat met die vrees sit, wat bejammer word.  Dit is amper ‘n gestremdheid wat die persoon verhoed om volwaardig te lewe.  Iewers het die fokus geskuif.  Fobie het ‘n verskoning geword om die lyers se probleem iemand anders s’n te maak.  Dink aan Xenofobie (die vreemdelinge het nie ‘n probleem met die vreemdes in die vreemde land nie) en natuurlik homofobie.  Bo alles is dit die vrees van erkenning – sou die lyer die erken, weet hy/sy immers waar die probleem lê.  Waar dit nie weg geboelie kan word nie?

Wat dink julle oor homophobia, veral op skoolvlak?  Wat  van openbare liefkosing?

Breinvasbrand:  Wat is Caligynephobia?

Breinlosbrand:  Olga was reg met sy beatiful wife.

John Moche (41), wat hoof was van die Steve Biko-hospitaal se dermatologie-eenheid, is Vrydagaand deur kapers doodgeskiet.  Hy was half 9 die aand voor ‘n woonstel gebou in Viljoenstraat toe hy oorval is.  Hy en ‘n verpleegster was voor die gebou besig om te gesels toe die deure oopgeruk en hulle uitgepluk is.  Moche se Range Rover wat hy 2 maande terug gekoop is, is later in Atteridgeville gekry. 

Arthur Chaskalson het die regering daarop gewys dat dit die howe se taak is om te sorg dat die grondwet altyd die oppergesag bly.  Blykbaar het hy by UCT mooi beskaaf die ANC vertel dat howe hulle werk onbevrees moet kan doen.  As kritici wat die Grondwet die skuld gee vir ’n te stadige transformering van die regbank ’n regsorde wil hê soos dié in die apartheidsera – waarin menseregte nie gewaarborg word nie en waar die parlement die oppergesag is en nie die Grondwet nie – “moet hulle so sê sodat ’n verstandige, openbare debat oor sulke sake kan plaasvind”.

Die seerowers in die Mosambiekse kanaal skrik vir ons weermag.  Vandat die SANW verlede jaar daar begin patroleer het, was daar nie een geval van seerowery nie.  Hulle het 4  fregatte wat met 180 bemanningslede 28 dae op see bly.  Die fregatte wissel ook mekaar af.  Al sien hulle nie seerowers nie, is daar baie werk wat gedoen moet word.  Daar is ook aktiwiteite om te verseker dat die verlange huistoe nie te veel raak nie. 

Solidariteit het Vrydag aan 5 polisielede Sterre in die Gemeenskap-toekennings gegee.  Hulle was Peet du Toit van Krugersdorp wat gehelp het om Jaco Steyn aan te keer; Johan Fourie van die Oosrand wat verlede jaar ‘n babaseun van bye gered het; Jan Pretorius van Balfour wat ‘n 6 jarige seun uit ‘n dam gered het; Jaco Botha en Gerhard Weyers van Hercules wat gewapende rowers op heterdaad betrap het en Peter Smit van Vanderbijlpark wat eers ‘n betoging ontlont het en dit toe self verder gelei het. 

Rubellos van Duitsland het gister die 16de Sun City-miljoendollar-duifwedvlug gewen na ‘n vlug van 9 ure vanaf Petrusville.  3 500 duiwe van 37 lande het deelgeneem aan die vlug van ongeveer 578 km.  Queen of Hearts was die eerste Suid-Afrikaanse duif en het glo 5de geëindig.  Daarmee het sy R280 000 gewen.  Rubellos spog met ‘n wentjek van R1.6 miljoen.  Die eerste 100 duiwe is gister opgeveil en Rubello het R250 000 gehaal.  Quean of Hearts is vir R12000 verkoop.  Ironies genoeg was die duif wat tweede gekom het die topverkoper teen R360 000.  Selfoon maatskappye moet maar wyd kyk.

