Koud, Lou, Warm

Baie mense glo mos dat hulle ‘n juiste prentjie van iemand kan vorm van net kommunikeer (blog, twitter, ens) met iemand.  Tot ‘n mate is dit seker nie juis te vergesog nie.  Hulle reken mos waarvan die hart vol is, loop die mond oor.  Jou blog is dus in ‘n mate ‘n weerspieling van ‘n gedeelte van jou binneste – maar net ‘n gedeelte.

‘n Kritiek wat dikwels gebruik word in dieselfde asem as bloggers, is hoeveel daar voorgegee word.  Ek ken iemand wat voel dat bloggers hulle almal as heiliges voordoen.  In ‘n mate is dit seker waar dat die beste voetjie altyd voorgesit word.  Langenhoven het iets gepraat van dat ‘n mens jou swakplek ewe sorgvuldig vir jou vyande en vriende wegsteek.  Dit is menslik, maar dit bied baie oppervlakige, fiktiewe karakters.  Ongeloofwaardig en vals.  Elke mens het immers goed en kwaad in hom of haar.

Nou raak ek weer filosofies en dit is juis vakansie.  Tyd om te speel.  “For one day, and one day only” kry jy ‘n kans om jou prentjie van Xena Phoenix te toets.  Jy maak ‘n stelling en ek sal dan sê of jy Koud, Lou of Warm is.  Byvoorbeeld:

• Is jy mal oor ABBA?  Warm
• Ry jy perd?  Koud

As iemand lus het om dit ‘n tag speletjie te maak, gaan voort.  Dit kan dalk vet pret word.