Loof die Here wat Sondagoggende op RSG uitgesaai word, word Maandag 40 jaar oud.  Om dit nog meer merkwaardig te maak, word dit van die begin af net 1 aanbieder gehad.  Selfs internasionaal kan nog nie so ‘n prestasie opgehaal word nie.  Fanie Smit (76) het dit op 6 Februarie 1972 die eerste keer aangebied as Alle volke loof die Heer.  Smit reken hy sal daarmee volhou terwyl sy stem hou.  Die enigste program wat langer aaneen in Afrikaans uitgesaai is, is U eie keuse wat 75 jaar oud is

Jenny, die Pretoria Dieretuin se 55 jarige sjimpansee, is Vrydagoggend aan haar hart dood.  In die maand voor haar dood het sy behandeling vir haar hart gekry.  Jenny het in 1975 van Duitsland hierheen gekom.  Sy sou vir die personeel soms stukkies gras en materiaal gee as geskenkies.  Jenny het soms die sjimpansees se bakke vir die personeel bymekaar gesit en soms sommer hand bygesit om dit te was.  Haar 35 jarige maat, Jasper, word nou mooi opgepas.  Hulle sal binnekort vir hom ‘n ander maat soek

Klein Merrie Phoenix is gister aand gebore.  Sy is 50 cm lank en weeg 3.1 kg.  Alles is 100 % met haar en Mamma Selene.

Ek het ook so ‘n bietjie met die Gausous gary!!    Ek is ‘n heksie wat weet van Gausous. 

Eerste moet ‘n heksie ‘n grootboekkaart koop om op die Gausous te ry.    Jy voer die masjien geld en dan spoeg dit vir jou ‘n kaart uit.    Heksies kan nie daarmee roomys koop nie, jy kan net op die Gausous ry.    Simpel kaart!!

Wanneer die Gausous kom moet jy vinnig inspring.  Vra maar vir Merriegriet, die gausous het vir weggeroei toe sy nie vinnig genoeg was nie.    Binne moet jy net mooi op jou stoel sit.    Ekke het gedink ek gaan afval as dit so vinnig roei, omdat daar nie veiligheidstoutjies is nie.    Gelukkig het ek nie, anders sou ek my prokstituut op hulle moes sit.

Ek het gedink die Gausous gaan soos ‘n vliegmasjien wees.    Dat dit nie gaan stop langs die pad om te gaan piepie nie.    Maar die Gausous stop baie langs die pad.    Dan klim daar maatjies op en af.

Maar ek wil nie snaakswees nie, maar die Gausous lyk net soos ‘n trein!    Die mense dink seker dat alle heksies dom is, maar ek is ‘n slim heks.

Tata maatjies

Daar is mense wat sê dat net tevrede ‘n te voor aan kan hê.  Duidelik het iemand nie die saak behoorlik deurdink nie. 

Ken julle die gevoel van punt in die wind?  Daardie punt wat dit doodeenvoudig nat nie kan beter nie, selfs al sou jy die Powerball van oor ‘n R100 miljoen net daar wen?  Enige iemand met ‘n tikseltjie lewenservaring weet dat dit die punt is wat die rooi vlaggies gehys word.  En dit het niks te maak met ‘n wiel wat draai nie.  Wanneer jy “on top of the world” is, val jy soos ‘n rots na onder. 

Dit is soos wanneer jy jouself op die skouer klop vir werk wat goed gedoen is, dan verander die blerrie reëls of verwagtinge.  Jy dink dalk jy het jou kinders goed groot gemaak en die volgende dag word een gearresteer vir verkragting.  Jy dink jy gaan nou ‘n neseier bou wat beny kan word, dan vreet onvoorsiene uitgawes jou laaste sent op.  Daardie kontrak wat jy tot perfeksie afgerond het, word aan iemand anders toegeken. 

Blykbaar is die mens maar gemaak om te sukkel.  Anders is daar seker ‘n fyn lyn tussen tevrede en selfvoldaan.  Die olimpiese leuse is seker ‘n wysheid.  As jy meer en beter gaan soek, gaan jy nooit tevrede wees nie.  Jy gaan altyd klim en nooit ‘n bopunt kan kry waar jy af kan neuk nie. 

Of praat ek nou snert?  Ken julle daardie gevoel wat so vinnig in ‘n gemors verander?

Breinvasbrand:  In Alanis Morrisette se liedjie, Ironic, wat is ironies aan “meeting the man of your dreams’?

Breinlosbrand:  Gerda was eerste reg met Donovan Moodley

Heyneke Meyer is glo die nuwe Bok-afrigter, maar blykbaar weier die Bulle om hom te laat gaan.  Niemand is al amptelik aangestel nie, maar die Bulle het ‘n verklaring uitgereik wat sê hulle keur nie Saru se versoek goed om Meyer beskikbaar te stel nie.  Dit blyk ook dat Meyer hom nie gaan laat boelie nie.

Daar is ‘n groot bohaai oor ‘n geldinsamelings konsert wat vir Christa Steyn se mediese behandeling gehou is.  Steyn het kanker.  37 kunstenaars het gratis op getree by die gratis lokaal wat Hoër Meisieskool Bloemhof beskikbaar gestel het.  Maniac Music wat die konsert georganiseer het, het twee derdes van die wins self gehou en net ‘n derde aan Steyn oor betaal. 

Diewe het glo ‘n groter aptyt vir Hilux en Fortuner-modelle.  Juis omdat dit so gesog is, het Gautrein stasies spesiale parkering vir die karre. 

Mishke Roux (6) het 3 van haar tone op ‘n roltrap in aManzimtoti verloor.  Iemand het glo die noodknoppie van die roltrap gedruk.  Mishke was agter haar ma toe haar linkervoet het tussen die kant van ’n trap van die roltrap en die glas vasgesit.  Sy het ook haar linker sy beseer.  Swastika Juggernath, woordvoerder van die winkelsentrum, kruip agter die waarskuwing dat geen kaalvoete op die roltrap mag wees nie weg. 

Mediese fondse word glo deur rykes gemelk.  Dit is glo omdat hulle by terapeute boer en eis vir goed wat nie regtig medies van aard is nie.  Discovery-syfers toon pasiënte van die noordelike voorstede van Johannesburg het spraakterapeute en ou­dioloë gemiddeld meer as 17 keer per jaar gesien, teenoor die res van die lede se minder as vyf besoeke.  Dit gebeur blykbaar op versoek van skole.  Die voordeel was voorheen onbeperk, maar Discovery het nou ‘n limiet opgesit. 

Sisanda Ndaza (13) is na 13 jaar met haar ouers verenig.  Sy is glo toe sy 6 maande oud was deur ‘n familielid ontvoer.  Hulle het na die voorval in 1998 dit by die polisie aangemeld, maar die saak is nooit geondersoek nie.  Hulle het aanvaar sy is vir moetie vermoor, maar toe loop hulle verlede jaar die ontvoerders raak.  Die vrou is deur die gemeenskap aangekeer en vir die polisie gegee.  Sy het erken sy het die kind ‘n paar maande later in die veld gelos.  Sy is later in pleegsorg gesit.  DNS toetse het bepaal dat sy wel aan die Ndaza’s behoort en die hof het beveel dat sy terug geplaas moet word. 

Lebogang Mokhatsane (10) het in ‘n vuil, onbewaakte swembad verdrink.  Twee kinders van ongeveer 4 jaar oud het by die rolbalklub kom hulp soek.  ‘n Tuinier moes tolk en toe het hulle gehoor ‘n kind het gegly en in die swembad geval.  By die swembad, het hulle borrels op die oppervlakte gesien.  Nie een van die polisielede wat opdaag kon swem nie en die brandweer moes ontbied word.  Die seun se lyk is later uitgehaal.

Ek hoor vanoggend op die radio dat Leigh Matthews se pa ‘n beroep op die regering doen dat slagoffers se regte ook in ag geneem moet word.  Die media het hom die stem gegee waaroor baie mense al baie lank brom.  Die persepsie dat die oortreder se regte nie net swaarder weeg as die man op straat nie, maar dat die oortreder se regte bo die van die slagoffer is. 

Die blote reg dat daar ‘n slagoffer was, wys dat iemand se regte sonder rede van hulle ontneem is.  Daar word ‘n saak gemaak en die skuldige word dalk vasgetrek.  Op die punt word daar basies vergeet dat daar ‘n slagoffer is.  Die oortreder neem nou die vloer, met aansienlik meer regte as waarop die slagoffer op staat kan maak.  Die staat moet namens die slagoffer bewys dat hy skuldig is.  In die proses word daar in elk geval meer van die slagoffer se regte ontneem, terwyl daar baie seker gemaak word die oortreder se regte is onaantasbaar.   

‘n Goeie voorbeeld is dalk verkragtingsake.  Een of ander stadium word die slagoffer op die getuiebank geplaas.  Sy word nie net gedwing om die hele storie hardop te vertel nie.  Haar karakter word ook aan flarde geruk.  Alles word in die stryd gewerp om haar te breek, om te wys dat sy nie ‘n geloofwaardige getuie is nie.  Ongeag daar gronde vir die aantygings is of nie.  Sou enige iets anders ‘n soortgelyke aanval loots, sal sy waarskynlik ‘n siviele eis kan instel.  Dit is nie ‘n luukse wat sy in die hof het nie.  Sy kan ‘n goedkoop slet genoem word, maar die oortreder het haar net na bewering verkrag.  Sy is skuldig sonder ‘n verhoor, hy moet skuldig bewys word. 

Mens moet onthou dat daar goeie redes is hoekom beskuldiges regte moet hê.  Aan die ander kant moet die regte ’n sekere gewig dra.  Om een of ander rede word die oortreder se regte swaarder geweeg.  Hy kan nog te na gekom word, ongeag van die feit dat hy reeds iemand (na bewering) te na gekom het.  Iemand wie se regte ontneem is, kan dit nie terug kry nie, al kan die oortreder wel gestraf word of gedwing word tot vergoeding.  Dit beteken vir die slagoffer niks.  Nee, ek jok, dit beteken vir die slagoffer dat hy/sy nie saak maak nie. 

Oortreders se regte word dus beskerm ten koste van die slagoffers s’n.  In geen wêreld kan dit regverdig wees nie.  Die vraag is hoe word die skaal gedraai?  Hoe word die slagoffer beskerm en vergoed? 

Breinvasbrand:  Wie is gevonnis op die die moord van Leigh Matthews?

Breinlosbrand:  Selene was reg met   Paper Lace

Alice Jogessar (69) is dood nadat ‘n trok haar getref het.  ‘n 8t vragmotor het gistermiddag op die N3 verloor en het deur die Liberty Midlands Mall in Pietermaritzburg geploeg.  Die trok het in ABSA tot stilstand gekom, maar het 5 motors in die pad getref.  Die trok het glo heen en weer oor die N3 beweeg, voertuie verbygesteek en op die geel streep gery voordat dit die pad verlaat het.  Die bestuurder en sy mededrywer is beseer.  Daar gaan ‘n saak van strafbare manslag en roekelose of nalatige bestuur ondersoek word. 

Twee laerskool kinders is deur die Makgawerivier saamgesleep toe hulle gisteroggend die rivier naby Sun City oorgesteek het.  Die rivier is in vloed.  Die soektog deur polisieduikers moes ook afgelas word omdat die rivier te sterk was.  In ‘n ander voorval moes 13 kinders van ‘n taxi gered word, toe hulle ook deur water meegesleur is in Rustenburg.  In dieselfde omgewing het ‘n pa sy kinders uit die motor gered toe dit ook meegesleur is.  Krokodille in die Blyde rivier vergemoeilik polisie duikers se werk. 

Johan Geyer is gister in die rug geskiet terwyl hy kos gemaak het in sy huis in Brooklyn Pretoria.  ‘n Buurman, Jaco La Cock, het gehoor toe Geyer se vrou en seun skree.  Hy het oorgery en die rowers gesien.  Omdat hy nie sy selfoon by hom gehad het nie, het hy by die huis ingehardloop en dit gaan haal.  Toe hy weer uitkom, het hy gesien die rotte het ‘n geweer.  Hulle het met sy Pajero gevlug.  Hy het Tracker in kennis gestel wat die voertuig gevolg het.  Die polisie het die rotte in Atterbury gekry en hulle het die Pajero by Hoërskool Menlopark gelos.  Hulle het daarna ‘n Mercedez probeer kaap en die eienaar is in die arm geskiet.  Hulle het toe weggekom. 

­André Gouws se prokureur, Anel Jacobs, voer aan dat die polisie se saak in die Chanélle Henning gegrond is op leuens van twee dwelmverslaafdes.  Sy voer ondermeer aan dat Gouws as hy ‘n moord beplan het, nie sy foon op luidspreker in ‘n openbare plek sou sit nie.  Die hof het ook gister beslis dat Benjamin Henning se foto nie meer in koerante gepubliseer mag word nie.   

Die staat skuld mediese verskaffers meer as R2 miljard.  Hulle beplan om glo R802 miljoen die maand te betaal, maar dit is ongeveer net 40% van hulle skuld.  R108 miljoen gaan aan die lede van SAMED betaal word.  Volengs Tanya Vogt, bedryfshoof van Samed, skuld die departament van gesondheid aan hulle lede R346 miljoen.  Van hulle lede is al betaal, maar die meeste het nog nie ‘n sent gesien nie. 

Die tropiese sikloon, Funso, gaan vakansieoorde aan die kus van Mosambiek se Inhambane-provinsie tref.  Die sikloon is ‘n kategorie 4 en bereik glo snelhede van tussen 211 km/h en 249 km/h.  Dit blyk nie enige gevaar vir Suid-Afrika in te hou nie. 

Dit gaan omtrent R1 miljoen kos om ‘n kind wat nou in gr 1 in ‘n privaat skool is, deur skool en universiteit te kry.  As die kind in staatskole is, gaan dit ongeveer R133 536 vir laerskool en R192 860 vir hoërskool kos.  Privaat gaan dit R267 072 vir laerskool en R540 008 vir hoërskool kos.  Wanneer dié kind universiteit toe gaan, sal hy sowat R335 130 vir klasgeld, R157 708 vir verblyf en R44 356 vir boeke nodig hê. Dit is in totaal sowat R537 194.  As dit nou die geboortebeperking is nie. 

Die plaaslike bande bedryf sleep die regering hof toe omdat hulle nie oor Redisa genader is nie.  Redisa is ‘n band herwinningsplek wat gefinansier gaan word uit ‘n moontlike R2-36 / kg  bandheffing.  Die bedryf beplan blykbaar al 12 jaar lank aan ‘n soortgelyke South African Tyre Recycling Process Company (SATRP) op aandrang van die regering.  Dit het hulle vanjaar al R8 miljoen gekos aan met die goedkeuring van die Mededingingskommissie en die nasionale tesourie.  In Mei was die minister nog tevrede en dit is sonder rede in November afgekeur.

Een ding wat ek al lankal geleer het, is dat mense hulle self Google.  Mense Google hulle geliefdes.  Wat ek dalk dink ‘n geregverdige galbraak sessie is, is dalk net die strooi wat nodig is om ‘n kameel se rug te laat knak.  Lang storie wat basies beteken dat ek persoonlike aanvalle op iemand se menswees of karakter beperk.  Gewoonlik.  Hangaf wie dit is en wat hulle gemaak het.  Ja, ek weet ek het dubbel standaarde.

Mens kan egter dink wat jy wil, al mag jy nie sê wat jy wil nie.  Die een berig wat gister in die nuus was, hou my aan die dink.  Dit is hoe ‘n jong man onder ‘n bed gaan skuil terwyl ou mense aangerand word.  Ek wil-wil hom iets noem, maar probeer ook regverdig wees.  Kanse is dat hy waarskynlik vandag ook ‘n kandidaat vir ‘n begrafnis sou wees as hy wel gaan help het.  ‘n Dapper toekomstige wat dood is, beteken nie veel nie.  Mag waar wees, maar daardie woordjie wil maar net nie rede in sien nie.  Ek wonder ook of sy verloofde altyd in die hitte van die oomblik sy wysheid gaan insien.

Ek hou oor die algemeen nie van macho-crap nie.  As ‘n man altyd wil wys hoe manlik hy is, wys hy eintlik hoe pateties die is.  Dit is dalk oulik in ‘n seuntjie van 5, maar wanneer jy Oros vir drank verruil is dit bekotsingswaardig.  Aan die ander kant hou vrouens tog ook van manlike (wel opgevoede mans).  Wie wil nou met iemand trou wat wanneer daar vreemde geluide is, gaan wegkruip.   Of wanneer die deure oopstaan agter jou gaan wegkruip wanneer daar in die huis gegaan word.  Soos ma’s altyd die versorgers van die gesin gaan bly, gaan pa’s seker die beskermers bly.

Deesdae is mense, met goeie rede, bang om hulle neuse in ander se sake te steek.  Wanneer iemand op straat beroof word, maak mense pad vir die rower om weg te kom.  As bure geskiet word, word daar iemand ontbied, maar daar gaan nie sommer gaan help word nie.  Heldwees kan maklik vandag doodwees.  Dit is presies die rede hoekom misdaad vandag hooggety vier.  Jou opinie van die saak gaan verskil as die die vrou is wat aangeval word en die buurvrou.  Die aangevalde gaan die held buurman ewig dankbaar wees, die buurvrou gaan hom waarskynlik sitkamer toe stuur.  Seker nie almal nie, persoonlik weet ek nie of ek veel respek vir iemand sal hê wat sy rug op iemand in lewensgevaar draai nie.

Maar soos reeds gesê:  ek het dubbel standaarde.  Ek het toevallig gister op TV iets gekyk van ‘n man wat volgens sy gewete opgetree het.  Dit het ongelukkig van hom ‘n verraaier gemaak en almal was opsoek na sy bloed.  Dit het onder meer gelei daartoe dat sy gesin geintimideer, geboelie en sommer na die weermag se frustrasie moes verduur.  Hy was ‘n held, maar danksy dit was sy gesin nou slagoffers.  Sy vrou loop hom wel later raak en is baie bly om te sien hy lewe.  Hy kry dus ‘n warm reaksie.  Ek moet egter sê dat as dit my man was, het ek my skuldig gemaak aan huishoudelike geweld.  Die Engelse spousal abuse werk eintlik net beter hier.

Hoe voel julle hieroor?  Wanneer kan ‘n man (of vrou) ‘n held wees en wanneer is dit beter om weg te kyk?

Breinvasbrand:  Wie het ‘n treffer gehad met Billy don’t be a Hero?

Breinlosbrand:  Olga was reg met munchausen by proxy.

Sedert 1952 is dit tradisie dat die huidige Meesterskampioen die kampioene dinee se spyskaart kies.  Van jaar is dit Charl Schwartzel en hy wil boerewors maak en self braai.  Hy reken nogal sy hand gaan seer wees na die gebraaiery en spog dat fillet eintlik sy spesialiteit is.  Trevor Immelman het na sy sege in 2008, bobotie, sosaties en melktert voorgesit.

Josie Raath, omroeper van Radiokansel en regisseur het die naweek selfmoord gepleeg.  Hy het glo ‘n selfmoordpakt met Christa Petersen Johnson, dogter van Roelf Petersen, uitvoerende hoof van die stasie, gehad, maar sy het kop uitgetrek en weier om dit te bespreek.  Raath reken die stasie het Jesus vir hom dood gemaak.  Sy laaste sms was:  “Sorrie vir almal. Ek’s klaar met die lewe, moet nie verder bel asb,” wat hy vir geliefdes gestuur het.  Hy het vermoedelik ‘n oordosis pille geneem en sy lyk is Sondagoggend gekry. 

André du Toit (52) is so erg deur die son verbrand dat hy in die hospitaal opgeneem moes word.  Du Toit het gaan visvang en het glo ‘n tent-afdak onder ’n boom teenaan die water opgeslaan en hy het heeltyd ’n breërandhoed gedra.  Dit het nie juis veel gedoen om die weerkaatsing van die water te stuit nie.  Hy het selfs sy tong en keel verbrand.  Hy is ‘n paar dae later in ‘n hospitaal opgeneem omdat hy swart kolle en blase op sy vel ontwikkel het.  Hy het blykbaar 3de graadse brandwonde en word daagliks in ’n ysbad geskraap om infeksie te keer.

Christiaan Lamprecht (22) word nog steeds aangehou en sal vir evaluasie gestuur word.  Hy is onlangs betrap met hondjies wat hy afgeslag en gevries het.  Blykbaar nie die eerste keer wat hy so iets doen nie.  ‘n Distrikgeneesheer het bepaal dat hy wel verstaan wat die aanklagte teen hom is, maar dat hy vir psigiatriese behandeling behoort te gaan. 

Chris Claassen (58), eertydse wenner van die program Flinkdink, het verlede Sondag spoorloos in die Hartebeespoort omgewing verdwyn.  Claassen is ‘n sistiese fibrose lyer en het 13 jaar gelede weens kommer oor misdaad na Australië geëmigreer.  Hy was glo nie te gelukkig daar nie.  Sy laaste woorde voor sy verdwyning was:  “Ek is steeds hartstogtelik ’n Boer.” ’n Spesiale taakspan bestaande uit lede van die polisiedienste, die Bergklimklub van Suid-Afrika, honde-hanteerders van Rustenburg en Potchefstroom, plaaslike buurtwagte en helikopters kon hom sedert verlede week nog nie opspoor nie. 

Zuma dink alweer hy is almagtig.  Hy het die afgelope paar maande 3 keer die weermag ontplooi sonder om die Nasionale Vergadering (NV) daarvan in kennis te stel.  Die weermag was glo ontplooi om die polisie met COP 17 en die feestyd bygestaan.  Verder het Zuma hulle vir 2 weke DRK toe gestuur.  Volgens David Maynier, DA-LP:  “Dié reël is om ’n goeie rede daar, dit is daar om uitvoerende oorloë te voorkom, waar die SANW met slegs die goedkeuring van ’n klein handjievol van die uitvoerende gesag van die land ontplooi word. ’n Mens wil nie wakker word en skielik hoor die weermag staan voor die hekke van Luanda en niemand het daarvan geweet nie.”  Pierre de Vos reken dat dit ‘n situasie kan skep waar gewone burgers deur soldate geskiet word. 

 Anita Jacobs van Niekerk (62) se keel is met ‘n skeermeslem oop gekerf.  Sy is die koster van die Afrikaanse Protestantse kerk en is Saterdagaand in haar huis deur 5 rotte aangeval.  Haar 4 jarige kleinseun was by haar.  Hulle het haar handsak met R300 gesteel en hulle is in hegtenis geneem toe die handsak by hulle gekry is.  Van Niekerk is in ‘n bedenklike toestand in die hospitaal, haar stembande moet weer geheg word en sy sal moontlik nie weer normaal kan sluk nie.

Ten slotte:  Petrol kan volgende maand met tot 34 c toeneem.  Een van die dae ry karre op polse kou.